1. N’nga chini inaireye waatu enango airile yodawa ilukulu?

 MUYOFUNJEDHA ivirile, natoofunjedha vyairile rumiwi Paulo mutu mwinango angairile yodawa ilukulu wu pingo wau Koritiyo. Mutu odauo kaachinyuwile thitho afwanela kumi-iwa pingoni. Mbwenye movwelana na lemba mukumele muru wa yofunjedha yei, atu anoira vyodawa vilukulu, anooda kami-iwa ira tachinyuwe. (Aro. 2:4) N’nga andimuwa avapingoni anaakami-e a-vi ira tachinyuwe?

2-3. N’nga ninofwanela iran’ni naidhiwa ira Kristau fwi-u utoira yodawa ilukulu, n’nga mwasiwa ngwan’ni?

² Ira andimuwa avapingoni tam’kami-e mutu, anofwanela idhiwa nyarwa inogumanana liye. N’nga ninofwanela ira n’ni naidhiwa ira Kristau fwi-u utoira yodawa ilukulu inairi-e ira akumi-iwe pingoni? Ninofwanela m’kokomeza ira adhowe amaonge waandimuwa avapingoni, naifunelo yoi tam’kami-e.—Esa. 1:18; May. 20:28; 1 Pe. 5:2.

³ N’nga a-vi akala mutu uirile yodauo kanofuna mawandela andimuwa avapingoni? I-yo ninofwanela dhowa maawandela andimuwa avapingoni naifunelo yoi mutuo akami-iwe. Nairana vyevi, ninothonyi-edha udhivela namwasa oi kaninofuna ira bali venango rongoli-uo anongiwe. Mutu odawa adhowanave irangana vyongo vyothakala, unononga uxamwalee na Yohova. Unooda thitho thakali-a limbili la pingo. Ee-no molimba rima, ninoiravo yongo namwasa oi ninom’dhiveliwana Yohova thitho mutuo.—Sal. 27:14.

 MODA ANDIMUWA AVAPINGONI MUNOKAMI-EDHA ALIWA ATU AIRILE VYODAWA VILUKULU

4. N’nga ifunelo ya andimuwa avapingo tadhowanga magumanana mutu uirile yodawa inokala yan’ni?

⁴ Mutu aira yodawa ilukulu pingoni, gulu laandimuwa linosakula andimuwa araru ofwanelela ira takale mukomisau yodhowa magumanana mutuo. a Andimuwala anofwanela kala odhiyevi-a. Tam’kami-anga mutu odawuo ira achinyuwe, anozindiyela ira katinaode m’kanyi-edha mutuo ira achinje. (Dot. 30:19) Andimuwa avapingoni anozindiyela ira kai atu othene anoira yodawa ana-arele malangi-o ninga mwemo mwairele mwene Davide. (2 Sa. 12:13) Atu enango anoira yodawa anokonda vwela malangi-o a Yohova. (Mar. 4:6-8) Angalive ira vili e-no, ifunelo ya andimuwa avapingoni inokala m’kami-a mutu uirile yodauo ira achinyuwe akala pyoodeya. N’nga mbamakhundo aavi andimuwa avapingoni ano-arela aliwa tadhowanga magumanana mutu uirile yodauo?

5. N’nga andimuwa avapingoni ano-arela malangi-o aavi tadhowanga magumanana mutu uirile yodawa? (2 Timoteo 2:24-26) (Muone thitho iruthiruthi.)

⁵ Andimuwa avapingoni anoona ira mutu uirile yodauo ndi libila la pereso yavadhulu li-olowile. (Luk. 15:4, 6) Ee-no tadhowanga magumanana mutuo, katinoonga venango ira vyongo na liye mwauwalanga. Aliwa katinodhowa magumanana mutuo mwailemeelelo baa-i naifunelo yoi tamam’fukenga vyofuka. Malomwee, anothonyi-edha makalalelo anofwanyeya va lemba la 2 Timoteo 2:24-26. (Muleri.) Andimuwa avapingonao anokala okhurudheya, opwaseya na oriya rima thitho anodhilimbi-edha ira tam’fiye varimani mutu uirile yodauo.

