1. N’nga atu ororomeleya anodha kala a-vi va uxamwali na Yohova?

BANJA la Yohova mutokala Yesu wenuo uli oroma baliwa mwa vyopandhuchiwa vyotene thitho angelo anjinji. (Akol. 1:15; Sal. 103:20) Angali vailambo yavathi Yesu atothonyi-edha ira atu ororomeleya anoodha m’mona Yohova kala Babiwa. Vyaonga liye na anamafunjedhee, Yesu atoonga ira “Babanga ngu Babinyu.” (Juwau 20:17) Thitho nadhivelela wa Yohova nobadiziwa ninokala mu banja la abali na arongola enao anadhivelana.—Marku 10:29, 30.

2. N’nga ninofuna nitapanyenin’ni mu yofunjedha yei?

² Atu enango vinowarucha ira tamonenga Yohova ninga Babiwa. Enango thitho katinaidhiwa mwemo munatonyi-edhele aliwa udhivela wa abali na arongola. Muyofunjedha yei ninoona mwemo Yesu munanikami-edha liye ira nimonenga Yohova ninga Babi-u waudhivela wenuo unakayena i-yo vauxamwali olimba. Ninodha ona thitho mwemo munam’sazi-edhe i-yo Yohova, naira vyongo naabali naarongoli-u.

3. N’nga lobelo laifwanafwani-o linanikami-e a-vi kala vauxamwali na Yohova?

³ Yohova ngu Baba waudhivela. Yesu unofuna ira nimonenga ninga munom’monela liye. Liye um’mona ninga namabala vaudhivela thitho ooma mrima wenuo unaodhe m’mongangana hora iliyothene, a-kala ninga mutu waizo wenuo unoumi-a rime nowandela atu vyoira. Umboni wa vyevyo pya Yesu vifunji-idhe liye va mwasa wa lobelo. Liye uromile wonga lobelo laifwanafwani-o lina madhu oi “Babi-u”. (Mat. 6:9) Yesu angaodile wonga ira niongenga ira Yohova “wakopolo dhotene”, “namapandhucha”, “venango Mwene wokalao dhowanodhowa” bwenye madhina enala mbaizo. (Maro. 49:25; Esaya  40:28; 1 Timo. 1:17) Malo mwa vyevyo Yesu atoniwandela ira Yohova ngu “Baba.”

4. N’nga ninaidhiwa a-vi ira Yohova unofuna ira nikale vauxamwali na liye?

⁴ N’nga vinouruchani m’mona Yohova ninga Baba? Enango vinoarucha. Venango namwasa wuleliwile aliwa vinoarucha idhiwa ira vatokala anamabala audhivela. Pyolimbi-a idhiwa ira Yohova unovwechecha mwemo munovwela i-yo. Liye unofuna ira nikale vauxamwali na liye. Ngumwasiwa madhwe anonilimbi-a ira: “Wandamelani Nlungu, thitho liye unouwandamelani”. (Tiy. 4:8) Yohova unonidhiveliwana thitho unoniwandela ira unodhakala Babi-u wapama vinjinji.

5. Movwelana na lemba la Luka 10:22, n’nga Yesu unanikami-e a-vi kala vauxamwali na Yohova?

⁵ Yesu unodha nikami-a ira nikale vauxamwali na Yohova. Liye unomwidhiwa pama Yohova thitho unosazi-edha pama makalelwe moi atoonga ira: “Undioni miyo utom’mona Baba”. (Juwau 14:9) Mofwanafwana na mwana oroma baliwa banjani, Yesu unonifunji-a vyevyo vinaire i-yo ira nilemezenga thitho mvuruwana Babi-u no rambela m’sukwali-a na kalanga wosangalala na i-yo. Vyevyo Yesu vyairile liye angali vailambo yavathivano, vinokami-a no vwechecha ira Yohova ngooma rima thitho waudhivela. (Muleri Luka 10:22.) Dhoweni nithuuleleni vifwanafwani-o vingasi.

