1-2. (a) N’nga Yohova unoaona a-vi atu anoira vyodawa aliwa a-funanga chinyuwa? (b) N’nga Yohova unodedi-edhela ira atu adawile tairen’ni?

 YOHOVA Nlungu kanolema vyodawa. (Sal. 5:4-6) Liye unofuna ira nivwelenga makhundwee olongomana enao anofwanyeya Bibilyani. Pyaimbarimbari ira Yohova kanodedi-edhela ira atu o-olongomana tairengana vyongo mo-odawi-a yongo iliyothene. (Sal. 130:3, 4) Vahora imbo-ive yeniyo, liye kanolema ‘atu o-oova Nlungu enao anotukula riyawee rima ulukhulu kala mwasa oirelana kalelo lova-a manyadho.’ (Yud. 4) Thitho Bibilya linoonga vya “nongiwa waatu o-oova Nlungu” vakondwee ya Armagedo.—2 Pe. 3:7; Apk. 16:16.

² Mbwenye Yohova kanofuna ira mutu uliwethene adhanongiwe. Ninga muonele i-yo mu miru yofunjedha ya murevistali, Bibilya linoonga movweya pama ira Nlungu “unofuna ira atu othene tachinyuwe.” (2 Pe. 3:9) Andimuwa avapingoni anom’sazi-edha Yohova takami-anga moleva rima atu enao airile yodawa ira tachinje ndhiladhiwa, nokala okoka vauxamwali na liye. Mbwenye hora dhinango atu anoira vyodawa katinochinyuwa. (Esa. 6:9) Enango anodhowanave irangana vyongo vyothakala angalive ira andimuwa avapingoni atoakami-a moweli-edha weli-edha ira tachinyuwe. N’nga vyaireya e-no, andimuwa avapingoni anofwanela iran’ni?

 “MUM’KHUMI-EMO MUTU OTHAKALUO”

3. (a) N’nga Bibilya linoonga ira andimuwa avapingoni anofwanela iran’ni na mutu o-ochinyuwa? (b) Mwasiwa ngwan’ni ninooda onga ira mutu unokala angasakunle ekene ira akhumi-iwe pingoni?

³ Akala mutu uirile yodauo kanochinyuwa, andimuwa avapingoni katinairele munango mbwenye aliwa ano-arela malangi-o anofwanyeya valemba la 1 Akoritiyo 5:13, anoonga ira: “M’khumi-enivo vari vinyu mutu othakaluo.” Veva vinokala ninga mutu odauo utosakula gumanana vyo-arelavo va vyoiravyee thitho unokala ira unaa-anda vyadhanle liye. a (Agl. 6:7) Mwasiwa ngwan’ni ninoonga e-no? Namwasa oi liye unokala ira utokonda chinja angalive ira andimuwa avapingoni tatoom’kami-a moweli-edha weli-edha ira achinyuwe. (2 Ma. 17:12-15) Vyoira vyee vinothonyi-edha ira utosakula konda a-rela makhundo a Yohova.—Dot. 30:19, 20.

4. Mwasiwa ngwan’ni vanoongiwa milanyu mutu o-ochinyuwa akhumi-iwa pingoni?

⁴ Mutu odawa a-anochinyuwa akhumi-iwa pingoni, milanyu inoongiwa pingoni yoonga ira liye kai wa Mboni dha Yohova. b Ifunelo ya milanywila kai m’va-a manyadho mutuo. Mbwenye milanywila inoongiwa naifunelo yoi atu pingonimo ta-arele malangi-o a Malembani oi “ta-iye vwelana” na mutuo “masiki udya vambo-i na liye.” (1 Ak. 5:6) Vatokala myasa yapama yeniyo Nlungu yavelelenle liye malangi-o ala. Rumiwi Paulo alembile ira: “Rombwe oyeva otupi-ana mapau unooda tupi-a utu othene omunyiwa.” (1 Ak. 5:6) Akala mutu o-ochinyuuo kanokhumi-iwa pingoni, vyoiravyee vinooda fooki-a atu enango enao anodhilimbi-edha a-rela makhundo olongomana a Yohova.—San. 13:20; 1 Ak. 15:33.

