1. N’nga Yohova uirilen’ni?

N’NGA mwaromile a-vi funjedha imbarimbari? Yoroma mwavwide milanyu yapama kumela waanamabalinyu venango afwinyu abasani venango axikolani venango a Mboni enao talaleela nyumba na nyumba. (Marku 13:10) Ee-no Mboni dha Yohova tatokaana thindhi vofunjedha Bibilya vambo-i na nyo. Hora yafunjedha nyo Bibilya mwatoroma mdhiveliwana Yohova thitho mwatoidhiwa ira liye unoudhiveliwanani. Yohova atoukami-ani idhiwa imbarimbari thitho va-eeni nyo muli namafunjedha wa Yesu Kristu thitho munodedi-edha dhakaana ingumi yo-omala. (Juwau 6:44) Mo-okaikela munosimba Yohova ira atolimbi-a mutu mwinango ira adhaufunji-eni imbarimbari thitho atorumela ira mukale namalabee.

2. N’nga ninofuna nitapanyen’ni va yofunjedha yei?

² Voi nitoidhiwa imbarimbari nitokaana ngari yokami-a atu enango ira tawende vandhila yodhowa mawachela ingumi yo-omala. Venango nyo munoona ira kai vyorucha laleela nyumba na nyumba. Mbwenye venango vinodha kala vyorucha romi-a funjedha Bibilya wavanyumbani. Akala ira vyevi vinouireelani makundo a yofunjedha yei anodha ukami-ani vinjinji. Ninodha tapanya vyevyo vinanilimbi-e ira niodenga tapanya naatu enango, thitho vyevyo vinaire i-yo volimbanana nyarwa dhedho dhinaniimwanani-e romi-a funjedha Bibilya wavanyumbani. Yoroma dhoweni nitapanyeni mwasiwa wa-anafwanela i-yo kala anamalaleya baa-i, mbwenye thitho kala anamafunji-a a milanyu yapama.

3. Mwasiwa ngwan’ni ninolaleela?

³ Yesu angali vailambo yavathi atoa-iyedhela anama-arelee lamulo lokaana vikundu viili. Yoroma liye atoawandela ira talaleelenga milanyu yapama ya Umwene thitho atoaoni-a mwemo mwafuna aliwa irela vyevyo. (Mat. 10:7; Luka 8:1) Mofwanafwani-a, Yesu atoawandela anamafunjedhee vyafwanela aliwa ira atu takonda venango tarumela milanyu ya Umwene. (Luka 9:2-5) Yesu atoongelatu ulukula wa basali voawandela anama-arelee ira tanodha irela “umboni wa maziza othene.” (Mat. 24:14; Mayir. 1:8) Akala ira atwao tangavuruwan’ne venango konda, anamafunjedhao tanofwanela awandela atu vyoonga vya Umwene wa Nlungu thitho vyevyo vinofuna dhaira Umwenuo.

4. Movwelana na lemba la Mateu 28:18-20, chini thitho jinofwanela i-yo ira vofuna wenjedhela basa lolaleela milanyu yapama ya Umwene?

⁴ N’nga ikundu yanambili ya lamulo la Yesu yali yoongan’ni? Liye atoawandela anama-arelee ira tafunji-enga atu lokota vyongo vyothene vyaawandele liye. N’nga basa lolaleela nofunji-a laveleliwe wa makristau oroma baa-i ninga mwemo munoongela atu enango? Kabe. Yesu atooni-a ira basali lingadhowilenave labiwa fiedha malamboano venango nionge ira “fiedha magomelo a vyoireya vya ilambwila.” (Muleri Mateu 28:18-20.) Vinooneya ira Yesu avelenle lamulo leli vahora yeniyo yadhowile liye maoneela waanamafunjedhee okwaranya 500. (1 Akor. 15:6) Thitho masompenya aoni Juwau Yesu atooni-a ira unofuna ira anamafunjedhee othene takami-e atu enango idhiwa vyoonga Yohova.—Apok. 22:17.

5. Movwelana na lemba la 1 Akoritiyo 3:6-9, n’nga Paulo afwanafwani-idhe basa lolaleela nan’ni?

⁵ Rumiwi Paulo afwanafwani-idhe basa lofunji-a atu na basa lolima. Vyevyo vinooni-a ira vatokala vinjinji vinofwanela i-yo ira a-kala ira dhalave mbeu baa-i. Liye atoathuucha makristau au Koritiyo ira: “Miyo ndatodhala, apolo ngu-elelile ma-inje, mbwenye nyo muli munda wa Nlungu wenuo unalimiwa.” (Muleri 1 Akoritiyo 3:6-9.) Voi nili anyabasa a ‘mundani wa Nlungu,’ basa li-u kai dhalave mbeu baa-i mbwenye ninodhi-elela ma-inje vakwikwi na vakwikwi noona moda unaulukula aliwa. (Juwau 4:35) Mbwenye ninozindiela ira Nlungu ngunaulukuli-a mbeudho.