6. Velelani ifwanafwani-o yothonyi-edha vyairile Yohova vom’vuruwana mwanee?

⁶ Yohova unovuruwana a-imee talobelanga wa liye. Dhoweni nioneni vyevyo vyairile liye vomvuruwana mwanee. Mo-okaikela Yohova anoovwa malobelo manjinji aira mwanee angali vailambo yavathi. (Luka 5:16) Liye atomvuruwana Yesu alobelanga vamwasa osimbwa ofuneya, mwaifwanafwani-o vasakasaka liye arumiwe 12. (Luka 6:12, 13) Atom’vwa thitho Yesu alobelanga vahora yavikumbanyedha liye. Anga-adhi vang’ono ira aveleliwe, Yesu atoolobela kumela vathi varima wa Babee vamwasa okuza vyowesedha vilukulu vyadedi-edha liye gumanana. Kaiira Yohova aira vuruwana malobelo a Yesu baa-i, mbwenye am’toruma ngelo ira amalimbi-e mwanee odhiveliwiwa.—Luka 22:41-44.

7. N’nga munavwa a-vi mwaona ira Yohova unovwa malobelo aatwee?

 ⁷ Malamboano Yohova unodhowanave vuruwanechecha malobelo aarumiwee thitho unoawakula vahora yofwanelela na mundhila yapama. (Sal. 116:1, 2) Rongola mwinango wau India atoona mwemo Yohova mwawakulele liye lobelo lee. Liye anoovuteya na vikumbanyedha thitho atolobela wa Yohova kumela vathi varima va yoruchayeyo. Rongolula alembile ira: “Programa ya JW Broadcasting^® ya Maio 2019 yaonga vinaire i-yo nakala ovikumbanyedha wa miyo, yatoofiya vahora yofwanelela. Programila yali yowakula yamalobelwanga.”

8. N’nga Yohova athonyi-edhe a-vi ira unom’dhiveliwana Yesu?

⁸ Yohova unonidhiveliwana thitho unonisamalela ninga mwemo mwamsamalele liye Yesu, vahora yothene yenio yaira liye urumiwe vailambo lavathivano wenuo wali worucha vinjinji. (Juwau 5:20) Liye atom’kami-a Yesu ira akaena iroromelo yolimba nolimbi-a vevo vali liye avikumbanyedhanga thitho atoonechecha ira utokaana vyofuneleya vyauzimu na vyaututuni. Yohova anomwandela thitho mwanee ira unosangalala na liye. (Mat. 3:16, 17) Voi atoidhiwa ira Babee waudhivela kanodha m’i-yachi, Yesu kaadhiona ira uliekene.—Juwau 8:16.

9. N’nga ninaidhiwa a-vi ira Yohova unonidhiveliwana?

⁹ Mofwanafwana na Yesu, i-yo othe nikadhi nionanga ira Yohova unonithonyi-edha udhivela mundhila dho-iyana-iyana. Kathulelani ira: Yohova utorumela ira nikale vauxamwali na liye thitho utoniva-a abali naarongola anjinji ananikami-a kala osangalala thitho nilimbi-a nagumanana nyarwa. (Juwau 6:44) Yohova utoniva thitho vyothene vyofuneela ira nikayena iroromelo yolimba. Liye unonikami-a thitho ira nifwanyenga vyongo vinofuneela i-yo vaingumi yi-u ya dambo nadambo. (Mat. 6:31, 32) Natuulelangani udhive unonioni-a Yohova, i-yo thitho ninoroma mdhiveliwana vinjinji.

10. N’nga ninofunjedhavon’ni va vyongo vinoairela Yohova abali-u?

¹⁰ Yohova unowadhiveliwana abali na arongoli-u. Mbwenye hora dhinango, vinonirucha ira nidhiveliwengana. Vyevi vinooda ireya namwasa wa makalelo na ukumele i-yo. Thitho i-yo othene, ninowoda irana vinango vinanyanyuwi-e venango sukwali-a atu enango. Mbwenye i-yo othene ninoda irana vyongo vinairi-e ira abali na arongola tadhivelengana. Ninoira e-no vomsazi-edha Babi-u vodhiveliwana abali na arongoli-u. (Aef. 5:1, 2; 1 Ju. 4:19) Dhoweni nioneni vinofunjedhavo i-yo vaifwanafwani-o ya Yohova.

11. N’nga Yesu athonyi-edhe a-vi tangaranga dhilukulu dha Yohova?

¹¹ Yohova “ngwatangaranga dhilukulu.” (Luka 1:78) Mutu wa tangaranga unokuzeya aona atu enango tavuteyanga no saka ndhila dho-iyana-iyana ira aode akami-a, noalimbi-a. Mwemo Yesu mwairela liye vyongo naatu enango, vyatoothonyi-edha mwemo Yohova munoadhiveliwana liye atwao. (Juwau 5:19) Vahora inango Yesu angaoni mwinji waatu, “atowa vwela tangaranga mwasiwa tawenda wu nawu ninga mabila o-okaana namakumbiza.” (Mat. 9:36) Wenjedhela voavwela tangaranga, Yesu thitho atoira vyongo vinango voakami-a, liye atoaili-a atu obulela thitho kami-a atu talaba mabasa “mwatindhi na onyemela.”—Mat. 11:28-30; 14:14.

