1. Chini inonikami-a ira nisangalalenga maningi?

 YOHOVA unofuna ira nisangalalenga. Ninoidhiwa vyevi namwasa oi imwerumweru tilimbo-i mwamakalelo anokumi-a zimu ochena. (Agal. 5:22) Voira va-a unodhi-a imwerumweru injinji kwaranya wachela, ninosangalala maningi nalaba vambo-i mwathindhi basa lolaleela thitho kami-a abali naarongoli-u mundhila dho-iyana-iyana.—Mayir. 20:35.

2-3. a) Movwelana na lemba la Agalata 6:4, n’nga pivyongo viivi vinli vinanikami-e ira nisangalalengave vomlabela Yohova? b) N’nga ninotapanya n’ni muyofunjedha yei?

² Va lemba la Agalata 6:4, rumiwi Paulo aongile vyongo vinli vinanikami-e dhowanave kala osangalala. (Muleri.) Yoroma, ifunelo yi-u inofwanela kala mva-a Yohova vyongo vyapama vili vyothene vinaode i-yo. Namva-anga vyothene vinaode i-yo ninokala osangalala. (Mat. 22:36-38) Yanambili, nirambelenga dhifwanafwani-edha naatu enango. Ninofwanela msimbanga Yohova va vyothene vinokwakwaneli-edha i-yo namwasa waingumi yi-u, mafunji-edhwi-u venango dodoliso lina i-yo. Thitho vili vyothene vina i-yo univa-idhe nguliye. Mbwenye akala ira atu enango tatokaana dodoliso vavikundu vinango vyaurumiwi kwaranya i-yo ninofwanela sangalalanga ira tano-indi-edha basa dodoliso liwa vomtitimi-a Yohova a-kala vofuna dhioneli-edha venango ira vyofuna viwa. Ee-no malo mopikisana naaliwa, ninofwanela funjedha mwemo munoirela aliwa vyongo.

³ Muyofunjedha yei, ninotapanya vinanikami-e akala ninoona ira kaninooda ira vinjinji vomlabela Yohova. Ninotapanya thitho vinaire i-yo ira ni-indi-edhenga basa pama yotuva iliyothene inakaena i-yo thitho vinafunjedhe i-yo waatu enango.

4. N’nga chini inanifooki-e hora dhinango? Ongani ifwanafwani-o.

⁴ Arumiwi enango a Yohova vinoarucha chinja taona ira anoimwanana irana vinjinji namwasa oulula venango ingumi yiwa. Vyevi piyevyo vyam’mwireele Carol. Vahora inango liye anoolabela isa wafuneela anamalaleela anjinji. Liye anoofunjedha Bibilya naatu 35 thitho atoakami-a atu anjinji dhivelela wa Yohova fiyedhela badiziwa. Vyongo vyanomwendela pama maningi muurumiwini. Mbwenye vasogolovee atoroma bulela thitho hora dhinjinji kaaoda kuma vandhe! Liye aongile ira: “Ndinoidhiwa ira namwasa waurendangula kandinooda ira vinjinji,” ninga vinoira atu enango “mbwenye ndinoona ira kandili ororomeleya maningi ninga vili aliwa. Kandinooda ira vyothene vinafuna miyo thitho vyevyo vinondisukwali-a.” Carol unofuna angairile vyongo vinjinji vomlabela Yohova. Onga mwaimbarimbari mathuulelo enala mbapama! thitho kaninokaikela ira Nlungwi-u watangaranga unosimba na vyothene vinoira liye vomlabela.

5. a) N’nga nithuulelenga n’ni akala nitosukwala namwasa oimwanana ira vyongo vinango? b) Ninga munoonela i-yo vaviruthiruthivi, n’nga balula ukanle airanga a-vi vyongo vinooda liye vomlabela Yohova?