5. N’nga nim’monenga a-vi mutu ukhumi-iwile pingoni, n’nga mwasiwa ngwan’ni?

⁵ N’nga nim’monenga a-vi bali venango rongola ukhumi-iwile pingoni? Angalive ira kaninofwanela waredha na liye, nim’monenga ninga libila lo-olowa. Libila lelo likhumilevo vaguluni vaafwee linooda welela okoka. Nithuulelenga ira libila lo-olowalo, latoodhivelela wa Yohova. Pyovwi-a tangaranga ira vahorila mutuo unokala ira kanokwakwaneli-edha yolanyedhayee yodhivelela thitho vyevi vinokala vyoopi-a maningi. (Zak. 18:31) Angalive ira vili e-no, Yohova unodhowanave thonyi-edha tangaranga thitho unodedi-edha ira mutuo adhawelele. N’nga andimuwa avapingoni anakami-e a-vi mutu odawa ukhumi-iwile pingoni?

MODA ANDIMUWA AVAPINGONI MUNOKAMI-EDHELA ALIWA ATU OKUMI-IWA PINGONI

6. N’nga andimuwa avapingoni anaire a-vi ira takami-e mutu ukhumi-iwile pingoni?

⁶ N’nga mutu akhumi-iwa pingoni, andimuwa anaam’iya aliwa a-m’kami-a ira awelele okoka wa Yohova? Kabe kai e-no. Komisau ya andimuwa yam’mwandela mutuo ira utokhumi-iwa pingoni, inom’mwandela thitho vyongo vinaire liye ira aweleli-edhiwe. Mbwenye kai vyevyo baa-i, andimuwa avapingoni anoirana vyongo vinjinji kwaranya vyevi. Hora dhinjinji aliwa anom’mwandela ira akala unodhiveliwa, anooda ira masaka-edho ira tadham’gumanena okoka vavira myedi mingasi ira taone akala utochinja. Akala mutuo unorumela dhagumana okoka na aliwa, vahora yeniyo andimuwa  anom’limbi-a mwaudhivela ira achinyuwe thitho awelele wa Yohova. Masiki vikale ira vahora yeniyo mutuo kathonyi-edhe ira utochinja, andimuwa anodhilimbi-edha ira masaka-edho oi tadhagumane okoka na mutuo.

7. N’nga andimuwa avapingoni anothonyi-edha a-vi tangaranga tairanga vyongo na mutu ukhumi-iwile pingoni? (Jeremiya 3:12)

⁷ Andimuwa avapingoni anodhilimbi-edha sazi-edha tangaranga dha Yohova tairanga vyongo na mutu okhumi-iwa pingoni. Mofwanafwani-a, Yohova kaadedi-edhele ira Aisraeli tachinyuwe liye a-anairevo yongo ira aakami-e. Malomwee, nguliye aromile iravo yongo aliwa ta-anarome thonyi-edha chinyuwa. Ninga muonele i-yo mu yofunjedha yanambili ya murevistali, Yohova atoothonyi-edha tangaranga vom’mwandela namaongela Oseya ira amavwelane okoka na i-yanee wenuo ali airangave yodawa ilukhulu. (Ose. 3:1; Mak. 3:7) Vosazi-edha Yohova, andimuwa avapingoni anofunechecha kami-a mutu uirile yodawa ira achinyuwe thitho anoirana vyongo vyothene vinaode aliwa ira vikale vyo-orucha wa mutuo welela pingoni.—Muleri Jeremiya 3:12.

8. N’nga ifwanafwani-o ya Yesu ya mwana opupuruwa inonikami-a a-vi vwechecha tangaranga dha Yohova? (Luka 15:7)

⁸ Thuulelani ifwanafwani-o ya mwana opupuruwa itapanyileni i-yo mu yofunjedha yanambili yamu levistali. Babee mwanuo angam’mone adhanga, “atom’tamangela nom’khumbarela thitho atoom’bejari mwa udhivela.” (Luk. 15:20) Babuo kaadedi-edhele ira mwanuo avepe ira am’levelele. Malomwee mofwanafwana na baba uliwethene wa udhivela, aliwa mbaromile iravo yongo. Ndimwemo thitho andimuwa avapingoni munoirela aliwa vyongo naatu enao a-olowile. Aliwa anofuna ira mabila odimela “tawelele wa Yohova.” (Luk. 15:22-24, 32) Dhulu unokala sangalala maningi mutu odawa awelela, saasawa thitho vailambo yavathi.—Muleri Luka 15:7.

