1. Movwelana na lemba la Namalaleya 7:20, n’nga ndilikundo liivi laimbarimbari laongile Mwene Solomu?

 MWENE Solomu alembile ira: “Kavali mutu olongomana vailambo yavathi unoira vyapamave baa-i liye adawanga.” (Namal. 7:20) Vyevi pyaimbarimbari namwasa oi i-yo othene nili odawa. (1 Ju. 1:8) E-no ninofuna ira Nlungu thitho afwi-u tanilevelelenga.

2. N’nga ninodhivwa a-vi fwi-u wavarimani anilevelela?

² Venango munothuulela hora inango vamdawelenyo fwinyu wavarimani. Mwanofuna saka-edha vyadawi-idhe nyoovyo ira murome vwelana okoka, e-no mwatompepesa kumela vathi varima. N’nga mwadhivwide a-vi fwinyuo adhauleveleleni na rima wethene? N’nga mwatoodhivwa pama? Ee, vinooneya ira mwatodhivwa pama thitho mwatosangala maningi!

3. N’nga ninofuna nitapanyen’ni muyofunjedha yei?

³ Ninofuna ira Yohova akale fwi-u wavarimani mbwenye hora dhinango ninooda onga venango ira vyongo vinamsukwali-e. N’nga ninasikimizele a-vi ira liye ngofunechecha nilevelela? N’nga vali i-yana oi a-vi vari va Yohova na i-yovano aatu vamwasa olevelela? N’nga baatu a-vi enao Yohova anaalevelele liye?

4. Mwasiwa ngwan’ni ninokala osikimiza ira Yohova ngokozeya levelela?

⁴ Madhu a Nlungu anonisikimizela ira liye ngokozeya levelela.  Vyadhionga liye wa Mose dhela mwaangelo vamwangoni wa Sinai, aongile ira: “Yohova, Yohova, Nlungu watangaranga na walelo, o-othakaleliwa mombaranya thitho odhaliwa na riya rima o-omala naimbarimbari. Olokotedha mamiliau amaziza riya rima o-omala, olevelela vyodawa ving’ono na vilukulu.” (Ekis. 34:6, 7) Yohova ndi Nlugu oriya rima thitho watangaranga, oi hora dhothene unokala okozeya levelela atu odawa ale achinyuwile.—Nee. 9:17; Sal. 86:15.

5. Movwelana na lemba la Salimo 103:13, 14, n’nga Yohova unoiran’ni namwasa owaidhiwa pama atu?

⁵ Ninga namapanduchi-u, Yohova unoidhiwa iliyothene yokuza i-yo vano aatu. N’nga kathuulelani! unoidhiwa iliyothene jokuza mutu uliwethene vailamboi. (Sal. 139:15-17) E-no unooda ona dawa wethene ulandele i-yo waanamabali-u. Wenjedhela veva, liye unoidhiwa vyongo vikanle viniireelanga vyevyo vinoomba umutwi-u. Namwasa oi Yohova unoidhiwa maningi atu, n’nga vyevi vinom’mwiri-a ira airenga a-vi? Vinom’mwiri-a ira anivwelenga tangaranga.—Sal. 78:39; muleri Salimo 103:13, 14.

6. N’nga Yohova athonyi-edhe a-vi ira unofuna nilevelela?

⁶ Yohova atothonyi-edha ira ngofunechecha nilevelela. Liye unovwechecha ira namwasa wavyoira vya mutu oroma, Adamu, i-yo othene nili odawa thitho ninokwa. (Aroma 5:12) Kavali yongo yaire i-yo ira nidhivulumuche venango vulumucha atu enango vatembelelo leli. (Sal. 49:7-9) Mbwenye Nlungwi-u waudhivela atonithonyi-edha tangaranga, thitho atosaka-edha vyoi nivulumuchiwe. N’nga liye airile a-vi vyevi? Ninga mwemo lemba la Juwau 3:16 munaongela aliwa, Yohova atomruma Mwanee obaliwa ekene ira adhanikwele. (Mat. 20:28; Aroma 5:19) Yesu atooni-iwa nyarwa thitho piwa naifunelo yoi uliwethene ororomela mwaliye avulumuchiwe. (Aeb. 2:9) Vinooneya ira vyatompi-a rimani maningi Yohova m’mona Mwanee akwanga ukwa opa thitho ova-a manyadho! Veva pyooneelatu ira Yohova, kaarumeli-e ira Mwanee akwe a-akale ira kanafuna nilevelela.

