1. N’nga ndi vyongo vinango viivi vinoova atu enango?

 KATHUULELANI vyongo vyevyo vyaaireele Amboni enango. Nestor na i-yanee tanofuna malaba wewo wafuneela anamalaleya anjinji. * Ira taode irana vyevi tanoofuneela chinja vyongo vinango vaingumi yiwa. Mbwenye aliwa taova ira anongo kaana kobiri dhoyeva thitho katinakalenga osangalala. Biniam wenuo unokala ilambo yeyo basa li-u tokondi-iwa, angakanle wa Mboni dha Yohova, atozindiyela ira ninga m’mbo-i waatu a Nlungu unooda oni-iwa nyarwa. Vyevyo pyam’movi-a. Mbwenye liye aova maningi vyevyo abalee vinaire aliwa taidhiwa ira utovolowa religiau lipya. Valérie atofwanyeyana urenda wa kasa thitho atorucheya fwanya maiferimero oira operasau enao talemezenga vyevyo vyaroromela liye vamwasa wa sangari. Pyovweya ira liye anoova ira unooda wukwa.

2. Mwasiwa ngwan’ni ninofuneela dhilimbi-edha mali-a ova unokaana i-yo?

² N’nga nyo mutoroma ovavo vyongo ninga vyevi? N’nga anjinji a-iyo vano natoovavo vyongo ninga vyevi? Akala kaninofunjedha mwemo munamali-edhe i-yo ova hora dhinjinji, ninooda sakula vyongo modaweya vyevyo vinaode nonga uxamwali-u na Yohova. Vyevyo piyevyo Satana vinofuna liye. Unofuna ira niovenga ira na-avwelenga malamulo a Yohova thangani-avo lamulo loonga ira nilaleelenga milanyu yapama. (Apok. 12:17) Satana ngothakala, wauwalanga thitho wakopolo. Mbwenye munooda dhivunela wa liye. Moi a-vi?

3. Chini inanikami-e mali-a ova una-iyo?

 ³ Naroromela ira Yohova unonidhiveliwana thitho uli uikundwi-u, kaninodha m’mova Satana. (Sal. 118:6) Mwaifwanafwani-o, alembile Salimo 118 atogumanana vyongo vinango vyosukwali-a. Atokaana amwidani anjinji thitho enango tali avizo vilukulu (versu 9, 10). Hora dhinango anopingei-iwa maningi (versu 13). Thitho atova-iwa malangi-o akopolo na Yohova (versu 18). Angalive ira vyali e-no olemba salimula, atoomba ira: “Kandinodha ova.” N’nga chini yam’mwiri-a onanga ira ngovuneleya? Liye anoidhiwa ira angalive ira Yohova atomva-a malangi-o a kopolo, Babee wadhulula anomdhiveliwana maningi. Olemba Salimula anororomela ira, masiki agumanena nyarwa dhoi a-vi, Nlungwee waudhivelula ali okozeya mkami-a.—Sal. 118:29.

4. N’nga ninooda mali-a ova vavyongo vinango akala ninororomela ira Nlungu unonidhiveliwana?

⁴ Niroromelenga ira Yohova unonidhiveliwana vakadha mutu vaekene. Vyevi vinodha nikami-a mali-a ova vavyongo viraru vyeyo atu anjinji vinaova aliwa 1) ova ira katinaode fwanyela banja liwa vyongo vyofuneela 2) ova atu, thitho 3) ova wukwa. Atu aongiwile mundima yoromile, tatooda mali-a ova wan’na aliwa namwasa oi tanororomela ira Yohova unoadhiveliwana.