6. N’nga andimuwa avapingoni anakozeeli-edhe a-vi rimiwa ta-anadhowe magumana na mutu uirile yodawa? (Aroma 2:4)

⁶ Andimuwa avapingoni anokozeeli-edha pama mirimiwa. Aliwa anodhilimbi-edha m’sazi-edha Yohova tairanga vyongo na mutu udawile thitho anothuulela malangi-o a Paulo oonga ira: “Nlungu unaauoni-a riya rimawee ulukhulu, naifunelo yoi uchinyuwe.” (Muleri Aroma 2:4.) Andimuwa avapingoni anofwanela thuulela ira aliwa ndi anamakumbiza thitho ano-arela malangi-o a Kristu. (Esa. 11:3, 4; Mat. 18:18-20) Andimuwa avapingoni anosakuliwa kala mukomisauni, ta-anadhowe magumanana mutuo, anolobela nothuulela ira ifunelo yiwa kukami-a mutu odauo ira achinyuwe. Aliwa anosakasaka malemba mumabukhwi-u thitho anolobela ira  Nlungu aakami-e kala ozindiyela. Anothuulela thitho akala vatokala vyongo vinango vinofwanela aliwa idhiwa vyokuza mutuo vyevyo vinom’mwiri-a ira athuulelenga venango irana vyongo mundhila inango.—San. 20:5.

7-8. N’nga andimuwa avapingoni anasazi-edhe a-vi leva rima wa Yohova takami-anga mutu uirile yodawa?

⁷ Andimuwa avapingoni anosazi-edha leva rima wa Yohova. Aliwa anothuulela moda Yohova mwairela liye vyongo na atu odawa ndulimu. Mofwanafwani-a, Yohova atoonga na Kaini moleva rima, nom’mwenjeli-a vyo-arelavo vya vyodawa thitho m’mwandela vyongo vinofwanela liye irana ira akale vauxamwali na liye. (Mar. 4:6, 7) Yohova atoo-indi-edha basa namaongela Natani vovelela malangi-o wa Davide. Natani atoo-indi-edha basa ifwanafwani-o yam’fiile varimani mwenula. (2 Sa. 12:1-7) Thitho Yohova “atoodhowanave tumiza” anamaongelee “moweli-edha weli-edha” wa Aisraeli taira vyodawa. (Jer. 7:24, 25) Liye kaadedi-edhe ira aliwa tarome chinyuwa amala aakami-e. Malomwee, aromile nguliye iravo yongo vowakami-a ira tachinyuwe.

⁸ Andimuwa avapingoni anosazi-edha ifwanafwani-o ya Yohova vokami-a mutu uirile yodawa ilukulu. Movwelana na lemba la 2 Timoteo 4:2, aliwa anotapanya “moleva rima maningi” na mutu unorucheya rimuo. Andimuwa avapingoni enao anodhilimbi-edha a-rela makundo ali valembali, “hora dhothene anodhilimbi-edha kala odhikondi-a nom’kami-a mutuo moleva rima ira akaena rima ofuna irana vyongo vyofwanelela. Akala ira m’mbo-i mwaandimuwa avapingonao unooni-edha ira utonyanyuwa, vinooda kala vyorucha ira mutu odauo achinyuwe.”

9-10. N’nga andimuwa avapingoni anakami-e a-vi mutu uirile yodawa ira athuulele vyongo vinoirecha liye?

⁹ Andimuwa avapingoni anosakasaka ira taidhiwe vyongo vyairi-idhe ira mutuo adawe. Mofwanafwani-a, n’nga Kristauo atofooka namwasa oi atoo-iya funjedha Bibilya vaekene venango no-iya dhowa muurumiwini? N’nga liye, anoolobelecha wiliwili venango alobela ninga mwailemeelo baa-i? N’nga liye, unolandeecha na vyongo vinolavela liye? N’nga unosakulecha modaweya atu owaredhana venango vyongo vyosangalali-a? N’nga vyongo vinasakula liyevyo, vikuzile a-vi rimee? N’nga liye unoidhiwa vyoira vyee, moda munom’kuzela aliwa Babee Yohova?

¹⁰ Andimuwa avapingoni tafukanga vyofuka mwazelu, anom’kami-a mutu odauo ira akale othathuwa, thitho athuulele vyongo vinoirecha liye. (San. 20:5) Aliwa anooda i-ndi-edha basa vifwanafwani-o vofuna m’kami-a mutu odauo ira athuulele vyongo vyadawi-idhe liye ninga mwemo mwairele Natani vom’kami-a Davide. Venango vaulendo oroma mutuo unooda roma dhivwela tangaranga na vyongo vinoirecha liye thitho unooda chinyuwa.

