1-2. a) Mwasiwa ngwan’ni malamboano atu anjinji vinoarucha roromela atu ale tana vizo? b) N’nga ninofuna nitapanyen’ni muyofunjedha yei?

MALAMBOANO atu anjinji vinowarucha roromela ale tana vizo. Aliwa tanoona ira anamatonga thitho malamulo tanovunela atu ofuma naale tana vizo mbwenye atu osauwa katinoairela vyongo vyolongomana. Bibilya linoonga movweya pama ira: “Mutu utompei-a mutu fwee vomtonga.” (Namal. 8:9) Wenjedhela veva, anamasogolela enango amareligiau tanoira vyongo vyothakala, Vyevi vinoiri-a ira atu enango ta-aroromelenga Nlungu. E-no nafunjedhanga Bibilya na mutu, ninofwanela mkami-a ira arome roromela Yohova thitho atu ale amsakunle liye ira tasogolelenga gululee.

² Mbwenye, kai anamafunjedha Bibilya okave baa-i tanofwanelela funjedha ira taroromelenga Yohova na gululee. Na-iyene oi ninolabela Yohova muvyawa vinjinji ninofwanelela a-kaikela ira hora dhothene Yohova unoirana vyongo mundhila yofwanelela. Hora dhinango vanooda ireya vyongo vinango vyevyo vinaniiri-e roma kaikela Yohova. Muyofunjedha yei, ninotapanya vikundu viraru: 1) naleringa myasa inango ya Bibiliyani, 2) nawachela malangi-o okumela mugulu la Yohova, na 3) nagumanana vyorucha sogolo.

3. N’nga myasa inango ya Bibilyani inoniiri-a a-vi kaikela mwemo Yohova munoirela liye vyongo?

 ³ Naleringa Madhu a Nlungu, venango ninooda dabwa nathuulela mwemo Yohova munoirela liye vyongo naatu enango  thitho mwasee unosakulela liye irana vyongo vinango. Mwaifwanafwani-o, naleri bukhu la Numero, ninovwavo ira Yohova atotonga m’mpa Mwiisraeli mwinango namwasa odhowa masaka kuni dambo la Sabudu. Bukhu la Samueli wanambili, ninoleri ira vanga virile vyawa vinjinji, Yohova atom’levelela Mwene Davide angairile yodawa yamararuo thitho m’mpa mutu. (Num. 15:32, 35; 2 Sam. 12:9, 13) Venango ninooda dabwa ira, ‘Mwasiwa ngwan’ni Yohova atom’levelela Davide apide mutu thitho raruwa na i-yana wa mutuo mbwenye tonga mutu ule uirile yodawa yooneya ninga ing’no ira apiwe?’ Ira niwakule yofuka yei, ninofwanela thuulela vyongo viraru vyevyo vinofwanela i-yo thuulela naleringa Bibilya.

4. N’nga lemba la Maromelo 18:20, 21 na Dotornomio 10:17 anonikami-a a-vi ira na-akaikelenga mwemo Yohova munoirela liye vyongo?

⁴Hora dhinango Bibilya kalinaonga makundo othene oonga vya mwasa unango. Mofwanafwani-a, ninoidhiwa ira Davide atochinyuwa kumela vathi varima va vyevyo vyairile liye. (Sal. 51:2-4) N’nga a-vi vya mutu ule apwazile lamulo la Sabudu? N’nga atovivwela tangaranga namwasa wavyairile liye vyo? N’nga atoimwanana vwela malamulo enango a Yohova ndulimu? N’nga atopwaza venango konda vwela vyowenjeli-a vyevyo vyava-iwile liye? Bibilya kalinaonga. Mbwenye vinoidhiwa i-yo pyoi: Yohova “kanairana vyo-ologomana.” (Dotor. 32:4) Liye unoira vyotheene vothuulela makundo othene a mwasuo vo-othukulela vinaonga atu enango, sakulo, venango vyongo vinango vyevyo hora injinji vinoiri-a atu ira tatongenga mo-olongomana. (Muleri Maromelo 18:20, 21; Dotornomio 10:17.) Nafunjedha vya Yohova thitho makudwee, paevo vanoroma i-yo mroromela maningi vamwasa wamwemo munoirela liye vyongo. Angalive ira vanoleri i-yo mwasa unango wa Bibilya thitho nitokaana vyofuka vyevyo vya-anofwanya i-yo vyowakulavyee, ninoidhiwa ira Nlungwi-u “ngolongomana dhiladhee dhothene.”—Sal. 145:17.