5. N’nga pyoireya viivi vinamsukwali-e maningi muru wabanja? (Muone iruthiruthi yavakapani.)

⁵ Kristau uli muru wabanja kanaona movevuwa izo yosamalela banjalee. (1 Timo. 5:8) Akala muli muru wabanja pyoodeya ira vahora yasau wachieneneevula, mwanoova ira basa linyu linooda umalelani. Venango mwanoosukwala ira munafwanyega a-vi yodya thitho kobiri dhopagalela nyumba. Venango thitho mwanoova ira akala basa linyu linoomalelani kamunaode fwanya n’nango. Venango thitho mofwanafwana na Nestor na Maria, mwanookaikela chinjanga vyongo vinango namwasa oova ira munongo tambila kobiri dhoyeva. Satana unooda iri-a atu anjinji ira ta-iye mlabela Yohova, namwasa ova ninga weu.

6. N’nga Satana unofuna ira niroromelengan’ni?

⁶ Satana unodhilimbi-edha niiri-a thuulelanga ira Yohova kananithuulela vakadha mutu vaekene thitho kanonikami-a fwanyela vyongo vyofuneela banja li-u. E-no, ninooda onanga ira ninofwanela ira iliyothene yeyo inaode i-yo ira nivunele basa li-u, angalive ira ninaapwanya makundo amalemba.

7. N’nga Yesu unonisikimizelan’ni?

⁷ Yesu wenuo unom’mwidhiwa pama Baba kwaranya mutu uliwethene, unonisikimizeli-a ira Nlungu “unoidhiwa vinofuneela i-yo na-anavepeve.” (Mat. 6:8) Thitho Yesu unoidhiwa ira Yohova ngokozeya niva-a vinofuneela i-yo. Ninga Makristau nili mubanja la Nlungu. E-no ninooda kala osikimiza ira ninga muru wabanja, Yohova unodha ira vyevyo viwandenle liye miru ya mabanja va lemba la 1 Timoteo 5:8.

8. a) N’nga chini inanikami-e ira na-aovenga vamwasa ofwanyela vyongo vyofuneya vya banja li-u? (Mateu 6:31-33) b) N’nga ninasazi-edhe a-vi banja lili vairuthiruthiniva lidhangana vyodya ira tadhadyele vambo-i na rongola mwinango?

⁸ Naroromelanga ira Yohova unonidhiveliwana thitho unodhiveliwana banja li-u, kaninokaikela ira ninodha fwanya vyevyo vinofuneela i-yo. (Muleri Mateu 6:31-33.) Liye unofunechecha niva-a vyevyo vinofuneela i-yo thitho ngova-a modhala mandha! Vapanducha liye ilamboi kaiira ate niva-a vyongo vinanikami-e kaana ingumi baa-i. Mwaudhivela liye atodhali-a ilamboi na vyongo  vyevyo vyaniiri-enga ira nisangalalenga maningi. (Maro. 2:9) Angalive ira hora dhinango ninooda kaana vyongo vyofuneela baa-i, ndi pama thuulelanga ira Yohova nguniva-idhe vyevyo. (Mat. 6:11) Kanidiwale ira vyotheene vyevyo vinadhimane i-yo va-eeni, kavinodha fwanafwana na vyevyo Nlugwi-u waudhivela vinaniva-e liye va-ee-ni thitho sogolou. Leli tilikundo lelo Nestor na Maria lazindiyele aliwa.—Esaya 65:21, 22.

9. N’nga ninofunjedhavon’ni vaifwanafwani-o ya Nestor na Maria?

⁹ Nestor na Maria enao anakala wu Colombia tanookaana ingumi yapama. Aliwa taongile ira: “Natoothuulela vyoi nirome kaana ingumi yo-ofuna vyongo vinjinji naifunelo yoi niwenjedhele urumiwi-u,” tatodhowanave onga ira, “mbwenye nanoova ira kaninasangalalenga namwasa oi ninongo kaana kobiri dhoyeva.” N’nga jaakami-i-dhe chini ira aliwa ta-aove vyevyo? Tatoothuulela ndhila dhinjinji dhedho Yohova dhaathonyi-edhe liye ira unoadhiveliwana. Namwasa ororomela ira liye unodha asamalela tato-iya mabasiwa enao ali akobiri dhinjinji. Aliwa tatoguli-a nyumbiwa thamela isa inango ya ilambo yeyo wafuneela anamalaleya anjinji. N’nga tavivwide a-vi namwasa wa vyongo vyasakunle aliwavyo? Nestor atoonga ira: “Nioni ira madhu ava lemba la Mateu 6:33 mbaimbarimbari. Kaninarambulelevo yongo iliyothene. Va-eeni nitokaana ingumi yosangalala maningi.”

