1. N’nga chini inokami-a atu a Yohova ira tadhowenganave m’lambela angalive ira anogumanana nyarwa?

 BIBILYA linoonga ira hora inokala i-yoi, “njavakundu thitho yorucha.” (2 Ti. 3:1) Wenjedhela va nyarwa dhinogumanana mutu uliwethene muilamboi, atu a Yohova anoruni-iwa thitho oni-iwa nyarwa. Chini inanikami-e ira nim’labelengave Yohova masiki vahora inogumanana i-yo nyarwa? Yongo imbo-i inanikami-e, ndi idhiwa ira Yohova ngu “Nlungu waingumi.”—Jer. 10:10; 2 Ti. 1:12.

2. Mwasiwa ngwan’ni ninooda onga ira Yohova ngu Nlungu waingumi?

² Yohova unoona nyarwa dhinogumanana i-yo thitho hora dhothene ngofunechecha nikami-a. (2 Li. 16:9; Sal. 23:4) Thuulela ira Nlungu ngwaingumi, unooda nikami-a limbanana nyarwa iliyothene inagumanena i-yo. Dhoweni nioneni mwemo idhiwa vyevi mwam’kami-edhele aliwa mwene Davide.

3. N’nga Davide athapulelan’ni vevo vaongile liye ira “Yohova ngwaingumi”?

³ Davide anoom’mwidhiwa Yohova thitho m’nyindela. Vevo Davide vyafuna liye phiwa naamwidanee, atoolobela wa Yohova ira am’kami-e. (Sal. 18:6) Nlungu angawakunle lobelolee nom’vulumucha, Davide atoonga ira: “Yohova ndiingumi yanga!” (Sal. 18:46) Voonga madhu enala, Davide kaathapulela ira ate idhiwa baa-i ira Nlungu utokalao. Bukhu n’nango laongile ira Davide anoororomela ira Yohova ndi “Nlungu waingumi wenuo unokami-a atwee hora dhothene.” Vyongo vyaireile vaingumi ya Davide, vyatoom’sikimizeli-a ira Yohova ngwaingumi thitho vyatoom’limbi-a ira adhowenave m’labela nom’titimi-a.—Sal. 18:28, 29, 49.

4. N’nga idhiwa ira Yohova ngu Nlungu waingumi unanikami-e a-vi?

⁴ Roromela ira Yohova ngu Nlungu waingumi, unooda nikami-a  ira nim’labelenga na rimi-u wethene. Ninooda fwanya kopolo ira nivilele vyowesedha thitho niirenga vyongo vinjinji vom’labela. Ninooda thitho kala ofunechecha dhowanave kala vauxamwali na Yohova.

NLUNGU WAINGUMI UNODHA UVA-ANI KOPOLO

5. Chini inanikami-e kala olimba rima nagumanangana nyarwa? (Afilipi 4:13)

⁵ Ninooda vilela vyowesedha vilivyothene mo-obala akala ndi vilukulu venango ving’ono. Akala ninothuulela ira Yohova ngu Nlungu waingumi thitho ngofunechecha nikami-a. Kavali yorucha iliyothene inaimwanena Nlungu waingumi imali-a. Yohova ndi Nlungu wakopolo dhothene thitho unodha niva-a kopolo ira nivilele vyowesedha. (Muleri Afilipi 4:13.) Ee-no nitokaana myasa yovweya yoniiri-a roromelanga ira ninooda vilela yorucha iliyothene inagumanena i-yo. Naona Yohova anikami-anga va nyarwa dhing’ono dhing’ono, kaninokaikela ira unodha nikami-a thitho vanyarwa dhilukulu.

6. N’nga Davide angali zombwe, aguman’nena vyongo viivi vyevyo vyairi-idhe ira am’roromelenga maningi Yohova?

⁶ Kathuulelani vyongo vyaireile vaingumi ya Davide, vyevyo vyairi-idhe ira am’roromelenga maningi Yohova. Davide angali zombwe, imbalangondo na kalamu tatoo-inda mabila ababee enao akumbiza liye. Vahora dhothene dhedhi, Davide atoolimba rima notamangi-a imbalangondo na kalamu novulumucha mabilao. Mbwenye Davide kaathuulela ira utoirana vyongo vyevi namwasa wa kopolodhee. Liye anoidhiwa ira Yohova ngwam’kami-idhe. (1 Sa. 17:34-37) Hora dhothene Davide anoothuulela vyaireilevi. Thuulela vyevi watom’kami-a roromela ira Nlungu waingumi unodha m’kami-a sogolou.

