MURU OFUNJEDHA 21
Moda munowakulela Yohova malobelwi-u
“Ninoidhiwa ira unonivwela namvepa yongo ili yothene, ninokaana iroromelo yoi ninowachela vyongo vivepile i-yo.”—1 JU. 5:15.
NYUMBO 41 Mulungu Imvani Pemphero Langa
VINOFUNA I-YO FUNJEDHA a
1-2. N’nga hora dhinango ninooda dhifukangan’ni vamwasa wa malobelwi-u?
N’NGA mutoroma dhifukavo akala Yohova unowakula malobelwinyu? Akala ndi ee-no, idhiwani ira kamuli mwekene. Abali naarongola enango thitho tatoroma dhifukavo yofuka yei, simbwasimbwa vahora inogumanana aliwa nyarwa. Akala i-yo thitho ninogumanana nyarwa vinokala vyo-orucha zindiyela mwemo Yohova munowakulela liye malobelwi-u.
2 Dhoweni nitapanyeni mwasee wa-anofwanela i-yo kaikelanga ira Yohova unowakula malobelo aarumiwee. (1 Ju. 5:15) Ninotapanyani vyofuka vi: Mwasiwa ngwan’ni hora dhinango vinooda oneyanga ninga Yohova kanowakula malobelwi-u? N’nga Yohova unowakula a-vi malobelwi-u malamboano?
HORA DHINANGO YOHOVA KANAWAKULE MALOBELWI-U MWANDHILA YADEDI-EDHELA I-YO
3. Mwasiwa ngwan’ni Yohova unofuna ira nilobelenga wa liye?
3 Malemba anonisikimizela ira Yohova unonidhiveliwana maningi thitho nili apereso yavadhulu wa liye. (Agai 2:7; 1 Ju. 4:10) Ngumwasee unoniwandela ira nimvepenga ira anikami-e. (1 Pe. 5:6, 7) Liye unofuna nikami-a ira nikale vauxamwali na liye thitho nivilelenga nyarwa dhinogumanana i-yo.
Yohova atowakula malobelo Davide vom’vulumucha mandhani mwaamwidanee (Muone ndima 4)
4. N’nga ninoidhiwa a-vi ira Yohova unowakula malobelo aarumiwee? (Muone thitho iruthiruthi.)
4 Hora dhinjinji ninolerecha Bibilyani ira Yohova unowakula malobelo aarumiwe. N’nga ndiifwanafwani-o ivi inoithuulela nyo? N’nga a-vi vya mwene Davide? Liye atoogumana naamwidanee anjinji oopi-a vaingumiyee, thitho hora dhinjinji atoolobela wa Yohova ira amkami-e. Vahora inango liye atomvepa Yohova ira: “Nyo Yohova, vwani lobelo langa, ndivuruwaneni vevo vanouvepani miyo. Ndiwakuleni movwelana na roromeleya winyu thitho na longomano linyu.” (Sal. 143:1) Yohova atowakula malobelo a Davide ira unomvulumucha. (1 Sam. 19:10, 18-20; 2 Sam. 5:17-25) Voi Davide atoofiya voonga mosikimizela rima ira: “Yohova uli vakwikwi naatu othene anoitana wa liye.” I-yo thitho ninooda kala osikimizela ira Yohova unodha nikami-a.—Sal. 145:18.
Yohova atowakula malobelo a Paulo vom’va-a kopolo dhafuneela liye ira aode vilela vyowesedha (Muone ndima 5)
5. N’nga hora dhothene Yohova anoowakula malobelo aarumiwe mwandhila yadedi-edhela aliwa? Muonge ifwanafwani-o. (Muone thitho iruthiruthi.)
5 Hora dhinango Yohova kanawakule malobelwi-u mwandhila yadedi-edha i-yo. Vi pyam’mwireele rumiwi Paulo. Liye atomvepa Yohova ira amkumi-edhe “munga tutunimwee” Fendo uraru alobelelanga nyarwa imbo-ive. N’nga Yohova atoowakula malobelwee? Ee, mbwenye a-kala mundhila yadedi-edha Paulo. Malo momali-a nyarwa dheedho, Yohova atomva-a kopolo dhafuneela liye ira adhowenave mlambela mororomeleya.—2 Akor. 12:7-10.
6. Mwasiwa ngwan’ni hora dhinango vinooda oneyanga ninga Yohova kanowakula malobelwi-u?
6 Hora dhinango na-iyene thitho ninooda wakuliwa malobelwi-u mundhila yeniyo ya-adedi-edhela i-yo. Mbwenye ninooda kala osikimiza ira Yohova unoidhiwa ndhila yapama maningi yonikami-edha. Liye “unooda ira vyongo vilukulu maningi kwaranya vinomvepa i-yo venango vithuulela.” (Aef. 3:20) Vamwasa wen’na, liye unooda wakula malobelwi-u vahora thitho mwandhila ya-adedi-edha i-yo.