10. Mwasiwa ngwan’ni pyovweya ira atu anoova atu afwiwa?

¹⁰ Romela walelene atu takanle tairelanga afwiwa vyongo vyothakala. (Namal. 8:9) Mwaifwanafwani-o, atu ano-indi-edha basa modaweya izo yiwa, o-ovwela malamulo anoira vyauwalanga, a-ima axikolani anonyoza venango tuchiwa naafwiwa thitho atu enango anooda irela uwalanga atu avabanjaniviwa. Fiya voi atu ovanga atu afwiwa! N’nga Satana unofwanyelavo ngari yoi a-vi?

11-12. N’nga Satana uno-indi-edha a-vi basa ova atu volimbanana i-yo?

¹¹ Satana uno-indi-edha basa ova atu vofuna ni-ii-a irana vyevyo vinofuna Yohova thitho basa lolaleela. (Luka 21:12; Apok. 2:10) Vikundu vyo-iyana-iyana vyailambo ya Satanai vinobalalecha vyonama na vyothakala maningi vyokuza Amboni dha Yohova. Atu anororomela vyonama vyevi anooda ninyoza, venango thitho katinafune ira nivwelane  naaliwa. (Mat. 10:36) N’nga vinoira Satanavi vinofwanela nidabwi-a? Kabe. Liye anooira vyevi thitho hora yaarumiwi.—Mayir. 5:27, 28, 40.

¹² Ova runi-iwa na anamatonga kai fwaramento yeniyo baa-i ino-indi-edha basa Satana kabe. Atu enango anoova maningi vyevyo abaliwa vinaire aliwa namwasa oi mbaa Mboni dha Yohova kwaranyi-a mwemo munaovele aliwa ireliwa uwalanga. Anodhiveliwana maningi abaliwao thitho anofuna ira taidhiwe thitho mdhiveliwana Yohova. Vinoapa rimani taavwanga taonganga vyongo vyo-olemeza Nlungu waimbarimbari thitho anamalabee. Mbwenye hora dhinango Abali oi voroma tali oruni-a, naaliwene thitho anooda roma funjedha Bibilya. N’nga ninaire a-vi atu abanjanimwi-u ta-iya ira vyongo vambo-i na-iyo namwasa wavyevyo vinororomela i-yo?

13. N’nga roromela ira Nlungu unonidhiveliwana unanikami-e a-vi abali-u taniruni-anga? (Salimo 27:10)

¹³ Ninooda limbi-iwa maningi na likundo laimbarimbairi lofwanyeya va lemba la Salimo 27:10. (Muleri.) Nathuulelanga mwemo Yohova munanidhiveliwana liye, ninodhivwa ira nili ovuneleya vevo vanoruni-iwa i-yo. Ninororomela ira liye unodha niva-a yotuva namwasa ovilela. Kwaranyi-a uliwethene Yohova unodha niva-a vyothene vinofuneela i-yo ira nikaena ingumi. Ninodha sangalala thitho mkaanee vauxamwali wapama! Vyevi ndi vyevyo Biniam wenuo um’mongile i-yo walelenule, vyazindiyele liye.

