1. Chini inodha mathuuleloni mwinyu mwathuulelanga vya Yohova?

 N’NGA mwatooroma thuulelavo ira Yohova ngoi a-vi? Chini inodha mathuuleloni mwinyu mwaonganga na liye angalive ira kamunaode m’mona? Bibilya linom’monga mundhila dho-iyana-iyana. Mwaifwanafwani-o, Yohova unoitaniwa “dhuwa, yovibarelana vamirimani” na “mulo ononga.” (Sal. 84:11; Aeb. 12:29) Unoongiwa thitho ira uli ninga libwe la safiro, momba ochena thitho zirimbo. (Zakiy.1:26-28) Vyongo viongiwilevi vyoonga Yohova, vinooda nidabwi-a venango niiri-a ova.

2. N’nga chini inoiri-a ira atu enango taonenga ira Yohova kanoadhiveliwana?

² Voi kaninooda m’mona Yohova, hora dhinango vinokala vyorucha roromela ira unonidhiveliwana. Atu enango anothuulela ira Yohova kanoadhiveliwana namwasa wa vyongo vyothakala vyaaireele ndulimu. Venango katinathonyi-edhiwevo udhivela na anamabaliwa. Yohova unovwechecha mwemo munovivwela i-yo thitho unoidhiwa vyongo vinoniiri-a ira vikale vyorucha kala vauxamwali na liye. Ee-no, vofuna nikami-a liye unoniwandela makalelwee osangalali-a dhela m’madhwee a Bibilyani.

3. Mwasiwa ngwan’ni ninofwanela funjedhanga vyoonga udhivela wa Yohova?

³ Madhu mambo-i anoonga pama vyokuza Yohova, ndi udhivela. (1 Ju. 4:8) Bibilya linoonga ira Nlungu ndi udhivela. Vyothene vinoira liye unoviira namwasa wa udhivela. Udhivelee ngwakopolo maningi moi unouthonyi-edha waatu oi katinom’dhiveliwana. (Mat. 5:44, 45) Muyofunjedha yei, ninotapanyani vya Yohova na udhivelee. Nafunjedhangani vyoonga Nlungu paevo thitho vanoroma i-yo m’dhiveliwana maningi.

YOHOVA UNONIDHIVELIWANA MANINGI

4. N’nga munovivwa a-vi namwasa wa udhivela ulukulu wa Yohova? (Muone thitho iruthiruthi.)

⁴ Bibilya linoonga ira: “Yohova ngwadhivelo nlukhulu.” (Yak. 5:11) Liye unovifwanafwani-edha na m’ma waudhivela. (Esaya  66:12, 13) Kathuulelani vya m’ma wenuo unosamalela mwanee mwaudhivela. Unom’tukula mandhanimwee nom’mongangana mwaudhivela thitho moriya rima. Aromanga ula venango uvwa upha unoonechecha ira utom’va-a vyongo vyothene vyofuneeleya. Na-iyene thitho navwanga upha kaninokaikela ira Yohova unonithonyi-edha udhivela. Mulimbo lemba Masalimo aongile ira: “Khumbanya wanga wangaulukhunle mwatoondididili-a no ndisamalela.”—Sal. 94:19.

5. N’nga munolimbi-iwa a-vi mwathuulelanga vya udhivela ulukhulu wa Yohova?

⁵ Yohova ngororomeleya. (Sal. 103:8) Liye kano-iya nidhiveliwana angalive ira nitodawi-a vyongo vinango. Aisraeli tanoom’sukwali-a Yohova moweli-edhaweli-edha. Mbwenye liye atoothonyi-edha ira unoadhiveliwana maningi atu o-ochinyuwala voawandela ira: “Ndatooroma uona ira uli wa pereso yavadhu, watoolemeziwa thitho ndinoudhiveliwana.” (Esaya 43:4, 5) Udhivela wa Yohova kunochinja. Hora dhothene kanikaikelenga ira unonidhiveliwana. Angalive ira ninodawi-a vyongo vinjinji, Yohova kano-iya nidhiveliwana. Nachinyuwa nowelela wa liye, ninoona ira unonidhiveliwanave. Liye unonilanyedha ira “unodha nilevelela na rima wethene.” (Esaya 55:7) Bibilya linoonga ira liye alevelela vinokala ninga “hora yodidili-a itodha khumela wa Yohova.”—Mayir. 3:19.

