1. N’nga Yohova unofuna ira atu othene pingoni taire n’ni?

 YOHOVA utova-a atu ufulu osakula. Hora dhothene nino-indi-edha basa ufulu wen’na nasakulanga vyoira. Mwasa nlukulu ofuneya maningi wenuo mutu uliwethene unofuneela liye sakula, ngokuza dhivelela wa Yohova nokala mubanja laatu anom’lambela. Yohova unofuna ira mutu uliwethene airena vyevi. Mwasiwa ngwan’ni? Namwasa oi Yohova unodhiveliwana atu thitho unowafunela vyongo vyapama. Yohova unofuna ira takale vauxamwali na liye thitho tadhakaena ingumi yo-omala.—Dot. 30:19, 20; Agl. 6:7, 8.

2. N’nga Yohova unofuna ira atu a-achinyuwile taire n’ni? (1 Juwau 2:1)

² Mbwenye Yohova kanokhanyi-edha mutu uliwethene ira am’labelenga. Unofuna ira mutu uliwethene asakulenga ekhene vinofwanela liye irana. N’nga chini inoireya akala Kristau obadiziwa kavwenle lamulo la Nlungu amala liye irana yodawa ilukulu? Akala kanochinyuwa, unofwanela kumi-iwa pingoni. (1 Ak. 5:13) Mbwenye angalive ira vili e-no, Yohova unodedi-edhela ira mutu uirile yodauo awelele wa liye. Ngu mwasiwa atoovelela kuto ira atu odawa enao anochinyuwa, taleveleliwenga. (Muleri 1 Juwau 2:1.) Nlungwi-u  waudhivela unovepa atu airile vyodawa vilukulu ira tachinyuwe.—Zka. 1:3; Aro. 2:4; Yak. 4:8.

3. N’nga ninotapanya n’ni muyofunjedha yei?

³ Yohova unofuna ira nisazi-edhenga mathuulelwee va mwasa wa vyodawa na atu enao anodawa. Muyofunjedha yei, ninotapanya moda munairele i-yo vyevi. Mwaleringa yofunjedhila munoona (1) vyaireile mupingo wau Koritiyo mutu mwinango angairile yodawa ilukulu, (2) malangi-o avelenle rumiwi Paulo mutu adawilule angachinyuwile thitho (3) moda mwasa wa Bibilyani munothonyi-edhela aliwa mwemo Yohova, munoonela liye Makristau enao airile yodawa ilukulu.

VYAIREILE MUPINGO WAU KORITIYO MUTU MWINANGO ANGAIRILE YODAWA ILUKULU

4. N’nga chini yaireile wu pingo wau Koritiyo? (1 Akoritiyo 5:1, 2)

⁴ Muleri 1 Akoritiyo 5:1, 2. Va ulendwee wanararu wau misionario, Paulo atoovwa mwasa osukwali-a maningi waireile mupingo wau Koritiyo wenuo wakaathi-iwile wene. Bali mwinango atooira mararuo na m’mee om’fwanya. Kaleloli lali lothakala maningi moi “masiki wa atu amaziza enango katairana.” Makristau aweo tathuulela ira kavali yorucha ira bali oirana vyongo ninga vyevyo akaleve pingoni. Venango atu tathuulela ira vyevi vinothonyi-edha ira Nlungu ngwatangaranga thitho unovwechecha ira atu mbo-olongomana. Mbwenye Yohova kanolevela vyongo vyothakala vari vaatwee. Voirana vyongo vyamanyadho ninga vyevi, mutuo atoothakali-a limbili la pingo. Angaodile thitho dodomi-a Makristau enango enao aawaredhengana liye. N’nga Paulo alangi-idhe ira pinguo wiire n’ni?

5. N’nga Paulo aulangi-idhe pingo ira wiire n’ni, n’nga athapulela n’ni? (1 Akoritiyo 5:13) (Muone thitho iruthiruthi.)

⁵ Muleri 1 Akoritiyo 5:13. Movudheleliwa, Paulo atoolemba karta thitho atoovelela malangi-o oi mutu odauo akumi-iwe pingoni. N’nga Makristau ororomeleya tafwanela iran’ni na mutuo? Paulo atoawandela ira, “ta-iye vwelana” na liye. N’nga veva Paulo athapulela n’ni? Liye atoonga ira lamulo leli, lathangani-avo ira “masiki m’dyanee mutu oi e-no” ko-ofwanelela. (1 Ak. 5:11) Udya vambo-i na mutuo unooda niiri-a ira nirome waredha na liye. Veva pyooneelatu ira Paulo athapulela ira Makristau, katafwanela waredha na mutuo. Vyevi vingabarenle atu pingonimo ira  ta-adodomi-eye na makalelwee othakalao. (1 Ak. 5:5-7) Wenjedhela vevo, i-ya waredha na mutuo ungam’kami-idhe zindiyela ira utolapelana maningi na Yohova, thitho kaana manyadho nochinyuwa.

