1. N’nga Yohova unofuna ira niiren’ni?

 BALIWA wa mwana ndiyongo imbo-i mwavyongo vyosangalali-a maningi wa anamabalee. Angalive ira anamabala anodhiveliwana maningi mwana akala kombwani, kaiira anofuna ira akalengave kombwani modhowa nodhowa. Thitho anooda dhikumbanyedhanga maningi akala mwanuo kanoulukula. Molandana na vyevi, Yohova unosangalala naroma m’a-rela Yesu, mbwenye liye kanofuna ira nikalengave a-ima mwauzimu. (1 Ak. 3:1) Malomwee Yohova unofuna ira nikale Makristau “oulukula mwauzimu.”—1 Ak. 14:20.

2. N’nga ninotapanyan’ni muyofunjedha yei?

² N’nga kala Kristau oulukula mwauzimu unothapulelan’ni? N’nga ninaire a-vi ira niulukule mauzimu? N’nga yodya yothakuna chofuneya moi a-vi ira niulukule mwauzimu? N’nga mwasiwa ngwan’ni ninofwanela rambela vinyindela? Muyofunjedha yei ninotapanya vyowakula vya vyofuka vyevi.

N’NGA KALA KRISTAU OULUKULA MWAUZIMU UNOTHAPULELAN’NI?

3. N’nga kala Kristau olimba mwauzimu unothapulelan’ni?

³ Bibilyani madhu athapuleliwile ira “andimuwa,” anotapulela thitho “atu owarala” venango “olimba mwauzimu.” a (1 Ak. 2:6) Molandana na mwana wenuo unodhowanave ulukula fiyedha kala ndimuwa, na-iyene thitho ninofwanela dhowanave ulukula mwauzimu fiyedha i-yo kala Makristau olimba mwauzimu. Masiki nifiye vokala Kristau olimba mwauzimu, kaninofwanela  i-yachi dhowa vasogolo. (1 Ti. 4:15) Kristau uliwethene masiki akale mwana, unooda kala olimba mwauzimu. N’nga chini inothonyi-edha ira Kristauo ngolimba mwauzimu?

4. N’nga ninaidhiwe a-vi ira Kristaula ngolimba mwauzimu?

⁴ Kristau olimba mwauzimu uno-arela makundo othene a Nlungu a-kala sakula makundo enango anofuna liye a-arelanga. Pyaimbarimbari ira ninga mutu o-olongomana unooda dawi-a vyongo vinango. Mbwenye dambo nlilothene unodhilimbi-edha ira athuulelenga thitho irana vyongo vyothene vinofuna Yohova. Liye unowara umutu upya nodhilimbi-edha ira mathuulelwee takalenga olandana maningi na mathuulelo a Yohova. (Aef. 4:22-24) Unovifunji-a ira asakulenga vyoira mwazelu vo-arela malamulo a Yohova namakundwee. Ee-no kanofuneela malamulo manjinji om’mwandela vyongo vyofuna irana. Asakula vyoira, unodhilimbi-edha ira akwakwaneli-edhe vyongo visakunle liyevyo.—1 Ak. 9:26, 27.

5. N’nga Kristau oi kai olimba mwauzimu unogumanana nyarwa dhiivi? (Aefeso 4:14, 15)

⁵ Mutu o-oulukula mwauzimu, unooda roromelanga mo-orucha “vyongo vyainyengo” vyevyo “vinomwadhiwa na vyongo vinango vyonama” thitho unooda pupwi-iwa naatu opanduwa. b (Muleri Aefeso 4:14, 15.) Liye unooda irelanga sanje atu enango, kangana naaliwa, venango nyanyuwanga mombaranya thitho hora dhinjinji unooda iranga vyongo vyothakala akala utowesedhiwa.—1 Ak. 3:3.