14. N’nga ninofunjedhavon’ni vaifwanafwani-o ya Biniam?

¹⁴ Biniam atokala wa Mboni dha Yohova angalive ira anoidhiwa ira unodha oni-iwa nyarwa maningi. Kathuulelani mwemo idhiwa ira Yohova unomdhiveliwana mwamkami-edhe aliwa ira a-aovenga atu. Liye aongile ira: “Ndatooni-iwa nyarwa maningi mbwenye kwaranyi-a oni-iwa nyarwa naanamatonga, ndanoova maningi oni-iwa nyarwa naatu abanjani mwanga. Ndanoova ira vyevyo visakunle miyo ira ndikale wa Mboni dha Yohova vinomsukwali-a babanga thitho atu avabanjani vi-u tanongoona ira ndili oimwanana.” Mbwenye Biniam anororomela ira Yohova unosamalela atu ale anoadhiveliwana liye. Liye atoonga ira: “Ndatothuulela mwemo Yohova mwamkami-edhe liye vilela vanyarwa dha fuma, rambeliwa, thitho ireliwa vyauwalanga. Ndanoidhiwa ira ndadhowanave kala ororomeleya wa Yohova liye unodha  ndiraeli-a. Ndangamangiwile maulendo mangaasi thitho oni-iwa nyarwa ndatoodhionela ndekene ira Yohova unondikami-a vahora ya nyarwa ndakalave ororomeleya.” Biniam atoofiya voona ira Yohova ndi Babee waimbarimbari thitho anamalabee tatothonyi-edha ira mbaatu abanjanimwee.

15. Mwasiwa ngwan’ni kai vyodabwi-a ira ninoova wukwa?

¹⁵ Bibilya linorumela ira wukwa ndi mwidani. (1 Akor. 15:25, 26) Ninooda sukwala nathuulela vya wukwa simbwasimbwa akala i-yo venango mutu unamdhiveliwana i-yo unaabulela maningi. Mwasiwa ngwan’ni ninoova wukwa? Namwasa oi Yohova anipanduchile mundhila yoi nifunefunenga kaana ingumi yodhowa nodhowa. (Namal. 3:11) Mbwenye ova wukwa mofwanelela unonivunela. Mofwanafwani-a, unooda nikami-a ira nisakulenga mofwanelela vamwasa wavyodya thitho mawaredhelo olimbi-a manungo venango kami-iwa namaifrimero vafuneela e-no thitho rambela ira vyongo vyevyo vina-ele ingumi vangovini.

16. N’nga Satana uno-indi-edha a-vi basa ova obaliwana unokaana i-yo vamwasa okwa vofuna nidhodhomi-a?

¹⁶ Satana unoidhiwa ira ninoona ira ingumi yi-u njapereso yavadhulu. Mbwenye liye unoonga ira ninooda rumeli-a tatila iliyothene thangani-avo uxamwali-u na Yohova naifunelo yoi nivunele ingumi yi-u. (Yobo 2:4, 5) Mbwenye liye unokala adhinami-anga! Vingalive e-no, vofwanyeya ira “liye utokaana ndhila yodhi-edha wukwa,” unodhilimbi-edha i-ndi-edha basa ova obaliwana unokaana i-yo vamwasa okwa ira aniiri-e am-vwela Yohova. (Aeb. 2:14, 15) Hora dhinango atu enao anosogoleliwa na Satana, anonitucha ira tanonipa akala kanino-iya mroromela Yohova. Vanofuneela i-yo pedelo la hospitale mombaranya, hora dhinango Satana unofwanyelavo ngari yoniiri-a sakula vyongo modaweya. Maiferimero venango abali-u ta-ali Amboni, anooda nikanyi-edha ira nirumele e-liwa sangiri vyevyo vinairi-e ira na-avwele malamulo a Nlungu. Venango thitho mutu mwinango unooda nilimbi-a ira nifwanye pedelo la mirombwe lo-ovwelana namakundo amalembani.

