1. N’nga ninoidhiwa a-vi ira Yohova unofuna ira nikale vauxamwali na liye?

 YOHOVA unoniwandela ira nim’mwandamele. (Yak. 4:8) Liye unofuna kala Nlungwi-u, babi-u thitho fwi-u. Unowakula malobelwi-u thitho unonikami-a vahora yorucha. Unonifunji-a vo-indi-edha basa gululee thitho unonivunela. N’nga ninaire a-vi ira nikale vauxamwali na liye?

2. N’nga ninaire a-vi ira nikale vauxamwali na Yohova?

² Ninokala vauxamwali na Yohova volobela wa liye thitho voleri no thuulela madhwee. Nairanga vyevi, ninoroma adhiveliwana maningi thitho nonsimba. Ninofunechecha mvwela thitho mdhiveliwana ninga mwemo munofuneela. (Apok. 4:11) Nam’mwidhiwanga maningi Yohova paevo vanomnyindela i-yo maningi thitho nyindela gululee liniva-idhe liye ira linikami-enga.

3. N’nga Namanami-a unodhilimbi-edha a-vi ira ani-iyani-e na Yohova, n’nga chini inanikami-e ira na-am-iye Nlungwi-u na gululee? (Salimo 31:13, 14)

³ Mbwenye Namanami-a unofuna ira ani-iyani-e na Yohova simbwasimbwa nagumanangana nyarwa. N’nga unoira a-vi vyevi? Vang’ono navang’ono, liye unofuna niiri-a ira na-anyindelenga Yohova na gululee. Mbwenye ninooda rambela migo-ee. Naroromelanga thitho nyindela maningi Yohova, kaninodha i-ya Nlungwi-u na gululee.—Muleri Salimo 31:13, 14.

4. N’nga muyofunjedha yei ninofuna nitapanyenin’ni?

⁴ Muyofunjedha yei, ninotapanya nyarwa taaru dhinoromi-iwa na ilamboi dhinaniiri-e ira na-anyindelenga maningi Yohova na gululee. N’nga nyarwadhi dhinani-iyani-e a-vi na  Yohova, n’nga ninaire a-vi ira vyowesedha vya Namanami-a vya-anidhodhomi-e?

5. N’nga nyarwa dhinogumanana i-yo dhinaniiri-e a-vi ira na-aroromelenga maningi Yohova na gululee?

⁵ Hora dhinango ninogumanana nyarwa ninga runi-iwa na abali-u venango mala wa basa. N’nga nyarwa dhedhi dhinaniiri-e a-vi ira ni-iyane na Yohova thitho ira na-aroromelenga gululee? Akala nitovilela nyarwa wahora indendai, ninoroma fooka dhiona ninga kanina idedi-edho. Satana unofwanyelavo n’ngari yoniiri-a ira nikaikelenga akala Yohova unonidhiveliwana. Liye unofuna ira nionenga ira nyarwadho dhinoiri-iwa na Yohova venango gululee. Vyofwanafwana na vyevi vyatoaireyelavo Aisraeli wu Iguputo. Voroma aliwa taroromela ira Yohova ngwarumile Mose na Aroni ira aakumi-e wu udhaari. (Ekis. 4:29-31) Mbwenye Farao angairi-idhe ira nyarwadho dhiwenjedheleye, aliwa tatoroma m’monba landu Mose na Aroni onganga ira: “Mutoniiri-a kala ninga yongo yo-ofwanelela vamethoni va Farao na anamalabee. Mutoava-a masarasada mandhani mwiwa ira tanipe.” (Ekis. 5:19-21) Aliwa taomba landu arumiwi ororomeleya a Yohova. Vyevi vyali vyova-a tangaranga. Akala mukanle muvilelanga nyarwa inangwee wahora indendai, munaire a-vi ira muroromelenga maningi Yohova na gululee?