7. N’nga ona vyongo mofwanelela wam’kami-idhe a-vi Davide ira amawane na Goliyati?

⁷ Vangavirile hora Davide angali zombwe, atoodhowa sasani wa Aisraeli. Angadhowile atoofwanya anyakondwao taovanga namwasa wa nyakondo wakopolo wa Afilisiti dhinalee Goliyati “anyozanga anyakondo Aisraeli.” (1 Sa. 17:10, 11) Anyakondwao tanoova namwasa oi tathuulela maningi maoneelo amutuo na madhu onyoza aonga liye. (1 Sa. 17:24, 25) Mbwenye Davide aona vyongo mo-iyana, liye aona ira Goliyati kaanyoza anyakondo Aisraeli baa-i mbwenye “anyoza anyakondo a Nlungu waingumi.” (1 Sa. 17:26) Davide athuulela maningi vya Yohova. Liye anoororomela ira Nlungu wenuo am’kami-idhe vahora yakumbiza liye vifuwo, unodha m’kami-a thitho vahora yeniyo. Voi Davide anoororomela ira Nlungu unodha m’kami-a, atoodhowa mawana na Goliyati thitho atooganyali.—1 Sa. 17:45-51.

8. Chini inanikami-e ira na-akaikelenga ira Yohova unonikami-a nagumanana nyarwa? (Muone thitho iruthiruthi.)

⁸ I-yo thitho ninooda vilela vyowesedha akala ninothuulela ira Nlungu waingumi ngokozeya nikami-a. (Sal. 118:6) Ninooda roromelanga maningi vyevi nathuulela vyongo viirile Yohova ndulimu. Muleringa myasa ya Bibilyani yothonyi-edha mwemo mwavulumuchele liye arumiwee. (Esa. 37:17, 33-37) Muleringa thitho onela malipoti ava jw.org, othonyi-edha mwemo Yohova munokami-edhela liye abali naarongoli-u malamboano. Wenjedhela vevo, muthuulelenga thitho mwemo muukami-edheleni liye. Kavali yorucha akala kamunaonge nyarwa dhilukulu ninga wana na kalamu venango imbalangondo. Ninoonga ee-no namwasa oi Yohova ukadhi auirelangani vyongo vinjinji vaingumiinyu. Atouwitanani ira mukale vauxamwali na liye. (Ju. 6:44) Va-eeni, ndi liye unoukami-ani ira  mudhowenave kala muimbarimbarini. Ee-no munooda ira pama m’vepa ira authuucheni vahora yawakunle liye malobelwinyu, ukami-ani vahora yofwanelela nousamalelani vahora yorucha. Thuulela vyongo vyevi, unooda ukami-ani ira muroromelenga maningi ira Yohova unodha dhowanave ukami-ani.

9. N’nga nyarwa dhinogumanana i-yo nidhionenga a-vi? (Sanganiko 27:11)

⁹ Roromela ira Yohova utokalaodi, unooda nikami-a ira nionenga mofwanelela vyowesedha vinogumanana i-yo. Mwasiwa ngwani ninoonga ee-no? Namwasa oi ninoroma ona nyarwa dhinogumanana i-yo, ninga ikundo vamwasa nlukulu wenuo ulivo vari va Yohova na Satana. Namanami-a unoonga ira nagumanana nyarwa, ninooda i-ya m’labela Yohova. (Yob. 1:10, 11; muleri Sanganiko 27:11.) Mbwenye naoda vilela nyarwadho, ninothonyi-edha ira ninom’dhiveliwana Yohova thitho ninoruni-a vyonama vya namanami-a. N’nga nyo munoruni-iwa naandimuwa andimuwa amaguverno, munogumanana nyarwa dhafuma, thitho atu katinovuruwana milanyu inolaleela nyo venango munogumanana vyowesedha vinango? Muthuulelenga ira vinogumana nyoovyo vinodha uva-ani ngari yoi musangalali-e rima wa Yohova. Muthuulelenga ira Nlungu kanodha rumeli-a ira muwesedhiwe fiyedha voi kamunaode vilela. (1 Ak. 10:13) Yohova unodha uva-ani kopolo ira muvilele.

