1. N’nga paradaizo wauzimu chini? N’nga ninofwanela kala osikimiza iranan’ni?

 MALAMBOANO vailamboi, vatokala paradaizo mwemo muli atu anjinji enao anokala opingeya voirana vyongo vyapama. Paradaizonimu mutokala atu mamilyau manjinji enao ali varendele waimbarimbari. Atu ali paradaizonimu, katinofuna kumamo. Aliwa anofuna ira atu anjinji tavolowemo. Wen’na ngu paradaizo wauzimu! a

2. N’nga chini inoniiri-a kaana ifunelo na paradaizo wauzimu?

² Pyodabwi-a ira Yohova utosaka-edha paradaizo opwaseula muilambo yoi Satana utoiri-a ira mukale umwidani thitho mutokala atu amakalelo othakala na oophi-a. (1 Ju. 5:19; Apk. 12:12) Nlungwi-u waudhivela utoidhiwa nyarwa dhinogumanana i-yo muilamboi thitho unonibarela ira nidhowenganave m’labela mosangalala. Madhwee anoonga ira paradaizo wauzimula ndi “limburo lotawelamo” lobareleya thitho nli ninga “dimba lamathamba o-eleliwa pama ma-inje.” (Esa. 4:6; 58:11) Mokami-iwa na Yohova, atu ali paradaizonimu anokala osangalala thitho anovivwa ira mbobareleya mumalambo omari-a oruchala.—Esa. 54:14; 2 Ti. 3:1.

3. N’nga lemba la Esaya 65, lakwakwaneli-edhiwe a-vi muhora ya Aisraeli?

³ Yohova atoonga dhela mwa namaongela Esaya mwemo ingumi yaatu anofuna dhakala paradaizonimu munofuna aliwa dhakalela. Kapitulo 65, la bukhu la Esaya, ninofwanyamo vyokuza paradaizula, vyevyo vyakwakwaneli-edhiwile romela yawa ya 537 AEC, vahora yeniyo, Ayuda enao tachinyuile tatoothathuliwa  udhaari nowelela waniwa. Yohova atoaraeli-a atwee thitho atoakami-a vosaka-edha sidadi ya Yerusalemu ira ikale yobaleya nomanga kachisi wenuo wali limburo nlukulu lolambelelamo Nlungu waimbarimbari.—Esa. 51:11; Zka. 8:3.

4. N’nga lemba la Esaya 65 linokwakwaneli-edhiwa a-vi malamboano?

⁴ Kwakwaneli-edhiwa wanembili waulosi wa Esaya waromile muyawa ya 1919 EC, vevo arumiwi a Yohova amalamboano vathathuliwile aliwa muudhaari wu Babulo nlukulu. Ee-no paradaizo wauzimu watooroma mwadheya vailambo yothene. Anamalaleya Aumwene athindhi tatokaathi-a mipingo minjinji thitho tanoothonyi-edha makalelo apama. Alombwana naa-iyana oi voromavene tali auwalanga thitho tanoothonyi-edha makalelo ninga avinyama, tatooroma “wara umutu upya waphanduchiwile movwelana na ifunelo ya Nlungu.” (Aef. 4:24) Pyaimbarimbari ira maraeli-o manjinji aongile Esaya anodha kwakwaneli-edhiwa sogolou muilambo ipya. Mbwenye va-eeni vatokala maraeli-o manjinji anofwanya i-yo. Dhoweni nioneni mwemo munoganyalela i-yo namwasa okala Paradaizoni wauzimu thitho mwasee wa-anofwanela i-yo kumamo.

MWEMO VYONGO MUKALENLE ALIWA MUPARADAIZO WAUZIMU

5. Movwelana na yolanyedha yava lemba la Esaya 65:13, n’nga ndi vyongo viivi vinosangalalana i-yo muparadaizo wauzimu?

⁵ Atwee mbamanungo aphama thitho anodidili-iwa. Ulosi wa Esaya unothonyi-edha ira vatokala i-yana maningi vari vaatu ali Paradaizoni wauzimu naatu ta-ali Paradaizonimu. (Muleri Esaya 65:13.) Yohova unova-a modhala mandha arumiwee othene vyongo vinofuneela aliwa ira tadhowenave kala vauxamwali na liye. Unoniva-a zimu ochena, madhwee na yodya yauzimu yoinjiva naifunelo yoi “nidyenga, . . . nimwenga, . . . [thitho] nikalenga osangalala.” (Mufwanafwani-edhele na lemba la Apokalipse 22:17) Mbwenye atu anokala undhe wa paradaizuo “anokaana ndhala, . . . anokaana tona, . . . [thitho] anokaana manyadho.” Aliwa katinofwanya vyongo vinofuneela aliwa vyevyo vinaakami-e kala vauxamwali na Nlungu.—Amo. 8:11.