6. N’nga lemba la Zakariya 2:8, linonifunji-a nʼni vyoonga Yohova?

⁶ Muleri Zakariya 2:8. Voi Yohova unonidhiveliwana, unovwechecha mwemo munovivwela i-yo thitho unokala okozeya nibarela. Navwanga upha naliyene thitho unovwa upha. Voi ninolobela vyokuza liye ira: “Mundivunele ninga mwana wa litho linyu.” (Sal. 17:8) Litho tapereso yavadhulu thitho ndi yongo imbo-i mwa vyano vinofwanela bareliwa maningi. Ee-no Yohova anifwanafwani-edha na mwana litholee, vinokala ninga unoonga ira: ‘Uliwethene unofuna uphei-ani unophei-a yongo yapereso yavadhulu wa miyo.’

7. Mwasiwa ngwan’ni kaninofwanela kaikela vyoi Yohova unonidhiveliwana?

⁷ Yohova unofuna niidhiwe ira liye unodhiveliwa mutu uliwethene vaekhene. Mbwenye liye unoidhiwa ira namwasa wa vyongo viniireele ndulimu, venango ninooda kaikelanga akala unonidhiveliwana. Venango ninogumanana  nyarwa dhinoniiri-a kaikelanga akala Yohova unonidhiveliwana. N’nga chini inaniiri-e ira na-akaikelenga? Yongo inanikami-e kufunjedha mwemo munothonyi-edha liye udhivelalee wa Yesu, wa ozoziwa na wa i-yo nothene.

MWEMO YOHOVA MUNOTHONYI-EDHELA LIYE UDHIVELEE

8. Mwasiwa ngwan’ni Yesu kaakaikela ira Babee unom’dhiveliwana?

⁸ Yohova na Mwanee takadhi takalanga vambo-i wa vyawa vinjinji thitho vyevi vitoiri-a ira tadhivelanenga maningi. Udhiveliwa ngwawale lene maningi kwaranya udhivela unango uliwethene. Va lemba la Mateu 17:5, Yohova atoonga mwemo munodhiveliwana liye Yesu. Yohova angaodile onga ira, ‘Ula ngu Mwananga unondisangalali-a.’ Mbwenye vofuna m’thonyi-edha moda unom’dhiveliwana liye Yesu, aongile ira: “Ula ngu Mwananga odhiveliwiwa.” Yohova anoosangalala maningi na Yesu thitho na vyevyo Yesuo vyafuna liye irana. (Aef. 1:7) Thitho Yesu kaakaikela ira Babee unom’dhiveliwana. Anoona ira udhivela wa Yohova ngwaimbarimbari thitho anouvwa rimanimwee. Liye atoonga moweli-edha weli-edha khumela vathi varima ira Babee unom’dhiveliwana.—Ju. 3:35; 10:17; 17:24.

9. N’nga mbamadhu avi anothonyi-edha ira Yohova unodhiveliwana atu ozoziwa? Muongemo. (Aroma 5:5)

⁹ Yohova unothonyi-edha ira unodhiveliwana atu ozoziwa. (Muleri Aroma 5:5.) Madhu athapuleliwile ira “unothonyi-edha ira unonidhiveliwana” anooda thapuleliwa thitho ira “unoniva-a udhivelee modhala mandha.” Bukhu n’nango loonga madhu a Bibilyani linoonga ira, udhivela wen’na unodha ninga i-nje. Madhu enala mbakopolo thitho anothonyi-edha ira Yohova unodhiveliwana maningi atu ozoziwa. Atu ozoziwa anoidhiwa ira Nlungu “unoadhiveliwana.” (Yuda 1) Rumiwi Juwau atoonga mwemo mwavivwela aliwa volemba ira: “Kathuulelani vya udhivela ulukhulu wenuo unonithonyi-edha liye voniromola ira nili a-imee. Thitho nilidi a-imee.” (1 Ju. 3:1) N’nga Yohova unodhiveliwana atu ozoziwa baa-i? Khabe, liye unonidhiveliwana i-yo othene.