12. N’nga ninathonyi-edhe avi tangaranga waabali na arongoli-u?

¹² Ninofwanela roma thuulela nyarwa dhedho abali naarongoli-u dhinogumana aliwa,  ira niode avwela tangaranga. Mwaifwanafwani-o rongola mwinango unooda gumanana nyarwa ninga marenda malukulu. Venango liye kanaodenga onga, mbwenye unooda simba akala ira atu enango tanom’kami-a. Ira niidhiwe mwemo munakami-ele i-yo, ninooda ira pama dhifuka ira: N’nga unoodadi laba pama mabasa ira asamalele banja lee? N’nga ndinofwanela m’kami-a piya yodya venango cheeni-a m’mbamwee? Venango bali mwinango basa litom’malela. N’nga ndinomva-amo kobiri niga yomtuva venango a-m’mwandela ira um’va-idhe ngu-iyo naifunelo yofuna mkami-a fiyedha angafwaidhe basa n’nango?

13-14. N’nga ninaire a-vi ira nikale ova-a modhala mandha ninga Yohova?

¹³ Yohova ngova-a modhala mandha. (Mat. 5:45) Mofwanafwana na Yohova nikami-enga atu enango masiki ta-anivepileve kanidikilenga ira abali-u na arongoli-u tanivepe ira naavwele tangaranga. Yohova unonikumi-edha dhualee dambo nlilothene, mbwenye mo-oira mvepa. Ka-a wa dhuwalo unokami-a mutu uliwetene a-kala anosimbave baa-i. N’nga kamunarumela ira Yohova unothonyi-edha ira unonidhiveliwana voniva-a vyevyo vinofuneela i-yo? Ninom’dhiveliwana vinjinji Yohova mwasa oi ngooma rima na ova-a modhala mandha.

¹⁴ Vomsazi-edha Babi-u wa dhulu, abali na arongoli-u anjinji tanothonyi-edha va-a modhala mandha. Mwaifwanafwani-o, yawa ya 2013, lipevo nlukulo loitaniwa Haiyan latononga vyongo vinjinji wu Filipina. Nyumba na vyongo vinjinji vyaabali vyatonongeya. Mbwenye banjaliwa lavailambo yothee latoakami-a mombaranya. Anjinji mwaaliwa tatoovelela kobiri dhiwa venango labanao basa lomanga moi nyumba dhowandamela 750 dhatoosaka-edhiwa venango mangiwa va-ana vire yawa. Vahora ya sawu wa COVID-19, abali naarongola tatokaana thindhi vokami-ana. Nambaranyanga kami-ana ninothonyi-eda ira ninodhivelana.

15-16. N’nga lemba la Luka 6:36 linoniwandela ira niirengan’ni vomsazi-eda Babi-u?

¹⁵ Yohova ngwatangaranga na olevelela. (Muleri Luka 6:36.) Dambo nlilothene, Babi-u wa dhulu, unonithonyi-edha ira  ngwatangaranga. (Sal. 103:10-14) Anama-arela a Yesu katali atu ochena, mbwenye liye atoathonyi-eda tangaranga oalevelela. Liye ali ofunechecha velela ingumiyee ira vyodawa vyaatu vileveleliwe. (1 Ju. 2:1, 2) Rima olevelela atu enango, thitho tangaranga dha Yohova na Yesu, vinoniiri-a ira nikale vauxamwali naaliwa.

¹⁶ Ninoroma adhiveliana vinjinji abali-u “naalevelelanga na rima wethene.” (Aef. 4:32) Pyaimbarimbari ira hora dinango levelela atu enango vinooda kala vyorucha vinjinji, mbwenye ninofwanela dhilimbi-edha ira nilevelelengana. Rongola mwinango atoona ira mwasa mwinango wamu Nsanja ya Olonda ya muru oi “muzikulukirana ndi mtima onse” * yatom’kami-a vinjinji. Liye alembile ira: “Mwasula watondikami-a vwechecha mwemo levelela atu enango munandikami-edhe aliwa. Atoonga thitho ira levelela atu enango kunathapulela ira onanga ira vyevyo vinoiranyoovyo pyapama venango pyoyeva”. Malo mwa vyevyo, vinothapulela a-lokota vyongo rimani nodhowanave kaana rendele wa rimani. Nalevelelanga abali na arongoli-u na rima wethene, ninothonyi-eda ira ninoadhiveliwana thithi ninosazi-edha Babi-u Yohova.