6. N’nga lemba la Joeli 2:21-24, linoonga vyongo viivi vyevyo viniva-idhe Yohova, n’nga vinoniganyali-a a-vi?

⁶ Muulosee, Joeli atoo-indi-edha basa vyongo vyavaingumini ninga tirigu, vinyu na makura amaolivi vofuna thonyi-edha ira Yohova unova-a modhala mandha atwee vyongo vinofuneela aliwa thangani-avo yodya yauzimu. (Joe. 2:21-24) Yohova unoirana vyevi dhela Bibilyani, mabukhu oonga vya Bibilya, saiti-u ya jw.org, migumano ya pingo, migumano yaisa na yagawo. Ninooda udya yodya yauzimu ila dambo nlilothene voi vyo-arelavovyee pyoi ninokaana manungo aphama thitho ninodidili-iwa.

7. N’nga chini inoniiri-a ira nikaengana “imwerumweu yarimani”? (Esaya 65:14)

⁷ Atwee anokala osangalala thitho anokala okwakwanana vyongo vina aliwa: Atu a Nlungu “anokuwa mosangalala” namwasa osimba vyongo vinowairela Yohova. (Muleri Esaya 65:14.) Ninokaana “imwerumweru yarimani” namwasa wa makundo olimbi-a iroromelo, vyolanyedha vyofwanyeya m’madhu a Nlungu na idedi-edho inoodeya namwasa wa sembe ya Kristu. Ninokala osangalala maningi nataphanyanga vyongo vyevi naabali naarongoli-u!—Sal. 34:8; 133:1-3.

8. N’nga ndi makalelo menli avi ofuneya enao anofwanyeya muparadaizo wauzimu?

⁸ Udhivela ndi vwelano wavari vaatu a Yohova namakalelo malukulu enao anofwanyeya mu Paradaizo wauzimu. “Vwelano wen’na”  unothonyi-edha mwemo ingumi munofuna aliwa dhakalela muilambo ipya, vevo arumiwi a Yohova vanofuna aliwa dhadhivelananga maningi thitho vwelana kwaranya va-eeni. (Ako. 3:14) Rongola mwinango atoonga vyongo vyaoni liye angagumam’nena fendo yoroma atu a Yohova. Liye aongile ira: “Ndali nda-anakalevo osangalala masiki banjani mwanga. Hora yaoni miyo atu tathonyi-edhangana udhivela waimbarimbari, paevo vaguman’nena miyo Amboni dha Yohova.” Mutu uliwethene unofuna kala osangalala na okwakwanana vyongo vina liye, unofwanela volowa paradaizoni wauzimula. Akala atu anothuulela vyongo vyoi a-vi vyokuza Amboni dha Yohova, aliwa tatokaana limbili laphama wa Yohovuo thitho waatu othene anom’lambela.—Esa. 65:15.

9. N’nga lemba la Esaya 65:16, 17, linolanyedhan’ni vyoonga nyarwa dhinogumanana i-yo?

⁹ Atwee anokala o-otekenyeya thitho mbokurudheya. Lemba la Esaya 65:14 linoonga ira mutu usakunle kala undhe wa Paradaizo wauzimula, “Unola namwasa ophiwa rima thitho unola mokuwa namwasa othweya rima.” N’nga a-vi vyongo vyothene vyevyo vinoiri-a ira atu a Nlungu tavwenga upa venango rucheya? Vachineneeva “vinodha diwaliwa thitho vinodha lokoteya ira [Nlungu] a-avioneve okhoka.” (Muleri Esaya 65:16, 17.) Yohova unodha kumi-avo nyarwa dhothene thitho vavira hora kaninodha thuulelave upa wavwa i-yo namwasa wa nyarwadho.

10. Mwasiwa ngwan’ni ninosimba kala vambo-i na abali naarongoli-u? (Muone thitho iruthiruthi.)

¹⁰ Masiki va-eeni mirimi-u inokala malonimwee nafwanyeya vamigumanoni weo unodiwala i-yo nyarwa dhinogumanana i-yo muilamboi. Ninokami-a atu othene pingoni ira takalenga o-otekenyeya, nathonyi-edhanga makalelo ninga udhivela, imwerumweru, rendele, riya rima thitho kala opyaseya, enao ndi makalelo anokaana i-yo mokami-iwa na zimu wa Nlungu. (Agl. 5:22, 23) Ndingari ilukulu kala mugulu la Nlulngu. Atu othene anodhowanave kala mu paradaizo wauzimu, anodha ona kwakwaneli-edhiwa wa vyolanyedha vya Nlungu vyokuza “dhulu upya na ilambo yavathi ipya.”

