MURU OFUNJEDHA 17
Yohova unoudhiveliwanani!
“Yohova unodhiveliwana atwee.”—Sal. 149:4.
NYUMBO 108 Chikondi Chosatha cha Mulungu
VINOFUNA I-YO FUNJEDHA *
Babi-u wa dhulu “unonidhiveliwana” vakadha mutu vaeka (Muone ndima 1)
1. N’nga chini jinoona Yohova mwaatwee?
YOHOVA Nlungu “unodhiveliwana atwee.” (Sal. 149:4) Pyapamadi idhiwa vyevyo! Yohova unoona pama makalelwi-u thitho unoona dodoliso li-u, e-no unonikami-a ira nikale axamwalee. Nodhowanave kala ororomeleya wa Yohova liye unodha kala xamwali-u wodhowa no dhowa!—Juwau 6:44.
2. N’nga mwasiwa n’ngwan’ni atu anjinji anoona kala vyorucha roromela ira Yohova unoadhiveliwana?
2 Venango atu enango anoonga ira: ‘Miyo ndinoidhiwa ira Yohova unoadhiveliwana atwee, n’nga miyo chini jinofuna ndiroromeli-a ira liye unondidhiveliwana?’ N’nga mwasiwa ngwan’ni atu enango anokaana yofuka yei? Oksana * wenuo aulukunle morucheya unoonga ira: “Ndingabadiziwile, ndatoosangalala maningi, ndatosakula kala painiya. Vangavirile vyawa 15, mathuulelo othakala tatoroma ndidhela oona moda waulukunle miyo morucheya vyothuulelavyo vyatoroma ndiopi-a. Vevo ndatoroma viona ira kandali ofuneya waliye e-no liye kanondidhiveliwana.” Painiya mwinango unoitaniwa Yua thitho aulukunle mwanyarwa, onoonga ira: “Miyo ndatodhipambulela wa Yohova vofuna mdhiveliwi-a. Mbwenye miyo ndanodhisikimizela ira liye chipo kanodha ndidhiveliwana.”
3. Pivyongo viivi vinofuna i-yo tapanya wari mwa yofunjedha yei?
3 Ninga vyaairele arongola ambili aongiwile ndulimwala, nyo thitho venango munomdhiveliwana Yohova mbwenye munokaikela ira liye unoudhiveliwanani. Wari mwa yofunjedha yei ninofuna nione vyowakula vya vyofuka vili: Mwasiwa ngwan’ni nyo munofwanela roromela ira Yohova unoudhiveliwanani? N’nga chini jinofuna ukami-ani limbanana mali-a mathuulelo odaweyala?
KAIKELANGA IRA VENANGO YOHOVA KANOUDHIVELIWANANI KOOPI-A
4. Mwasiwa ngwan’ni kaikelanga ira Yohova kanonidhiveliwana ngugo-i nlukulu?
4 Udhivela unoniva-a kopolo ira niode iravo yongo. Kaana iroromelo yoi Yohova unonidhiveliwana thitho unonikami-a, unoniva-a kopolo dhofuna mlabela liye na rima wethene angalive ira ninogumanana nyarwa dhinjinji vaingumiyi-u. Mbwenye a-irana vyevyo thuulelanga ira Nlungu kanonibala, “nguru dhi-u dhinokala dhoyeva.” (Sang. 24:10) Nakala osukwala no luza iroromelo yi-u, vevovene Satana panofuna liye nigwi-ana go-i.—Aef. 6:16.