6. N’nga basa lokami-a atu enango linothangani-avon’ni?

⁶ I-yo ninosakasaka atu a mathuulela apama anaakami-e dha fwanya ingumi yo-omala. (Mayir. 13:48) Mbwenye atu enala ira takale anamafunjedha a Yesu ninofwanela akami-a 1) vwechecha, 2) roromela thitho 3) i-ndi-edha basa vinofujedha aliwa Bibilyani. (Juwau 17:3; Akol. 2:6, 7; 1 Atez. 2:13) Uliwethene pingoni unooda kami-a anamafunjedha Bibilya voaoni-a udhivela thitho awachela na mandha meli tafiya vamigumanoni. (Juwau 13:35) Namafunji-a unofwanela kaana thindhi na hora injinji ira amkami-e namafunjedha Bibilya ira a-iyachi vilemeelo na vinororomela liye vyevyo vimadhi kaatheya molimba rimanimwee. (2 Akor. 10:4, 5) Venango vanooda vira medi injinji ira mutu aode chinja ingumiyee fiedhela fwanelela badiziwa. Mbwenye chinjau kokami-a vinjinji.

7. N’nga chini jinanilimbi-a ira nidhowenave laba basa lolaleela nofunji-a atu enango?

⁷ Mwasiwa ngwan’ni ninolaba basa lolaleela nokami-a atu enango ira takale anamafunjedha? Mwasa oroma ngoi ninomdhiveliwana Yohova. Nadhilimbi-edhanga vwela lamulo loonga ira nilaleelenga nokami-a atu enango ira takale anamafujedha, ninooni-a  ira ninomdhiveliwana Nlungu. (1 Ju. 5:3) Kathuulelani vi: Mwasa oi munomdhiveliwana Yohova mwatoroma basa lolaleela nyumba na nyumba. N’nga munoona ira ali vyokweya vwela lamulo leli? Kaali vyokweya. N’nga mungafiile vandhe vamutu fendo yoroma mwatoova? Vyevyo pyo-oira kaikela. Mbwenye mwatoidhiwa ira lelo lali basa lafuna Yesu ira mulilabe thitho mwatovwela lamulo leli. Vira wa hora ali vyo-orucha ira mulabenga basa lolaleela. N’nga munavivwa a-vi mwathuulela vyoromi-a funjedha Bibilya wavanyumbani? Munoova? Venango ndi e-no. Mbwenye mwavepa Yohova ira aukami-eni mali-a ova thitho limbi-a riminyu ira muromi-e funjedha Bibilya wavanyumbani, liye unodha ukami-ani ira mukaena rima ofuna kami-a atu enango ira takale anamafunjedha a Yesu.

8. Movwelana na lemba la Marku 6:34, n’nga chini thitho inoniiri-a ira nifunji-enga atu enango?

⁸ Yanambili, dhiveliwana atu unoniiri-a ira nifunji-enga atu enango imbarimbari. Hora inango Yesu vambo-i naanamafunjedhee tatochenyela mwasa oi tatolaleela hora injinji. Aliwa tanofwanela saka limburo ira tavume mbwenye mwinjinji waatu watoa-arela wewo. Voavwela tangaranga Yesu atoroma afunji-a “vyongo vinjinji.” (Muleri Marku 6:34.) Liye atoira vyevi angalive ira atochenyela vinjinji. Mwasiwa ngwan’ni? Liye athuulela mwemo atwao mwavwela aliwa. Liye ali ofunechecha akami-a mwasa oi atoidhiwa nyarwa dhedho dhagumanana aliwa thitho katan’na idedi-edho. Puemo thitho mukalele atu malamboano. Kaninofwanela vuthi-eya mwasa wa maoneelwiwa. Aliwa tali ninga mabila odimela ta-ana namakumiza. Rumiwi Paulo atoonga ira atu ninga enala katimmwidhi Nlungu thitho katin’na idedi-edho. (Aef. 2:12) Aliwa tali vandhila yodhowa manongiwa. (Mat. 7:13) Ee-no nathuulelenga ira puemo mukalele atu atatamoni mwi-u, udhivela na tangaranga vinonilimbi-a ira niode akami-a. Thitho ndhila yapama yofuna akami-edha kufunjedha Bibilya vambo-i naaliwa.