6. N’nga ulukula mwauzimu ninafwanafwani-edhe nan’ni? (Muone thitho iruthiruthi.)

⁶ Ninga muongile i-yo wale, malemba anofwanafwani-edha ulukula mwauzimu na mwemo mwana munoulukulela liye nokala ndimuwa. Mwana kanoidhiwa vyongo vinjinji, ee-no unofuneela ndimuwa ira am’sogolelenga thitho m’kami-a. Mofwanafwani-a, m’ma unooda m’inda mwanee wono ira alupe rapa. Mbwenye mwanuo aulukulanga, m’mee unooda m’rumeli-a ira alupe ekene rapanimo. Mbwenye unom’thuucha ira aromenga ing’ana wu na wu a-analupe rapalo. Ee-no mwanuo aulukulanga unooda rambela vyongo ninga vyevi vaekene. Molandana namwana wenuo unofuneela  ndimuwa ira am’kami-enga rambela vyongo vyoopi-a, Kristau o-olimba mwauzimu unofuneela Makristau olimba mwauzimu ira tam’kami-enga rambela vyongo vinanonge uxamwalee na Yohova thitho ira asakulenga vyoira mwazelu. Mbwenye mo-iyana na vyevi, Kristau olimba mwauzimu afunanga sakula vyoira, unothuulela makundo a Bibilyani ira aidhiwe mathuulelo a Yohova va mwasuo thitho unoirana vyongo vyofwanelela.

7. N’nga Makristau olimba mwauzimu anofuneela kami-iwa naatu enango?

⁷ N’nga vyevi vinothapulela ira Kristau olimba mwauzimu kanofuneela kami-iwa na mutu uliwethene? Kabe. Hora dhinango Kristau olimba mwauzimu unofuneela thitho kami-iwa. Kuongela ira Kristau o-olimba mwauzimu, unodedi-edhela ira Makristau enango tam’mwandelenga vyoira venango m’sakulela vyoira vamwasa wenuo wafuneela liye sakula ekene. Voi Kristau olimba mwauzimu avepa Makristau enanga azelu venango oidhiwa vyongo vinjinji ira tam’kami-e, unoidhiwa ira izo yosakula vyoira njee namwasa oi uliwethene unofwanela “tukula tolwee.”—Agl. 6:5.

8. N’nga Makristau olimba mwauzimu ano-iyana mundhila dhiivi?

⁸ Andimuwa anooneya mo-iyana, molandana na vyevi, Makristau olimba mwauzimu ano-iyana thitho vamyasa ya makalelo auzimu ninga zelu, limba rima, va-a modhala mandha nothuulela atu enango. Wenjedhela vevo Makristau ambili olimba mwauzimu tagumanana vyongo vyolandana, anooda sakula vyongo vyo-iyana mbwenye vyothene pyovwelana namakundo a Bibilyani. Vyevyo vinoireya simbwasimbwa vamwasa wa ithuulela rima. Namwasa ozindiela likundo leli, aliwa katinotonga atu enango taona ira tatosakula mo-iyana. Yongo inofuna aliwa maningi kukalave ovwelana.—Aro. 14:10; 1 Ak. 1:10.

N’NGA NINAIRE A-VI IRA NIULUKULE MWAUZIMU?

9. N’nga ulukula mwauzimu unoireya vaokene? Muongemo.

⁹ Vavira hora, mwana unoulukula kala ndimuwa, mbwenye ulukula mwauzimu kunoireya vaokene. Ifwanafwani-o ndi vyevyo vyaireele abali awu Koritiyo. Aliwa tatoowachela milanyu yapama, tatoobadiziwa, tatoowachela zimu ochena thitho tatoofunjedha vyongo vinjinji kumela mumalangi-o a rumiwi Paulo. (May. 18:8-11) Mbwenye angalive ira vatoovira hora indendai venango vyawa vinjinji kumela vahora yabadiziwile aliwa, anjinji mwaaliwa tali o-olimba mwauzimu. (1 Ak. 3:2) N’nga ninaire a-vi ira vyongo ninga vyevi vya-aniireele?

10. N’nga ninaire a-vi ira niulukule mwauzimu? (Yuda 20)

¹⁰ Ira nifiye voulukula mwauzimu, yoroma ninofwanela kaana rima ofuna kala olimba mwauzimu. Atu enao anosakula kala “o-oidhiwa vyongo,” nodhowanganave kala a-ima mwauzimu, katinodhowa vasogolo. (San. 1:22) Kaninofwanela kala ninga andimuwa enao anonyindela anamabaliwa ira taasakulelenga vyoira. Malomwee ninofwanela onechecha ira ninaadhowanave ulukula mwauzimu. (Muleri Yuda 20.) Akala munaadhilimbi-edha ira muulukule mwauzimu, mum’vepenga Yohova ira auva-eni “rima ofuna irana vyongo vinodhiveliwana liye thitho kopolo dhoirela vyongovyo.”—Afl. 2:13.

