Umwene wa Nlungu unodha tonga e-lini ilambo yavathi?
Anama-arela enango ororomeleya a Yesu tafuna taidhiwe ira Umwene wa Nlungu unodha roma tonga e-lini. Yesu atowakhula ira aliwa khatafwanele idhiwa dambo linofuna dhaireya vyongo vyevi. (Mayirelo 1:6, 7) Mbwenye ndulimu Yesu atoonga ira vyongo vidhaireya sogolou, vyothene va hora imbo-i ba-i aliwa tanodha idhiwa “ira Umwene wa Nlungu uli vakwikwi” thitho njihora yeniyo Umwenuo vanofuna aliwa dhatonga ilambo yavathi.—Luka 21:31.
PIVYONGO VIIVI VYAONGILE YESU IRA VINODHA IREYA?
Yesu aongile ira: “Tundu unodha dhimbinuwelana na tundu unango, thitho umwene unodha dhimbinuwelana na umwene unango. Unodha ireya vindharandhara vyanguru, thitho unodha khala sau na ndhala m’mamburo o-iyana-iyana.” (Luka 21:10, 11) Ee-no ninga yongo yolanyedha inaoni-a mutu ira afie unaaliye, izindielo iniva-idhe Yesu inooni-a vochena ira “Umwene wa Nlungu uli vakwikwi.” Vyongo viongile Yesu vyangaireile vyothene vahora imbo-ive vailambo yothene. N’nga vyevyo vinaaireyadi? Dhoweni nione.
1. .KHONDO
Yawa ya 1914 yatoromeya khondo yo-iyana vinjinji na khondo dhaireilevo vamaromelo va istoriya yaatu! Alimbo lemba vistoriya taongile ira 1914 yali yawa yorucha vinjinji mwasiwa yali roma wa khondo yavailambo yothene. Va khondo dhothene khavana-indi-edhiwenga mafaramento akhondo ninga vakhondo yenio, mabomba ogwi-iwa adhulu, gaji okothomuli-a na futi dhinango dhopha atu anjinji vakhondoni. Vanduli vaevyo vatodha khondo yanambili yavailambo yothene, yeniyo ya-indi-edhiwile basa mabomba anoongiwa atômicas. Khumela mu 1914 khondo dhaireya mamburo o-iyana-iyana thitho tatopha mamiliyau aatu
2. VINDHARANDHARA
Bukhu la Academico Britaniya laongile ira vakhadha yawa vanoireya vindharandhara 100 vinanonga “vyongo vinjinji”. Basa laosakhakhasa linoireya wu Estados Unidos liongile ira “movwelana na milanyu (khumela mu 1900), vanoireya vindharandhara vakwikwi na vakwikwi 16 vyanguru vakhadha yawa”. Atu enango tanoonga ira numero ya vindharandhara inaawenjedheleyangave vapeeno pyo-orucha onelamo vindharandhara. Mbwenye nyarwa dhinoona atu mwasa wa vindharandhra, thitho atu anokwa mbaanjinji.
3. .RAMBULELEYA WA VYODYA
Vailambo yothene, vatokhala rambuleleya wa vyodya mwasa wa khondo, wakhi-iwa vyongo, mwasa o-okhaana kobiri thitho anamatonga oing’anela vyolima. Milanyu ya 2018 ya Bungwe Lavailambo Yothene Loing’anela Vyodya yaongile ira: “Ilambo yothene atu okwakwana mamiliyau 821 tanokhaana ndhala thitho atu okwakwana mamiliyau 124 tanozuzuma mwasa wandhala ilukhulu.” Nyezelana mwasa orambuleleya vyodya a-ima okwakwana mamiliyau 3,1 tanokwa vyawa vyothene. Yawa ya 2011 nyezelana mwasa orambuleleya wa vyodya utopha hafu yaa-ima vailambo yothene.
4. .MARENDA OLANDI-ANA NA MARENDA O-OLANDI-ANA
Bukhu la Bungwe loona vyaingumi Lavailambo Yothene laongile ira: “Khomoni wa vyawa 21 vatooneya marenda malukhulu olandi-ana. Marenda oidhiweya nawale, ninga kolera, irenda ya peste na nakhonyole febere amarela, tatowela, thitho marenda mapya atoongiwa, ninga marenda okhothomula a Sars [síndrome respiratória aguda severa], a Mers [síndrome respiratória do Oriente Médio], ebola thitho zika.” Angalive ira masietista na mamediko tana zindiela vinjinji, mirombwe ya marenda enala inofwanyeya undendai vinjinji.
5. .BASA LOLALEELA VAILAMBO YOTHENE
Yesu thitho atoonga ikhundu inango yooni-a izindielo. Liye aongile ira: “Milanyu yaphama ya Umwene inodha laleiwa va ilambo yothene yavathi weo uli atu, ira ukhale umboni wa maziza othene, era e-no khomoni unodha fiya.” (Mateu 24:14) Angalive ira vapenene ilambwila ili vanyarwani, atu okwakwana mamiliyau 8 tanana laleela milanyu yaphama ya Umwene wa Nlungu va vilambo 240 thitho matatamo na vakwikwi na vakwikwi viongelo vyokwaranya 1.000. Wen’na ngumwasa oi khunaireyevo varomile istoriya yaatu!
N’NGA VYEVI VINOTHAPHULELA N’NI WA-IYO?
Vyongo vyaongile Yesu ira vinodha ireya vinana kwakwanela vapeeno. Mwasiwa ngwan’ni ninofuneela idhiwa vyevi? Mwasiwa Yesu aongile ira: “mudhaona vyongo vyevi viireyanga, muidhiwe ira Umwene wa Nlungu uli vakwikwi.”— Luka 21:31.
Chineneeva, Umwene wa Nlungu unodha onechecha ira ifunelo ya Nlungu itoireya vailambo yavathi
Vizindielo vinango vyaniva-idhe Yesu mu vikhundu vinango vya Bibilyani vinonikhami-a vwechecha ira Nlungu ukhaathei-a Umwenee dhulu yawa ya 1914. * Paevo va-eliwile Yesu khala Mwene wa Umwene wa Nlungu. (Salimo 2:2, 4, 6-9) Chineneeva Umwene wa Nlungu udharoma tonga ilambwila, liye unodha mali-a mautongi othene aatu thitho unodha dhi-a ilambwila khala paradaizo, mwemo munofuna khalanga atu dhowa nodhowa.
Madhu a lobelo lo-orucha afunji-idhe Yesu chineneeva anodha kwakwanela: “Umweninyu udhe. Ifunelwinyu iireye ninga dhulu thitho vikhale saasawa na ilambo yavathi vano.” (Mateu 6:10) N’nga Umwene wa Nlungu unairan’ni romela yawa ya 1914? Thitho chini jinofuna ireya Umwenula wadharoma tonga ilambo yavathi?
^ ndima 17 Ira muone vinjinji voonga vya yawa ya 1914 muone bukhu la Zimene Baibulo Limaphunzitsa lokhumi-iwa na Mboni dha Yohova madhu a khomoni 22, mathakuru 217 fiedha 220.