5. Chini yaairele abali akaikela ira apwase Nlungu kanoadhiveliwana?
5 Kaikela unofooki-a iroromelo yaabali-u enango. Ndimuwa mwinango wavapingoni dhinalee James uongile ira: “Miyo ndalaba Beteli thitho ndanokami-a pingo waiongelo inango, mbwenye ndatoroma dhifuka ira akala ira Yohova anorumeladi basa lamlabela miyo. Ndatofiya vodhifuka ira: ‘Yohova unovuruwanadi malobelwanga?’” Eva thitho unolaba basa lahora yothene uongile ira: “Miyo ndinoona ira kaikelanga akala ira Yohova unonidhiveliwana koopi-a, namwasa oi vyevyo vinairenga undunyela undendai na Yohova. Vyevyo vinomari-edha ufooki-a vabasa linolabanyo lauzimu thitho vinovungula imwerumweru unokaana i-yo vomlabela Yohova.” Michael, painiya okaatheya thitho liye ngundimuwa wavapingoni, uongile ira: “Akala ira nyo kamunororomela ira Yohova unoudhiveliwanani, munogomela i-yachi a-ra ndhiladhee.”
6. Naromanga kaana mathuulelo onikaikeli-a ira apwase Nlungu kanonidhiveliwana, chini inofwanela i-yo ira?
6 Vyaairele abalala, vinooni-a ira kaana mathuulelo ninga enala unooda fooki-a iroromelo yi-u. N’nga ninaire a-vi akala mathuulelo ninga enala atoroma nidhela rimanimwi-u? Ninofwanela akonda mombaranya! Mumvepe Yohova ira achinjemo “mathuulelo odhodhomi-ao” no e-lamo ‘rendele wa Nlungu unofuna lokota riminyu na mathuulelwinyu.’ (Sal. 139:23, madhu achindo; Afil. 4:6, 7) Muthuulele ira nyo kamuli mweka. Vatokala abali naarongola anjinji anolimbana mathuulela odaweya ninga enao. Thangani-avo arumiwi andulimu tanolimbanana nyarwa yamathuulelo ninga yeniyo. Onani munafunjedhele-iyo vaifwanafwani-o ya rumiwi Paulo.
VINOFUNJEDHA I-YO VAIFWANAFWANI-O YA RUMIWI PAULO
7. N’nga Paulo alimban’nena vyorucha viivi?
7 Hora dhinango nyo munoviona kala opingeya na mabasa manjinji anolaba nyo vionanga ira kamunooda vikwakwaneli-edha? Akala ti-eno, munooda vwechecha pama vyorucha vya Paulo. Liye anokumbanya na mwasa “wamipingo yothene” a-kala pingo m’mbo-i. (2 Akor. 11:23-28) Nyo munobulela marenda o-oona rombwe anookali-ani osukwala? Paulo anofwanela limbanana “mwinga wamanungoni,” venango ali vyorucha vyatutuni vyamoni-idhe nyarwa hora yolapela mbwenye liye anofunechecha imali-a nyarwiyo. (2 Akor. 12:7-10) Kalelo linyu voona ira muli mutu o-olongomana linouiri-ani kala mutu osukwala? Paulo Hora dhinango avivwa e-no. Liye adhiongile ira “ali mutu ovwi-a tangaranga” namwasa oi hora dhothene liye akalelecha limbanana kalelolee vokala mutu o-olongomana.—Aroma 7:21-24.
8. Chini yamkami-idhe Paulo ira alimbanena nyarwadhee?
8 Paulo atolimbana nyarwa dhamwesedhile iroromelo yee thitho dhatom’mwiri-a ira akale osukwala, mbwenye liye atodhowanave mlabelanga Yohova. N’nga liye akumilena wani kopolo ira adhowenave laba basaleli? Angalive ira Paulo anokaana mathuulelo odaweya volimbana umutwee o-olongomana, liye atokaana iroromela yolimba va mwasa wa khuto. Liye thitho atokaana iroromelo yo-osusi-eya ya madhu a Yesu oonga ira mutu “uliwethene unakaena iroromelo mwa [Yesu] unodha kaana ingumi yo-omala.” (Juwau 3:16; Aroma 6:23) Mo-okaikela, Paulo anororomela khuto. Liye anonyindela ira Yohova unofunechecha levelela atu vyodawa viwa thangani-avo atu airile vyodawa vilukulu aliwa chinyuwa.—Sal. 86:5.