7. N’nga ndivifwanafwani-edho vinango viivi vyaatu oongiwa Bibilyani, enao Yohova aalevelele liye na rima wethene?

⁷ Bibilyani mutokala vifwanafwani-o vyaatu  anjinji enao Yohova aalevelele liye na rima wethene. (Aef. 4:32) N’ga nyo munathuulela ira ali aani? Venango munothuulela vya Mwene Manase. Mutu wen’na atoira vyodawa vilukuluvilukulu thitho vyothakala maningi. Anoosogolela atu volambela onama. Atoopa a-imee voavelela sembe wa milungu yonama. Atofiya vosaka-edha fano maliimecha kachisini ochena wa Yohova. Voonga vya Manase, Bibilya linoonga ira: “Liye atoira vyongo vinjinji vyothakala vamethoni va Yohova thitho vyatomthakaleliwi-a.” (2 Limb. 33:2-7) Mbwenye liye angachinyuwile kumela vathi varima Yohova atomlevelela. Thitho atofiyedha vom’mweleli-edha vaumwenee. (2 Limb. 33:12, 13) Pyoodeya thitho ira munothuulela vya Mwene Davide, wenuo airile vyodawa vilukulu thangani-avo mararuo thitho upa mutu. Mbwenye angachinyuwile kumela vathi varima norumela vyodawavyee, Yohova atomlevelela. (2 Sam. 12:9, 10, 13, 14) E-no ninooda sikimizela ira Yohova ngofunechecha levelela atu ale tachinyuwile. Thitho ninga munofuna i-yo onela, Yohova ngo-iyana maningi naatu vamwasa olevelela.

8. N’nga kala namatonga wapama maningi unokuza a-vi mwemo Yohova munairela liye vamwasa olevelela?

⁸ Yohova “ngunamatonga wailambo yothene yavathi.” (Maro. 18:25) Namatonga wapama unofuneela idhiwa pama malamulo. Mwemo ndi ninga vili Yohova, namwasa owenjedhela vokala namatongi-u liye utoniva-a malamulo. (Esaya 33:22) Thitho Yohova ekene ngunooda vwechecha paama vamwasa wa vyongo vyapama na vyothakala. N’nga namatonga wapama unofuneela thitho kala oi a-vi? Unofuneela avwechechenga paama makundo othene a myasa a-anatonge. E-no Yohova ngunamatonga wapama namwasa oi unoidhiwa jilijothene.

9. N’nga ndi vyongo viivi vinaidhiwa Yohova afunanga levelela mutu?

⁹ Mo-iyana naatu anatonga, hora dhothene Yohova unoidhiwa pama makundo a myasa inafuna liye tonga. (Maro. 18:20, 21; Sal. 90:8) Liye unoidhiwa vyokwaranya vile atu vinaona aliwa venango vivwa. Unovwechecha pama mwemo mutu munairela liye vyongo namwasa waibaliweloyee, moda muleliwile liye, unakala liye, mwemo munavwela liye na munathuulela liye. Yohova unoidhiwa thitho vyevyo vili rimani. Liye unovwechecha pama vifunelo thitho vyevyo vinom’mwiri-a mutu uliwethene irana vyongo vinangovyee. Kavali jongo ja-anaona Yohova. (Aeb. 4:13) E-no Yohova alevelelanga, unokala angaidhiwile iliyothene yokuza mwasuo.

10. Mwasiwa ngwan’ni ninoonga ira hora dhothene Yohova unotonga molongomana? (Dotornomio 32:4)

¹⁰ Hora dhothene Yohova unotonga molongomana thitho kanosakula navang’onovene. Ira alevelele mutu kavinotukulela moda munaoneela mutuo, fuma, vweya venango dodolisolee. (1 Sam. 16:7; Tiy. 2:1-4) Kavali mutu unamkanyi-edhe Yohova ira aire vyongo venango mdyekela. (2 Limb. 19:7) Liye kanosakula vyongo namwasa othakaleliwa venango moda munovwela liye. (Ekis. 34:7) Pyo-okaikeli-a ira zindiyela thitho vwechecha vyongo, unom’mwiri-a Yohova kala namatonga wapama maningi.—Muleri Dotornomio 32:4.