17. Movwelana na lemba la Aroma 8:37-39, mwasiwa ngwan’ni kaninofwanela ova wukwa?

¹⁷ Angalive ira kaninofuna wukwa ninoidhiwa ira Yohova kanadha i-ya nidhiveliwana masiki nikwe. (Muleri Aroma 8:37-39.) Afwee a Yohova takwa, liye unoathuulelave thitho vinokala ninga tatokaanave ingumi. (Luka 20:37, 38) Unofunechecha dhaavenyathi-a. (Yobo 14:15) Yohova atopagali pereso yavadhulu maningi “naifunelo yoi . . . nidhakaena ingumi yo-omala.” (Juwau 3:16) Ninoidhiwa ira liye unonidhiveliwana maningi thitho unonithuulela. E-no malo mom-iya Yohova nabulelanga venango wukwa ninomnyindela ira anilimbi-e, niva-a zelu na kopolo. Vyevi ndi vyevyo vyairile Valérie naman’nee.—Sal. 41:3.

18. N’nga ninofunjedhavon’ni vaifwanafwani-o ya Valérie?

¹⁸ Angana vyawa 35, Valérie atofwanyeyana urenda wa kasa oopi-a maningi. Kaonani mdhiveliwana Nlungu mwamkami-edhe aliwa ira a-aove wukwa. Liye aongile ira: “Vyongo vyatochinja mo-odedi-edhela vaingumi yi-u ndingafwanyeilena kasila. Ndanofwanela iriwa operasau ira ndikaena ingumi. Ndatotapanya namaiferimero manjinji oira operasau mbwenye othenene enala tatookonda ndiira operasau o-o-ela sangari. Ndanoova mbwenye vothuulela lamulo la Nlungu, kandarumenle ira ndi-eliwe sangari! Vaingumi yanga yothene Yohova ukanle andithonyi-edhanga  ira unondidhiveliwana maningi. Va-eeni ndatokaana ngari yothonyi-edha ira namiyene thitho ndanoomdhiveliwana. Hora dhothene akala ira vyongo kaviwendile pama, vyanondiiri-a ira ndisikimize rima mdhiveliwi-a Yohova a-kala ganyali-a Satana. Moi e-no ndatoiriwa operasau mo-o-eliwa sangari thitho vyatowenda pama. Angalive ira manungwanga katili pama maningi, hora dhothene Yohova unoniva-a vyevyo vinofuneela i-yo. Mwaifwanafwani-o, ‘vagumano wakomoni wasumana wenuo wairile i-yo ndingakurudheile vang’ono vakasila, ndatofunjedha mwasa oi limbani rima vogumanana nyarwa.’ * Mwasa wen’na watonilimbi-a maningi thitho nanouleri mowelelawelela. Myasa dhofwanafwana na wen’na thitho ira vyongo vyokuza lambela hora dhothene, utonikami-a miyo na mananga kaana rendele warimani, kala othuulela pama thitho sakula vyongo mwazelu.”

19. N’nga chini inofuna ireya vachineneeva?

¹⁹ Mokami-iwa na Yohova, Makristau availambo yothene yavathi tatooda limbanana nyarwa dho-iyana-iyana thitho mruni-a namanami-a. (1 Pe. 5:8, 9) Nyo thitho munooda. Vachineneeva Yohova unom’mwandela Yesu naanamatonga afwee ira “tanonge mabasa anamanami-a.” (1 Ju. 3:8) Vyevi vyadhaireya atu ale anofuna dhalabelanga Nlungu vailamboi katinadha ovanga “uliwethene thitho kaunadha kala vyongo vyoopi-a.” (Esaya 54:14; Mik. 4:4) Mbwenye vanodedi-edhela i-yo vyevi, ninofwanela dhilimbi-edha mali-anga ova unakaana i-yo.

20. N’nga chini inanikami-e ira na-aovenga?

²⁰ Ninofwanela dhowanave roromela maningi ira Yohova, unonidhiveliwana thitho vunela anamalabee. Thuulela thitho tapanya mwemo Yohova mwavunelele liye anamalabee ndulimu, unooda nikami-a irana vyevi. Thitho nithuulelenga mwemo mukanle liye anikami-anga i-yo vaokene vahora ya nyarwa. Mokami-iwa na Yohova ninooda mali-a ova!—Sal. 34:4.