9. Chini jinofunjedhavo i-yo va madhu anonithuucha Paulo va lemba la Agalata 2:20?
9 Paulo thitho anororomela ira Nlungu anomdhiveliwana, namwasa oi Nlunguo atomruma Yesu liye dhamkwela. (Muleri Agalata 2:20.) Kaonani madhu apama a Paulo komoni wa versuli: “Mwana Nlungu, utondidhiveliwana na dhivelela mwasa wa miyo.” Paulo kaaona ira udhivela wa Nlungu wagomela waatu enango baa-i, liye kalanga ninga unoonga ira, pyo-orucha ona ira mwasiwa ngwan’ni Yohova unoadhiveliwana abalangave, mbwenye liye kanondidhiveliwana.’ Paulo atoathuucha atu au Roma ira: “Kristu unikwele i-yo angalive ira nali atu odawa.” (Aroma 5:8) Udhivela wa Yohova wa i-yo kuna madile!
10. N’nga lemba la Aroma 8:38, 39, linonifunji-an’ni?
10 Muleri Aroma 8:38, 39. Paulo atokaana iroromelo yolimba ya udhivela nlukulu wana Nlungu waliye. Liye atolemba ira “kavali jinofuna ni-iyani-a va udhiveli-u na Nlungu.” Paulo atoidhiwa ira Yohova ali okurudheya rima na mbumba yaana israeli. Thitho liye anothuulela moda wamomele rima Yohova. Ninooda onga mogwandela va madhu a Paulo mwandhila ila: ‘Akala Yohova atomruma Mwanee ira adhandikwele, vatokala jinofuna miyo kaikelela ira liye unondidhiveliwana?’—Aroma 8:32.
Yohova unobala vinoira nyo chineneeva navinofunanyo dhaira sogolou, a-akala vyodawa viirile i-yo ndulimu (Muone ndima 11) *
11. Angalive ira Paulo atoira vyodawa viongile liye va lemba la 1 Timoteo 1:12-15, mwasiwa ngwan’ni liye anokaana imbarimbari yoi Nlungu anomdhiveliwana?
11 Muleri 1 Timoteo 1:12-15. Vinooneya ira Paulo anoova vyanduli. Dhela va vyoongavyee vyoi miyo ndali mwaatu “osimbwa” dawa. Paulo a-anafunjedhe imbarimbari akalelecha a-ra-ara makristau masidadi na masidadi, a-elanga perezoni no rumeli-anga ira enango tapiwe. (Mayir. 26:10, 11) Mwathuulela munoona ira Paulo avivwa a-vi agumana kristaufwee wa zombwe liye idhiwa ira kristauo ngumwanapawi na mwasa oi liye ngwaapi-idhe anamabalee? Pyo-okaikela ira liye kaadhivwa paama. Paulo anochinyuwa vya vyodawa vyairile liye nduli, mbwenye liye kavali jaire liye ira aode chinja vyairile liye ndulimovyo. Liye aira rumela baa-i ira Kristu ukwele liye. Paulo ulembile ira: “Mooma rima ulukulu wa Nlungu, miyo ndili vilimiyovi.” (1 Akor. 15:3, 10) Chini inofunjedhavo i-yo? Murumele ira Kristu ukwele nyo, vyevyo vitouva-ani ngari yoi mukale vauxamwali olimba na Yohova. (Mayir. 3:19) Venango nyo munovivwela tangaranga va vyodawa vairilenyo ndulimu, venango mwa-anakale mboni wa Yohova. Mbwenye vinofunanyo idhiwa pyoi Yohova unobala vinoira nyo chineneeva na vinofunanyo dhaira sogolou, a-kala vyodawa viirile i-yo ndulimu.—Esaya 1:18.