6. N’nga Makristau au Koritiyo na mutu adawilule tairile n’ni tangawachenle karta la Paulo?

⁶ Angatumizile kartalee wa Makristau awu Koritiyo, vinooneya ira Paulo athuulela vyevyo pingo vyaire aliwa tawachela kartalo. Voi e-no Tito atoodhana milanyu yeniyo yam’sangalali-idhe maningi. Makristauao tatoowachela pama kartalee. (2 Ak. 7:6, 7) Aliwa tatoo-arela malangi-o akartalo. Va-anavire hora kumela vevo Paulo vatumizile liye kartalee, mutu odawuo atoochinyuwa nochinja makalelwee. Thitho atooroma a-rela makhundo olongomana a Yohova.  (2 Ak. 7:8-11) N’nga Paulo aulangi-idhe pinguo ira wiire n’ni?

VYAIRILE PINGO MUTU AIRILE YODAUO ANGACHINYUWILE

7. N’nga m’kumi-a pingoni mutu airile yodaule wam’kami-idhe a-vi? (2 Akoritiyo 2:5-8)

⁷ Muleri 2 Akoritiyo 2:5-8. Paulo atoonga ira, “sumululiwa na atu anjinji wali okwakwanela wa mutu wen’na.” Mumadhu enango ninooda onga ira, langiwao watom’kami-a. N’nga wam’kami-dhe a-vi? Wam’kami-dhe ira achinyuwe.—Aeb. 12:11.

8. N’nga Paulo aulangi-idhe pingo ira wiire n’ni?

⁸ Vasogolovee Paulo atoolangi-a pinguo ira: “Mum’levelele na rima othene nom’didili-a.” Thitho “mum’sikimizele ira munom’dhiveliwana.” Veva vanooni-a ira Paulo afuna ira pinguo, wiirena vyongo vinjinji a-kala m’rumeli-a ira awelele mugulu la Yohova baa-i. Paulo afuna ira vyoonga na vyoira viwa, vim’sikimizeli-e mutuo ira atom’levelela thitho anom’dhiveliwana. Vyevi vyathonyi-edha ira atom’mwachela pingoni na mandha menli.

9. Mwasiwa ngwan’ni atu enango vyanowarucha m’levelela mutu achinyuwilule?

⁹ N’nga atu enango pingonimo, vyanowarucha wachela mutu odawa achinyuwile? Bibilya kalinoonga, mbwenye vinooneya ira tatookalavo. Aliwa tathuulela ira vyoira vyee vyatooromi-a nyarwa pingoni, nova-a manyadho atu enango. Vinooneya thitho ira atu enango taona ira kai longomano m’mwachela okoka mutuo ninga baliwa, namwasa oi aliwa tanoodhilimbi-edha kaana makalelo apama. (Mufwanafwani-edhele na lemba la Luka 15:28-30.) Mwasiwa ngwan’ni pinguo wa fwanela m’thonyi-edha udhivela waimbarimbari baliwa uweleliluo?

10-11. N’nga chini yaireye aa-kale ira andimuwa avapingoni katam’levelele mutu odawa achinyuwiluo?

¹⁰ Kathuulelani vyaireye aa-kale ira andimuwa avapingoni, tatookonda m’mwachela mutu ochinyuuo venango aa-kale ira vyawelenle liye pingoni Makristau afwee tatookonda m’thonyi-edha udhivela. Angakanle “watangaranga maningi mokwaranyi-a madile.” Thitho adhivwenga ira kaaode m’labela okoka Yohova. Vingam’ruchile ira adhowenave saka-edha uxamwalee na Nlungu.

¹¹ Yoophi-a maningi choi aa-kale ira abali naarongolao tatookonda m’levelela mutu ochinyuuo, tangadodomi-idhe uxamwaliwa na Yohova. Mwasiwa ngwan’ni ninoonga e-no? Namwasa oi, malo mom’sazi-edha Yohova wenuo unolevelela atu odawa anochinyuwa, tangam’sazi-edhenga Satana wenuo uli o-okhaana tangaranga thitho wauwalanga. Aliwa tangakanle ninga mafwaramento enao Namanami-a anoa-indi-edhela liye basa vofuna m’mwimwanani-a mutuo ira a-arome m’labela Yohova.—2 Ak. 2:10, 11; Aef. 4:27.