⁵ Akala hora dhinango munofooka namwasa oimwanana irana vyongo vinango, mudhifukenga ira: ‘N’nga Yohova unofuna ira ndiire n’ni?’ Liye unofuna ira niirenga vinooda i-yo movwelana na vyongo muli aliwa vahoriyo. Rongola mwinango una vyawa 80 unosukwala namwasa o-oira vyongo vinjinji muurumiwini ninga mwairecha liye angana vyawa 40. Liye unoona ira masiki avilimbi-edhe ira vyothene vinaode liye, Yohova kanavisangalalana. N’nga vyevi pyaimbarimbari? Kathuulelani vi. Akala rongolula utoira vyothene vinooda liye angana vyawa 40, thitho una dhowanave irana vyevi vina liye vyawa 80, ninooda onga ira liye ka-iidhe ira vyothene vinooda liye vomlabela Yohova. Akala nitoroma ona ira kaninooda ira vyokwakwanela vomlabela Yohova nithuulelenga ira liye ngunosakula ona akala vinomsangalali-a venango kabe. Naira vyothene vinooda i-yo Yohova unonisangalalana noniwandela ira: “Utoira pama maningi!”—Mufwanafwani-edhe na lemba la Mateu 25:20-23.

6. N’nga ninafunjedhavo n’ni vaifwanafwani-o ya Maria?

⁶ Vinokala vyo-orucha sangalala akala ninothuulela vinooda i-yo irana a-kala vya-anaoda i-yo irana. Kathuulelani ifwanafwani-o inango ya rongola unaitaniwa Maria una urenda unam’mwimanani-a irana vinjinji muurumiwini. Voroma, liye anookumbanya maningi thitho adhiona kala o-ofuneya. Mbwenye vasogolovee atoothuulela vyarongola mwinango wapingonimwiwa ule ali ogonathene namwasa wamarenda thitho anoofunechecha mkami-a. Maria atoonga ira: “Ndatoira masaka-edho ira nilaleelenga vambo-i na telefoni thitho volemba makarta.” “Hora iliyothene ndalaleela vambo-i na liye, ndinowelela nyumbani ndingali osangalala mokwakwanela ira nditomkami-a rongolanga.” Na-iyene thitho ninowenjedhela imwerumweru yi-u nathuulela vinooda i-yo irana a-kala vya-anaoda i-yo irana. N’nga munodhivwa a-vi akala munooda ira vinjinji venango akala munooda ira vyongo vinango mwapama vomlabela Yohova?

7. N’nga rumiwi Pedru aava-idhe Makristau malangi-o okami-a aavi?

⁷ Rumiwi Pedru karta laalembele liye abalee, atoalimbi-a ira ta-indi-edhe basa yotuva iliyothene na dodoliso lina aliwa volimbi-a Makristau afwiwa. Liye alembile ira: “Movwelana na yotuva iwachele nyo, muji-indi-edhe basa volaba ninga anamaing’anela apama owachela oma rima ulukulu wa Nlungu.” (1 Pe. 4:10) Kaninofwanela imwanana i-ndi-edha basa mokwakwanela vyotuva vina i-yo voova ira atu  enango anodha niirela sanje venango sukwala. Akala ninoira vyevi, kavinokala ira ninomva-a Yohova vyothene vinooda i-yo kabe.

8. Movwelana na lemba la 1 Akoritiyo 4:6, 7, mwasiwa ngwan’ni kaninofwanela dhiulukuli-a na vyotuva vina i-yo?

⁸ Ninofwanela i-ndi-edhanga basa mokwakwanela vyotuva vina i-yo, mbwenye ninofwanela ira polepole ira na-arome dhiulukuli-a. (Muleri 1 Akoritiyo 4:6, 7.) Mofwanafwani-a, venango mutokaana dodoliso loromi-a funjedha Bibilya wavanyumbani. Ee-no kamuimwanane i-ndi-edha basa yotuviyo! Mbwenye vatokala i-yana vari vo-indi-edha basa yotuva no dhiulukuli-a. Nifwanafwani-e ira vyongo vinouwendelani paama maningi muurumiwini thitho mutoromi-a funjedha Bibilya. Mbwenye munofuna wandela bali venango rongola wa gurupu linyu lodhowa muurumiwini. Mbwenye mungafiile unagumaneela nyoowo mutofwanya ira rongola unaaonga vimuireele muurumiwini thitho utogawela marevista. Rongoluo utogawela marevista, mbwenye nyo mutoromi-a funjedha Bibilya. N’nga veva munaire a-vi? Nyo mutoidhiwa ira abali naarongola tanolimbi-eya taidhiwa ira mutoromi-a funjedha Bibilya, mbwenye munosakula ira mudhaonge vyevi vahora inango, ovela ira rongolula unooda i-ya sangalala vothuulela ira kavali jinaira liye. Wewo e-no kuoma rima. Mbwenye vyevi kavinothapulela ira mu-iye romi-a funjedha Bibilya. Yei chotuva inanyo—i-indi-edheni basa!