12. Navionanga ira kanili ofuneya, mwasiwa ngwan’ni lemba la 1 Juwau 3:19, 20, linooda nikami-a?
12 Mwathuulelanga ira Yesu akwele ira avu-elele vyodawa vinyu venango munoonga ira: ‘Miyo kandifwanenle yotuva yapereso yavadhului.’ Mwasiwa ngwan’ni venango munovivwa e-no? Rimi-u o-olongomana venango unooda ninami-a ira i-yo kaninofwanela dhiveliwiwa. (Muleri 1 Juwau 3:19, 20.) Naroma thuulela mwatundu wen’na ninofwanela idhiwa ira “Nlungu nguunlukulu kwaranya rimi-u.” Udhivela no levelela wa Babi-u wa dhulu pyakopolo dhilukulu kwaranyi-a mathuulelo aliothene odaweya anonidhela. Ninofwanela funjedha idhiwa ira Yohova unonidhiveliwana. Ira vyevyo viireye ninofwanela funjedhanga Madhu a Nlungu anofwanyea Bibilyani hora dhothene, lobelanga wa liye mo-owezedhela no ganyalina abali-u tanikami-anga. Mwasiwa ngwan’ni irana vyongo vyevi pyofuneya maningi?
FUNJEDHA BIBILYA, LOBELO NO KAMI-IWA NAABALI VINOODA NIKAMI-A
13. N’nga funjedha madhu a Nlungu unanikami-e a-vi? (Muone kwadru loi ““ Madhu a Nlungu anooda nikami-a.”)
13 Mufunjedhenga madhu a Nlungu malambo othene, moi e-no nyo munodha funjedha makalelo apama a Yohova. Nyo munodha funjedha moda unoudhiveliwanani Yohova. Thuulela mopwasedha lemba limbo-i vadambo, vinooda ukami-ani ira muchinje mathuulelwinyu ira “mudhongole vyongo” mathuuleloni mwinyu na rimani mwinyu. (2 Timo. 3:16) Ndimuwa mwinango wavapingoni dhinalee Keven ulimban’nena mathuulelo oviona a-kala mutu ofuneya, uongile ira: “Leri lemba la Salimo 103 no lithuulela mopwasedha, unondikami-a kaathei-a mathuulelwanga, no vwechecha ira Yohova unondithuulela a-vi miyo.” Eva uongiwile ndulimule, uongile ira: “Dhuwa laviranga miyo ndinokaathecha thuulela mopwaseya vyongo vili vyofuneechecha wa Yohova, pivyevyo vinondiva-echa rendele wa rimani thitho vinowenjedhela iroromelo yanga.”
14. N’nga lobelo linonikami-a a-vi?
14 Mulobelenga hora dhothene. (1 Atez. 5:17) Nafuna ira mutu mwinango akale xamwali-u ninofwanela tapanyanga na liye hora dhothene, wandelangana munovivwela i-yo. Vyevyo tisaasawa na uxamwali-u na Yohova. Nalobelanga wa liye m’mwandelanga vyarimani mwi-u, vinonikumbanyi-a, vinothuulela i-yo, na mwemo munovwela i-yo, ninooni-a ira i-yo ninomroromela liye thitho ninoidhiwa ira liye unonidhiveliwana. (Sal. 94:17-19; 1 Ju. 5:14, 15) Yua uongiwile voromule, uongile ira: “Miyo ndalobelanga ndinoira vyongo vinjinji kwaranyi-a velela lipoti langa la mabasa alabile miyo dambo lelo, miyo ndinomdhulela Yohova rimanga no m’mwandela munovivwela miyo. Mwavang’ono na vang’ono ndinofunjedha m’mona Yohova, a-akala ninga mwinyaa ipereza, mbwenye ninga Baba unosimbwa adhiveliwana a-imee.”—Muone kwadru loi “ Nyo mutolileri buku leli?”