5. Voi kanili ochena n’nga vyevi vinaode a-vi kuza mwemo munoonela i-yo vyongo vinango? (Muone kwadro loi “ kaninaona vyongo mofwanelela namwasa oi nili o-ologomana.”)

⁵Ninoimwanana tonga mo-ofwanelela namwasa oi nili atu o-ochena. Nlungu atonipanducha muifwanafwani-o yee, e-no  ninofunechecha ona atu taireliwanga vyongo molongomana. (Maro. 1:26) Mbwenye, namwasa oi kanili atu ochena, kaninaode ona mofwanelela, myasa inango angalive ira ninothuulela ira ninoidhiwa makundo enango a myasiyo. Mofwanafwani-a, kathuulelani mwemo Yona mwasukwanle liye namwasa oi Yohova atothonyi-edha tangaranga atu au Ninive. (Yona 3:10–4:1) Mbwenye, kathuulelani vyevile vyaireile namwasa oi Yohova atothonyi-edha tangaranga. Atu okwakwana 120,000 au Ninive enao tachinyuwile tatovulumuchiwa! Komoniwee, Yona ngwafwanele kami-iwa ira achinje mathuulelwee a-kala Yohova.

6. N’nga Yohova unofwanela onga yongo iliyothene yeyo isakunle liye?

⁶Ka-iira Yohova unofwanelela awandela atu mwasee usakulele liye vyongo vinango kabe. Imbarimbari choi, ndulimu hora dhinango Yohova anorumeli-a ira arumiwee taonge mathuulelwiwa vavyongo viirile liye venango vinofuna liye ira. (Maro. 18:25; Yona 4:2, 3) Thitho vahora inango, atoonga mwasiwa wairele liye vyevyo. (Yona 4:10, 11) Mbwenye, ka-iira Yohova unofwanela niwandelamo iliyothene kabe. Ka-iira liye unodedi-edha ira i-yo, nimrumeli-e irana vyongo vinango kabe.—Esaya 40:13, 14; 55:9.

7. N’nga ninagumanena yorucha yoi a-vi, n’nga namwasa wan’ni?

⁷ Ninororomela na rima wethene ira vinoira Yohova hora dhothene vinokala vyofwanelela. Mbwenye, ninooda rucheya, roromela atu ale anoa-indi-edha liye basa. Ninooda kaikela akala atu tali vaizo mugulu la Yohova tanoira vyongo movwelana na malangi-o a Yohova venango mathuulelwiwa. Pyovweya ira enango ndulimu tanothuulela e-no. Kathuulelani vifwanafwani-o vinango viongiwe  mundima 3. Venango bali wa mutu apwazile lamulo la Sabudu, anokaikela akala ira Mose atomfuka Yohova a-anatonge ira mutuo apiwe. Thitho fwee Uriya Mhiti i-yanee araruwile na Davide, atoona ira Davide ato-indi-edha basa izoyee ninga mwene votawa langiwa wafuna liye iriwana. Mbwenye likundo lo-oruni-eya toi, kaninaonge ira ninororomela Yohova akala kaninoaroromela atu anoa-indi-edha liye basa.

