MURU OFUNJEDHA 32
NYUMBO 44 Pemphero la Munthu Wovutika
Yohova unofuna ira atu othene tachinyuwe
“Yohova . . . kanofuna ira mutu uliwethene adhanongiwe, mbwenye unofuna ira atu othene tachinyuwe.”—2 PE. 3:9.
VINOFUNA I-YO FUNJEDHA
Muyofunjedha yei ninoona inothapulela chinyuwa, thitho moda Yohova mukadhi liye akami-anga atu othene ira tachinyuwe.
1. N’nga chinyuwa unothapulelan’ni?
NAIRA yongo inango yothakala, vanofuneya ira nichinyuwe. Bibilya linoonga ira mutu ochinyuwa unoroma idanana vyongo vyothakala viirile liyevyo, no-iya viirana thitho unosikimizela rimee ira kanodha viirana okoka.—Muone thapuleliwa wa madhu enango a Bibilyani “Chinyuwa.”
2. Mwasiwa ngwan’ni i-yo othene ninofuneela funjedha vyokuza chinyuwa? (Neemiya 8:9-11)
2 Mutu uliwethene unofwanela funjedha vyokuza chinyuwa. Mwasiwa ngwan’ni? Namwasa oi i-yo othene ninodawa dambo nlilothene. Ninga a-ima a Adamu na Eva, i-yo othene natootukulela vyodawa na wukwa. (Aro. 3:23; 5:12) Kavali mutu nambo-ene o-odawa. Masiki atu enao tan’na iroromelo yolimba ninga rumiwi Paulo, tanoolimbanana thitho vyodawa. (Aro. 7:21-24) N’nga vyevi vinothapulela ira hora dhothene nikalenga osukwala namwasa wa vyodawa vi-u? Kabe, Yohova ngwatangaranga thitho unofuna ira nisangalalenga. Kathuulelani vyaireile na Ayuda amuhora ya Neemiya. (Muleri Neemiya 8:9-11.) Yohova kaafuna ira aliwa tavivwelenga tangaranga namwasa wa vyodawa vyairile aliwa walelene, mbwenye afuna ira tam’lambelenga mosangalala. Yohova unoidhiwa ira nachinyuwa, ninosangalala. Ee-no unonifunji-a vyokuza chinyuwa. Nachinyuwa vyodawa vi-u, ninooda sikimizela ira Babi-u watangaranga unonilevelela.
3. N’nga ninotapanyan’ni muyofunjedha yei?
3 Muyofunjedha yei ninotapanyani vikhundu viraru vyokuza chinyuwa. Yoroma, ninoona moda Yohova mwafunji-idhe liye Aisraeli vyokuza chinyuwa. Namala ninoona moda Yohova mukadhi liye akami-anga atu odawa ira tachinyuwe. Vosogolovee ninotapanya moda Yesu mwafunji-edhe liye anama-arelee vyokuza chinyuwa.
MODA YOHOVA MWAFUNJI-IDHE LIYE AISRAELI VYOKUZA CHINYUWA
4. N’nga Yohova afunji-idhen’ni Aisraeli vamwasa okuza chinyuwa?
4 Yohova atoosakula Aisraeli ira takale tundwee. Atooira vwelano naaliwa thitho aliwa tatoolanyedha ira anongo m’vwela. Tavwelanga malamulwee, Yohova anoabarela nowaraeli-a. Voonga vya malamulwao, Yohova aongile ira: “Lamulo linouva-ani miyo peneneli kai lorucha wanyo li-arele, namwasa oi linofwanyeya.” (Dot. 30:11, 16) Mbwenye ta-avwele, venango tasakula lambela milungu inango, Yohova anoa-iya araeli-a thitho tanoogumanana nyarwa. Angalive ira vyali e-no, vyali vyoodeya ira Nlungu arome okoka adhiveliwana. Aliwa tanooda “welela wa Yohova Nlungwiwa thitho vwela madhwee.” (Dot. 30:1-3, 17-20) Mumadhu enango ninooda onga ira tachinyuwa, Yohova anooda kala okoka vauxamwali naaliwa noroma araeli-a.
5. N’nga Yohova athonyi-edhe a-vi ira kaa-iidhe atwee o-ovwela? (2 Mamwene 17:13, 14)
5 Atu a Yohova tanom’dawela moweli-edha weli-edha. Wenjedhela volambela mafwano, aliwa tanooira thitho makalelo enango othakala. Vyevi vyatooiri-a ira tagumanengana nyarwa. Mbwenye Yohova kaachenyenle naatu o-ovwelala. Moweli-edha weli-edha, Yohova anowaruma anamaongelee ira tamaakami-e naifunelo yoi tachinyuwe nowelela wa liye.—Muleri 2 Mamwene 17:13, 14.