11. N’nga Yesu aira a-vi vyongo naatu odawa?

¹¹ Andimuwa avapingoni anodhilimbi-edha m’sazi-edha Yesu. Yesu angavenyathi-iwile atoonga na Saulo wau Tariso thitho atom’fuka ira: “Mwasiwa ngwan’ni unondi-ara-ara?” Veva Yesu atom’kami-a thuulela vyodawa vyaira liye. (May. 9:3-6) Thitho voonga vya “i-yanule dhinalee Yezebeli,” Yesu aongile ira: “Nditom’va-a hora ira achinyuwe.”—Apk. 2:20, 21.

12-13. N’nga andimuwa avapingoni anom’va-a a-vi mutu odawa hora ira achinyuwe? (Muone thitho iruthiruthi.)

¹² Vom’sazi-edha Yesu, andimuwa avapingoni katinombaranyedha thuulela ira mutu uirile yodauo kanodhachinyuwave. Atu enango anooda thonyi-edha rima ofuna chinyuwa tagumanana komisau fendo yoromene, mbwenye waatu enango vanovira hora. Ee-no andimuwa avapingonao, anooda ira masaka-edho oi tamagumane okoka na mutu odauo fendo  dhingasi. Pyoodeya ira vasogolo vogumana na liye fendo yoroma, Kristau odauo unooda thuulela viwandeliwile liye. Unooda lobela wa Yohova modhiyevi-a. (Sal. 32:5; 38:18) Vaulendo o-arela unooda kaana mathuulelo o-iyana na ana liye vaulendo oroma.

¹³ Andimuwa avapingoni anothonyi-edha tangaranga nooma rima vom’kami-a mutu odauo ira achinyuwe. Aliwa anolobela wa Yohova thitho anokaana idedi-edho yoi Yohova unoraeli-a thindhi liwa vom’kami-a Kristauo ira azindiyele vyongo vidawi-idhe liyevyo nochinyuwa.—2 Ti. 2:25, 26.

14. N’nga mbaani unofwanela lemeziwa mutu odawa achinyuwa, n’nga mwasiwa ngwan’ni?

¹⁴ Pyosangalali-a maningi mutu odawa achinyuwa. (Luk. 15:7, 10) N’nga vyaira e-no mbaani unofwanela lemeziwa? Mbaandimuwa avapingoni? Thuulelani vyalembile Paulo vyokuza atu ochinyuwa. Liye aongile ira: “Venango Nlungu unodha arumeli-a ira tachinyuwe.” (2 Ti. 2:25) Mutu odawa achinja mathuulelwee na rimee, ofwanelela lemeziwa kai mutu, mbwenye Yohova namwasa oi ngu liye um’kami-idhe mutuo ira achinje. Paulo atoonga thitho vyongo vinango vyapama vinoireya mutuo achinyuwa. Atoonga ira mutu odauo aidhiwa imbarimbari molinyali, zelu dhinom’dhela thitho unovulumuwa wu migo-i ya namanami-a.—2 Ti 2:26.

15. N’nga andimuwa avapigoni anaire a-vi ira tadhowenave kami-a mutu odawa uchinyuwile?

¹⁵ Mutu odawa achinyuwa, andimuwa amukomisau yadhowile maonga na liye, anoira maulendo aubusa naifunelo yoi tadhowenave m’kami-a rambela migo-i ya Satana thitho ira asaka-edhe ndhiladhee. (Aeb. 12:12, 13) Andimuwa avapingoni katinowandela atu vyongo vyothakala viirile mutu odauo. N’nga ndi vyongo viivi, vinofwanela ira pingo uidhiwe?

“MWAASUMULULENGA VAMETHONI VAATU OTHENE”

16. Movwelana na lemba la 1 Timoteo 5:20, n’nga Paulo aonga vyaatu aavi vevo vaongile liye ira “othene”?

¹⁶ Muleri 1 Timoteo 5:20. Enala ndi madhu Paulo alembele liye Timoteo oi ali ndimuwa  fwee om’mwandela vyofwanelela irana na “atu ana ilemeelo yoiranga vyongo vyodaweya.” N’nga veva Paulo athapulela n’ni? Liye kaathapulela ira “atu othene” pingoni anofwanela idhiwa vyokuza mwasuo. Mbwenye aonga vya atu oyeva aidhi vyokuza mwasuo. Anooda kala atu aoni vahora yaira liye vyodawavyo venango mutu odauo aawandenle liye vyokuza mwasuo. Andimuwa avapingoni anooda awandelamo mwazelu ira mwasuo utosamaleliwa thitho mutu odauo utokami-iwa.