8. N’nga vali fwanafwana oi a-vi vari va vinoongiwa va lemba la Mayirelo 16:4, 5 na vinoira atu mupingo malamboano?

⁸ Malamboano Yohova unosogolela ikundu ya ilambo yothene yavathi ya gululee vo-indi-edha basa “dhaari ororomeleya na wazelu.” (Mat. 24:45) Mofwanafwana na gulu lotonga la muhora yaarumiwi, dhaarula unosogolela atu a Nlungu vailambo yothene yavathi thitho unovelela malangi-o waandimuwa avapingoni. (Muleri Mayirelo 16:4, 5.) Andimuwa avapingoni, naaliwene ano-indi-edha basa malangi-o pingoni. Ninothonyi-edha ira ninororomela mwemo Yohova munoirela liye vyongo vo-arela malangi-o okumela mugululee, thitho waandimuwa avapingoni.

9. N’nga ndi hora iivi vinokala aliwa vyorucha a-rela visakunle andimuwa avapingoni, n’nga mwasiwa ngwan’ni?

⁹ Hora dhinango, vinokala vyorucha vwela visakunle andimuwa avapingoni. Mofwanafwani-a, vyawa vivirilevi mipingo na visa vinjinji vitosaka-edhiwa okoka. Hora dhinango, andimuwa tanoavepa anamalaleya enango ira tathamele mipingo inango, naifunelo yoi mipando ya Nyumba ya Umwene i-indi-edhiwenga basa mokwakwanela. Akala tatonivepa ira nithamele umipingo inango, venango ninongoona ira pyorucha i-yana naafwi-u naabali-u. N’nga andimuwa avapingoni tanowandeliwa  mundhila inango na Nlungu ira tathami-edhe anamalaleya mupingo unango? Kabe. Ee-no vyevi vinokala vyorucha ira ni-arele malangi-o anova-iwa i-yo. Mbwenye Yohova unororomela ira andimuwa avapngoni, tatosakula pama vamyasa yen’na thitho i-yo ninofwanela roromela. *

10. Movwelana na lemba la Aebere 13:17, mwasiwa ngwan’ni ninofwanela ira vyongo movwelana naandimuwa avapingoni?

¹⁰ Mwasiwa ngwan’ni ninofwanela irana vyongo movwelana na visakunle andimuwa apingonii angalive ira kaninovidhiveliwana? Namwasa oi nairana vyevi, ninokami-a ira atu a Nlungu tadhowenave kala ovwelana. (Aef. 4:2, 3) Vyongo vinowenda mwapama atu othene pingoni ta-arelanga modhievi-a vinosakula gulu laandimuwa avapingoni. (Muleri Aebere 13:17.) Mbwenye vyofuneya vinjinji pyoi, ninomthonyi-edha Yohova ira ninom’roromela nairanga vyongo movwelana naatu aava-idhe liye izo yonisamalela.—Mayir. 20:28.

11. N’nga chini inanikami-e ira niroromelenga malangi-o anova-iwa i-yo naandimuwa avapingoni?

¹¹ Thuulela ira andimuwa avapingoni tanoroma mvepa Yohova ira aava-e zimu ochena tatapanyanga mwasa okuza pingo, unonikami-a ira niroromelenga malangi-o anova-iwa i-yo. Tanothuulela mwapolepole makundo o-iyana i-yana a Bibilyani anovwelana namwasuo na malangi-o anovelela gulu la Yohova. Aliwa tanofunechecha sangalali-a Yohova no samalela atwee mundhila yapama. Alombwana oromeleyala tanoidhiwa ira tanodha rumela wa Nlungu va vyevyo vinoira aliwa vaizo iwa. (1 Pe. 5:2, 3) Kathuulelani likundo li: Ilambo yoi atwee mbogawaneya namwasa o-iyana tundu, mareligiau, na vyandale, atu a Yohova tanokala ovwelana volambela Nlungu waimbarimbari baa-i. Vyevi vinoodeya namwasa oi Yohova unokami-a gululee!

