N’NGA nyo munodhivwa a-vi mwawachela karta la xamwalinyu ofuneya? Kristau namafunjedha Timoteo atowachela karta la rumiwi Paulo. I-yo ninoliidhiwana kala buku la Bibilyani la 2 Timoteo. Voliwachela kartali, Timoteo mo-okaikela liye anofunechecha idhiwa vyali kartanimo moi atodhowana vakundu ira amaode leri vyali kartanimo ira azindiele fwee ofuneyuo vyalembele liye. Venango Timoteo atothuulela ira: ‘N’nga Paulo uli a-vi? Liye utekaana malangi-o ira andiva-e ofunandiwandela ira mabasa ava-iwile miywala ndaalabenga a-vi? N’nga kartali linofuna lindikami-e ira ndiodenga laba pama basa langa laurumiwini no kami-a atu enango?’ Ninga munofuna i-yo onela, Timoteo kartanimu, atofwanyamo vyowakula vyofuneya vya vyofuka vyevi na vinango vyoinjiva. Mbwenye mwachineneeva, dhoweni nikaleni vaikundu imbo-i baa-i va malangi-o awachenle liyala na ona ira mbofuneya a-vi wa-iyo.

Timoteo angaromile leri madhu oroma akartanimu, liye atozindiyela ira Paulo anom’dhiveliwana. Momsembezela Paulo aongile ira Timoteo ali “mwanee wavarimani.” (2 Timo. 1:2) Timoteo awachenle kartali mu vyawa 65, vinooneya ira liye ana vyawa 30 vyobaliwa angali vandhevee. Angalive ira ali zombwe. Timoteo ali ndimuwa wavapingoni oidhiwa vyongo mwapama. Liye atolabavo na Paulo vyawa vyokwaranya kumi atofunja vinjinji na liye.

Timoteo angaidhi ira Paulo anolimbanana vyorucha vyothene mororomeleya, atolimbi-eya vinjinji vyene. Paulo ali perezoni wu Roma anga-adhi vang’ono funa piwa. (2 Timo. 1:15, 16; 4:6-8) Madhu a Paulo oonga ira, “ndinodhowanave kala ovilela va vyongo vyothene”, vyatom’moni-a Timoteo ira Paulo ali olimba rima. (2 Timo. 2:8-13) Ee-no ninga Timoteo, i-yo thitho ninooda limbi-wa na vifwanafwani-o vyodabwi-a vyovilela vya Paulo.

Paulo atomlimbi-a Timoteo ira aonenga izo iva-iwile liya kala yofuneya mu basa la Nlungu. Liye am’mwandele e-ni Timoteo: “kukunyedha ninga mulo yova-a ya Nlungu iwachenle weyo.” (2 Timo. 1:6) Madhu aigrego a-indi-edhe basa Paulo veva,  othapuleliwa kala “yova-a” mboonga ira khárisma. Madhu enala aigrego anoongana yova-a yo-opagali-a. Timoteo atowachela yova-a yei vyava-iwile liye izo ira akami-enga pingo mwandhila inango yavakundu.— 1 Timo. 4:14.

N’nga Timoteo afwanele iiranan’ni yova-a yei? Angamadhi leri madhu oonga ira “kukunyedha ninga mulo,” liye atooda thuulela mulo wenuo atu wakukunyedhecha aliwa vandhe uinjivenga kala makala o-inda. Makala enala afwanelela kukunyedhiwa ira muluo uodengave i-nda. Disionariyo mwinango uongile ira verbo waigrego oonga ira anazopyréo, wa-indi-edhe basa Paulo, anothapulela “kala waimwerumweru vofuna i-nda basa.” Moi e-no, vevo Paulo afuna am’limbi-e Timoteo ira: ‘Udhilimbi-edhe ira mwadodoliso vaizo iva-iwilewee!’ Malamboano i-yo ninofwanela ira vimbo-ive—kala odhivelela va basa la Yohova.