6. N’nga Yohova a-indi-edhe a-vi basa anamaongela vofunji-a atwee funeya ochinyuwa? (Muone thitho iruthiruthi.)
6 Hora dhothene Yohova anoo-indi-edha basa anamaongela vofuna wenjeli-a thitho kami-a atwee ira tachinje. Mofwanafwani-a, dhela wa Jeremiya Nlungu aongile ira: “Welela Israeli opanduwawe . . . kandinodha uing’ana mothakaleliwa namwasa oi miyo ndili olevelela . . . kandinodha nyanyuwa modhowa nodhowa. Mbwenye murumele ira muli odawa namwasa opanduwela Yohova.” (Jer. 3:12, 13) Dhela wa Joeli, Yohova aongile ira: “Muwelele wamiyo na riminyu othene.” (Joe. 2:12, 13) Atoom’mwandela Esaya onga ira: “Mudhicheni-e. Mukumi-e vyoira vinyu vyothakala vamethoni vanga thitho mu-iye irana vyongo vyothakala.” (Esa. 1:16-19) Dhela wa Zakiyeli Yohova atoofuka ira: “N’nga miyo ndinosangalala na wukwa wa mutu odawa? . . . N’nga vinofuna miyo kai vyoi mutu odauo achinyuwe nodhowanave kaana ingumi? Miyo kandinosangalala na wukwa wa mutu uliwethene, . . . ee-no i-yani irana vyongo vyothakala ira mudhowenave kaana ingumi.” (Zak. 18:23, 32) Yohova unosangalala aona ira atu atochinyuwa namwasa oi liye unofuna ira tadhowenave kaana ingumi modhowa nodhowa. N’nga Yohova unodedi-edhela ira atu odawao tachinje okene o-oakami-ene? Dhoweni nioneni vifwanafwani-o vinango vya vyevyi.
Hora dhinjinji Yohova anooruma anamaongelee ira tamalimbi-e atwee o-ovwela ira thachinyuwe (Muone ndima 6 na 7)
7. Vo-indi-edha basa mwasa wa namaongela Oseya na i-yanee, n’nga Yohova afunji-idhen’ni atwee?
7 Muone mwemo Yohova mwafunji-idhe liye atwee vo-indi-edha basa ifwanafwani-o ya namaongela Oseya na i-yanee Gomeri. Gomeri atooira unyambi thitho atoom’iya Oseya nodhowa wa lombwana mwinango. N’nga Nlungu atom’mona ira kanaode chinja? Yohova wenuo unoidhiwa vili rimani mwa mutu, atoom’mwandela Oseya ira: “Dhowa umarome okoka dhiveliwana i-yanaa wenuo unodhiveliwiwa na lombwana mwinango thitho unoira unyambi. Umam’dhiveliwena ninga moda Yohova munodhiveliwana liye Aisraeli, angalive ira anolambela milungu inango.” (Ose. 3:1; San. 16:2) Idhiwani ira i-yana wa Oseya ali a-ana i-ye irana yodawa ilukulwila. Mbwenye Yohova atom’mwandela Oseya ira adhowe wa i-yaneuo, manlevelela nom’thukula ninga i-yanee. a Mofwanafwana na vyevi, Yohova kaa-iidhe adhiveliwana atwee tali o-ovwela. Angalive ira aliwa tanooira vyodawa vilukulu, Yohova anowadhiveliwanave. Thitho atoodhowanave akami-a ira tachinyuwe nochinja vyoira viwa. N’nga vyevi vinothapulela ira Yohova wenuo unoidhiwa vyarimani unooda kami-a mutu wenuo unodhowanave irana vyodawa vilukulu ira achinyuwe? (San. 17:3) Dhoweni nioneni.
MODA YOHOVA MUKADHI LIYE AKAMI-ANGA ATU ODAWA IRA TACHINYUWE
8. N’nga Yohova airile a-vi, vofuna kami-a Kaini ira achinyuwe? (Maromelo 4:3-7) (Muone thitho iruthiruthi.)
8 Kaini ali mwana oroma baliwa wa Adamu na Eva. Liye atootukulela vyodawa kumela wa anamabalee. Voonga vya liye Bibilya linoonga ira: “Vyoira vyee vyali vyothakala.” (1 Ju. 3:12) Venango ngumwasee Yohova “kaasangalanle na Kaini thitho na sembee navang’onovene.” Malo mochinja vyoiravyee, “Kaini atoothakaleliwa maningi rimanimwee nosukwala.” N’nga Yohova airilen’ni? Liye atoonga na Kaini. (Muleri Maromelo 4:3-7.) Yohova atoonga na Kaini moriya rima, thitho atom’mwandela ira unodha m’raeli-a akala unoirana vyongo vyapama thitho atoom’mwenjeli-a ophi-a wa vyodawavyee. Pyovwi-a tangaranga ira Kaini kaavwele. Kaini kaarumenle ira Yohova am’kami-e ira achinyuwe. N’nga Kaini angakondile vwela, Yohova atoo-iya kami-a atu enango? Kabe.