12. N’nga andimuwa avapingoni tanofwanela thuula likundo liivi ira taidhiwe akala mutu utochinyuwa?

¹² Yohova atoava-a andimuwa avapingoni izo ilukulu yoonechecha ira pingo ukale ochena. Akala Kristau utoira yodawa ilukulu, Yohova unodedi-edha ira andimuwa taone akala mutuo unofwanela dhowanave kala mupingoni. Mwavinango, aliwa tanofwanelela sakasaka ira taidhiwe akala mutuo unovivweladi tangaranga namwasa wa yodawa yeeyo. Mutu unooda onga ira utochinyuwa, n’nga unoidananadi na vyevyo vyaire liye? N’nga utosikimizadi ira kanodha welela akoka irana yodawiyo? Akala utoira yodawa namwasa ovwelana naatu enango othakala, n’nga liye ngosikimizadi i-yachi vwelana naatwao? Andimuwa tanolobelela mwasuo no sakasaka makundo amalembani, noona moda munothuulela mutuo. Taira e-no tanoona akala baluo venango rongoluo unongo dhowanave kala pingoni venango kumi-iwa.—1 Akor. 5:11-13.

13. N’nga ninooda roma thuulela vyongo viivi akala ira bali-u venango fwi-u utokumi-a pingoni?

¹³ N’nga iroromelo yi-u waandimuwa inodha wesedhiwa a-vi? Akala mutu ukumi-iwile pingoni kai fwi-u venango bali-u, vinooda kala vyo-orucha rumela andimuwa avapingoni visakunle aliwa. Mbwenye akala ira ukumi-iwile pingonuo ngufwi-u wavarimani venango ninooda onga ira andimuwa katithuulele makundo othene a mwasuo, venango ninooda kaikela akala tatotonga movwelana na vinofuna Yohova. N’nga chini inofuna nikami-a ira nionenga mofwanelela visakunle andimuwa avapingoni?

14. N’nga chini inofuna nikami-a akala andimuwa avapingoni tatosakula ira fwi-u venango bali-u akumi-iwe pingoni?

 ¹⁴ Ninofwanela thuulela ira Yohova ngunoira masaka-edho oi mutu o-ochinyuwa akumi-iwe pingoni thitho vyevi vinoganyali-a pingo no kami-a mutu odauo. Akala ira mutu o-ochinyuuo unodhowanave kala pingonimo, unongolimbi-a atu enango ira tairengana vyongo vyothakala. (Agal. 5:9) Wenjedhela veva, liye kanathuulela ulukula wa yodawa yee, thitho kanoona funeya oi achinje moda unothuulela liye, vyoira vyee naifunelo yoi akale okoka vauxamwali na Yohova. (Namal. 8:11) Ninooda sikimiza ira andimuwa avapingoni tafuna sakula ira mutu unofwanela kumi-iwa pingoni, katinaona izo yiwa movevuwa. Aliwa tanoidhiwa ira mofwanafwana naanamatonga amuhora ya Israeli, aliwa “katinotongela mutu mbwenye Yohova.”—2 Limb. 19:6, 7.

15. N’nga mwasiwa ngwan’ni ninofwanela roromela malangi-o okumela wa Yohova va-eeni kwaranya walelene?

¹⁵ Komoni wailamboi vinokwivela aliwa, ninofwanela roromela Yohova moda munoirela liye vyongo kwaranya walelene. Mwasiwa ngwan’ni? Namwasa oi venango vanyarwa ilukulu, ninodha va-iwa malangi-o ooneya ninga mbailendo, o-okami-a, venango o-ovweya pama. Njiimbarimbari ira Yohova, kanodha onga na i-yo methonametho. Pyoidhiweya ira unodha niva-a malangi-o dhela mwaabali avizo. Yen’na kinodha kala hora yokaikela malangi-o anofuna i-yo dhava-iwa noonga ira, ‘N’nga malangi-o enala takumeledi wa Yohova, venango abalala tanoirana vinothuulela aliwa?’ N’nga nyo mudha ira a-vi vyongo vahora ninga yen’na? Munodha idhiwa vinofwanelanyo ira vahora yeniyo mwathuulela mwemo munoirelanyo mwawachela malangi-o okumela mugulu la Yohova va-eeni. Akala ninororomela malangi-o anova-iwa i-yo malamboano nowa-arela mofunechecha, pyo-okaikeli-a ira ninodha irana vimbo-ive vanyarwa ilukulu.—Luka 16:10.