15. N’nga Yohova uoni-idhe a-vi ira unonifuna?
15 Muganyalingana kami-iwana abali; aliwa chiyotuva ya Yohova. (Tiy. 1:17) Babi-u wadhulu unooni-a ira unonifuna vakadha mutu vaeka, voniva-a banja lauzimu laabali naarongola, anonidhiveliwana “mwahora ili yothene.” (Sang. 17:17) Karta lalembile Paulo lodhowa wa Akolose, atoongamo abali enango amkami-dhe. Paulo aongile ira aliwa tali “isime ilukulu yomdidili-a rima.” (Akol. 4:10, 11) Na Yeswene atofuneela kami-iwa naaxamwele, romela waangelo dhafiedhela waatu aututu, moi e-no, liye atoosimba na mwasa okami-wa.—Luka 22:28, 43.
16. N’nga abali ananikami-e a-vi kala vauxamwali olimba na Yohova?
16 Nyo munoganyalina pama yotuva yuuva-idheni Yohova? M’mwandela bali owarala mwauzimu vyorucha vinyu kaiira mutekala mutu o-oidhiwa vyongo; hora dhinango munooda vuneleya mwaira e-no. Kaonani vimwireele James uongiwile ndulimule viongile liye: “Kala vauxamwali wapama naabali owarala mwauzimu pyokami-a wa miyo. Ndawa-eya na vyothuulela vyo-okala paama, axamwali apamala anondivuruwanecha moleva rima mwapama no ndiwandela moda unondidhiveliwana aliwa. Dhela mwaaliwa, ndinooda ona mwemo Yohova munondifunela liye, thitho ndidhiveliwana.” Mwaimbarimbari, pyofuneya limbi-a uxamwali-u naabali-u vambo-i naarongoli-u!
DHOWANANIVE KALA MUUDHIVELANI NA YOHOVA
17-18. Mbaani unofwanela i-yo mvuruwana, n’nga mwasiwa n’ngwan’ni?
17 Satana unofuna auoneni mungaimwan’ne va khondo inolimbana nyo vofuna ira vyongo vyapama. Liye unofuna muonenga ira Yohova kanaudhiveliwanani, ira mudhionenga ninga yongo yodimela yo-okaana basa. Mbwenye ninga muonele i-yo, vyothene vyevyo pyonama.
18 Yohova unoudhiveliwanani. Vamethoni va Yohova nyo muli fuma yapereso yavadhulu. Mwadhowanave kala ovwela munodha “kalave muudhivela” wa Yohova, Yesu aongile e-no. (Juwau 15:10) Moi ee-no kamuvuruwane Satana venango riminyu watandanga uwandelani ira kamuli ofuneya. Malo mwaevyo, mumvuruwanenga Yohova unoona va kadha mutu wa i-yo vyapama vina liye. Muroromele ira Yohova “unoadhiveliwana atwee,” vyevyo vinothangani-avo ira nyo thitho muli mutu ofuneya!
NYUMBO 141 Moyo Ndi Wodabwitsa
^ ndima 5 Abali naarongola enango anorucheya rumela ira Yohova unoadhiveliwana. Wari mwa muruwen’na, ninodha funjedhela mwemo munakaena i-yo iroromelo yoi Yohova unonidhivelaiwana vakadha mutu vaeka. Thitho ninodha tapanya ira ninaire a-vi akala ninoona ira pyorucha rumela ira Nlungu unonidhiveliwana.
^ ndima 2 Madhina enango atochinjiwa.
^ ndima 67 VIRUTHIRUTHI VYA Thakuru: Paulo a-anakale kristau ano-ara-ara makristau fiedhela a-eli-a perezoni makristau anjinji. Liye angarumenle vyam’mwandenle Yesu, liye ato chinja makalelo. Moi e-no Paulo atoroma alimbi-anga abalee amuiroromeloni, tangani-avo atu enango oi venango abalee atowa-ara-ara.