Yohova atoonga na Kaini moriya rima, ira unodha m’raeli-a akala unochinja thitho atoom’mwenjeli-a thakala wa vyodawavyee (Muone ndima 8)
9. N’nga Yohova akami-idhe a-vi Davide ira achinyuwe?
9 Yohova anom’dhiveliwana maningi mwene Davide. Yohova atoofiya vom’monga ira, “mutu wavarimani vanga.” (May. 13:22) Mbwenye Davide atooira vyodawa vilukulu ninga ira unyambi thitho upha mutu. Movwelana na ilamulo yava-iwile Mose na Nlungu, Davide afwanela phiwa. (Lev. 20:10; Num. 35:31) Mbwenye moriya rima Yohova atoom’kami-a ira achinyuwe. b Liye atooruma namaongelee Natani angalive ira Davide ali a-anathonyi-edhe chinyuwa uliwethene. Natani atoo-indi-edha basa ifwanafwani-o yofiya varimani wa Davide. Angazindiyele ira atoom’sukwali-a Yohova, Davide atoochinyuwa. (2 Sa. 12:1-14) Vasogolovee, atoolemba Salimo lothonyi-edha dhivwela tangaranga na vyairile liye. (Sal. 51, visimadhu vyavadhulu) Salimoli likadhi lididili-anga atu anjinji odawa thitho alimbi-a ira tachinyuwe. Ninosimba maningi ira Yohova atookami-a rumiwee odhiveliwiwa Davide ira achinyuwe.
10. N’nga munovivwa a-vi mwathuulela leva rima thitho levelela wa Yohova airanga vyongo naatu odawa?
10 Yohova unoidanana yodawa yatundu uliwethene. (Sal. 5:4, 5) Mbwenye Yohova unoidhiwa ira i-yo othene nili atu odawa, ngumwasee unonidhiveliwana thitho unofuna nikami-a limbanana madawao. Hora dhothene Yohova unofunechecha kami-a masiki atu odawa maningi ira tachinyuwe nokala okoka vauxamwali na liye. Vyevi pyosangalali-a maningi. Nathuulela leva rima ulukulu wa Yohova, ninofunechecha kalave ororomeleya wa liye thitho chinyuwa mombaranya nadawa. Va-eeni dhoweni nioneni moda Yesu mwakami-edhe liye anamafunjedhee ira taidhiwe vyongo vinjinji vamwasa okuza chinyuwa.
VYONGO VYAFUNJEDHILE ANAMAFUNJEDHA A YESU VYOKUZA CHINYUWA
11-12. N’nga Yesu a-indi-edhe basa ifwanafwani-o iivi, vofuna nikami-a idhiwa ira Babee ngokozeya nilevelela? (Muone yavakapani.)
11 Yatoofiya hora vevo Mesiya vyaoneele liye. Ninga muonele i-yo muyofunjedha ivirile, Yohova atoo-indi-edha basa Juwau namabadiza na Yesu Kristu vofunji-a atu ira tachinyuwe.—Mat. 3:1, 2; 4:17.
12 Angali vailambo yavathi, Yesu atoofunji-a atu ira Babee ngokozeya nilevelela nadawa. Yesu atooirana vyevi voonga ifwanafwani-o ya mwana opupuruwa. Mwanuo atoosakula kuma vandhe va anamabalee mairanga vyothakala. Mbwenye vasogolovee “zelu dhingam’dhele,” atoowelela waniwa. N’nga babee airile a-vi? Yesu atoonga ira mwanuo “angali undendai, babeuo atoom’mona thitho atom’vwela tangaranga. Adhamale atoom’tamangela nom’kumbarela thitho atoom’bejari mwaudhivela.” Mwanuo atoovepa babeuo ira am’tukule ninga nyabasee, mbwenye babeuo atoonga ira “mwanangula,” thonyi-edha ira am’mona ninga mwanee. Babeuo aongile ira: “Ali odimela mbwenye utofwanyeya.” (Luk. 15:11-32) Mo-okaikela, Yesu a-anadhe vailamboi, anoona Babee athonyi-edhanga tangaranga waatu ochinyuwa wiliwili. Ifwanafwani-o ya Yeswila, inonilimbi-a thitho inonisikimizela ira Babi-u Yohova ngwatangaranga.
Baba wa muifwanafwani-o ya Yesu ya mwana opupuruwa am’tamangelanga mwanee wenuo unowelela mudhi nom’kumbarela. (Muone ndima 11 na 12)
13-14. N’nga rumiwi Pedru afunjedhile vyoi a-vi vyokuza chinyuwa, n’nga aafunji-idhe a-vi atu enango vamwasa wen’na? (Muone thitho iruthiruthi.)