10. N’nga ndi ndhila ilukhulu ivi inothonyi-edha Yohova ira unonidhiveliwana?

¹⁰ N’nga ndhila ilukhulu maningi ithonyi-edhena Yohova ira unonidhiveliwana njivi? Kuto ndi ndhila ilukhulu maningi inithonyi-edhena liye udhivela kwaranya mutu mwinango uliwethene. (Ju. 3:16; Aroma 5:8) Yohova atoorumeli-a ira Mwanee wa pereso yavadhulu adhanikwele naifunelo yoi atu taleveleliwe vyodawa viwa thitho takale afwee. (1 Ju. 4:10) Nathuulelanga maningi vya pereso ivelenle Yesu, paevo vanovwechecha i-yo mwemo munodhiveliwana aliwa mutu uliwethene vaekhe. (Agal. 2:20) Kaiira kuto waveleliwile namwasa oi wanoofuneya movwelana na longomano la Yohova kabe, mbwenye chotuva yaveleliwile namwasa wa udhiveliwa. Yohova utothonyi-edha ira unonidhiveliwana vovelela Yesu kala sembe, yoi nja pereso yavadhulu maningi wa liye. Liye atoorumeli-a ira Mwanee arucheye thitho aphiwe namwasa wa i-yo.

11. N’nga ninofunjedhavon’ni va lemba la Jeremiya 31:3?

¹¹ Movwelana na vitapanyileni i-yovi, Yohova kanovwa rimanimwee ira unonidhiveliwana baa-i mbwenye unoniwandela thitho mwasee unonidhiveliwana liye. (Muleri Jeremiya 31:3.) Yohova utoniitanela wa liye namwasa oi unonidhiveliwana. (Mufwanafwani-edhe na lemba la Dotornomio 7:7, 8.) Kavali yongo iliyothene venango mutu uliwethene wenuo unani-iyani-e na udhivelee. (Aroma 8:38, 39) N’nga nyo munovwa a-vi mwathuulelanga vya udhivela wen’na? Muleri Salimo 23 ira muone mwemo Davide mwavivwela liye namwasa wa udhivela wa Yohova thitho mwemo munavivwele nyo.

 N’NGA MUNOVIVWA A-VI MWATHUULELANGA VYA UDHIVELA WA YOHOVA?

12. N’nga munaonge a-vi mogwandela makhundo anofwanyeya va lemba la Salimo 23?

¹² Muleri Salimo 23:1-6. Davide, wenuo alembile Salimo 23, atoothonyi-edha ira kaakaikela ira Yohova unom’dhiveliwana maningi. Liye atoonga vyoonga uxamwalee olimba wenuo walivo vari va liye na Yohova wenuo ali Namakumbizee. Davide avivwa ira ali obareleya namwasa oi anoorumeli-a ira Yohova am’sogolelenga thitho anom’nyindela va yongo iliyothene. Davide anoidhiwa ira Yohova unodham’thonyi-edha udhivela va ingumee yothene. Mwasiwa ngwan’ni liye kaakaikela vyevi navang’onovene?

13. Mwasiwa ngwan’ni Davide kaakaikela ira Yohova anom’dhiveliwana?

¹³ “Kandinodha sowa yongo iliyothene.” Davide anoona ira Yohova unom’samalela namwasa oi hora dhothene anom’va-a vyongo vyafuneela liye. Anoidhiwa ira Yohova ngufwee thitho ira anoosangalala na liye. Ngumwasee liye kaakaikela ira masiki agumanena nyarwa dhoi a-vi, Yohova unodha dhowanave m’samalela. Voi Davide anoororomela maningi ira Yohova unom’dhiveliwana thitho unodha m’samalela, vyevi vyatom’kami-a ira a-akhumbanyenga mbwenye asangalalenga.—Sal. 16:11.