Vodhowanave leringa karta laxamwalee ofuneya, Timoteo atoonga malangi-o enango am’kami-idhe ira alabenga mwapama mabasee aurumiwini. Paulo alembile ira: “Ulokote, mwazimu ochena unokala mwa-iyo, fuma yofuneiyo iva-iwile wee mororomeleya.” (2 Timo. 1:14) N’nga njifuma ivi yofuneya yaroromelena atu Timoteo? Maversu landuli, Paulo aongile mwezo wa “madhu apama” ali imbarimbari ili Malembani. (2 Timo. 1:13) Mwasa okala rumiwi waukristau Timoteo afwanele laleela madhu aimbarimbari romela wari mwa pingo fiedha undhe. (2 Timo. 4:1-5) I-yavo vyevyo, Timoteo atova-iwa izo yokumbiza mabila a Nlungu. (1 Pe. 5:2) Ira alokote fuma yofuneya, venango nionge ira imbarimbari yafunji-iwile liye, Timoteo afwanele roromela zimu ochena wa Yohova na madhwee.—2 Timo. 3:14-17.

Malamboano i-yo thitho nitowachela fuma yofuneya yodhowana vambo-i atu muurumiwini waukristau. (Mat. 28:19, 20) Ninofwanela dhowanave lemeza izo yofuneyai movilela va nyarwa dhinogumanana i-yo mwa lobelo na mofunjedha Bibilya malambo othene. (Aroma 12:11, 12; 1 Timo. 4:13, 15, 16) Venango nitowachela izo yowenjedheleya, malaba basa lahora yothene venango ninga ndimuwa wavapingoni. Vizo vyoi ee-no, vinoniva-a i-yo kala odhievi-a na vozindiyela ira ninofwanela m’roromelanga Nlungu ira nilabe mabasa enala. Ninofwanela lokota venango vunela fuma yen’na yofuneila iwachenle i-yo moilemeza nom’nyindela Yohova ira nilabe mwapama.

Basa lava-wile Timoteo, kaali lolaba ekave. Ali ira afunji-e atu enango ira taodenga laba basa lelo. Ngumwasiwa Paulo atomlimbi-a Timoteo ira: “Vyongo vivwidewee na miyo, vyongo vyevi . . . waafunji-e atu ororomeleya ira naaluwene tavilabenga, ira aluwa tafwanelele vofunji-a atu enango.” (2 Timo. 2:2) Paulo atothuulela ira Timoteo anofwanela funji-a atu enango vyongo vyafunja liye. Pyofuneya ira andimuwa othene avapingoni tavilimbi-edhe ira tairenga e-no mipingoni. Ndimuwa wapama kanokaana sanje vaizoyee thitho kanolokota viidhi liye. Liye unofunji-a atu enango ira taodenga laba basa. Liye kanoova voloweliwa limburo naabali enango anadodoliso linjinji, venango anooda laba pama mabasa anova-iwa aliwa. Ndimuwa wapama, kanosangalala vofunji-a vyongo vyavadhuludhulu va basani. Liye unofunechecha funji-a azombwe ira takaena makalelo apama thitho mathuulelo adodoliso, venango nionge ira, taulukule mwauzimu. Moi ee-no, Alombwana ororomeleya anofunji-iwala anokami-a vinjinjivyene pingoni.

Mo-okaikela, Timoteo atolidhiveliwana maningi karta laudhivelali lamlembele Paulo. Pyo-orucha thuulela Timoteo aleringa mowelela welela malangi-o ofuneyala thitho nithuulelanga moda unofuna i-yo landelavo dodoliso vyochinja moda oirela vyongo malamboano vabasa liva-iwile i-yo.

I-yo thitho ninofwanelela a-rela malangi-o elana. Moi a-vi? Mokukunyedha ninga mulo va yova-iwa iwachenle i-yo, volokota viniva-idhe atu moniroromela na mogaana naatu enango viidhi i-yo. Mwatundu wen’na, ninooda a-rela malangi-o a Paulo am’va-idhe liye Timoteo oi: “Ukwakwaneli-edhe vikhundu vyothene vya urumiwao.”—2 Timo. 4:5.