13 Rumiwi Pedru atoofunjedha makundo ofuneya kumela wa Yesu okuza chinyuwa nolevelela. Hora dhinjinji, Pedru anoodawi-a vyongo thitho Yesu anoom’levelela. Mofwanafwani-a, liye angam’kondile mbwiyee fendo 3, atoosukwala maningi. (Mat. 26:34, 35, 69-75) Mbwenye Yesu angavenyathi-iwile, atooneela wa Pedru venango vahora yeniyo ali ekhene. (Luk. 24:33, 34; 1 Ak. 15:3-5) Mo-okaikela vahora yen’na, Yesu atoom’sikimizela mwaudhivela rumiwee ochinyuula ira utom’levelela.—Mrk. 16:7.
14 Voi atoidhiwa moda mutu munovwela liye achinyuwa noleveleliwa, Pedru angaodile funji-a atu enango vyokuza mwasula. Vahora inango vasogolo vapwando la petekoste, Pedru atoonga mwasa va guluni la Ayuda oonga ira aliwa tatoom’pha Mesiya. Mbwenye mwaudhivela Pedru atowalimbi-a ira: “Muchinyuwe nodhimbinuwa ira vyodawa vinyu vivu-eleliwe, hora yosisimula idhe kumela wa Yohova.” (May. 3:14, 15, 17, 19) Veva Pedru atoothonyi-edha ira chinyuwa unokami-a mutu odawa ira adhimbinuwe, thapulela ira a-iye vyothakala vyathuulela liye venango vyairana liye, noroma iranga vyongo vyapama vinam’sangalali-e Nlungu. Rumiula atoothonyi-edha ira Yohova unolevelela, vyevi vinokala ninga utofudha vyodawa viwa. Vangavirile vyawa vinjinji, Pedru atoosikimizela Makristau ira: “Yohova . . . auleveleni rima namwasa oi kanofuna ira mutu uliwethene adhanongiwe, mbwenye unofuna ira atu othene tachinyuwe.” (2 Pe. 3:9) Pyolimbi-adi idhiwa ira nachinyuwa vyodawa vi-u, masiki vikale vilukulu, Yohova unonilevelela.
Yesu atoom’sikimizela mwaudhivela rumiwee wenuo achinyuwile ira utom’levelela (Muone ndima 13 na 14)
15-16. (a) N’nga Paulo afunjedhile a-vi vyokuza levelela? (1 Timoteo 1:12-15) (b) N’nga muyofunjedha yo-arela, ninodha thapanyan’ni?
15 Saulo wau Tarso atooira vyothakala maningi thitho anofuneela chinyuwa ira aleveleliwe. Liye anooni-a nyarwa mwauwalanga anama-arela a Kristu. Vinooneeya ira Makristau anjinji tathuulela ira kanaode chinyuwa nochinja. Mbwenye Yesu anoidhiwa ira Saulo unooda chinja. Yesu na Babee tanoona makalelo apama enao Saulo ana liye. Yesu aongile ira: “Mutu wen’na ndi iya yanga yosakuliwa.” (May. 9:15) Yesu atoofiya voirana vyodabwi-a vofuna m’kami-a Saulo ira achinyuwe. (May. 7:58–8:3; 9:1-9, 17-20) Angakanle Kristau, hora dhinjinji Saulo, oi vasogolovee aidhiweyana dhina loi rumiwi Paulo, anoosimba vyairile Yohova na Yesu vothonyi-edha tangaranga nom’riyela rima. (Muleri 1 Timoteo 1:12-15.) Rumiula aongile ira: “Nlungu unaauoni-a riya rimawee ulukhulu, naifunelo yoi uchinyuwe.”—Aro. 2:4.
16 N’nga Paulo airilen’ni angavwide yodawa inango vamwasa waunyambi waireile wu Korinto? Liye atoosamalela mwasula mundhila yeniyo inonifunji-a thonyi-edha tangaranga thitho ira Yohova unonilangi-a mwaudhivela nadawa. Ninofunjedha vinjinji vamwasa wen’na, muyofunjedha yo-arela.
NYUMBO 33 Umutulire Yehova Nkhawa Zako
a Yofunjedhila njavakhundu namwasa oi malamboano, Yohova ka-enle lamulo loi mutu aira unyambi, fwee o-odauo adhowenganave kala na liye vabanjani. Thitho Yohova atom’mwandela mwanee ira aonge ira mutu odaweliwiluo, unooda dhowa matukula karta yomali-a banja akala unofuna irana e-no.—Mat. 5:32; 19:9.
b Muone mwasa oi “Yohova ngofunechecha ulevelelani.” Mu Nsanja Ya Olonda ya 15 wa Novembro wa 2012, thakuru 21 fiyedha 23, ndima 3 fiyedha 10.