11. N’nga Yohova ngo-iyana a-vi naatu enango vamwasa olevelela?

¹¹ Atu alemba Malemba Aieberi tanoozindiyela ira Yohova, ngo-iyana maningi naatu enango vamwasa olevelela. Hora dhinango aliwa tanoo-indi-edha basa madhu Aiyeberi enao bukhu n’nango laongile ira, “anoonga  simbwasimbwa vile Nlungu vinaira liye volevelela atu odawa, thito kalinaonga vya mwezo olevelela wenuo mutu unairela liye mutu mfwee, wenuo uli oyeva.” Yohova ekene gunooda levelela mo-o-iyedhela wa mutu uchinyuwile. N’nga inaireya chini Yohova anilevelela?

12-13. a) N’nga mutu unosangalala na vyongo viivi Yohova amlevelela? b) N’nga mutu unosangalala wa hora yolapela moi a-vi namaraeli-o odha namwasa oi Yohova utomlevelela?

¹² Narumela ira Yohova utonilevelela ninosangalala na “hora yapama,” vyevyo vinothangani-avo kaana rendele wamathuulelo thitho ithuulela rima yochena. “Yohova ekene” ngunanilevelela moi e-no a-kala atu. (Mayir. 3:19) Liye anilevelela ninokala thitho vauxamwali wapama na liye ninga kaninarome mdawelavo.

¹³ Yohova anilevelela kanavithuulelave thitho niombanga landu namwasa wayodawa iirile i-yo. (Esaya 43:25; Jer. 31:34) Liye uno-ela vyodawa vi-u undendai “ninga mwemo makumelo adhuwa mulapelena aliwa namavirelo adhuwa.” * (Sal. 103:12) Nathuulela mwemo Yohova munoirela liye vyongo vonilevelela, ninosowa yoonga thitho ninomsimba maningi. (Sal. 130:4) N’nga Yohova unolevelela atu oi a-vi?

14. N’nga va-eni nifunjedhilen’ni vamwasa wamwemo Yohova munoira liye afuna sakula levelela?

¹⁴ Ninga muonele i-yo, kaiira Yohova unonilevelela votukulela ulukula wayodawa yairile i-yo. Nitofunjedha thitho ira afunanga sakula ira alevelele Yohova uno-indi-edha basa vinoidhiwa liye ninga namapanduchi-u oniva-a malamulo thitho namatongi-u. N’nga pivyongo viivi vinoona Yohova?

15. Movwelana na lemba la Luka 12:47, 48, n’nga ndi yongo iivi inango inothuulela Yohova afunanga levelela?

¹⁵ Yohova unothuulela akala mutu uirile yodauo unoidhiwa ira viirile liyevyo pyodaweya. Yesu atoonga movweya pama likundo leli va lemba la Luka 12:47, 48. (Muleri.) Mutu unakozeela ira aire vyothakala mbwenye aidhiwanga pama vinofuna liye iravyo ira Yohova unoviidanana, unakala airanga yodawa ilukulu maningi. Mutu wenuo unokala vangovini ira kanaleveleliwe. (Marku 3:29; Juwau 9:41)  Mbwenye nirumele ira hora dhinango ninokala ningaidhiwile ira vyairile i-yo pyodaweya. N’nga vyaira e-no vanokala idedi-edho yoi ninoleveleliwa? Ee! Vyevi vinonifii-a va yongo inango yeyo Yohova inothuulela liye.

