1. N’nga kalave othuulela pama unothapulelan’ni wa i-yo? (2 Timoteo 4:5)

 HORA dhinango nyarwa dhinogumanana i-yo dhinooda niimwanani-a kala ororomeleya wa Yohova na gululee. N’nga ninaire a-vi ira niode limbanana nyarwa dhedhi? Ninofwanela dhowanave kala othuulela pama, kala methove thitho kala olimba muiroromelo. (Muleri 2 Timoteo 4:5.) Ninokalave othuulela pama nakala okurudheya thitho naonanga vyongo ninga munovionela Yohova. Nairanga vyevi mathuulelwi-u katinadodomi-eya namwasa wa moda munodhivwela i-yo.

2. N’nga ninofuna nitapanyenin’ni muyofunjedha yei?

² Muyofunjedha ivirile natotapanya nyarwa taaru dhoiri-iwa na ilamboi dhedho dhinagumanena i-yo. Muyofunjedha yei, ninotapanyani nyarwa taaru dhinagumanena i-yo pingoni dhedho dhinawesedhe roromeleya wi-u wa Yohova. Nyarwadhi ndi (1) naonanga ira Kristau fwi-u kaniirele vyongo molongomana, (2) nava-iwa malangi-o venango langiwa thitho (3) narucheyanga lemeela chinja wa vyongo guluni. N’nga ninaire a-vi ira nidhowenave kala othuulela pama thitho ira na-am-iye Yohova na gululee nagumanangana nyarwa dhedhi?

3. N’nga ninaire a-vi akala ninoona ira Kristau fwi-u utoniirela vyongo vyo-olongomana?

³ N’nga hora inango mutoroma onavo ira Kristau fwinyu venango mutu una izo kauirelene vyongo molongomana? Pyoidhiweelatu ira baluo kaana ifunelo yofuna usukwali-ani. (Aroma 3:23; Yak. 3:2) Mbwenye vyairile liyevyo, vyatouthakaleliwi-ani. Venango thitho mwatoimwanana gona namwasa wa mwasuo. Pyoodeya ira mwatodhifuka ira: ‘Akala uirile vyevi ndi balula, n’nga lelidi ndi gulu la Nlungu?’ Vyevi ndi vinofuna Satana ira nithuulelenga. (2 Akor. 2:11) Mathuulelo odaweyala anooda niiri-a ira nim-iye Yohova na gululee. N’nga  akala ninoona ira Kristau fwi-u utoniirela vyongo vyo-olongomana ninaire a-vi ira nidhowenave kala othuulela pama thitho rambela mathuulelo odaweya anofuna Satana ira naakaena?

4. N’nga Yosefe airile a-vi ira adhowenave kala othuulela pama angaireliwile vyongo vyo-olongomana, n’nga ninofunjedhavon’ni vaifwanafwani-oyee? (Maromelo 50:19-21)

⁴ Kamulokotenga vyarimani. Yosefe angali zombwe abalee katam’mwirele vyongo vyapama. Tanom’mwidananee thitho enango tanofuna mpa. (Maro. 37:4, 18-22) Vasogolovee tatomguli-a udhaari. Vyevi vyatoiri-a ira Yosefe agumanena vyowesedha vilukulu maningi, wa vyawa vyowandamela 13. Yosefe angaodile kaikela akala Yohova anomdhiveliwanadi. Angaodile thitho ona ira Yohova utom-iya vahora yafuneela liye kami-iwa. Mbwenye kaarumenle ira vyevi vimsukwali-e. Atodhowanave kala othuulela pama vokala okurudheya. Vevo vana liye ngari yoi angaodile aweli-edha abaleyao, liye kaairile e-no atoathonyi-edha udhivela thitho atoalevelela. (Maro. 45:4, 5) Yosefe atooda ira vyevi namwasa oi anothuulela pama. Malo mothuulelanga nyarwa dhagumanana liye, anoothulela mwasa ofuneya maningi okuza ifunelo ya Yohova. (Muleri Maromelo 50:19-21.) N’nga ninofunjedhavon’ni? Mwaireliwa vyongo vyo-olongomana, Kamunyanyuwele Yohova venango roma ona ira utoutatilani. Malomwee, muthuulelenga mwemo munoukami-edhani liye vilela vyowesedhiwavyo. Wenjedhela vevo atu enango taudawelani mugudumeyenga vyodawaviwavyo na udhivelinyu.—1 Pe. 4:8.

