Molandanana vyevyi, i-yo othene nili duzi na “Liphevo linjinji” lelo Yesu laongile liye ira “Nyarwa ilukhulu.” (Mateu 24:21) Khaninaode tawa mo-orucha va nyarwa ilukhulu. Mbwenye ninooda ira yongo inofuna nivunela. Chini yongo yeyo?

Vyalaleela liye vamwangoni, Yesu aongile ira: Dhowananive sakasaka voroma Umwene na uphama wa Nlungu.” (Mateu 6:33) N’nga ninaode a-vi irana vyevyo?

Sakhani e-la valimburo loroma Umwene wa Nlungu. Vyevyi vinothaphulela ira ninofwanela onanga Umwene wa Nlungu khala ofuneya vinjinji vaingumiyi-u. (Mateu 6:25, 32, 33) Mwasiwa ngwan’ni Umwene unofwanela khala valimburo loroma? Na mwasa oi atu mbo-olongomana khatinaoda mali-a nyarwa. Mbwenye Umwene wa Nlungu unooda irana vyevyi.

Sakhani uphama wa Nlungu. Ninofwanela irana munaodele i-yo ira nikhaleo movwelana na malamulo olongomana a Nlungu. Na mwasa wan’ni? Na mwasa oi akhala ira i-yo ninosakhula mwa-okha va yongo yolongomana venango yo-olongomana, vyevyo vinooda nidhi-edha nyarwa. (Sanganikho 16:25) Mwandhila inango akhala ira ninomvwela Nlungu, ninomdhiveliwi-a liye thitho ninokhaana ingumi yaimwerumweru vinjinji.—Esaya 48:17, 18.

Dhowananive e-la valimburo loroma Umwene na longomana wa Nlungu. Yesu aongile ira enango  anodha dhiveliwana vyongo vyaututuni, thuulelanga ira khaana kobiri dhinjinji unooda akhami-a khaana sogolo laphama. Enango tangakhanle ophingeya na vyorambuleleya vyavaingumini moira khatinaode khaana hora yosakha Umwene wa Nlungu.—Mateu 6:19-21, 25-32.

Mbwenye Yesu atolanyedha ira atu anofuna dhakhami-a Umwene wa Nlungu, hora dhothene anodha khala aimwerumweru chineneeva thitho anodha va-iwa maraeli-o manjinji sogolo.—Mateu 6:33.

Arumiwi a Yesu tatosakha Umwene na longomana wa Nlungu. Mbwenye aliwa khationi khomoni wa nyarwa vaingumi yiwa yothene. Masikhi angalive ee-no aliwa talive ovuneleya. Moi a-vi?

Aliwa takhalileyo movwelana na makhundo olongomana a Nlungu. Ee-no aliwa tatorambela nyarwa dhinokhaana atu na mwasa o-ovwela Nlungu. Aliwa tatokhaana iroromelo yolimba ira Umwene unodha, vyevyo vyatoakhami-a limbanana nyarwa. Thitho Nlungu atoava-a “nguru dhokwaranya dhobaliwana” Ee-no aliwa tatooda vilelana vyogumanana.—2 Akoritiyo 4:7-9.

Makristau oroma tatovwela lamulo laongile Yesu lo-ela Umwene valimburo loroma. Aliwa tatolaleela milanyu ya Umwene uliwethene wafwanyeya atu. (Akolose 1:23) N’nga vatokhala atu anoirana vyevyo malamboano?

Ee! Mboni dha Yohova dhinoidhiwa ira u-adhi hora yoeva ira Umwene wa Nlungu umali-e vyongo vyothakala muilamboi. Ngumwasiwa aliwa anoira munaodela aliwa ira takwakwaneli-edhe madhu aongile Yesu ira: “Milanyu yaphama ya Umwene inodha laleiwa vailambo yothene yavathi weo uli atu, ira ukhale umboni wa maziza othene, era e-no khomoni unodha fiya.”—Mateu 24:14.

Chini inafuna nyo ira mwamala uvwa milanyu yaphamila? I-yo ninoukhokhomezani ira musazi-edhe atu a sidadi lawale la Bereya, ilambo ya Makedoniya. Rumiwi Paulo atoalaleela vya milanyu yaphama ya Umwene, aliwa tatovwela “na rima wethene” khuma vevo aliwa thitho dambo na dambo tanosakasaka Malemba mopwasedha ira taone akhala vyothene vivwide aliwa pyaimbarimbari, na e-no tatoroma khala naingumi yovwelanana vyafunjile aliwavyo.—Mayirelo 17:11, 12.

Nyo munooda ira saasawa naaliwa. Akhala ira nyo munosakasaka na e-la va limburo loroma Umwene na uphama wa Nlungu, munodha fwanya limburo lovuneleya mwachineneeva thitho munodha khaana rendele na vuneleya sogolou.