9. N’nga ninofwanela i-ndi-edhanga basa a-vi vyotuva vi-u?

⁹ Nithuulelenga ira dodoliso latundu uliwethene lina i-yo chotuva yokumela wa Nlungu. Ni-indi-edhenga basa vyotuvavi vofuna limbi-a abali naarongola pingoni a-kala vofuna ira nivweye. (Afil. 2:3) Na-indi-edha basa kopolo na dodoliso li-u voira vinofuna Nlungu ninodha kala osangalala maningi a-kala namwasa ofuna kwaranya atu enango venango ira nioneye kala avadhulu, mbwenye namwasa oi nino-indi-edha basa vyotuva vi-u vomtitimi-a Yohova.

10. N’nga na-aire polepole ninooda mangeya na go-i uuvi?

¹⁰ Na-aire polepole, ninomangeya go-ini odhilandani-ana vinoira i-yo vyapama naatu enango vinoimamanana aliwa ira. Mofwanafwani-a, pyoodeya ira bali mwinango venango unoonga mwasa wavatando mwapama. Baluo unooda kaana dodoliso leli, venango rimanimwee unooda roma mluluvi-a bali mwinango unorucheya ira aode onga mwapama mwasa wavatando. Mbwenye baluo unooda kaana dodoliso n’nango loira vyongo mwapama ninga, wachela alendo, funji-a a-imee venango kaana thindhi lodhowa muurumiwini. Ninosimba ira nitokaana abali naarongola anjinji okaana dodoliso  ano-indi-edha basa yotuva yiwa vomlabela Yohova nokami-a atu enango!

11. Mwasiwa ngwan’ni ninofwanela vilimbi-edha msazi-anga Yesu?

¹¹ Angalive ira kaninofwanelela vifwanafwani-edhanga naatu enango, ninooda ganyali vofunjedha na vifwanafwani-o vyaanamalaba ororomeleya a Yohova. Ifwanafwani-o yapama maningi cha Yesu. Angalive ira liye ali olongomana, ninooda funjedha vinjinji vamakalelwee apama namoda wairela liye vyongo. (1 Pe. 2:21) Navilimbi-edhanga msazi-a mwapolepole ninooda kala arumiwi a Yohova apama thitho ninooda laba vinjinji muurumiwi-u.

12-13. N’nga ninafunjedhe n’ni wa Mwene Davide?

¹² Bibilyani ali Madhu a Nlungu ninofwanyamo vifwanafwani-o vinjinji vyaalombwana naa-iyana ororomeleya oi ninooda tukulela vifwanafwani-o viwa angalive ira aliwa katali atu amakalelo olongomana. (Aeb. 6:12) Kathuulelani vya Mwene Davide wam’mongile Yohova kala “mutu o-okaana damba” venango ninga munom’mongela Bibilya linangolee onga ira “mutu unondisangalali-a maningi.” (Mayir. 13:22) Mbwenye Davide kaali mutu wamakalelo olongomana. Mbwenye thitho atoira vyodawa vinango vilukulu. Angalive vili e-no liye chiifwanafwani-o yapama wa i-yo. Mwasiwa ngwan’ni ninoonga e-no? Mwasiwa ngoi liye vyava-iwa liye malangi-o, anoorumela kumela vathi varima aonanga ira yodawa yeeyo choyeva. Mo-iyana na vyevyo liye anoorumela malangi-o akopolo ava-iwa liye thitho anodhivwela tangaranga namwasa wa vyodawa vyairile liye. Vyevyo vyatom’mwiri-a ira Nlungu amlevelele.—Sal. 51:3, 4, 10-12.