17. N’nga yodawa yaidhiweya pingoni venango akala inodha idhiweya, vanofwanela ongiwa milanyu yoi a-vi? N’nga mwasiwa ngwan’ni?

¹⁷ Mbwenye hora dhinango vinokalecha ira yodawayo itoidhiweya pingoni mwethene venango inodha idhiweya. Vyaireya e-no, madhu oi “othene” anooda thapulela pingo wethene. Ee-no andimuwa anooda onga milanyu yoonga ira bali venango rongola utosumululiwa. Mwasiwa ngwan’ni vyevyo vinofwanela ireya? Paulo atoonga ira: “Ira atu enangwao taovenga” na ifunelo yoi ta-airenga vyodawa.

18. N’nga andimuwa avapingoni anakami-e a-vi a-ima obadiziwa taira yodawa ilukulu? (Muone thitho iruthiruthi.)

¹⁸ N’nga andimuwa avapingoni anakami-e a-vi a-ima obadiziwa o-o-okwakwani-a vyawa 18 airile yodawa ilukulu? Gulu la andimuwa linoira masaka-edho oi andimuwa ambili tamagumane na mwanuo vambo-i na anamabalee akala ndi Makristau. b Aliwa thitho anosaka idhiwa viirile anamabaliwa vofuna m’kami-a mwaniuo. Akala ira mwanuo utokaana makalelo apama thitho akala ira anamabaleao anave m’kami-a vamwasuo, andimuwa avapingoni  ambilao anooda sakula ira mwasuo umalele vevo. Thitho Nlungu atoava-a izo anamabala ira talangi-enga a-imiwa mwaudhivela. (Dot. 6:6, 7; San. 6:20; 22:6; Aef. 6:2-4) Hora dhinango andimuwa avapingoni anooda fukanga anamabala ira taidhiwe akala mwanuo utokami-iwa mofwanelela. N’nga a-vi akala ira mwanuo unodhowanave iranga vyongo vyothakala, angalive ira utomakami-iwa naandimuwa avapingoni ambili na anamabalee venango Kristau unom’mwimelela? Vyakala e-no, komisau ya andimuwa inodhowa magumanana okoka mwanuo, vambo-i na anamabalee akala ndi makristau.

“YOHOVA NGWAUDHIVELA ULUKULU NA WATANGARANGA”

19. N’nga andimuwa avapingoni anom’sazi-edha a-vi Yohova takami-anga mutu uirile yodawa?

¹⁹ Andimuwa avapingoni amu komisauni atokaana izo ilukulu wa Yohova vokami-a ira pingo ukale ochena. (1 Ak. 5:7) Anofuna thitho kami-a atu odawa ira tachinyuwe akala pyoodeya. Ira vyevi viodeye anofwanela kaana mathuulelo apama, nodedi-edhanga ira mutuo unooda chinja. Mwasiwa ngwan’ni? Mwasiwa ngoi, aliwa anofuna m’sazi-edha Yohova oi “ngwaudhivela ulukulu na watangaranga.” (Yak. 5:11) Rumiwi Juwau thitho anoodhiveliwana abali naarongolee. Liye alembile ira: “A-imanga odhiveliwiwa, ndinoulembelani vyongo vyevi ira mwa-aire yodawa. Mbwenye akala mutu utodawa, nitokaana namakami-a olongomana, Yesu Kristu, oi uli vambo-i na Baba.”—1 Ju. 2:1.

20. N’nga ninodha tapanya n’ni muyofunjedha yomari-a?

²⁰ Pyovwi-a tangaranga ira hora dhinango Makristau katinofuna chinyuwa. Vyaireya e-no anofwanela kumi-iwa pingoni. N’nga andimuwa avapingoni anosamalela a-vi myasa ninga dhedhi? Ninodha tapanya vyevi muyofunjedha yomari-a ya Nsanja yen’na.