Vyova-a tangaranga, ndingana vyawa 13, udhivela wana miyo na Yohova watoroma didila. Akalaninga afwanga a xikolani tatokaana ufulu miyo ndaona ira ndaira yelela vyongo vinango. Ndatoroma ona ira anamabalanga, basa laurumiwi na makalelo aukristau taira nditiyelela thitho vyanondiva-a basa. Chipo kandinathuulelevo ira Yohova kaliwo mbwenye kandalive vauxamwalini na liye.

Vingalive e-no ndatodhowanave laleela. Mbwenye ndalaleela moyeva voovela ira nda-a didile va basa lolaleela. Ndadhowanga malaleela kandakozeela, E-no vyakalecha vyorucha ira ndirome tapanya naatu mavandhe mwiwa thitho kanda dimbelavo. Namwasa wenuo kandapurawo ilo, vyevyo vyatondiwenjedhela a-dhiveliwangana laleela. Miyo ndanodhifukecha ira ‘vinoodeya a-vi mutu iranga vyevi masumana othene medi yothene?

Ndingana vyawa 17, ndanofunecha a-funanga wandeliwa vyoira. Ndatoromari vyongo vyanga miyo thamela ilambo ya Austrália. Vyevyo vyali vyorucha wa baba na m’ma. Aliwa katavivwa paama, mbwenye tanororomela ira miyo ndingadhowilenave mlabela Yohova.

 Wu Austrália miyo ndatosimbwa didila mwauzimu. Ndadhowa migumanoni modjombela mwene. Miyo ndadhiveliwana asikana afwanga ana zelu ninga dhanga, moi malambo enango ndakala migumanoni mbwenye malambo enango ndakala mamwelo umwa noina wene. Ndaing’ana nduli, ndinoona ira miyo ndali na nyalo limbo-i imbarimbarini nyalo n’nango ilamboni, mbwenye mwethene mwemo kavali wandiriyela.

MBWENYE YAPAMA

Vanduli va vyawa vili, ndatogumanana mombaranya rongola mwinango oi mo-ozindiyela, atondi-ii-a ingumi yanamiyo. Miyo ndakala vanyumbani vakala arongola athanu aadiye, i-yo nanom’mwitanecha namaing’anela isa na-iyanee, Tamara, aliwa dhakalanga na i-yo sumana lipumbula. Hora ya-inda liye basa lapingoni, i-yanee Tamara akalecha na-iyo waredhanga tapanyanga makani othei-a. Vyevyo vali vyapama maningi. Tamara ali mutu o-orucha lemeeleya, otapanyeyana mo-orucha. Ndatozindiela kalelolee lauzimo hora imbo-ve owarendeyana mosangalala.

Tamara ali mutu waimweruweru ogomi-a luso. Udhivela wana liye va basa lolaleela anooda landi-a atu. Liye ali waimwerumweru voira vilivyothene vofuna mlabela Yohova, angali ira miyo kandavivwa paama ndanodhilimbie-dha vofuna ira vyoyeva. Makalelwee apama na imwerumweruyee, vyatochinja ingumi yanga. Ifwanafwani-o yee yatondiiri-a ira ndithuulele imbarimbari yofuneya yoonga ira: Yohova unofuna ira i-yo othene nimlabelenga liye “mosangalala” na “kuwa mosangalala.”—Sal. 100:2.

Miyo ndafuna ndikaena imwerumweru ninga ya Tamara, mbwenye ira vyevyo viodeye ndafwanela chinja vyongo vinjinji vaingumi yanga. Vyatodimbela, Mbwenye mwa vang’ono na vang’ono ndatoroma chinja. Ndatoroma kozeela ndadhowanga malaleela, mwavo na vo ndanolabecha basa laupainiya opedhela. Vyevyo vyatoroma ndikami-a miyo a-kalanga othakaleliwa wiliwili ndatoroma viroromela. Na mwasa o-indi-edha basa Bibilya urumiwini, ndanokala osangalala volaleela. Mo-odimbela ndatoroma basa laupainiya opedhela mwedi wethene.

 Ndatoroma wandhana naatu atunga lililothene. Enao avilimbi-edha ira vili vyothene vomlabela Yohova no mdhiveliwana. Vifwanafwani-o vyaaxamwali enala vitondikami-a ira ndiode ona vyongo vyafwanela miyo-ela valimburo loroma, no kaana ingumi ya dambo na dambo yauzimu. Ndatoroma dhiveliwana laleela, moi e-no ndatosakula kala painiya okaatheya. Fendo yoroma vanduli vomala hora injinji na-alaleelanga mwapama, ndanookala osangalala, thitho pingoni ndanodhivwa pama.

WAINGUMI YOTHENE

Vangavirile yawa imbo-i, ndatoidhiwana na Alex, lombwana wamakalelo apama, unomdhiveliwana Yohova mwaimbarimbari thitho unolaleela vya liye. Liye ali rumiwi okami-a, thitho wa vyawa 6 angali painiya. Alex atolabavo hora inango gawoni, wafuneecha anamalaleya anjinji, ilambo ya Malawi. Weo liye atoidhiwana mamisionariyo amoni-dhe ifyanafwani-o yapama, thitho tanomlimbi-a ira adhowenave e-la valimburo loroma vya Umwene.