14. N’nga chini inothonyi-edha ira Yohova unonisamalela mwaudhivela?

¹⁴ Yohova unonisamalela mwa udhivela simbwasimbwa vevo vanogunana i-yo nyarwa. Claire, a wenuo ukadhi atumikelanga va Beteli wa vyawa vyokwaranya 20, atoosowa vyoira vevo atu abanjanimwee vyagumanana aliwa nyarwa dhilukhulu. Babee atoobulela marenda ophi-a vyano, ng’onwee atookhumi-iwa  pingoni thitho basa liwa latoomala moi banjali kalana vokaathi. N’nga Yohova athonyi-edhe a-vi udhivela? Claire atoonga ira: “Yohova atoonechecha ira atu abanjani mwanga tatofwanya vyongo vyafuneela aliwa dambo nlilothene. Hora dhinjinji Yohova anooniva-a vyongo vinjinji kwaranya vyevyo vyadedi-edhela i-yo. Ndinothuulela hora yandithonyi-edha Yohova udhivela thitho kandinodha diwala. Thuulela vyevi unondikami-a ira ndivilelenga nyarwa dhinango.”

15. N’nga Yohova am’didili-idhe a-vi Davide? (Muone thitho iruthiruthi.)

¹⁵ “Unondididili-a.” Hora dhinango Davide anoodhikhumbanyedha maningi namwasa wa nyarwa dhagumanana liye. (Sal. 18:4-6) Mbwenye anoodidili-iwa namwasa oi Yohova anom’thonyi-edha udhivela thitho m’samalela. Vahora yen’na, Yohova anoosogolela fweula “wu malachi manjinji obitimela” thitho “ulimburo lopimela mai-nje manjinji.” Vyevi vyatoom’kami-a Davide ira akaena okoka kopolo thitho atoodhowanave m’labela Nlungu.—Sal. 18:28-32.

16. N’nga udhivela wa Yohova unonididili-a a-vi?

¹⁶ Malamboano Yohova unonithonyi-edha udhivela ororomeleya angalive ira ninogumanana nyarwa dhinjinji. (Male. 3:22; Akol. 1:11) Ifwanafwani-o va mwasula ndi Rachel. Vahora ya sau wa COVID-19, vyatoophi-a maningi rimani vevo man’nee angam’iidhe thitho i-ya m’lambela Yohova. N’nga Yohova am’kami-idhe a-vi? Liye aongile ira: “Yohova atoondikami-a ira ndivivwenga ira liye unondidhiveliwana. Vatookala afwanga awaredhana miyo, ndidhelana yodya, nditumizela mamesaje na malemba olimbi-a, theya na miyo thitho tanoondithuucha ira Yohova unondidhiveliwana. Hora dhothene ndinosimba Yohova namwasa ondiva-a banja laatu odhivelana unango nafwee.”

17. Mwasiwa ngwan’ni Davide “kaaova yongo iliyothene”?

¹⁷ “Kandinoova yongo iliyothene namwasa oi nyo muli na miyo.” Hora dhinjinji ingumi ya Davide yali vangovini thitho amwidanee tali akopolo. Mbwenye udhivela wa Yohova watoom’kami-a vivwanga ira ngobareleya. Hora dhothene Davide anoona ira Yohova uli na liye thitho vyevi vyanoom’limbi-a. Ee-no liye atoomba ira, “Yohova atoondivulumucha wu vyongo vyothene vinondiovi-a.” (Sal. 34:4) Angalive ira hora dhinango Davide anoova maningi, akalechave olimba rima namwasa oidhiwa ira Yohova unom’dhiveliwana.