9. N’nga Yohova unofuna ira atu adawile tairen’ni?

⁹ Khumela va vyongo vitapanyileni i-yovi, pyooneelatu ira Yohova kanolema atu o-ochinyuwa. Mbwenye kanoatatilelatu atwao. Unofuna ira aliwa tawelele. Mathuulelo a Yohova waatu odawa atoongiwa va lemba la Oseya 14:4, vevo vanoonga ira: “Ndinodha mali-a a-roromeleya wiwa. Ndinodha adhiveliwana mofuna wanga, namwasa oi ndito-iya anyanyuwela.” Vinooneya ira madhu enala, anokami-a andimuwa avapingoni ira taonenga izindiyelo iliyothene yothonyi-edha ira mutuo utoroma chinyuwa. Madhwala anosikimizela thitho atu am’iidhe Yohova ira liye unoadhiveliwana thitho unofuna ira tawelele mombaranya.

10-11. N’nga andimuwa avapingoni anakami-e a-vi mutu ukumi-iwile pingoni walelene?

¹⁰ N’nga a-vi vya atu enao akhumi-iwile pingoni walelene venango vyawa vinjinji ndulimu? Atu oi e-no venango anokala ira katinoira vyodawa vyevyo vyairi-idhe ira takhumi-iwe pingoni. Thitho hora dhinango katinothuulela navang’ono vene yeyo yairi-idhe ira takhumi-iwe pingoni. Akala vatovira hora indendai moi a-vi, andimuwa avapingoni anodha dhilimbi-edha sakasaka noawendela atu ninga enala. Vamaulendo enao, andimuwa avapingoni anooda lobela vambo-i na aliwa, noalimbi-a mwa udhivela ira tawelele pingoni. Akala mutu uli undhe wa vyawa vingasi, pyo-oira fuka ira unokala angafookile mwauzimu. Ee-no athonyi-edha ira unofuna welela, andimuwa avapingonao anooda ira masaka-edho oi mutu  mwinango afunjedhenga na liye Bibilya angalive ira kanawelele pingoni. Vavyoireya vyothene vyevi ndi andimuwa anofwanela ira masaka-edho oi mutuo afunjedhenga Bibilya.

¹¹ Andimuwa avapingoni anofwanela sazi-edha tangaranga dha Yohova, vodhilimbi-edha kami-a atu anjinji idhiwa ira ngari itokalavove yoi anooda welela wa Yohova. Akala mutu odawa utochinyuwa thitho uto-iya vyothakala vyevyo vyaira liye, unofwanela weleli-edhiwa pingoni mombaranya.—2 Ak. 2:6-8.

12. (a) N’nga ndi va hora ivi vevo andimuwa avapingoni vanofwanela aliwa ira polepole maningi? (b) Mwasiwa ngwan’ni kaninofwanela thuulelanga ira atu enao airile vyodawa vinangovyee, katinavweliwe tangaranga na Yohova? (Muone thitho madhu achindo.)

¹² Hora dhinango andimuwa avapingoni  anofwanela ira vyongo mwapolepole maningi ta-anam’mweleli-edhe mutu pingoni. Mofwanafwani-a, akala mutuo airele vyongo vyauwalanga mwana noroma panduwa venango ateira masaka-edho oi amali-e banjalee, andimuwa avapingoni anofwanela sikimizela ira mutuo utochinyuwadi. (Mak. 2:14; 2 Ti. 3:6) Aliwa anofwanela barela abali na arongola pingoni. Vahora imbo-ive yeniyo nizindiyelenga ira Yohova ngokhozeya wachela mutu uchinyuwile khumela vathi varima thitho i-ya irana vyongo vyothakala vyaira liye. Angalive ira andimuwa avapingoni anofwanela ira polepole naatu airele vyongo vyainyengo afwiwa, aliwa katinofwanela thuulela ira kavali mutu odawa wenuo a-anavweliwe tangaranga na Yohova. c—1 Pe. 2:10.