11. N’nga ndi vyongo viivi vinoniva-a Yohova ira vinikami-e kala oulukula mwauzimu? (Aefeso 4:11-13)

¹¹ Yohova kanodedi-edhela ira niulukulenga okene mwauzimu. Ee-no utoniva-a anamakumbiza na anamafunji-a pingoni enao afunji-iwile pama ira takami-enga mutu uliwethene naifunelo yoi takale “andimuwa” mwauzimu nofiya “kala owarala mwauzimu ninga mwemo mwakalele Kristu.” (Muleri Aefeso 4:11- 13.) Yohova unoniva-a thitho zimu ochena ira unikami-enga kaana “mathuulelo a Kristu.” (1 Ak. 2:14-16) Mbwenye Yohova atoowandela atu ira talembe mabukhu 4 amilanyu yapama ira tanithonyi-edhe mwemo Yesu mwairela liye vyongo angali vailambo yavathivano, mwathuulela liye na mwaongela liye. Nasazi-edhanga mathuulelo a Yesu namwemo mwairela liye vyongo, ninooda kala Makristau olimba mwauzimu.

MWEMO YODYA YOTHAKUNA MUNANIKAMI-EDHELE ALIWA

12. N’nga “makundo oroma oonga vya Kristu” mbaavi?

¹² Ira niulukule mwauzimu, “ninofwanela funjedha vyongo vinjinji a-kala makundo oroma oonga vya Kristu baa-i.” Ifwanafwani-o yamakundo oromala, mbamafunji-edho okuza chinyuwa, iroromelo, ubadizo na venyathi-iwa muukwani. (Aeb. 6:1, 2) Enala mbenango mwamakundo oroma enao Makristau anororomela aliwa. Ngumwasiwa rumiwi Pedru atoonga makundo enala vevo valaleela liye mwinji wagumanyeile va petekoste. (May. 2:32-35, 38) Ninofwanela rumela makundo oromala ira nikale anamafunjedha a Kristu. Mofwanafwani-a, rumiwi Paulo atoowenjeli-a ira mutu uliwethene unokonda ifunji-edho yoonga venyathi-iwa waatu okwa, utokonda vyongo vyothene vinororomela Makristau. (1 Ak. 15:12-14) Mbwenye kaninofwanela kala okwakwanana makundo oroma aimbarimbarala baa-i.

13. N’nga ninaire a-vi ira niganyalinga na yodya yothakuna yoongiwa va lemba la Aebere 5:14? (Muone thitho iruthiruthi.)

¹³ Mo-iyana na makundo oroma, yodya yothakuna inothangani-avo malamulo a Yohova namakundwee enao anonikami-a vwechecha mathuulelwee. Ira ninganyalinga maningi na yodya yothakunila, ninofwanela funjedhanga madhu a Nlungu noathuulelanga modi-a thitho a-indi-edhanga basa vaingumii-u. Nairangana vyongo vyevi, ninodha funjedha sakula vyongo vinam’sangalali-e Yohova. c—Muleri Aebere 5:14.

14. N’nga Paulo akami-idhe a-vi Makristau awu Koritiyo ira taulukule mwauzimu?

¹⁴ Kristau o-olimba mwauzimu, unorucheya vaireya yongo yofuneya thuulela makundo a Bibilyani nowa-arela. Atu enango anothuulela ira akala kavali lamulo la Bibilyani  vamwasa unangwee, pyoi anooda irana yongo iliyothene inofuna aliwa. Atu enango anofuna ira tairenga va-iwa malamulo vamwasa oi kavali lamulo. Mofwanafwani-a, vinooneya ira Makristau awu Koritiyo tafuna ira Paulo aava-e malamulo vamwasa wa yodya yaveleliwa wu mafano. Malo moawandela vyoira, Paulo atoawandela ira mutu oliwethene utokaana “ufulu osakula” movwelana na ithuulela rimee. Liye atootapanya naaliwa likundo lelo laakami-e ira ithuulela rima ya mutu uliwethene ya-am’ruchi-enga thitho ya-asukwali-enga atu enango. (1 Ak. 8:4, 7-9) Voi ee-no Paulo atooakami-a Makristau awu Koritiyo ira taulukule mwauzimu naifunelo yoi ta-indi-edhenga basa dodoliso liwa lothuulela malo monyindelanga atu enango venango funanga ira vamwasa uliwethene vakale lamulo.