16. N’nga chinyuwa kuira a-vi, n’nga kofuneya a-vi ira Yohova anilevelele?

¹⁶ Yongo inango inothuulela Yohova, ndi akala mutu adauo utochinyuwa kumela vathi va rima. N’nga chinyuwa kuira a-vi? Chinyuwa unothapulela “chinja mathuulelo, mwemo munaonela i-yo vyongo thitho vifunelo vi-u.” Unothangani-avo dhivwela tangaranga maningi namwasa wavyongo vyothakala vyairile i-yo, venango namwasa o-oira vyongo vyofwanelela. Kaiira mutu ochinyuwa unodhivwela tangaranga namwasa wavyothakala viirile liye baa-i mbwenye namwasa oimanana thitho limbi-a uxamwalee na Yohova vyevyo vinoiri-a ira aire yodawiyo. Thuulelani ira Mwene Manase na Mwene Davide tatoira thitho vyodawa vilukulu; mbwenye Yohova atoalevelela namwasa oi tatochinyuwa kumela vathi varima. (1 Mam. 14:8) E-no, ira Yohova anilevelele unofwanela ona umboni othonyi-edha ira nitochinyuwadi. Kaiira dhivwela tangaranga vavyodawa vi-u baa-i kokwakwanela, mbwenye ninofwanela kala okozeya iravo yongo mombaranya. * Vyevi vinonifii-a thitho vayongo inango inathuulela Yohova.

17. N’nga chinja kuira a-vi, n’nga unanikami-e a-vi ira na-awelele thitho uvyodawa? (Esaya 55:7)

¹⁷ Yongo inango yofuneya maningi inothuulela Yohova, “kuchinja.” Mumadhu enango nionge ira mutu unofwanela i-yachi vyothakala vyevyo vinoira liye noroma ira vinofuna Yohova. (Muleri Esaya 55:7.) Mutuo unofwanela chinja moda munothuulela liye naifunelo yoi asogoleliwenga namathuulelo a Yohova. (Aroma 12:2; Aef. 4:23) Unofwanela kala osikimiza rima ira a-iye vyongo vyothakala vyevyo vyathuulela liye thitho viirana. (Akol. 3:7-10) Thitho ninofwanela roromela sembe ya Kristu ira Yohova anilevelele thitho cheni-a vyodawa vi-u. Yohova unonilevelela vo-indi-edha basa sembe yen’na akala utoona ira ninodhilimbi-edha chinja ingumi yi-u.—1 Ju. 1:7.

18. N’nga nifunjedhilen’ni vyokuza Yohova vamwasa olevelela?

¹⁸ Dhoweni nitapanyeni mogwandela makundo enango malukulu afunjedhile i-yo. Yohova nguule unolevelela maningi muvyopanduchiwa vyothene. Mwasiwa ngwan’ni ninoonga e-no? Yoroma, hora dhothene liye unokala okozeya levelela. Yanambili, unoniidhiwa pama maningi thitho unoidhiwa jilijothene jokuza i-yo, namwasa oi nguliye unaidhiwe pama akala nitochinyuwadi kumela vathi va rima. Thitho yongo yanararu, unonilevelela mo-o-iyedhela moi vinokala ninga kanimdawele wene. Vyevi vinonikami-a ira nikaena ithuulela rima yochena thitho ira nikale vauxamwali wapama maningi na liye.

19. Angalive ira kanili olongomana thitho ninodhowanave dawi-a vyongo, mwasiwa ngwan’ni ninokala osangalala?

¹⁹ Pyaimbarimbari ira va-eeni, ninongo dhowanave dawa namwasa oi nili atu o-olongomana. Mbwenye ninooda limbi-iwa maningi namadhu ofwanyeya mubukhu la it Estudo perspicaz das escrituras, Volume 2, thakuru 771, vevo vanoonga ira: “Namwasa wa tangaranga, Yohova unothuulela vyofooka vyaarumiwee, aliwa katinofwanela dhiombanga landu na vinodawi-a aliwa namwasa oi kai olongomana. (Sal. 103:8-14; 130:3) Akala hora dhothene ninodhilimbi-edha ira vinofuna Nlungu, ninodha kala osangalala. (Afil. 4:4-6; 1 Ju. 3:19-22).” Vyevi pyolimbi-a maningi!

20. N’nga ninodha tapanyan’ni muyofunjedha yo-arela?

²⁰ Ninomsimba maningi Yohova namwasa oi ngokozeya nilevelela nadhivwelanga tangaranga vavyodawa viirile i-yo. N’nga ninamsazi-edhe a-vi Yohova vamwasa olevelela? N’nga ninofwanafwana na Yohova mundhila dhiivi vamwasa olevelela, n’nga nino-iyana a-vi? N’nga vwechecha i-yana weu kofuneya moi a-vi? Yofunjedha yo-arela, inodha wakula vyofuka vyevi.