6. N’nga ninofunjedhavon’ni wa Habakuku vamwasa ovilela nyarwa? (Abakuku 3:17-19)

⁶ Mulobelenga wa Yohova na riminyu othene ira aukami-eni. Namaongela Habakuku atogumanana nyarwa dhinjinji. Vahora inango, anokaikela akala Yohova anomthuulela. Ee-no atolobela wa liye kumela vathi varima. Liye aongile ira: “Nyo Yohova, n’nga ndinodha lela pedhelo mbwenye nyo andikami-a fiedha elini? . . . Mwasiwa ngwan’ni munodhowanave ing’ana kalelo lothakalali?” (Habak. 1:2, 3) Yohova atowakula lobelo la rumiwee ororomeleyula. (Habak. 2:2, 3) Angathuulele mwemo Yohova mwavulumuchile liye atwee ndulimu, Habakuku atoroma okoka kala osangalala. Liye atosikimizela ira Yohova unomthuulela thitho ira unomkami-a vilela vyowesedha vyothene. (Muleri Abakuku 3:17-19.) N’nga ninofunjedhavon’ni? Mwagumanangana nyarwa, mulobelenga wa Yohova thitho mum’mwandelenga mwemo munovwelanyo. Ee-no mumnyindelenga ira unoukami-ani. Mwaira ee-no, munokala osimikizela ira Yohova unouva-ani kopolo dhinofuneelanyo ira muvilele. Thitho mwaona ira utoukami-ani, munoroma mroromela maningi.

7. N’nga abalee a Shirley tatodhilimbi-edha m’mwiri-a ira airen’ni, n’nga chini yamkami-idhe ira a-a-iye mroromela Yohova?

⁷ Mudhowenave ira vyongo vyokuza lambela. Thuulelani irana vyevyo mwakamidhe aliwa rongola unango wawu Papua New Guinea dhinalee Shirley, angagumanena nyarwa. b Banjalee lali losauwa thitho hora dhinango anorucheya fwanya yodya yokwakwanela. Balee unango atomfooki-a ira a-anyindelenga Yohova. Baleuwo aongile ira: “Unoonga ira mzimu wa Nlungu unoukami-a, n’nga eva unoukami-a a-vi? Banjalaa tosauwa. Unatatila hora nolaleela.” Shirley aongile ira: “Ndatodhifuka ira: ‘N’nga Nlungu unonithuuleladi venango kabe?’ Ee-no hora yeniyo ndatolobela wa Yohova m’mwandela vyothene vyali rimani mwanga. Ndatodhowanave leri Bibilya na mabukwi-u, laleela thitho fwanyeya vamigumanoni.” Mo-odibela, liye atozindiela ira Yohova unosamalela banjalee.  Aliwa katinagonevo nandhala thitho tanosangalala. Shirley aongile ira: “Ndanoona ira Yohova atowakula malobelwanga.” (1 Timo. 6:6-8) Akala hora dhothene munoira vyongo vyokuza lambela, nyo thitho kamunorumela ira kaikela venango nyarwa dhinogumanananyo, dhiu-iyani-en’ni na Yohova.

8. N’nga chini inofuna aireela abali enao anosogolela gulu la Yohova?

⁸ Dhela varadiyoni, majorunale thitho va internetini, amwidani-u tanomwadha myasa yonama yokuza abali anosogolela gulu la Yohova. (Sal. 31:13) Abali enango tatomangiwa thitho ombiwa landu ninga mapanga. Vyevi ndivyaireele thitho Makristau oroma, vevo rumiwi Paulo vaombiwile liye milandu yonama thitho mangiwa. N’nga aliwa tairile a-vi?

9. N’nga Makristau enango tairile a-vi, Paulo angamangiwile?

⁹ Makristau tatom-iya mkami-a Paulo vafungeliwile liye perezoni wu Roma. (2 Timo. 1:8, 15) Mwasiwa ngwan’ni? N’nga tana manyadho namwasa oi atu enango taoona ninga mapanga? (2 Timo. 2: 8, 9) Venango taova ira naaliwene tanooni-iwa nyarwa? Peno tana myasa yoi a-vi, kathuulelani mwavwela Paulo. Liye ali angavilele nyarwa dhinjinji thitho ato-ela ingumiyee vangovini namwasa waaliwa. (Mayir. 20:18-21; 2 Akor. 1:8) Dhoweni na-akaleni ninga atu tatawile Paulo vahora yafuna liye pedhelo liwa. N’nga nithuulelangan’ni abali-u onisogolela taoni-iwanga nyarwa?

10. N’nga nithuulelengan’ni abali anosogolela taoni-iwanga nyarwa, n’nga mwasiwa ngwan’ni?

¹⁰ Muthuulelenga mwasa unooni-iwela i-yo nyarwa thitho unoiri-a vyevi. Lemba la 2 Timoteo 3:12, linoonga ira: “Othene anofuna kaana ingumi yodhivelela wa Nluungu na wa Yesu Kristu, naaliwene thitho tanodha oni-iwa nyarwa.” Ee-no kanidabwe voona ira Satana unolimbanana maningi abali enao anosogolela. Ifuneloyee kuiri-a ira ta-iye kala ororomeleya thitho ira i-yo niove.—1 Pe. 5:8.