17. Movwelana na lemba la Mateu 5:16, n’nga ninaire a-vi ira nilemeze Babi-u wa dhulu?

¹⁷ Ninosimba vinjinji vokala mubanja lavailambo yothenee loi atwiwa mbodhivelana. Ninofunechecha kami-a atu anjinji mwemo muodele i-yo ira naaliwene thitho tarome mlambela Nlungwi-u. Vothuulela makundo enala ninofwanela ira polepole, ira na-airena jilijothenee jinairi-e atu thuulelanga vyothakala vyokuza atu a Yohova, na Babi-u wa dhulu. Hora dothene nivilimbi-edenga irana vyevyo vinakami-e atu kaana ifunelo ya milanyu yapama.—Muleri Mateu 5:16.

18. N’nga chin’ni inofuna nikami-anga ira nilaleelenga mombaranya?

¹⁸ Hora dhinango atu enango anooda ninyoza venango nioni-a nyarwa mwasa oi ninovwela Babi-u wa dhulu. N’nga ninofwanela ira n’ni akala ninoova wandela atu enango vyongo vinororomela  i-yo? Ninyindelenga Yohova thitho mwanee ira anikami-e. Yesu atoawandela anamafunjedee ira: “Katinofwanela vikumbanyedhanga va vyevyo vinofuna aliwa dhowa maonga”. Mwasiwa ngwan’ni? Liye atoonga ira “vahora yeniyo munodha wandeliwa vyofuna onga.” Atoodhowanave onga ira voi voonga kamunodha kala mwekene mbwenye zimu wa Babinyu unodha onga dhela mwanyo.”—Mat. 10:19, 20.

19. Velelani ifwanafwani-o ya bali mwinango alaleele molimba rima.

¹⁹ Kathuulelani vyamwireele Robert. Vahora inango aromanga wene funjedha Bibilya atoitaniwa tribunale waanyathropa la Afrika do Sul. Vahora yenio kaaidhiwa vinjinji vyonga Bibilya. Liye atoonga molimba rima waanamatonga ira, kanafuna volowa kondoni namwasa oi liye unoadhiveliwana abalee! Robert unosimba kala mu banja la Yohova. Namatonguwo atom’fuka ira “abalao mbaania?” Liye kaadedi-edha yofuka ninga yei, mbwenye mombaranya atothuulela lemba la siku la dambo lelo. Lali lemba la Mateu 12:50, linoonga ira: “Uliwethene unoira ifunelo ya Babanga wadhulu, wenuo ngu balanga, rongolanga na m’manga.” Angalive ira Robert aira romawene funjedha Bibilya, zimu wa Yohova watoom’kami-a ira awakule yofuka yei, wakula vyofuka vya-adedi-edha liye. Vinooneya ira Yohova atosangalala vinjinji na vyevyo vyairile liye. Yohova unosangalala thitho nam’yindelanga nolaleela molimba rima angalive ira nili vahora yorucha.

20. N’nga ninofwanela kala osikimizela rima iran’ni? (Juwau 17:11, 15)

²⁰ Dhoweni nidhowenave simba ngari ina i-yo yokala mubanja lauzimu loi atwee mbodhivelana. Nitokaana Babi-u wapama thitho abali na arongoli-u oinjiva ananidhiveliwana. Hora dothene ninofwanela simbanga vinjinji namwasa wa vyevi. Satana na anama-arelee othakala tanovilimbi-edha ira nikaikelenga udhivela wa Babi-u wa dhulu thitho tanofuna ira tadodomi-e vwelano lina i-yo. Mbwenye Yesu atomvepa Babi-u ira: Unongo niing’anela naifunelo yoi banjali-u likale lovwelana. (Muleri Juwau 17:11, 15.) Yohova atowakula lobelo leli. Mofwanafwana na Yesu, kanikaikelenga navang’onovene ira Babi-u wa dhulu unonidhiveliwana thitho unongo nikami-a. Doweni nisikimizeni rima ira ninodha dowanave vwelana naatu abanjani mwi-u lauzimu.