18. N’nga a-kaikela ira Yohova unonidhiveliwana, unanilimbi-e a-vi naovanga?

¹⁸ N’nga idhiwa ira Yohova unonidhiveliwana  unoniva-a a-vi kopolo nagumanangana vyongo vinoniiri-a ova? Painiya mwinango dhinalee Susi atoonga vya mwemo liye na m’manee mwavwivwela aliwa mwaniwa angavipide ekene. Liye aongile ira: “Vyongo vyoophi-a vyaireya, unododomeya mathuulelo thitho unosowa yoira. Mbwenye idhiwa ira Yohova unonidhiveliwana maningi utonikami-a vwivwanga ira nili obareleya.” Rachel wenuo um’mongile i-yo voroma aongile ira: “Dambo n’nango nama-iyu, vyangaromile ndipha rimani mwanga, ndanoovikumbanyedha thitho ndanoova. Ee-no ndatoolobela mogweli-a madhu wa Yohova wu ndilanga. Hora yeniyoene ndatovwivwa ira liye utokaathi-a rimanga vathi ninga mwemo munomiyali-a m’ma mwanee thitho ndatoogona. kandinodha diwala hora yen’na.” Ndimuwa mwinango dhinalee Tasos ali perezoni wa vyawa 4 namwasa okonda volowela kondo. N’nga Yohova athonyi-edhile a-vi ira unom’dhiveliwana thitho m’samalela? Liye aongile ira: “Yohova utondiva-a vyongo kwaranya vyevyo vyadedi-dha miyo. Vyevi vyatoondikami-a ira ndim’roromelenga maningi. Thitho Yohova atoo-indi-edha basa zimwee ochena wenuo wandikama-idhe ira ndisangalalenga angalive ira ndali ulimburo lorucha. Vyevi vyatoondikami-a ona ira ndam’nyindelanga maningi Yohova, paevo thitho vanavwenga miyo ira unondidhiveliwana maningi. Ee-no ndatooroma upainiya okaatheya ndingali perezoni.”

DHOWANANIVE KALA VAUXAMWALI NA NLUNGU WENUO ULI WA UDHIVELA

19. (a) N’nga idhiwa ira Yohova unonidhiveliwana unanikami-e a-vi idhiwa onga vyofwanelela mumalobelwi-u? (b) N’nga ndi likhundo livi loonga vya udhivela wa Yohova linaulimbi-eni? (Muone kwadru loi “ Madhu enao anonikami-a idhiwa ira Yohova unonidhiveliwana maningi.”)

¹⁹ Vifwanafwani-o vitapanyileni i-yovi, vinothonyi-edh ira Yohova “Nlungu waudhivela,” uli na i-yo! (2 Akor. 13:11) Liye unodhiveliwana mutu uliwethene vaekhene. Kaninokaikela ira hora dhothene “unonithonyi-edha udhivelee ororomeleya.” (Sal. 32:10) Nathuulelanga maningi vya mwemo munonithonyi-edhela liye udhivelee, paevo thitho vanokala i-yo vauxamwali olimba maningi na liye. Ninooda lobela mothathuwa nom’mwandela mwemo munosimbela i-yo udhivelee. Ninooda m’mwandela vyongo vyothene vinonikhumbanyi-a nororomelanga ira unonivuruwana thitho ngofunechecha nikami-a.—Sal. 145:18, 19.

20. N’nga Yohova unonikami-a a-vi ira nikale vauxamwali na liye?

²⁰ I-yo othene ninokopeyana udhivela wa Yohova ninga mwemo munoirela i-yo na mulo undhe wadidilanga. Udhivela wa Yohova ngwakopolo thitho unouthonyi-edha moriya rima. Ee-no musangalalenga namwasa oi Yohova unoudhiveliwanani. Vyevi vinoniiri-a i-yo othene onganga mosangalala ira “Ndinom’dhiveliwana maningi Yohova.”—Sal. 116:1.