5. N’nga Miqueas airile a-vi ira akaleve othuulela pama vevo vaona liye ira utoireliwa vyongo vyo-olongomana?

⁵ Kathuulelani ifwanafwani-o ya malamboano ya bali unango, wenuo uli ndimuwa wava pingoni wu Amerca do Sul, dhinalee Miqueas. b Liye unothuulela mwemo mwavwele liye vahora inango vevo vaoni liye ira abali enango aizo tatom’mwirela vyongo vyo-omvwela tangaranga. Liye aongile ira: “Ndali nda-anakumbanyevo kumela walelene fiyedha va-eeni. Ndanoova maningi. Nama-iyu ndagona ndakalelechave ula thitho dhionanga ira ndili o-okaana basa.” Mbwenye Miqueas atodhowanave kala othuulela pama thitho kaarumenle dhodhomi-iwa namwemo mwavwela liye. Anolobela vaduzi navaduzi mvepa Yohova ira amva-e zimwee ochena thitho kopolo ira avilele. Atosakasaka thitho mabukhunimwi-u makundo enao tafuna mkami-a. N’nga ninofunjedhavon’ni? Akala mutoona ira bali venango rongola unango kauireleni vyongo molongomana, mukalenga okurudheya thitho mudhilimbi-edhenga kumi-amo mathuulelo aliothene odaweya anakaenanyo. Pyoodeya ira kamunaidhiwe vyevyo vyam’mwiri-idhe onga venango irana vyevyo. Ee-no mulobelenga wa Yohova, mvepa ira aukami-eni ona vyongo ninga munovionela liye. Vyevi vinooda ukami-ani ona ira bali venango rongolinyuo, kaana ifunelo yoi auireleni vyongo vyothakala thitho munooda mlevelela. (Sang. 19:11) Muthuulelenga ira Yohova unoidhiwa vinouireelani thitho unodha uva-ani kopolo dhinofuneelanyo ira muvilele.—2 Limb. 16:9; Namal. 5:8.

6. Mwasiwa ngwan’ni ninofwanela onanga malangi-o okumela wa Yohova ninga ndhila yothonyi-edha ira unonidhiveliwana? (Aebere 12:5, 6, 11)

⁶ Va-iwa malangi-o unopa. Nathuulelanga maningi upawee ninooda roma ona ira malangi-oao mbo-ofuneya maningi, kaninofwanela va-iwa venango taveleliwe mo-okaana tangaranga. Vyo-arelavovyee pyoi kaninaonenga  ira malangi-oao, ndi ndhila inonithonyi-edhela Yohova udhivela. (Muleri Aebere 12:5, 6, 11.) Mbwenye narumela dhodhomi-iwa na moda munodhivwela i-yo Satana unofwanyelavo ngari. Liye unofuna ira nikondenga malangi-o thitho kwaranya vevo, unofuna ira ni-iyane na Yohova na gululee. Akala mutova-iwa malangi-o, n’nga munaire a-vi ira mukaleve othuulela pama?

7. (a) Movwelana na iruthiruthii, n’nga Pedru a-indi-edhiwile a-vi basa na Yohova namwasa orumela malangi-o? (b) N’nga ninofunjedhavon’ni vaifwanafwani-o ya Pedru?

⁷ Murumelenga malangi-o thitho muchinjenga. Maulendo mangasi, Yesu atomsumulula Pedru vamethoni vaarumiwi enango. (Marku 8:33; Luka 22:31-34) Vinooni-a ira Pedru anookana manyadho. Mbwenye liye atokalave ororomeleya wa Yesu. Anorumela malangi-o thitho anofunjedhavo yongo. Vira wa hora, Yohova atomraeli-a Pedru namwasa okalave orormeleya thitho atomva-a vizo vilukulu pingoni. (Juwau 21:15-17; Mayir. 10:24-33; 1 Pe. 1:1) N’nga ninofunjedhavon’ni vaifwanafwani-o ya Pedru? Narambelanga thuulela maningi ira nitoiri-iwa manyadho norumela malangi-o nochinja, vyongo vinoniwendela pama wa-iyo thitho waatu enango. Naira e-no, ninokala ofuneya maningi wa Yohova thitho waabali-u.