16. N’nga mroromela wi-u Yohova unodha wesedhiwa a-vi vevo vanofuna liye dha tonga atu sogolou?

¹⁶ Likundo n’nango linofwanela i-yo lithuulela toonga mwemo Yohova munofuna liye dhatonga komoni wailambwila. Va-eni, ninodedi-edha ira atu enao ta-ali arumiwi a Yohova, thangani-avo abali-u ta-ali a Mboni dha Yohova tanodha chinja noroma mlabela Yohova komoni wa-anafiye. Mbwenye va kondo ya arumagedo, Yohova, dhela mwa Yesu, mbenao anofuna dhasakula vinaairele aliwa. (Mat. 25:31-33; 2 Atez. 1:7-9) Kai i-yo  unofwanela dha sakula ira Yohova aathonyi-edhe tangaranga venango kabe. (Mat. 25:34, 41, 46) N’nga ninodha roromela ira Yohova unodha tonga mofwanelela, venango ninodha sukwala? Onga mwaimbarimbari, ninofwanela roromela Yohova va-eeni ira nidhamroromele maningi sogolo.

17. N’nga ninodha ganyali a-vi namwasa wamwemo munofuna dha tongela Yohova adhanonga ilamboi?

¹⁷ Kathuulelani mwemo munofuna i-yo dha vwela muilambo ipya ona vyo-arelavo vya tonga wa Yohova. Kavanodha kala religiau lonama, oguli-a malonda aidyani thitho anamatonga andale enao takadhi tanyingalelanga atu nodhi-a nyarwa dhilukulu muvyawa vinjinji. Marenda, ulula, na wukwa waatu anowadhiveliwana i-yo kunodha ira ikundu vaingumi yi-u ya dambo na dambo. Satana naviwandavyee anodha mangiwa muvyawa mili. Vyothakala vyevyo vinodha namwasa o-ovwela wiwa vinodha mala. (Apok. 20:2, 3) Ninodha sangalala maningi voona ira ninororomela mwemo Yohova munoirela iye vyongo!

18. N’nga ninofunjedhavon’ni vaifwanafani-o ya Israeli, inofwanyeya va lemba la Numero 11:4-6 na 21:5?

¹⁸ N’nga muilambo ipya ninodha wesedhiwa vamyasa yororomela mwemo Yohova munoirela liye vyongo? Mofwanafwani-a, kathuulelani vyaaireele Aisraeli tangathathuliwile muudhaari wu Iguputu. Atu enango tatoroma dungunya namwasa oi katadya vyodya vyapama vyevyo vyadyecha aliwa wu Iguputu, thitho katasimba yodya ya mana yaava-a Yohova. (Muleri Numero 11:4-6; 21:5.) N’nga na-iyene ninodha kaana mathuulelo ninga enala vanduli va nyarwa ilukulu? Kaninoidhiwa injiva wabasa inofuna dhakalavo yoi nikumi-emo vyongo vinongiwile noroma saka-edha ilambo vang’ono navang’ono ira ikale paradaizo. Pyoidhiweya, ira ninodha kaana basa injinji na nyarwa dhinango maromelo wene. N’nga ninodha dungunyanga na vyevyo Yohova vinofuna liye dha niva-a vahora yeniyo? Likundo lo-oruni-eya toi: Nasimbanga vinoniva-a Yohova va-eeni, pyo-okaikela ira ninodha simba vyevyo vinofuna liye dha niva-a vahora yeniyo.

19. N’nga mbamakundo aavi malukulu malukulu afunjedhile i-yo muyofunjedha yei?

¹⁹ Hora dhothene Yohova unoira vyongo mundhila yofwanelela. Kaninofwanela kaikela vyevyi. Niroromelenga atu ale Yohova unaanyindela liye ira tano-arela malangi-o. Kanidiwale madhu a Yohova aongile liye dhela wa namaogela Esaya ira: “Munodha kala akopolo mwakala o-otekenyeya naairoromelo.”—Esaya 30:15.