12. N’nga pingo wam’sazi-edhe a-vi Yohova?

¹² N’nga pingo wau Koritiyo wasazi-edhe a-vi Yohova, a-kala Satana? Aliwa tangairilena vyevi vosazi-edha moda Yohova munoirela liye vyongo naatu odawa achinyuwile. Kaonani vyaongile alimbo lemba Bibilya enango vyokuza Yohova. Davide aongile ira: Liye “ngwapama thitho ngokozeya levelela.” (Sal. 86:5) Mika aongile ira: “N’nga vatokala Nlungu mwinango, olandana nanyo unolevelela vyodawa vyaatu?” (Mik. 7:18) Thitho Esaya atoonga ira: “Mutu wa makalelo othakala, a-iye ndhiladhee thitho ophei-a afwee a-iye mathuulelwee. Awelele  wa Yohova voi unodha m’vwela tangaranga. Awelele wa Nlungwi-u, namwasa oi unodha m’levelela na rima othene.”—Esa. 55:7.

13. Mwasiwa ngwan’ni vyali vyofwanelela m’mweli-edha pingoni mutu achinyuwilule? (Muone kwadru loi, “ n’nga ndi e-lini vevo mutu wau Koritiyo vyaweleli-edhiwe liye pingoni?”)

¹³ Ira atu awu Koritiyo tam’sazi-edhe Yohova, tafuneela m’mwachela mutu odawa achinyuwiluo nom’sikimizela ira tanom’dhiveliwana. Vo-arela malangi-o a Paulo oi tam’mwachele mutu ochinyuuo, pingo watoothonyi-edha ira “wali ovwela va vyongo vyothene.” (2 Ak. 2:9) Angalive ira vavirile myedi yoyeva kumela vevo vakumi-wile liye pingoni, mutuo atoochinyuwa. Ee-no, kavalive mwasa odembuwela m’mweleli-edha pingoni.

NISAZI-EDHENGA LONGOMANO NA TANGARANGA DHA YOHOVA

14-15. N’nga ninofunjedhavo n’ni va vyaireile wu pingo wau Koritiyo? (2 Pedru 3:9) (Muone thitho iruthiruthi.)

¹⁴ Mwasa waireile wu pingo wau Koritiyo, walembiwile ira “unilangi-e.” (Aro. 15:4) Mwasula unothonyi-edha ira Yohova kanolema mutu oirana vyodawa vilukulu vari vaatwee. Liye kanoona ira atu odawa enao ta-anochinyuwa anofwanela vweliwa tangaranga ira tadhowenave kala pingoni vambo-i na arumiwee ororomeleya. Yohova ngwatangaranga mbwenye kanolema mutu  unoirana vyodawa vilukulu thitho makundwee katinochinja. (Yud. 4) Levelela mutu o-ochinyuwa kai thonyi-edha tangaranga, namwasa oi unooda phei-a atu othene pingonimo.—San. 13:20; 1 Ak. 15:33.

¹⁵ Angalive ira vili e-no, ninoidhiwa ira Yohova kanofuna ira mutu uliothene adhanongiwe. Liye unofuna vulumucha atu akala pyoodeya. Yohova unothonyi-edha tangaranga waatu anochinyuwa thitho unofuna ira takale okoka vauxamwali na liye. (Zak. 33:11; Muleri 2 Pedru 3:9.) Ee-no mutu wau Koritiyo vyachinyuwile liye, no-iya ndhiladhee dhothakala, Yohova atom’indi-edha basa Paulo vowandela pinguo ira um’levelele nom’mwachela okoka pingoni.

16. N’nga munovivwa a-vi, mwathuulela moda mwawendele mwasa waireile wu Koritiyo?

¹⁶ Tapanya vyaireile wu pingo wau Koritiyo, utonikami-a ona ira Yohova ngwaudhivela na olongomana. (Sal. 33:5) Idhiwa vyevi unoniiri-a ira nim’titimi-enga maningi. I-yo othene nili atu odawa thitho ninofuneela ira anilevelelenga. Ninofwanela m’simba Yohova namwasa oniva-a kuto oi unoiri-a ira anilevelelenga. Pyolimbi-a maningi idhiwa ira Yohova unodhiveliwana atwee thitho unowafunela vyongo vyapama.

17. N’nga ninodha tapanya n’ni muvyofunjedha vyo-arela?

¹⁷ N’nga mutu aira yodawa ilukulu pingoni malamboano, andimuwa avapingoni anasazi-edhe a-vi udhivela wa Yohova nom’kami-a ira achinyuwe? N’nga pingo unofwanela iran’ni akala andimuwa avapingoni atosakula vyom’kumi-a pingoni venango m’mweli-edhamo? Vyofuka vyevi vinowakuliwa muvyofunjedha vyo-arela.