15. N’nga Paulo akami-idhe a-vi Makristau awu Iyeberi ira takale olimba mwauzimu?

¹⁵ Ninofunjedhavo thitho likundo n’nango lofuneya maningi vamadhu enao Paulo alembenle liye Makristau awu Iyeberi. Enango mwamakristau ala, katadhowilenave ulukula mwauzimu. Aliwa “tatooroma funafuna kaka a-kala yodya yauzimu yothakuna.” (Aeb. 5:12) Aliwa katafunjedhile thitho rumela makundo mapya enao Yohova aafunji-a liye dhela pingoni. (San. 4:18) Mofwanafwani-a, Makristau anjinji awu Yuda tanoolimbi-ave ilamulo yava-iwile Mose na Nlungu angalive ira ilamulwiyo yali ingamali-iwile wavyawa vyokwaranya 30 ndulimu, namwasa wa sembe ya Kristu. (Aro. 10:4; Tit. 1:10) Vyawa 30 vyali vyokwakwanela ira Makristau tavwecheche likundo loi katinofwanela a-rela ilamulo. Mutu uliwethene wenuo unaleri karta lalimbile Paulo lembela Makristau awu Iyeberi, unooda rumela ira mubukhuli mutokala yodya yauzimu yothakuna. Makundo enala mbenao afuneela aliwa ira taaroromelenga ira ndhila yolambelela ya Makristau njavakhundu. Vyangaakami-idhe thitho ira talaleelenga molimba rima angalive ira tanooruni-iwa na Ayuda.—Aeb. 10:19-23.

MURAMBELENGA VINYINDELA

16. N’nga wenjedhela vokala oulukula mwauzimu ninofwanela thitho iranan’ni?

¹⁶ Kaiira nivilimbi-edhenga ira niulukule mwauzimu baa-i, mbwenye nivilimbi-edhenga thitho ira nikaleve oulukula mwauzimu. Ira vyevi viodeye, ninofwanela rambela vinyindela. (1 Ak. 10:12) Ninofuneela “dhowanave dhiwesedha”  ira nione akala ninave dhowa vasogolo.—2 Ak. 13:5.

17. N’nga karta lalembile Paulo lembela Makristau awu Kolose, linothonyi-edha a-vi funeya odhowanave kala olimba mwauzimu?

¹⁷ Karta lalembile Paulo lembela Makristau awu Kolose, atoogogomedha funeya okalave olimba mwauzimu. Angalive ira aliwa tali oulukula mwauzimu, Paulo atoawenjeli-a ira katinami-iwe na zelu dhaatu. (Ako. 2:6-10) Epafura, wenuo unooneya ira anowaidhiwa pama atu apingonimo, anowalobelela hora dhothene ira “tadhowenave kala olimba mwauzimu.” (Ako. 4:12) N’nga ninofunjedhavon’ni? Paulo na Epafura, tatooidhiwa ira vanofuneela thindhi thitho kami-iwa na Nlungu ira mutu akaleve olimba mwauzimu. Aliwa tafuna ira Makristau awu Kolose, takaleve olimba mwauzimu angalive ira tanoogumanana nyarwa.

18. N’nga chini inaireele Kristau olimba mwauzimu? (Muone thitho iruthiruthi.)

¹⁸ Paulo atoowenjeli-a Makristau awu Iyeberi ira mutu olimba mwauzimu unooda dodomi-a uxamwalee na Nlungu. Akala Kristauo ngoruni-a kanachinyuwe ira Nlungu am’levelele. Yosangalali-a choi Makristau awu Iyeberi katafiile vevo. (Aeb. 6:4-9) N’nga a-vi waatu ofooka amalamboano? Venango enao akumi-iwile pingoni amala aliwa chinyuwa? Chinyuwa wiwa thitho dhiyevi-a wiwa, unothonyi-edha ira katili ninga atu aaongile Paulo ira anooda dodomi-a uxamwaliwa na Yohova. Mbwenye atwao tawelela wa Yohova anofuneela kami-iwa. (Zak. 34:15, 16) Andimuwa avapingoni anooda ira masaka-edho oi Kristau oidhiwa vyongo vinjinji aakami-enga ira taode fwanya kopolo mwauzimu.

19. N’nga ninofwanela kaana ifunelo yoi a-vi?

¹⁹ Akala munodhilimbi-edha ira mukale Kristau olimba mwauzimu, munooda kwakwaneli-edha vifunelo vinyuvyo. Dhowananive udya yodya yothakuna thitho mudhilimbi-edhenga ira mathuulelwinyu takale olandana maningi namathuulelo a Yohova. Akala muli Kristau olimba mwauzimu, dhilimbi-edheni ira mukaleve ee-no modhowa nodhowa.