VYONGO VINAIRE PINGO

13. N’nga ninoira a-vi mutu asumululiwa? N’nga ninoira a-vi mutu akhumi-iwa pingoni?

¹³ Movwelana na yofunjedha ivirile, milanyu yaongiwa ira mutuo utosumululiwa, ninodhowanave irela vyongo vambo-i naliye voidhiwa ira atoochinyuwa thitho uto-iya vyothakala vyairana liye. (1 Ti. 5:20) Liye unokalave uikundu ya pingo thitho unofuneela limbi-iwa vowaredha na Makristau afwee. (Aeb. 10:24, 25) Mbwenye kai mwemo munokalela aliwa na mutu akumi-iwa pingoni. Mutu akumi-iwa pingoni nino-iya vwelana naliye “masiki udya na mutu oi e-no.”—1 Ak. 5:11.

14. N’nga Makristau ana-indi-edhe a-vi basa ithuulela rima iwa voira vyongo na mutu ukumi-iwile pingoni? (Muone thitho iruthiruthi.)

¹⁴ N’nga vitapanyileni i-yovi, vinothapulela ira nim’pwazenga mutu ukhumi-iwile pingoni? Kabe. Pyaimbarimbari ira kaninawaredhenga na liye. Mbwenye akala ukumi-iwile pingonuo ngu bali venango ali fwi-u, ninooda m’mwitanela migumanoni. N’nga afiya va migumanoni niirenga a-vi? Ndulimu kanam’mwenyula mutu akumi-iwa pingoni. Mbwenye va-eeni, Kristau uliwethene unooda ira vyongo movwela na ithuulela rimayee yofunji-iwa pama Bibilya. Enango  anooda sakula m’va-a mandha nom’mwenyula venango m’mwachela vagumanoni. Mbwenye kaninaode onga na liye wahora injinji venango waredhanga na liye.

15. N’nga lemba la 2 Juwau 9-11 linoonga vyaatu airile vyodawa viivi? (Muone thitho kwadru yoi “ N’nga Juwau na Paulo taonga vyodawa vyolandana?’’)

¹⁵ Enango anooda fukanga ira, ‘N’nga vale Bibilya kalinoonga ira mutu amwenyulanga mutu okumi-iwa pingoni unokala airangana vambo-i mabasee othakalao?’ (Muleri 2 Juwau 1:9-11.) Mwasa othene wava lembali, unothonyi-edha ira malangi-o ala taonga vyaatu opanduwa venango enao anolimbi-a makalelo othakala. (Apk. 2:20) Ee-no akala mutuo unolimbi-a makalelo opanduwa, andimuwa avapingoni katinoira masaka-edho oi tam’mwendele. Mbwenye vanokala idedi-edho yoi unodha chinja mathuulelwee. Vodedi-edhela hora yoi achinje, mutu oi ee-no kaninom’mwenyula venango m’mwitanela migumanoni.

NISAZI-EDHENGA TANGARANGA DHA YOHOVA

16-17. (a) N’nga Yohova unofuna ira atu odawa tairen’ni? (Zakiyeli 18:32) (b) N’nga andimuwa avapingoni anathonyi-edhe a-vi ira anolaba basa vambo-i na Yohova vokami-a atu airile vyodawa?

¹⁶ N’nga nitapanyileni n’ni muvyofunjedha 5 vi? Yohova kanofuna ira mutu uliwethene adhanongiwe. (Muleri Zakiyeli 18:32.) Mbwenye unofuna ira atu ochinyuwa tawelele wa liye. (2 Ak. 5:20) Ngumwasee wahora indendai thitho moweli-edha weli-edha, Yohova ukadhi awandelanga atwee ninga gulu na mutu uliwethene vaekene ira achinyuwe nowelele wa liye. Andimuwa avapingoni anolaba basa vambo-i na Yohova, vokami-a atu enao airile yodawa ira tachinyuwe.—Aro. 2:4; 1 Ak. 3:9.

¹⁷ Dhulu unokala sangalala maningi mutu odawa achinyuwa. Babi-u wadhulu Yohova unosangalala thitho maningi libila lo-olowa lawelela pingoni. Ninom’dhiveliwana maningi Yohova nathuulela tangarangadhee noriya rimawee ulukulu.—Luk. 1:78.