9. Movwelana na lemba la Afilipi 2:13 n’nga Yohova unaukami-eni a-vi?

⁹ Venango nyo munokaikelecha romi-a funjedha Bibilya wavanyumbani mwasa oi munoona ira munofwanela kaana hora injinji yofunji-a. Akala ti ee-no mummwandelenga Yohova mwemo monovwelanyo. Mumvepenga ira aukami-eni kaana hora yofuna romi-a funjedha Bibilya wavanyumbani. (Muleri Afilipi 2:13.) Rumiwi Juwau tonisikimizeli-a ira Nlungu unowakula malobelwi-u enao ali ovwelana na ifuneloyee. (1 Ju. 5:14, 15) Ee-no kamukaikelenga ira Yohova unodha ukami-ani kaana rima ofuna kami-a atu ira takale anamafunjedha a Yesu.

10-11. Mwasiwa ngwan’ni atu enango anokaikela romi-a funjedha Bibilya wavanyumbani?

¹⁰ I-yo ninoona ira basa lofunji-a atu enango tofuneya vinjinji angalive ninogumanana nyarwa dhinango dhinaniimwanani-e irana vyongo vinjinji volaba basali. Ee-ni dhoweni nitapanyeni vinango mwa vyorucha vinagumanana i-yo thitho vinaire i-yo vofuna vilimbanana.

¹¹ Ninooda ona ira kaninaire vyongo vinjinji. Mofwanafwani-a, anamalaleya enango mboulula venango obulela bulela. N’nga nyo muli ee-no? Akala ti e-no kathuulelani vyongo vifunjedhile i-yo vahora ya sau wa COVID-19. Nitoona ira pyoodeya romi-a funjedha Bibilya wavanyumbani odhowa vasogolo vo-indi-edha basa telefoni. Ee-no munooda romi-a funjedha Bibilya wavanyumbani mungali vandhe vinyu. Mbwenye vatokala upama unango. Atu enango anofuna funjedha Bibilya mbwenye katinofwanyeya vandhe vahora inolaleela abali. Venango  anofwanyeya mavandhe namaebe-i venango nama-iyu. N’nga pyoodeya ira mufunjedhenga naatu vahora ninga yen’na? Yesu atomfunji-a Nikodemo nama-iyu, hora yen’na Nikodemo aona ira njapama wa liye.—Juwau 3:1, 2.

12. N’nga pivyongo viivi vinanikami-e ira nikale anamafunji-a apama?

¹² Ninooda vikaikela ira kaninaromi-e funjedha Bibilya wavanyumbani. Venango munoona ira munofwanela idhiwa vyongo vinjinji venango kaana dodoliso ira murome fenjedha Bibilya wavanyumbani vambo-i na mutu mwinango. Akala munodhivwa ee-no, kathuulelani vyongo viraruvi vyevyo vinauiri-eni ira mwa-avikaikelenga. Yoroma, Yohova unoona ira muli ofwanelela funji-a atu enango. (2 Akor. 3:5) Yanambili, Yesu wenuo una ‘utongi dhulu na ilambo yavathi’ utouwandela ira mufunji-enga. (Mat. 28:18) Yaneraru munooda vepa abali ira taode ukami-ani. Yesu anonyindela vyevyo vyamfunji-idhe Babee, nyo thitho munooda irana vyevyo. (Juwau 8:28; 12:49) Venango munooda vepa namaing’anela wa grupu linyu laurumiwi, apainiya venango anamalaleya adodoliso ira taukami-eni romi-a funjedha Bibilya wavanyumbani. Yongo imbo-i inofuna ukami-a ira mwa-akaikelenga kudhowa vambo-i na anamalaleya ninga enala tadhowanga mairi-a funjedha Bibilya wavanyumbani.

13. Mwasiwa ngwan’ni ninofwanela lemeela ndhila dhachineneeva dhofuji-ana?

¹³ Ninooda rucheya i-ndi-edha basa mafaramento a chineneeva. Ndhila dhedho dhino-indi-edha i-yo basa voromi-a funjedha Bibilya wavanyumbani dhitochinja. Buku lo-indi-edha basa vofunjedha Bibilya naatu toonga ira Ingumi yokalao dhowa nodhowa!, linofuneya kozeela pama thitho funji-a vo-indi-edha basa ndhila dhinango mo-iyana na mwemo mwairela i-yo ndulimu. Ninaleringa ndima dhoyeva, nokaana hora injinji yooda tapanya na namafunjedhi-u. Ni-indi-edhenga basa mavidiyo na vyongo vyachineneeva vinofwanyeya va JW Library^®. Akala munorucheya i-ndi-edha basa vyongo vyevyo vepani abali enango ira taukami-eni. Mwaibaliwelo i-yo ninodhiveliwecha i-ndi-edha basa vyongo vilemeele i-yo. Kai vyokweya lemeela indi-edha basa vyongo vyachineneeva. Mbwenye Yohova vambo-i na abali enango anooda nikami-a noona ira pyo-orucha funja, thitho ninooda kala osangalala nafunjedhanga Bibilya naatu enango. Ninga mwemo mwaongele painiya mwinango, ndhila dhofunji-anadhi, “tosangalali-a wa namafunjedha thitho namafunji-ee.”

