Kabe, Bibilya venango vistoriya vinooni-a ira katana ilemelo yeniyo.

Namwasa o-othapuleliwa pama wa Mabibilya unoiri-a atu enango thuulelanga ira hora ya Paulo, watokala ilemeelo yobadiziwelanga va mwasa waatu okwa. Mofwanafwani-a, Nova Versão Internacional linoonga ira: “Akala kuli venyathi-iwa mwasiwa ngwan’ni atu tanobadiziwela atu okwa?”

Mbwenye kaonani vyaatu ambinli oidhiwechecha Bibilya vyaongile Aliwa. Gregory Lockwood wenuyo uli dotore wa vyofunjedha, aongile ira badiziwela “atu akwide wanle” unooda kala “tundu waubadizo oi masiki ui aatu auidhi tundu wen’na waubadizo, kunoongiwecha mulimbili lawale laatu. Venango limbili lawale la Bibilyani.” Saasawa thitho namafunji-a mwinango wa universidade Gordon D. Fee alembile ira: “Kavali limbili lawale venango limbili lawale la Bibilyani loonga vyobadiziwa weu. Ivwelano Ipya kinaongevo yongo va vyongo vyevi. Thitho kavali umboni oi wairiwile na makristau oroma venango religiau nlilothene laromile vyawa vinjinji vanduli vee.”

Bibilya linaonga ira anama-arela a Yesu tafwanele ira ‘tamafunji-e atu amaziza othene, mwaabadizenga . . . , noafunji-enga vwela vyongo vyothene vvyaawandenle liye.’ (Mat. 28:19, 20) Ira mutu akale namalaleya obadiziwa, liye unofuneela roma funjedha vyoonga Yohova na Mwanee, aaroromelenga noavwela. Mutu ukwide thitho liye lokotiwa kanaoda irana vyevyo. Thitho Kristau uli waingumi kanaode m’mwirela vyevyo mutu ukwiduo.—Namal. 9:5, 10; Juwau 4:1; 1 Akor. 1:14-16.

N’nga Paulo afuna aonge n’ni?

(1 Akor. 15:12) Paulo atodhilimbi-edha vwechechi-a va maonelo odaweyala. Liye atoonga ira “(anoogumanana) nyarwa a-la vang’ono funa wukwa malambo othene.” Mbwenye liye alive waingumi. Angalive ira atogumanana nyarwa dhinjinji, liye atosikimiza ira masiki akwe, unodha venyathi-iwa ninga zimu wakopolo, ninga vyam’mwireele Yesu.—1 Akor. 15:30-32, 42-44.

Atu au Koritiyo tafwanela vwechecha ira kala ozoziwa wathapulela gumanana nyarwa malambo othene thitho wukwa a-anavenyathi-iwe. Kala “obadiziwa mwa Kristu Yesu” unothangani-avo kala “obadiziwa muukwa wee.” (Aroma 6:3) Paulo afuna aonge ira, e-no ninga Yesu, makristau ozoziwa tangabadiziwile, venango bwini-iwa momidhiwa ma-injeni movwelana na kalelo laingumi yofuna dadhi-a wukwa. Vanduli viwa venyathi-iwa muingumi yauzimu.

Vangavirile vyawa vinli Yesu angabadiziwile ma-injeni, liye atoonga na anama-arelee ambinli ira: “[Nyo] munodha badiziwa na ubadizo ninga ubadiziwilena miula.” (Marku 10:38, 39) Yesu kaongana ubadizo wama-injeni. Liye athapulela ira mwasa okalave ororomeleya wa Nlungu, adhamari-edhe wukwa. Paulo alembile ira makristau ozoziwa tanodha “oni-iwa nyarwa vambo-i na Kristu, ira thitho tadha tatitimi-iwe vambo-i na Kristu.” (Aroma 8:16, 17; 2 Akor. 4:17) Vyevyo vinofuna vionge ira aliwa tangakwide tamala tavenyathi-iwe ira tamakalenga dhulu.

Likundo va vyothene vwevyo, vyoonga vya Paulo vinooda thapuleliwa mwapama mwadhila ila: “N’nga aakale e-no, vinakala a-vi waatu ale anobadiziwela ira takwe? Akala ira atu okwa katinovenyathi-iwa, mwasiwa ngwani tanobatiziwela mwasa wenuyo?”