Angalive ee-no, Yohova unofuna ira nidedi-edhelenga moleva rima ira airevo yongo horee yakwakwana. N’nga mwasiwa ngwan’ni unofuna ira niirenga ee-no? N’nga chini inanikami-e kala osangalala vanom’dedi-edha i-yo moleva rima?

N’NGA MWASIWA NGWAN’NI YOHOVA UNOFUNA IRA NIM’DEDI-EDHELENGA?

Bibilya linoonga ira: “Yohova unodedi-edhela moleva rima ira auriyeleni rima, thitho unodha venyathi ira auvweleni tangaranga, namwasa oi Yohova ngu Nlungu wa longomano. Oraeli-iwa mbaatu anom’dedi-edhela Yohova moleva rima.” (Esa. 30:18) Madhu enala Yohova alembela Ayuda o-ovwela. (Esa. 30:1) Mbwenye vari va Ayuda o-ovwelalao vatookala Ayuda enango enao tali ororomeleya thitho madhwala tatoava-a idedi-edho. Malamboano thitho madhwala anova-a idedi-edho arumiwi a Yohova ororomeleya.

Moi ee-no, ninofwanela dedi-edhanga moleva rima namwasa oi Yohova unodedi-edhela thitho moleva rima. Liye utomala sakula dambo linofuna liye dhanonga ilambo yavathi yothakalila thitho unaadedi-edhela dambolo na hora ira ifiye. (Mat. 24:36) Va dambo lelo, vinodha oneelatu ira vyongo vyothene vyaonga Satana naangelwee vyokuza Yohova na atu anom’lambela, pyonama. Vasogolovee, Yohova unodha nonga Satana naatu othene ali uikunduyee, mbwenye i-yo Yohova unodha “nivwela tangaranga.”

Va-eeni Yohova kanonimali-edha nyarwa dhinogumanana i-yo, mbwenye unonisikimizela ira ninooda sangalalanga vevo vanodedi-edha i-yo. Ninga mwemo mwaongile namaongela Esaya, pyoodeya kala osangalala, vevo vanodedi-edhela i-yo ira vyongo vyaphama viireye. (Esa. 30:18) a N’nga chini inanikami-e ira nikalengave osangalala vevo vanodedi-edhela i-yo? Dhoweni nioneni vyongo 4 vyevyo vinanikami-e.

VYONGO VINANIKAMI-E IRA NISANGALALENGA VEVO VANODEDI-EDHELA I-YO

Nithuulelenga vyongo vyaphama vyevyo vinoireya vaingumi yi-u. Mwene Davide atoogumanana vyongo vinjinji vyothakala vaingumiyee. (Sal. 37:35) Vingalive ee-no, liye atoolemba ira: “Mukale opwaseya vamethoni va Yohova thitho um’dedi-edhele moleva  rima. Kusukwale na mutu uli wethene oi vyongo vinom’mwendela phama, na mutu wenuo unokwakwaneli-edha vifunelovyee vyotakala mo-orucheya.” (Sal. 37:7) Davide atoo-arela malangi-o enala vo-ela mathuulelwee othene va idedi-edhoyee yoi Yohova unodha m’vulumucha. Anoosimba thitho vyongo vyothene vyaphama vyam’mwirela Yohova. (Sal. 40:5) Na-iyene thitho nathuulelanga vyongo vyaphama vyevyo vinoireya, a-kala vyongo vyothakala, vinodha kala vyo-orucha m’dedi-edhela Yohova.

Mu-indi-edhenga basa ngari iliyothene inakaena nyo vom’titimi-a Yohova. Mulimbo lemba masalimo 71, wenuo unooneya ira ngu Davide, atom’mwandela Yohova ira: “Ndinodhowanave dedi-edhela. Ndinodha utitimi-ani kwaranya wale nlilothene.” (Sal. 71:14) N’nga liye am’titimi-edhe a-vi Yohova? Anoowandela atu enango vyoonga Yohova thitho omba nyumbo dhom’titimi-a. (Sal. 71:16, 23) Molandana na Davide, i-yo thitho ninooda sangalalanga nam’dedi-edhelanga Yohova. Ninom’titimi-a na laleelanga, nawaredhanga naatu enango thitho naombanga nyumbo dhauzimu. Hora dhinango mwaombanga nyumbo dha Umwene, muthuulelenga madhwao mwapolepole ira muone mwemo munaulimbi-edheni aliwa.

Murumelenga ira abali naarongolinyu taulimbi-engani. Davide angaguman’nena nyarwa atom’mwandela Yohova ira: “Vamethoni va atwinyu ororomeleya, ndinodha dedi-edha dhina linyu, namwasa oi taphama.” (Sal. 52:9) Makristau afwi-u anooda thitho nilimbi-a, a-kala va migumanoni baa-i venango na laleelanga thitho nawaredhanga.—Aro. 1:11, 12.

Mukaengana idedi-edho yakopolo. Lemba la Salimo 62:5 linoonga ira: “Ndinom’dedi-edhela Nlungu mokurudheya namwasa oi idedi-edhwanga inokumela wa liye.” Idedi-dho yakopolo chofuneya maningi simbwasimbwa vevo komoni wa vyongo vyothakalavi wa-anofiya aliwa vahora yadedi-edhela i-yo. Niroromelenga maningi ira Vyolanyedha vya Yohova vinodha kwakwaneli-edhiwa masiki vavire hora indendai, nidedi-edhelengave basi. Ninooda kaana idedi-edho yakopolo akala ninofunjedha madhu a Nlungu, vyevyo vinothangani-avo maulosi, vwelana wa myasa dhee thitho vyongo vinjinji vinoniwandela Yohova vyokuza liye. (Sal. 1:2, 3) Ninofwanela thitho dhowanave lobelanga “movwelana na zimu ochena,” ira nidhowenave kala vauxamwali waphama na Yohova vevo vanodedi-edhela i-yo kwakwaneli-edhiwa wa yolanyedha ya ingumi yo-omala.—Yud. 20, 21.

Molandana na Mwene Davide, ninooda thitho kala osikimizela ira Yohova unoing’anela atu othene enao anom’dedi-dhela thitho unoathonyi-edha udhivelee ororomeleya. (Sal. 33:18, 22) Dhowananive m’dedi-edhela Yohova molimba rima, vothuulelanga vyongo vyaphama vyevyo vinoireya vaingumi inyu, m’titimi-a Yohova, rumeli-a Makristau afwinyu ira taulimbi-engani thitho dhowanave kaana idedi-edho yolimba.