7. Mwasiwa ngwan’ni hora dhinango ninofwanela chinjanga vinolobelela i-yo? Muonge ifwanafwani-o.
7 Vevo vanovwechecha i-yo pama ifunelo ya Nlungu, hora dhinango ninofuneela chinja vyongo vinolobelela i-yo. Kathuulelani vyevyo vyam’mwireele bali Martin Poetzinger. Angathenle, bali Poetzinger ato-eliwa perezoni ya Nazi yooni-edhelao atu nyarwa. Voroma atomvepa Yohova ira amkami-e kuma perezoni naifunelo yoi amasamalelenga i-yanee thitho dhowanave laba basa yolaleela. Mbwenye vangavirile masumana menli, kaaoni izindiyelo iliyothene yothonyi-edha ira Yohova unomkami-a kuma perezonimo. Voi e-no, atooroma lobela ira: “Yohova, ndiidhiwi-eni vinofuna nyo ira ndiire.” Voi ee-no atooroma thuulela nyarwa dhedho abali anjinji aperezonimo dhagumanana aliwa. Anjinji mwaaliwa tanookubanyedha a-iyaniwa naa-imiwa. Voi e-no bali Poetzinger atoolobela ira: “Yohova, mnosimba maningi namwasa ondiva-a urumiwi upya. Ndikami-eni ira ndilimbi-e abalanga.” Vi piyevyo vyaira liye wa vyawa 9 angali perezoni!
8. N’nga ninofwanela thuulelanga likundo lofuneya liivi nalobelanga?
8 Nithuulelenga ira Yohova utokaana ifunelo yoi adhaikwakwaneli-edhe vahoree. Ifunelo yei inothangani-avo kumi-elavotu nyarwa dhothene dhaatu dhinogumanana aliwa ninga masoka avilengo, marenda thitho wukwa. Yohova unodha irana vyevi vo-indi-edha basa Umwenee. (Dan. 2:44; Apok. 21:3, 4) Mbwenye va-eni unorumeli-a ira Satana atongenga ilamboi. b (Ju. 12:31; Apok. 12:9) Aakale ira Yohova unomali-a nyarwa dhi-u va-eeni, mwandhila inango vingaoneilenga ira Satana unotonga pama. Mbwenye vanodedi-edha i-yo ira Yohova akwakwaneli-edhe vyolanyedha vyeevi kavinothapulela ira nagumanangana nyarwa kananikami-e. Dhoweni nitapanyeni ndhila dhinango dhedho Yohova dhinonikami-edhelana liye.
MODA MUNOWAKULELA YOHOVA MALOBELWI-U MALAMBOANO
9. N’nga Yohova unanikami-e a-vi vevo vanofuneela i-yo sakula vyoira? Muonge ifwanafwani-o.
9 Unoniva-a zelu. Yohova unolanyedha ira unongoniva-a zelu dhedho dhinofuneela i-yo ira nisakulenga pama vamyasa yo-iyana-iyana. Ninofuneela zelu dha Nlungu simbwasimbwa nasakulanga vyoira vamyasa dhedho dhinakuze ingumi yi-u yothene, ninga myasa yokuza kaana banja venango a-kaana banja. (Yak. 1:5) Kathuulelani vyevyo vyam’mwireele rongola unango o-otheliwa dhinalee Maria. c Ali asangalalanga ira upainiya vevo vagumanena liye bali unango. Liye aongile ira: “Nangaromile vwelana maningi natooroma thitho dhivelana. Ndanoidhiwa ira ndanofuneela sakula vyoira thitho ndatoolobelela mwasula wahora indendai. Ndanofuneela sogoleliwa na Yohova mbwenye ndatoidhiwa ira liye kanandisakulele vyoira.” Maria atoona ira Yohova atoowakula lobelolee loi amkami-e sakula vyoira mwazelu. Moi a-vi? Vevo vasakasaka liye mabukuni mwi-u, atoofwanya myasa yeniyo yawakula vyofuka vyana liye. Liye ato-arela malangi-o azelu enao amva-idhe m’mee. Malangi-oao tatomkami-a ira athuulele mwemo mwavwela liye. Vamamari-edhovee atoosakula vyongo mwazelu.
N’nga Yohova unoniva-a a-vi kopolo ira nivilele? (Muone ndima 10)
10. Movwelana na lemba la Afilipi 4:13, n’nga Yohova unodha iran’ni vokami-a arumiwee? Muonge ifwanafwani-o. (Muone thitho iruthiruthi.)