11. N’nga ninofunjedhan’ni vaifwanafwani-o ya Onesiforo? (2 Timoteo 1:16-18)

¹¹ Mudhowenganave kami-a abalinyu thitho mukalenga ororomeleya wa aliwa. (Muleri  2 Timoteo 1:16-18.) Paulo angamangiwile, Kristau unango dhinalee Onesiforo atoira vyongo mo-iyana naatu enango. Liye “kaanna manyadho na migo-i ya Paulo.” Malomwee, liye atosakasaka thitho angafwayidhe, atodhilimbi-edha mkami-a. Voira vyevi, Onesiforo ato-ela ingumiyee vangovini. N’nga i-yo ninofunjedhavon’ni? Kanirumeli-e ira ova atu unidodomi-e venango niimwanani-a kami-a enao tanooni-iwa nyarwa. Malomwee, niirenga vyothene vinaode i-yo ira niakami-e. (Sang. 17:17) Aliwa tanofuneela udhiveli-u na pedhelo li-u.

12. N’nga ninofunjedhavon’ni waabali naarongoli-u a Russiya?

¹² Kathuulelani mwemo abali na arongoli-u a Russia munokami-edha aliwa Makristau afwiwa enao amangiwile. Atu enango tanukhedhiwa miselu tiribunale, abali na arongola anjinji tanodhowa weo, vothonyi-edha ira ali uikundu iwa. N’nga i-yo ninofunjedhavon’ni? Abali anosogolela tanyoziwanga, mangiwa venango oni-iwa nyarwa, kamuove. Mualobelelenga samalela atu abanja liwa, thitho sakasaka ndhila dhinango dhowakami-a.—Mayir. 12:5; 2 Akor. 1:10, 11.

13. N’nga nyoziwa unairi-e a-vi ira na-anyindelenga maningi Yohova na gululee?

¹³ Abali-u thitho afwi-u axikolani, tanooda ninyozanga namwasa oi ninolaleela venango namwasa o-arela makundo a Yohova a makalelo apama. (1 Pe. 4:4) Aliwa tanooda onga ira: “Weyo-eni uli mutu wapama, mbwenye religiau linyu linovuti-a vyongo thitho linowendela makundo awale.” Enango anonisumulula na moda unoirela i-yo vyongo na mutu okumi-iwa pingoni, voonga ira: “N’nga munaonge a-vi ira muli atu audhivela?” Madhu ninga enala anoniiri-a ira nirome kaana mathuulelo okaikela. Apwase ninoroma dhifuka ira: ‘N’nga Yohova unandikanyi-edha? N’nga gululeeli linovuti-a maningi vyongo?’ Akala munogumanana ninga vyevi, munaire a-vi ira mukaleve ovwelana na Yohova thitho gululee?

14. N’nga niirenga a-vi atu enango taninyozanga namwasa o-arela makundo a Yohova? (Salimo 119:50-52)

¹⁴ Mukalenga osikimiza ira mu-arelengave makundo a Yohova. Yobo ano-arelave makundo a Yohova angalive ira anonyoziwa namwasa oira vyevi. Mbo-i mwa atu aonga ira tali afwe, atodhilimbi-edha m’mwiri-a ira aonenga ira Nlungu kavyakuza akala a-arela makudwee. (Yobo 4:17, 18; 22:3) Mbwenye Yobo kaaviroromenle vyonamavyo. Liye anoidhiwa ira makundo a Yohova okuza yapama na yothakala, mbofwanelela thitho ali osikimiza a-arela. Kaarumenle ira atu enango tam’mwiri-e kala o-ororomeleya. (Yobo 27:5, 6) N’nga ninofunjedhavon’ni? Kamurumele ira nyoziwa uwiri-eni roma kaikela makundo a Yohova. Muthuulelenga vyongo vikanle viuwirelangani nyo vamweka. N’nga kamudhionenle mwekene mowelelawelela ira makundo a Yohova mbaimbarimbari thitho ira tanoukami-ani? Munofwanela sikimizela kalave mugulu lino-arela makundwala. Mwaira e-no, munodha dhowanave mlabela Yohova masiki atu taunyozeni moi a-vi.—Muleri Salimo 119:50-52.