NLUNGU WAINGUMI UNODHA UVA-ANI YOTUVA

10. N’nga Nlungu waingumi unodha airelan’ni atu anom’lambela?

¹⁰ Yohova unovelela yotuva waatu anom’lambela. (Aeb. 11:6) Va-eeni liye unoniva-a rendele, unonikami-a kala osangalala thitho unodha niva-a ingumi yo-omala sogolou. Ninororomela maningi ira ngofunechecha niva-a yotuva thitho liye utokaana kopolo dhoirana vyevyo. Nam’roromelanga maningi, ninodhowanave m’labela na rimi-u othene ninga mwemo mwairelecha arumiwee awalelene. Vyevi ndi vyairile Timoteo.—Aeb. 6:10-12.

11. N’nga chini yam’limbi-idhe Timoteo ira alabenga basalee mwathindhi pingoni? (1 Timoteo 4:10)

 ¹¹ Muleri 1 Timoteo 4:10. Timoteo anoororomela maningi ira Nlungu waingumi unodha m’va-a yotuva. Ngumwasiwa liye atokaana thindhi vom’labela Nlungu. N’nga aodile a-vi irana vyevi? Rumiwi Paulo atoom’limbi-a ira adhilimbi-edhe kala namafunji-a wapama vabasa yolaleela thitho pingoni. Timoteo afuneela thitho kala ifwanafwani-o yapama wa Makristau afwee, azombwe na andimuwa oulula. Atoova-iwa thitho basa yorucha yeniyo yathangani-avo velela malangi-o akopolo, mbwenye audhivela waatu enao tafuneela malangi-oao. (1 Ti. 4:11-16; 2 Ti. 4:1-5) Angalive ira hora dhinango atu katasimba vyaira liye, Timoteo kaakaikela ira Yohova unodha m’va-a yotuva.—Aro. 2:6, 7.

12. N’nga chini inalimbi-e andimuwa avapingoni ira talabenga basa liwa mwathindhi? (Muone thitho iruthiruthi.)

¹² Malamboano, andimuwa avapingoni anoidhiwa ira Yohova unoona thitho simba mabasa apama anolaba aliwa. Wenjedhela vosamalela mabila a Nlungu, funji-a nolaleela, andimuwa anjinji anokami-a thitho vamabasa omangamanga, novelela kami-o vaireya masoka avilengo. Andimuwa enango thitho ali mugurupu yowendela atu obulela venango makomisau oongi-ana ximitari. Andimuwa avapingoni anovivelela laba mabasa enala, anoidhiwa ira Yohova ndi mwinyaa pingo a-kala mutu. Vamwasa wen’na, aliwa anolaba mabasiwa modhivelela thitho anororomela ira Nlungu unodha ava-a yotuva namwasa wa mabasa anolaba aliwa.—Ako. 3:23, 24.

13. N’nga Yohova unovivwa a-vi aona vyongo vinoira i-yo vom’labela mwathindhi?

¹³ Pyo-oodeya ira mutu uliwethene akale ndimuwa wavapingoni. Mbwenye i-yo othene ninooda m’va-a yongo inangoyee Yohova. Nlungwi-u unosimba maningi nadhilimbi-edhanga ira nim’labelenga mwathindhi. Liye unoona navelelanga vyongo vi-u vokami-a basa yavailambo yothene yavathi, masiki  vikale vyoyeva. Yohova unosangalala aniona nidhilimbi-edhanga imecha wono ira niwakule vamigumanoni angalive ira nili amanyadho. Thitho unosangalala aniona nivwalavwali-anga vyodawa vyaatu enango nowalevelela. Masiki muonenga ira kamunoira vyongo vinjinji vom’labela Yohova, idhiwani ira Yohova unosimba vyongo vyothene vinoira nyo. Yohova unoudhiveliwanani namwasa wa vyongo vinoira nyoovyo thitho unodha uva-ani yotuva.—Luk. 21:1-4.