11. Movwelana na lemba la Esaya 65:18, 19, n’nga ninovivwa a-vi nathuulelanga paradaizo wauzimu unisaka-edhele Yohova?

¹¹ Atwee anokala osimba. Esaya atoodhowanave onga mwasee unofwanela i-yo “dhiveliwa thitho kala osangalala” na paradaizo wauzimu. Yohova ngusaka-edhile Paradaizula. (Muleri Esaya 65:18, 19.) Ngumwasee unoni-indi-edha  basa ira nikami-e atu kuma mumagulu ailamboi enao ta-anokami-a atu ira takale vauxamwali na liye, novolowa paradaizo wauzimu obaleula. Ninosangalala na maraeli-o afwaidhe i-yo namwasa okala muimbarimbarini thitho liye unonilimbi-a ira niwandelenga atu enango vyokuza maraeli-o ala.—Jer. 31:12.

12. N’nga ninovivwa a-vi namwasa wa yolanyedha ya valemba la Esaya 65:20-24, n’nga mwasiwa ngwan’ni?

¹² Ninosimba idedi-edho ina i-yo namwasa okala vauxamwali waphama na Yohova thitho ninokala osangalala. Kathuulelani vyongo vinofuna i-yo dhaona noirana muilambo ipya ya Nlungu. Bibilya linonilanyedha ira: “Kavanodha kala mwana tete unofuna dhakaana . . . ingumi yoyeva baa-i, venango mutu oulula wenuo a-anaode fii-a vyawa vinofuneela mutu ira akaena ingumi.” Ninodha “manga nyumba nokalamo, dhala mauva noudya vyova-avyee.” Atu “katinodha laba basa mwathindhi mwapezi” namwasa oi “anodha raeli-iwa na Yohova.” Liye unonilanyedha ira, ninodha kaana ingumi yaphama thitho ninodha kala obareleya. “Ta-anam’muitane,” Nlungu unodha idhiwa vinofuneela muthu uli wethene thitho “unodha kwakwaneli-edha vyofuna vyaingumi iliyothene.”—Esa. 65:20-24; Sal. 145:16.

13. N’nga lemba la Esaya 65:25 linoonga ira atu anochinja a-vi taroma m’labela Yohova?

¹³ Atwee anokala mwarendele thitho mbobareleya. Zimu wa Nlungu utokami-a atu anjinji enao voromavene ana makalelo ninga avinyama ira tachinje. (Muleri Esaya 65:25.) Aliwa tatodhilimbi-edha i-yachi makalelo othakala ana aliwa ndulimu. (Aro. 12:2; Aef. 4:22-24) Mbwenye atu a Nlungu kai olongomana, ee-no anoodangave dawi-a vyongo vinango. Angalive ira vili e-no, Yohova unaakami-a “atu amaziza othene” ira takale ovwelana thitho vyo-arelavovyee vikale vyoi tadhivelanenga nokala varendele. (Tit. 2:11) Vyevi pyodabwi-a viirile Nlungu ekene wenuo uli wakopolo dhothene.

14. N’nga vyam’mwireele bali mwinango vinokwakwaneli-edha a-vi lemba la Esaya 65:25?

¹⁴ N’nga mutu unoodadi chinja makalelo? Kathuulelani ifwanafwani-o ila. Zombwe mwinango ana vyawa 20 ali angamangiwile fendo dhingasi, anoira vyongo vyothakala thitho ali wauwalanga. Ali angamangiwile namwasa oba karro, uba manyumba mwaatu, nothathamula landu ulukulu. Kaarucha romi-a ndale. Angavwide vyongo vyokuza imbarimbari ya Bibilyani fendo yoroma, atooroma fwanyeya vamigumanoni ya Amboni dha Yohova. Atoosikimizela ira utofwanya mwasa okaanela ingumi, yeniyo ili lambela Yohova muparadaizo wauzimu. Angabadiziwile nokala wa Mboni, hora dhinjinji anoothuulela mwemo lemba la Esaya 65:25 munom’kuzela aliwa. Liye atoochinja no-iya kala wauwalanga ninga kalamu nofiya vokala mutu odhiveliwana rendele ninga mwana libila.