15. N’nga mwasiwa ngwan’ni Brizit anonyoziwa?

¹⁵ Kathuulelani vyamwireele rongola unango wa India, dhinalee Brizit. Liye anonyoziwa na abalee namwasa wa iroromeloyee. Angabadiziwile yawa ya 1997, man’nee wenuo kaali Mboni basa latom’malela. Ee-no lobwanuo atothuulela ira liye vambo-i na banjalee tamakalenga na anamabalee, enao takala Sidadi n’nango. Vyevi vyatoiri-a ira Brizit  agumanena nyarwa dhinango dhilukulu. Voi man’nee kaali vabasani, liye anofuneya ira alabenga basa malambo othene, ira akami-enga banja liwa. Wenjedhela vevo, pingo wavaduzi wali olapela makilometru owandamela 350. Pyovwi-a tangaranga ira abali aman’neuo tatoroma mruni-a namwasa wa iroromeloyee. Vyongo vyatofiya vothakala maningi moi banja la Brizit, latoothama akoka. Moi e-no mo-odedi-edhela, man’nee atookwa. Vasogolove mwanee wa-iyana atookwa na marenda a khasa angana vyawa 12 baa-i. Vyongo vyatofiya vothakala maningi thitho vevo abali a Brizit vyaromile aliwa m’momba landu onga ira, nguweyo unoiri-a vyevi. Aliwa taonga ira a-akale ira liye kai wa Mboni dha Yohova, nyarwa dhothene dhedho kadhaireye. Mbwenye liye atodhowanave nyindela Yohova thitho kalave gulunimwee.

16. N’nga Brizit araeli-iwile a-vi namwasa oi kaa-iyidhe Yohova na gululee?

¹⁶ Voi Brizit akala undedai na pingo, namaing’anela isa atomlimbi-a ira alaleelenga tatamoni wakala liyeo thitho airelenga migumano m’mbamwe. Voroma liye aona ira vyevi pyorucha maningi, mbwenye ato-arela malangi-ao. Anolaleela milanyu yapama waatu enango, ira migumano m’mbamwe, thitho anoira lambela wavabanjani na a-imee. N’nga vyo-arelavyee vyali vyoi a-vi? Brizit atoroma kaana anamafunjedha Bibilya anjinji thitho atu anjinji aafunji-a liye tatobadiziwa. Mu 2005, atoroma upainiya okhaatheya. Liye atoraeli-iwa namwasa onyindela Yohova thitho kalave ororomeleya gulunimwee. Va ee-ni a-imee tanamlabela Yohova mororomeleya thitho tatamoni wiwa utokala mipingo mili. Birizit kanokaikela ira Yohova atomva-a kopolo ira aode vilela nyarwa dhagumanana liye thitho nyoziwa naabalee.

17. N’nga ninofwanela simikiza rima ira n’ni?

¹⁷ Satana unofuna ira niroromelenga ira Yohova unoni-iya nagumanana nyarwa thitho ira kala gulunimwee, unowenjedhela nyarwa.  Unofuna thitho ira niovenga abali anosogolela gulu la Nlungu tanyoziwanga, taoni-iwanga nyarwa venango ta-eliwa perezoni. Thitho unofuna ira nyoziwa uniiri-e i-ya roromela makundo a Yohova, na gululee. Mbwenye i-yo nitoidhiwa pama migo-ee yothakala thitho kanonivuthi-a. (2 Akor. 2:11) Dhoweni nisimikize rima ira nikondenga vyonama vya Satana nokalave ororomeleya wa Yohova na gululee. Nithuulelenga ira Yohova kanodha ni-iya navang’onovene. (Sal. 28:7) Ee-no kanirumele ira iliyothene ini-iyani-e na Yohova!—Aroma 8:35-39.

18. N’nga ninodha tapanyan’ni muyofunjedha yo-arela?

¹⁸ Muyofunedha yei, nitotapanya nyarwa dhoiri-iwa na ilamboi, dhedho dhinogumanana i-yo. Mbwenye hora dhinango nyarwa dhinogumanana i-yo pingoni, dhinoiri-a thitho ira ni-iye nyindela Yohova na gululee. N’nga ninaire a-vi ira nilimbanena nyarwa dhedhi? Ninodha tapanya vyevi muyofunjedha yo-arela.