MUDHOWENAVE KALA VAUXAMWALI WAPAMA NA NLUNGU WAINGUMI

14. N’nga kala vauxamwali na Yohova unanikami-e a-vi ira nikale ororomeleya? (Muone thitho iruthiruthi.)

¹⁴ Naroromelanga ira Yohova utokalaodi, vinooda kala vyo-orucha ira nikale ororomeleya wa Yohova. Ndi mwemo mwakalenle aliwa na Yosefe. Liye atookonda irana vyongo vyamararuo namwasa oi atooidhiwa ira vyoiravyee vinom’kuza Nlungu thitho kaafuna m’sukwali-a. (Mar. 39:9) Ira nikale vauxamwali wapama na Yohova, ninofwanela lobelanga thitho funjedha madhwee. Nairangana vyongo vyevi, uxamwali-u unokala olimba maningi na Yohova. Molandana na Yosefe, nakala vauxamwali olimba na Yohova, kaninodha irana yongo iliyothene inam’sukwali-e.—Yak. 4:8.

15. N’nga ninofunjedhavon’ni va vyongo vyaireele Aisraeli tangali kokolani? (Aebere 3:12)

¹⁵ Mutu adiwala ira Yohova ndi Nlungu waingumi, vinokala vyo-orucha ira a-iye kala ororomeleya wa Yohova. Ifwanafwani-o vamwasula ndi vyevyo vyaireele Aisraeli tangali kokolani. Aliwa tatoidhiwa ira Yohova utokalao, mbwenye tatooroma kaikela akala liye angaasamaleledi. Tatoofiya vofuka ira: “N’nga varivi-u vano, Yohova utokalavo venango kabe?” (Eki. 17:2, 7) Vyo-arelavovyee pyoi tatoo-iya m’vwela Nlungu. Pyoidhiweelatu ira kaninofuna sazi-edha ifwanafwani-o yiwa yothakalai.—Muleri Aebere 3:12.

16. N’nga ndi vyongo viivi vyevyo vinawesedhe iroromelwi-u?

¹⁶ Muilamboi dhowanave kala vauxamwali  na Yohova kai okweya. Atu anjinji katinorumela ira Nlungu utokalao. Thitho hora dhinjinji atu ta-ano-arela makundo a Nlungu, anooneya ninga vyongo vinoawendela pama. Naonanga vyongo vyevi viireyanga, iroromelo yi-u inooda wesedhiwa. Angalive ira kaninafiye vokaikelanga ira Nlungu utokalaodi, ninooda roma kaikelanga akala unooda nikami-a. Alembile Salimo 73, atooroma kaikela vyongo vyevi. Liye aona ira atu enao anovwalavwali-a malamulo a Nlungu, vyongo vinoawendela pama. Ee-no atooroma kaikela akala m’lambela Yohova koganyali-a.—Sal. 73:11-13.

17. Chini inanikami-e ira nikaleve vauxamwali wapama na Yohova?

¹⁷ N’nga chini yam’kami-idhe mulimbo lemba Salimula ira arome ona vyongo mofwanelela? Liye atoothuulela vyongo vyaireele atu enao am’duwanle Yohova. (Sal. 73:18, 19, 27) Atoothuulela thitho maraeli-o anofuna dhakaana atu anom’labela Nlungu. (Sal. 73:24) Iyo thitho ninooda thuulelanga maraeli-o aniva-idhe Yohova. Nithuulelenga mwemo ingumii-u mwakalele aliwa aakale ira kaninom’labela Yohova. Irana vyevi unooda nikami-a ira nikaleve ororomeleya noonga ninga mwaongele mulimbo lemba masalimula ira: “Wamiyo, m’mwandamela Nlungu ndi yongo yapama maningi.”—Sal. 73:28.

18. Mwasiwa ngwan’ni kaninofwanela ova vyongo vinofuna dhaireya sogolou?

¹⁸ Ninooda vilela nyarwa dhinogumanana i-yo malambo omari-ala namwasa oi “ninom’labela Nlungu waingumi na waimbarimbari.” (1 At. 1:9) Nlungwi-u unonidhiveliwana thitho hora dhothene unonikami-a. Liye atookami-a arumiwee ndulimu, thitho unongo nikami-a malamboano. Vachineneeva ninodedi-edhela ira vailambo yavathila, vanoireya nyarwa ilukulu. Mbwenye imbarimbari choi kaninodha kala okene Yohova unodha nikami-a va nyarwa ilukulu. (Esa. 41:10) Ee-no dhoweni i-yo othene “nikale olimba rima thitho nionge ira: ‘Yohova ndi namakami-anga; Kandinodha ova yongo iliyothene.’”—Aeb. 13:5, 6.