10 Unoniva-a kopolo ira nivilele. Ninga mwairele liye na Paulo, Yohova unoniva-a thitho kopolo ira nivilele vyowesedha vinogumanana i-yo. (Muleri Afilipi 4:13.) Kathuulelani mwemo Yohova mwamkami-idhe liye bali unango dhinalee Benjamin ira avilele nyarwa dhagumanana liye. Wahora indendai angali zombwe, liye naanamabalee takala maburo o-iyana-iyana osamalelao atu otawa waniwa wu Africa. Benjamin aongile ira: “Ndanoolobela vaduzi navaduzi wa Yohova mvepa ira andiva-e kopolo dhoi dhindikami-e irana vyevyo vinomsangalali-a. Yohova atoowakula malobelwanga vondiva-a rendele warimani, ndikami-a ira nda-a-iye laleela thitho ndiva-a mabukhu enao tandikami-idhe ira ndikale vauxamwali olimba na liye.” Liye atoodhowanave onga ira: “Leri vyevyo vyaireele Amboni enango thitho funjedha mwemo Yohova mwaakami-edhe liye vilela, watoondikami-a ira ndisikimizele rimanga dhowanave kala ororomeleya.”
N’nga Yohova utoroma ukami-anivo vo-indi-edha basa Makristau afwinyu? (Muone ndima 11-12) d
11-12. N’nga Yohova una-indi-edhe a-vi basa abali naarongoli-u voakula malobelwi-u? (Muone thitho iruthiruthi.)
11 Uno-indi-edha basa abali naarongoli-u. Va dambolee lomaria-a a-anavelele ingumiyee ninga sembe, Yesu atoolobela kumela vathi va rima. Liye atomsembezela Yohova ira karumeli-e ira atu enango tam’monenga ninga ngonyoza Nlungu. Mbwenye malo moirana vya vepile liyevyo, Yohova atomkami-a Yesu, vomruma mbo-i mwaangelwee ira amamlimbi-e. (Luka 22:42, 43) I-yo othene Yohova unooda nikami-a dhela wa bali venango rongola wenuo uniligarele venango niwendela ira anilimbi-e. I-yo othene ninooda fwanya ngari yoi nionge “madhu apama” wa Makristau afwi-u.—Sang. 12:25.
12 Kathuulelani vyevyo vyam’mwireele rongola unango dhinalee Miriam. Vangavirile masumana mangasi kumela vevo vakwide mam’nee, liye ali ekene vanyumbani mbwenye atookaana tangaranga maningi thitho atoododomi-eya mathuulelo. Akalelave ula thitho anoofuna angaongile na mutu unango. Liye atoonga ira: “Kandanave kopolo dhoi ndiligarele mutu uliothene e-no ndatoolobela wa Yohova. Ndilanga thitho lobela ndavwide telefonanga iitananga. Aligariluo ali ndimuwa wavapingoni thitho ali ndimuwa wamvwelananee miyo maningi.” Ndimuuo na i-yanee tatomlimbi-a maningi Miriam. Liye anoororomela ira ngu Yohova airi-idhe ira ndimuwa wavapingonuo amligarele.
N’nga Yohova una-indi-edhe a-vi basa atu enango ira tanikami-e? (Muone ndima 13-14)
13. Muonge ifwanafwani-o yothonyi-edha mwemo Yohova muna-indi-edhele liye basa atu ta-anomlambela voakula malobelwi-u.
13 Unooda i-ndi-edha basa atu oi kai arumiwee. (Sang. 21:1) Hora dhinango Yohova unowakula malobelo aarumiwee volimbi-a atu oi katinomlambela ira taakami-e. Mofwanafwani-a, atomlimbi-a Mwene Aritasasita ira arumele vya vepile Neemiya vyoi awelele wu Yerusalemu nodhowa makami-a va basa lomanga sidadilo. (Nee. 2:3-6) Malamboano thitho Yohova unooda iri-a atu ta-anolambela ira tanikami-e vevo vanofuneela i-yo kami-iwa.
14. N’nga vyam’mireele Soo Hing viulimbi-idheni a-vi? (Muone thitho iruthiruthi.)
14 Rongola unango dhinalee Soo Hing atoona ira Yohova atomkami-a dhela Mwaifirimerwee mwane walombwana vyabulela liye marenda o-iyana-iyana amathuuleloni. Mwaneuo atooira ngovi, rongoluo namannee tato-iya basa ira tamsamalelenga. Vyevi vyatoiri-a ira tagumanena nyarwa dhafuma. Soo Hing atoona ira vyatoofiya voi kaaode vilela. Atoolobela wa Yohova kumela vathi varima ira amkami-e. Ifirimeruo atodhilimbi-edha sakasaka ndhila ira aakami-e. Namwasa wa vyevi aliwa tatowachela kami-o kumela wa maguverno thitho tatofwanya limburo lokaathi. Vasogolovee Soo Hing atoonga ira: “Natoona mwemo Yohova mwanikami-edhe liye vamwasula. Onga mwaimbarimbari liye ‘ngowakula malobelo.’”—Sal. 65:2.