14. N’nga nithuulelengan’ni akala ira tatamo linolaleela i-yo torucha fwanya anamafunjedha, n’nga lemba la 1 Akoritiyo 3:6, 7 linanilimbi-e a-vi?

¹⁴ Venango ninokala tatamo loi pyorucha romi-a funjedha Bibilya wavanyumbani. Venango atu katinokaana ifunelo yovuruwana milanyu dhi-u thitho anooda niruni-a. Chini jinanikami-e ira nidhowenave aona mofwanelela atu a tatamo ninga dhedhi? Nithuulele ira vyongo vinooda chinja mo-odedi-edela vaingumi yaatu a vailambo yothakalila, thitho atu enao voroma taoneya ninga katin’na ifunelo tanooda onelamo ira tanofuneela Nlungu ira aodenga asogolela. (Mat. 5:3) Atu enango enao takanle ta-arumelanga mabukwi-u vira wahora tatorumela ira tafunjedhenga Bbibilya. Nithuulelanga ira Yohova ngumwinyaa wa vyo-andavyo. (Mat. 9:38) Liye unofuna ira nidhowenave dhala thitho e-lela ma-inje mbwenye unaulukuli-a nguliye. (1 Akor. 3:6, 7) Mbwenye pyolimbi-a idhiwa ira angalive ira kaninafunjedha Bibilya na mutu, Yohova unoniraeli-a mwasa wa thindhi li-u a-kala mabuku anogawedha i-yo venango atu anaafunjana i-yo Bibilya. *

15. N’nga Yohova unovivwa a-vi mutu afunjedha Bibilya no-indi-edha basa vyevyo vinofunjedha liye?

¹⁵ Yohova unokala osangalala mutu afunjedha imbarimbari ya Bibilyani, nowandela atu enango vyevyo vifunjedhile liye. (Sang. 23:15, 16) Yohova unokala osangalala vinjinji aona vyevyo vinoireya malamboano. Mofwanafwani-a angalive ira yawa ya urumiwi ya 2020 vailambo yothene vatokala sau, natofunji-a Bibilya atu okwakwana 7.705.765 vyevyo pikami-idhe ira atu okwakwana 241.994 tadhivelele wa Yohova nobadiziwa. Anamafunjedha apyala, naaliwene tafunji-enga atu Bibilya ira takale anamafunjedha a Yesu. (Luka 6:40) Pyo-okaikela ira ninosangalali-a rima wa yohova nakami-anga atu enango ira takale anamafunjedha.

16. N’nga njiifunelo yapama iivi yeniyo inofwanela i-yo kaana?

¹⁶ Kami-a atu ira takale anamafunjedha unofuneya kaana thindhi. Mbwenye Yohova unonkami-a ira nifunji-e anamafunjedha Bibilya apyao ira tamdhiveliwengana Babi-u wa dhulu. N’nga akala kaninarome funjedha Bibilya na mbo-ene? Ninooda dabwa na vyevyo vinofuna ireya akala ira nino-indi-edha basa hori-u vooda fwanya mutu unofuna funjedha Bibilya. Kaninokaikela ira Yohova unodhowanave raeli-a thindhi li-u.

17. N’nga ninavivwe a-vi akala ira nitooda funjedha Bibilya wavanyumbani?

¹⁷ Njingari ilukulu yooda laba basa lolaleela thitho funji-a atu imbarimbari. Ngari yen’na inonikami-a ira nikalenga osangalala vinjinji. Rumiwi Paulo, wenuo ukami-idhe atu anjinji au Tezalonika ira takale anamafunjedha, atoonga mwemo mwavwela liye ira: “N’nga idedi-edho yi-u, venango imwerumweru yi-u chini? Ee, yotuva yi-u yoigayela vamethoni va Mbwii-u Yesu, vahora yokalavo wee chini? N’nga kai nyo? Mwaimbwarimbari, nyo muli titimi-o na imwerumweru yi-u.” (1 Atez. 2:19, 20; Mayir. 17:1-4) Abali naarongola anjinji anodhivwa e-no malamboano. Rongola mwinango dhina lee Stéphanie vambo-i na man’nee tangakami-idhe atu anjinji fiedhela badiziwa anoonga ira: “Kavali yongo yofuneya vinjinji kwaranya kami-a atu ira tadhivelele wa Yohova.”