Vyofuka vyokumela waalimbo leri
N’nga madhu oi “munodha aing’anela,” anofwanyeya va lemba la Salimo 12:7, anoonga “vyaatu orucheya” (versu 5) venango “madhu a Yohova” (versu 6)?
Mwasa othene unothonyi-edha ira madhu averswala anoonga vyaatu.
Va lemba la Salimo 12:1-4, ninolerivo ira, “atu ororomeleya atomalelatu vari vaatu othakala.” Va-eeni dhoweni nitapanyeni madhu ava Salimo 12:5-7, maversu enala ndi vakumenle yofukai. Madhwiwa anoonga ira:
“‘Yohova uongile ira, namwasa oi atu orucheya anaanyingaleliwa,
Namwasa ola waatu osauwa,
Ndinodha venyathi noiravo yongo.
‘Ndinodha avulumucha waatu enao anowanyingalela.’
Madhu a Yohova mbochena;
Ali ninga siliva onyunguluchiwa mufornu ya mulo nocheni-iwa fendo 7.
Nyo Yohova munodha aing’anela.
Mutu uliwethene waaliwa munodha m’barela, wu zizali modhowa nodhowa.”
Versu 5 linoonga vyevyo Nlungu vinofuna liye dhairela “atwee orucheya,” liye unodha avulumucha.
Versu 6 linowenjedhela onga ira “madhu a Yohova mbochena,” ali ninga siliva onyunguluchiwa. Vyevi vinothonyi-edha mwemo Makristau othene odhivelela, monovwela aliwa voonga madhu a Nlungu.—Sal. 18:30; 119:140.
Va-eeni dhoweni nitapanyeni versu lo-arela, Salimo 12:7 vanoonga ira: “Nyo Yohova munodha aing’anela. Mutu uliwethene waaliwa munodha m’barela, wu zizali modhowa nodhowa.” N’nga madhu oi munodha aing’anela modhowa nodhowa, anoonga “vyaani”?
Voi madhu avaversu 7 anodha nduli mwa versu 6 oonga ira “madhu a Yohova,” atu enango anooda thuulelanga ira “vyevi” vinothapulela Madhu a Nlungu. Ninoidhiwa ira liye ukadhi aing’anelanga venango ira barela Bibilya angalive ira atu oruni-a tatoodhilimbi-edha ira talinonge thitho kondi-a ira la-afwanyeyeve.—Esa. 40:8; 1 Pe. 1:25.
Mbwenye vinoonga versu 5, pyaimbarimbari. Yohova ukadhi akami-anga thitho vulumucha “atu orucheya” na “atu onyingaleliwa,” thitho unodha dhowanave irana vyevi—Yob. 36:15; Sal. 6:4; 31:1, 2; 54:7; 145:20.
N’nga madhu oi “munodha aing’anela” ali va versu 7 anothapulelan’ni?
Mwasa othene unofwanyeya musalimoli, unothonyi-edha ira madhu oi “munodha aing’anela,” anoonga vyaatu.
Va Salimo 12:1, vanoonga vya “atu ororomeleya” enao takadhi tanami-iwanga. Ninofwanyavo thitho madhu othonyi-edha ira Yohova, unodha langa atu ano-indi-edha basa lumi liwa voonga vyongo vyothakala. Salimoli linonisikimizeli-a ira Nlungu unodha kami-a atwee namwasa wa madhwee ochena.
Ee-no va versu 7, vanoonga ira Yohova “unodha aing’anela” venango barela atu anoruchi-iwa naatu amakalelo othakala.
Madhu oi “munodha aing’anela” anofwanyeya thitho mumalemba Aimasorete. Bibilya la Septuagint lino-indi-edha basa madhu oi “munodha niing’anela” fendo mbili muversu 7, thonyi-edha ira anoonga vyaatu ororomeleya enao anoruni-iwa thitho nyingaleliwa. Mamari-edho wa versu 7, vanoonga ira “mutu uliwethene” ororomela “unodha bareliwa wu ziza leli,” enao mbaatu anolimbi-a vyongo vyothakala. (Sal. 12:7, 8) Bibilya la Iyaramu lothapuleliwa mumalemba Aiyeberi, ikundu yoroma ya versu 7 tatoo-indi-edha basa madhu oi “munodha aing’anela,” thitho linovwei-a ira: “Nyo Mbwiye munodha barela atu olongomana, munodha aing’anela wu ziza lothakalali modhowa nodhowa.” Vyevi vinothonyi-edha umboni unango ooni-a ira Salimo 12:7, linoonga vya madhu a Nlungu.
Vamwasa wen’na, versuli linova-a idedi-edho “atu ororomeleya” ira Nlungu unodha iravo yongo ira aakami-e.