¹³ Ninooda funjedhavo yongo wa Davide vodhifuka ira: ‘N’nga miyo ndava-iwa malangi-o ndinoirecha a-vi? N’nga ndinorumela mombaranya vyongo vidawi-idhe miyo, venango ndinoona ira vidawi-idhe miyovyo pyoyeva? N’nga ndinotamangelecha aombanga atu enango landu ira mbaaliwa andidawi-idhe? N’nga ndinovilimbi-edha ira nda-awelele okoka jidawi-idhe miyojo?’ Munooda dhifukanga vyofuka vyevi vanoleri nyo myasa yaalombwana naa-iyana ororomeleya aongiwile Bibilyani. N’nga aliwa tatoogumanana vyorucha ninga vinogumanana nyo? N’nga mbamakalelo aavi apama athonyi-edhe aliwa? Vamwasa uliwethene unaleri nyo mudhifukenga ira: ‘N’nga ndinamsazi-edhe a-vi rumiwi wa Yohova ororomeleula?’

14. N’nga ninaganyali a-vi voona vinoira Makristau afwi-u?

¹⁴ Ninooda ganyali thitho voona vinoira Makristau afwi-u masiki akale andimuwa venango azombwe. Mofwanafwani-a, n’nga vatokala  mutu mwinango pingonimwinyu unovilelana vyowesedha ninga, kanyi-edhiwana afwee ira airena vyongo vyo-ofwanelela, runi-iwa naatu abanjanimwee venango volimbana marenda? N’nga mwamutuo nyo munoonamo makalelwee apama oi nanyen’ne thitho munofunechecha kaana makalelo enao? Thuulelanga vifwanafwani-o vyapama unooda ukami-a idhiwa moda unairelenyo ira muode vilela vyowesedha vinogumanana nyo. Ninosimba nosangalala ira nitokaana abali naarongola ororomeleya oi ninooda tukulela ifwanafwani-o yiwa!—Aeb. 13:7; Tiy. 1:2, 3.

15. N’nga Paulo avelele malangi-o aavi oi anooda nikami-a ira nidhowenave kala osangalala vomlabela Yohova?

¹⁵ I-yo othene ninofwanelela vilimbi-edha ira nilimbi-enga rendele na vwelano pingoni. Kathuulelani ifwanafwani-o ya Makristau ahora yaarumiwi. Aliwa tatokaana vyotuva namaurumiwi o-iyana-iyana. (1 Akor. 12:4, 7-11) Mbwenye vyevi kavyairi-idhe ira taodenga pikisana no gaaneya. Malo moira vyevyo, Paulo atoolimbi-a mutu uli wethene ira airenga vyongo vyakami-e ira “tamange tutu la Kristu.” Paulo atoalembela au Efeso ira: “Tutu lotheneelo linoulukula vodhimanga ooka mwaudhivela movwelana namabasa ofwanelela a yano jilijothene.” (Aef. 4:1-3, 11, 12, 16) Atu a-arela malangi-ala tanoolimbi-a rendele na vwelano, makalelo oi ninoaona thitho wari mwamipingwi-u malamboano.

16. N’nga ninofwanela kala osikimizela rimanimwi-u ira n’ni? (Aebere 6:10)

¹⁶ Ninofwanela kala odhisikimizela rimani ira kaninofwanela dhifwanafwani-anga naatu enango. Malo mwavyevyo nifunjedhenga wa Yesu vodhilimbi-edha sazi-edha makalelwee. Mufunjedhenga thitho vavifwanafwani-o vyaatu aongiwile Bibilyani thitho naarumiwi ororomeleya a Yohova amalamboano. Vanovilimbi-edha nyo irana vyothene vinaode nyo vomlabela Yohova munokala osikimizela ira liye “kai o-olongomana oi unodiwala mabasinyu.” (Muleri Aebere 6:10.) Mudhowenave sangalalanga vomlabela Yohova voidhiwa ira liye unosimba vyothene vinovilimbi-edha nyo irana vomlabela.