Yawa ya 2003, Alex na miyo natothelana, nongodhowanave laba basa lahora yothene. Nitofunjedha yofunjedha yapama thitho Yohova utoniraeli-a mwandhila dhinjinji dhene.

Yawa ya 2009, natoitaniwa ira nimalabe basa laumisionariyo ilambo ya Timore-Leste, ilambo ing’ono dhuzi na Indonésia. Natodabwa, dhiveliwa no thakaleliwa, vyothene vyevyo hora imbo-ive. Medi mithanu vanduli viwa, natofiya sidade la Dili, kapitale wa Timor-Leste.

Ira nilabe ilambo yeile nafuneela chinja vyongo vinjinji vaingumii-u. Vyothene weule ali vyo-iyana: makaathedho, iongelo, vyodya na mairelo a vyongo vyavaingumini. I-yo nafwanele chinja makalelo ovwelana naweule. Malaleelo nakala naatu osauwechecha, o-ofunja xikola thitho tali atu onyingaleliwa. Atu anjinji tali amadamba manungoni  na mathuuleloni na mwasa wa khondo na uwalanga. *

Laleela ali odabwi-a! Mofwanafwani-a, dambo n’nango ndatogumana sikana wa vyawa 13, dhinalee Maria. * Liye anova-a sisi. M’mee atotatiya vyawa vyoyeva ndulimo, thitho liye babee kaamwidhi. Ninga mwasikana atungalee, Maria kaana idedi-edho vaingumiyee. Miyo ndinothuulela ira dambo n’nango, liye atola voniwandela mwemo mwadhivwela liye, mbwenye miyo kandaodile uvwa madhu enango aongile liye na mwasa oi miyo kandajiidhi pama iongeloyo. Miyo ndatolobela wa Yohova, mvepa ira andikami-e msangalali-a sikanuo, ndatoroma leri malemba omdidili-ana rima. Vyawa vyo-arela ndatoona mwemo imbarimbari mwanjinjele aliwa mathuulelwee, na leva rima wa Maria. Liye atobadiziwa, Mwachineneeva unofunji-a atu enango Bibilya ekene. Malamboano Maria utokaana banja nlukulu mwairoromeloni e-no unodhivwa ira utogumana limburo lee.

Yohova unaraeli-a basa la Timor-Leste. Anamalaleya anjinji aweo tafunjile imbarimbari vanduli va vyawa kumi. Vingalive e-no, anjinji mbaapainiya, arumiwi okami-a venango andimuwa. Enango anolaba wu ma RTO kami-anga basa losaka-edha yodya yauzimu muviongelo vyatatamoni. Nditodhiveliwa ona novwa taombanga Nyumbani ya Umwene na kove dhosangalala noona ulukula wiwa mwauzimu.

Basa li-u wu Timor-Leste ali lo-iyanelatu na la Austrália, mbwenye ndili osangalala na ingumi yaimwerumweru. Hora dhinango nanovinyedhana basini ling’ono modhala atu kundumwi-u mwakalecha somba dhouma na madengu a vyova-a vyavaisanivo vyodhowa maguli-iwa. Malambo enango nafunji-echa Bibilya mba movi-a na monyeta, vamateyani, anakuu hora dhothene rungunu-rungunu vakala-iyovo. Vavyorucha vyothene vyevyo, miyo ndathuulelecha ira, ‘Pyapama vyokoka!’

Ndathuulela vyanduli, ndinosimba Nlungu dhela mwaanamabalanga vondifunji-a imbarimbari ya Yohova na ndikami-a, fiedhela vahora yorucha yaisikana yanga. Ndinoona vinoonga lemba la Sanganikho 22:6 pyaimbarimbari. Kumela m’manga udha babanga, tanoninyidhela miyo na Alex. Aliwa anosangalala ona moda unoni-indi-edha basa Yohova. Romela yawa ya 2016, ninolaba basa la anamaing’anela isa wu Austrália, Nova Zelândia.

Vinorumeleya ira miyo kandadhiveliwana basa lolaleela? Mwachineneeva miyo ndinodhiveliwana laleela. Nditozindiyela ira angalive ira ninokaana vyorucha na hora yapama, mutu unooda kala osangalala alambelanga Yohova na rima wethene. Mo-okaikela va vyawa 18 vyomlabela Yohova vambo-i na Alex, pyosangalali-a vaingumi yanga. Mwachineneeva ndinozindiyela mwalembele wamasalimo Davide, vyaonga liye wa Yohova ira: “Othene anotawela wanyo anodha kala aimwerumweru; hora dhothene anodha kuwa mosangalala. Thitho anodhiveliwana dhina linyu anodha sangalala na nyo.”—Sal. 5:11.