VANOFUNEELA IROROMELO IRA NISAKESAKE THITHO RUMELA MODA MUNOWAKULA YOHOVA MALOBELWI-U
15. N’nga chini yamkami-idhe rongola unango idhiwa ira Yohova unowakula malobelo?
15 Kai hora dhothene vevo malobelwi-u vanowakuliwa aliwa modabwi-a. Mbwenye vyowakula vya Yohova vinonikami-a ira nikaleve ororomeleya wa Babi-u wadhuluo. Ee-no mukalenga opwaseya ira muone mwemo Yohova munowakulela liye malobelwinyu. Rongola unango dhinalee Yoko aona ira Yohova kanowakula malobelwee, ee-no atooroma lemba bukhunimwee vyevyo vyavepa liye. Vangavirile hora atooing’ana bukhuni mweemo thitho atoozindiyela ira Yohova ali angawakunle malobelwee manjinji thangani-avo enao aadiwanle liye. Hora na hora ninofuneela roma imela nothuulela mwemo Yohova munowakulela liye malobelwi-u.—Sal. 66:19, 20.
16. N’nga ninathonyi-edhe a-vi iroromelo vamwasa wa lobelo? (Aebere 11:6)
16 Ninothonyi-edha iroromelo a-kala volobela wa Yohova ekene baa-i mbwenye vorumela yowakula ya lobelo li-u masiki akala yowakuliyo ikale yoi a-vi. (Muleri Aebere 11:6.) Kathuulelani ifwanafwani-o ya Mike na-iyanee Chrissy. Aliwa tanoofuna laba va Beteli. Mike aongile ira: “Wavyawa vinjinji nanoofukedhelecha urumiula thitho lobela wa Yohova moweli-edha weli-edha ira anikami-e kwakwaneli-edha ifunelwi-u, mbwenye kanaitaniwile wu Beteli.” Mike na Chrissy katakaikela ira Yohova unoidhiwa mwemo muna-indi-edhe liye basa pama arumiwee. Ee-no aliwa tatoodhowanave ira vyothene vyevyo vaoda aliwa voira upainiya okatheya, weo wafuneela apainiya anjinji thitho kami-a vabasa lomangamanga. Va-eeni Mike ngunamaing’anela isa. Liye aongile ira: “Kai hora dhothene vevo Yohova vanowakula liye malobelwi-u mundhila yeniyo inondedi-edhela i-yo, mbwenye ukadhi awakulanga mundhila yapama maningi kwaranya mwemo mwathuulela i-yo.”
17-18. Movwelana na lemba la Salimo 86:6, 7, n’nga ninofwanela kala osikimizela vyan’ni?
17 Muleri Salimo 86:6, 7. Olemba Salimo Davide anoororomela ira Yohova unovwa thitho rumela malobelwee. Nyo thitho munooda roromela vyevi. Vifwanafwani-o vitapanyileni i-yo muyofunjedha yei, vinonisikimizeli-a ira Yohova unodha niva-a zelu thitho kopolo dhinofuneela i-yo ira niode vilela. Liye unooda i-ndi-edha basa abali naarongoli-u venango atu oi va-eni katinomlambela ira tanikami-e mwandhila inangwee.
18 Angalive ira kai hora dhothene Yohova munowakula liye malobelwi-u mundhila ya-adedi-edhela i-yo, ninoidhiwa ira unodha niwakula. Unodha niva-adi vyongo vinofuneela i-yo thitho vahora inofuneela i-yo. Ee-no, dhowananive lobela mungana iroromelo yoi Yohova unodha usamalelani va-eni, thitho “unodha kwakwaneli-edha vyofuna vya ya ingumi iliyothene” muilambo ipya inodhiyo.—Sal. 145:16.
NYUMBO 46 Timakuyamikirani Yehova
a Yohova unonisimikezela ira unodha wakula malobelwi-u akala mbovwelana na ifunelwee. Vahora inogumanana i-yo vyowesedha, kaninodha kaikela ira unodha nikami-a kalave ororomeleya wa liye. Dhoweni nioneni mwemo Yohova munowakulela liye malobelwi-u.
b Ira muidhiwe mwasee Yohova urumeli-edhe liye ira Satana atongenga ilamboi, muone mwasa oi “Musamaiwale Nkhani Yofunika Kwambiri,” mu Nsanja ya Olonda ya Junho wa 2017.
c Madhina enango tatochinjiwa.
d VIRUTHIRUTHI VYA: M’ma unango utoofiya muilambo inango ninga atu otawa waniwa. Makristau afwiwa tatoawachela mwaudhivela thitho tanoakami-a mwandhila dho-iyana i-yana.