15. Mwasiwa ngwan’ni ninofuna itana atu enango ira tavolowe paradaizoni wauzimu, n’nga ninaire a-vi vyevi?

¹⁵ Lemba la Esaya 65:13, linoroma namadhu oonga ira: “Yohova, mbwiye nlukulu okwaranya, uongile ira.” Versu 25 linomari-a namadhu oonga ira “uongile ee-no ngu Yohova.” Vyevi vinothonyi-edha ira madhwee anokwakwaneli-edhiwa hora dhothene. (Esa. 55:10, 11) Va-eeni Paradaizo wauzimu utokalavo wale. Yohova utosaka-edha ubali wavakundu maningi. Atwee anokala mwarendele thitho mbobareleya angalive ira muilamboi mutodhala atu auwalanga. (Sal. 72:7) Ngumwasiwa ninofuna kami-a atu anjinji ninga mwemo munaodele i-yo ira tavolowe mubanja lauzimuli. Ninooda irana vyevi volaba basa yofunji-a atu.—Mat. 28:19, 20.

 VYONGO VINAIRE I-YO IRA ATU ENANGO TAVOLOWE MUPARADAIZO WAUZIMU

16. Chini inakami-e atu volowa paradaizoni wauzimu?

¹⁶ Mutu uliwethene wa-iyo utokaana izo yokami-a atu ira takopeyenga na Paradaizo wauzimu. Ira niode irana vyevi, ninofwanela m’sazi-edhanga Yohova. Liye kanokanyi-edha atu ira tavolowe muparadaizula, malomwee “unowakopa” mwaudhivela. (Ju. 6:44; Jer. 31:3) Atu anamirima yapama enao anofunjedha vya Yohova na makalelwee apama, anoroma kala vauxamwali na liye. N’nga ninaire a-vi ira makalelwi-u apama takope atu enango ira tavolowe muparadaizo wauzimu?

17. N’nga ninakami-e a-vi atu enango ira takopeyenga na paradaizo wauzimu?

¹⁷ Ndhila imbo-i inanikami-e kopa atu enango ira tavolowe muparadaizo wauzimu, ndi adhiveliwana thitho riyela rima Makristau afwi-u. Atu tafiya vamigumanoni yapingo ninofuna ira tavwivwenga ninga mwemo mwavivwele atu o-ororomeleya tangafiile va migumanoni wu Koritiyo. Aliwa taongile ira: “Mwaimbarimbaridi Nlungu uli vari vinyu.” (1 Ak. 14:24, 25; Zka. 8:23) Ee-no ninofwanela dhowanave a-rela malangi-o oi “nikalenga mwarendele vari vi-u.”—1 At. 5:13.

18. N’nga chini inakope atu ira tavolowe mugulu li-u?

¹⁸ Hora dhothene nidhilimbi-edhenga ona abali naarongoli-u ninga mwemo munowaonela Yohova. Ninooda irana vyevi voona makalelo apama ana aliwa a-kala othakala oi vira wa hora anoa-iya. Ninooda mali-a a-vwana uliothene akala hora dhothene “ninoriyelana rima, thonyi-edhana tangaranga dhilukulu, thitho levelelana na rima wethene.” (Aef. 4:32) Ee-no atu anofuna ireliwa vyevi anooda kopeya novolowa paradaizoni wauzimu. b

 KAMUKUMEMO PARADAIZONI WAUZIMU

19. (a) Movwelana na kwadru loi “ Atookuma, adhamale ongowelela okoka,” n’nga atu enango taongilen’ni tangawelenle okoka paradaizoni wauzimu? (b) N’nga ninofwanela kala osikimezela rima iranan’ni? (Muone thitho iruthiruthi.)

¹⁹ Ninosimba maningi namwasa okala paradaizoni wauzimu. Va-eeni paradaizula ngobaleya maningi kwaranya wale thitho mutokala atu anjinji enao anolambela Yohova. Ninodha dhowanave m’simba Yohova modhowa nodhowa namwasa wa paradaizo unisaka-edhele liyula. Mutu uliwethene unofuna kaana ingumi yapama, didili-iwa, kala o-otekenyeya na obarelaya, unofwanela volowa muparadaizula thitho kanofwanela kumamo. Mbwenye ninofwanela kala osamala namwasa oi Satana unofunechecha anganikumi-idhemo. (1 Pe. 5:8; Apk. 12:9) Kanirumeli-e ira Satana airena vyevyo. Dhoweni niireni vyongo vyothene vinaode i-yo ira paradaizo wauzimula, udhowenave kala ochena, obaleya thitho warendele.