Vyaireya e-no pingo, uonenga ira banja lawalelo lamadhi lombwanuo vyathelan’nena liye na-iyana mwinango thitho pingo uonenga ira banja lipyalo kala lorumeleya mwalamulo. Ira nivwecheche mwasiwa ngwan’ni ninoonga e-no, dhoweni nitapanyeni vyaongile Yesu vamwasa omali-a banja no thelana okoka na mutu mwinango.

Va Mateu 19:9 Yesu aongile mwasa m’mbo-i baa-i wamalembani omali-edha banja. Liye aongile ira: “Uli wethene una-iya i-yanee no thela i-yana mwinango utoira chigololo, i-yavo akala ira u-iyedhele namwasa oraruwa.” Vamadhu a Yeswala ninofunjedhavo ira 1) chigololo ndi mwasa m’mbo-i wamalembani unairi-e ira banja liode mala thitho 2) lombwana una-iya i-yanee a-kala namwasa ovweya wamalemba utoira chigololo. *

N’nga Madhu a Yeswala anothapulela ira lombwana uirile chigololo no mali-a banjalee unokala othathuwa mwamalemba liye thela? Kai e-no. Lombwana aira chigololo i-yana o-odauo ngunokaana ufulu osakula mlevelela man’neuo venango kabe. Akala ira i-yanuo usakunle ira a-amlevelela man’neuo no mali-a banjalo mwalamulo otheneenao e-no ali othathuwa ira taode thela venango theliwa akala ira mwasuwo umalele tiribunaleni.

Hora dhinango i-yana o-odauo unooda funa ira a-amali-e banjalo akalenga naman’neuo thitho unooda m’mwandela ira unofuna amlevelele. N’nga vinokala a-vi akala ira lombwana uirile chigololuo utokonda ira i-yaneuo amlevelele thitho liye dhowa matukula karta lomali-edhana banja? Voi i-yanuo unofuna ira amlevelele no dhowanave kala na liye banjani, lombwanuo kanakala othathuwa mwamalemba ira aode thela okoka kabe. Akala liye utothela thitho i-yana mwinango, angalive ira kali othathuwa ira aire e-no kuongela ira liye utoira chigololo fendo yanambili. Vyaireya e-no andimuwa avapingoni anofwanela taire komisau okoka, yotonga ira taode samalela mwasuo.—1 Akor. 5:1, 2; 6:9, 10.

Mutu a-ali othathuwa mwamalemba athela okoka, n’nga pingo unoona a-vi banjalee lawalelo na lipyalo? N’nga banja lawalelo linokalaove movwelana namalemba? N’nga i-yana o-odauo unokaanave ufulu osakula mlevelela venango a-mlevelela man’neuo? N’nga pingo unofwanela ona banja lipyalo kala lachigololo?

Ndulimu, pingo waona ira banja lipyalo tachigololo akala ira i-yana o-odauo ali a-anakwe, ali a-anatheliwe thitho ali a-anaire vyodawa vyachigololo. Mbwenye vyaonga Yesu vyoonga mali-a banja na thela venango theliwa okoka, kaaongilevo jongo jilijothene jokuzana na mutu o-odauo kabe. Malomwee, liye aongile ira lombwanuo amali-a banjalee vo-okala matangwi amalemba liye thela okoka, Utoira chigololo. E-no i-ya i-yana no thela okoka, piyevyo vyaongile Yesu ira kuira chigololo unooda mali-a banja loromalo.

Akala ira banja litomala namwasa oi lombwana ute mali-a banjalo thitho utethela okoka, kavinoodeya  thitho ira i-yana o-odauo asakule mlevelela venango kabe. I-yanuo kanoona nyarwa okoka vothuulelanga vamwasa wa yosakula ira amlevelele venango kabe. Wenjedhela vevo moda munoonela pingo banja lipyalo kavinonyinde ira i-yana o-odauo utotatiya, theliwa na lombwana mwinango, venango utoira chigololo kabe. *

Muifwanafwani-o itapan’nye i-yoji lombwana atoira chigololo, vyairi-idhe ira banjaleelo limale. N’nga a-viya akala ira lombwana kairile chigololo mbwenye utomali-a banjalee liye thela okoka i-yana mwinango? Venango n’nga vinokala a-vi akala ira lombwana kairile chigololo a-anamali-e banja na i-yanee wawale, mbwenye airile chigololo angamali-idhe banjalee thitho atothela okoka angalive ira i-yanee afuna ira amlevelele? Muvifwanafwani-o vyothene vyevi, i-yachi i-yana no thela okoka kuwewo uli ira chigololo. Unooda mali-a banja loromanle. E-no banja lipyalo linokala lorumeliwa mwalamulo. Nsanja ya Olonda ya Ingeles ya 15, wa Novembro wa 1979, thakuru 32, yatoonga ira: “Lombwanuo unokala ira utovolowa banja lipya thitho kanooda limali-a okoka welelana na i-yanee wawale, namwasa oi banja loromalo latomala hora yamali-idhe liye banjalo liye ira chigololo no thela okoka.”

Chinja mavweelo a vyongo vamwasa wen’na, kavinathapulela ira nionenga moluluva nyanyalana vabanjani venango luluvi-a yodawa ya chigololo kabe. Lombwana unamali-a banjalee vo-okalene matangwi ovweya amalemba no thela i-yana mwinango, angalive ira mwamalemba liye kaali othathuwa ira airena e-no, unodha tongiwa na komisau yotonga vaselu wa chigololo. (Akala ira i-yana mpyuo ngu Kristau, na liyene thitho unodha tongiwa na komisau yotonga vaselu wa chigololo.) Angalive ira banja lipyalo kalinooda oniwa kala la chigololo, atwao anokala tanga pwanyile makundo a Nlungu vamwasa wa kazamento thitho lombwanuo, kanofwanelela va-iwa vizo vyavakundu pingoni mwavayawa vinjinji fiyedhela atu tanga-iidhe sukwala na vyoireya vyairile liye na taroma mlemezanga. Andimuwa ta-anamva-e urumiwi uliwethene, anofwanela thuulela thitho moda uli vyongo wa-iyana aireliwile vyongo mwabivuo vambo-i naa-ima ang’ono a-iidhe lombwana odauo.—Malak. 2:14-16.

Vothuulela vyorucha vinokalavo namwasa omali-a banja vo-okala matangwi amalembani no thela venango theliwa okoka, Makristau anoira vyongo mwazelu vosazi-edha Yohova noonanga ira thelana kopambuleya ninga mwemo Yohova munaonela liye.—Namal. 5:4, 5; Aeb. 13:4.