8-9. N’nga Bernardo avivwide a-vi voroma angalangiwile, n’nga chini yamkami-idhe ira achinje mathuulelo?

⁸ Kathuulelani vyam’mwireele bali unango wa Moçambique dhinalee Bernardo. Liye atokumi-iwa vaizoni ninga ndimuwa wavapingoni. N’nga voroma Bernardo avivwide a-vi? Liye aongile ira: “Ndatosukwala maningi namwasa oi kandasangalale namoda walangiwile miyo.” Bernardo anosukwala na moda wa wafuna m’monelanga atu pingoni. Liye atorumela ira: “Vyatonditukulela medi mingasi ira ndirome ona thitho vyongo mofwanelela thitho mroromela Yohova na gululee.” N’nga chini yamkami-idhe Bernardo ira arome ona vyongo mofwanelela?

⁹ Bernardo atochinja moda mwathuulela liye. Liye atoonga ira: “Vahora yali miyo ndimuwa wavapingoni ndanoo-indi-edha basa lemba la Aebere 12:7 vokami-a atu enango ira taonenga mofwanelela langiwa okumela wa Yohova. Moi e-no ndatodhifuka ira: ‘N’nga mbaani unofuneya i-ndi-edha basa makundo avalembali?’ Ndi anamalaba othene a Yohova  thangani-avo miyo.” Moi e-no Bernardo atoira vyongo vyomkami-a ira arome mroromela Yohova na gululee. Atowenjedhela vyaira liye voleri Bibilya thitho thuulela maningi vyaleri liye. Angalive ira anosukwala namoda abali naarongola mwam’monela aliwa, liye anolaleela thitho gumaneya vambo-i naaliwa thitho vira wa hora ato-eliwa kala ndimuwa wavapingoni. Akala mofwanafwana na Bernardo nyo thitho mutolangiwa, kamuthuulelenga maningi manyadho anokaananyo, mbwenye murumelenga malangi-o thitho muchinjenga. c (Sang. 8:33; 22:4) Mwairanga vyevi munodhakala osikimiza ira Yohova, unodha uraeli-ani namwasa okalave ororomeleya wa liye na gululee.

10. N’nga kuchinja uuvi mugulu la Yohova wewo wawesedhile roromeleya wa Anaisraeli enango?

¹⁰ Chinja wa vyongo guluni unooda wesedha iroromelo yi-u. Na-aire polepole chinja weu unooda iri-a ira ni-iye Yohova. Mwaifwanafwani-o, kathuulelani mwemo chinja wa vyongo guluni mwa Yohova mwakuzele aliwa Anaisraeli enango muhora ya Mose. Ilamulo ya-anakaathi-iwe miru yamabanja njaira vyongo vyaira asembe. Aliwa tanomanga iguwa thitho velela sembe wa Yohova malo mwamabanjiwa. (Maro. 8:20, 21; 12:7; 26:25; 35:1, 6, 7; Yobo 1:5) Ilamulo ingakaathii-iwile miru yamabanja, yanofuneela i-ya ira vyevi. Yohova atosakula ira atu okumela mubanja la Aroni mbenao tanofuna velelanga sembe. Vyongo vingachinjile e-no mugulu la Nlungu, akala muru wa banja wenuo a-ali wa banja la Aroni liye ira vyongo vyokuza usembe anooda piwa. d (Lev. 17:3-6, 8, 9) N’nga venango chinja weu kwaairi-idhe Kora, Datani, Abiramu na anamasogolela enango 250 ira tamdhimbinuele Mose na Aroni? (Num. 16:1-3) Kaninaongeletu akala vyongo vyali e-no. Mo-obala ira vyongo vyali a-vi Kora naafwe tatoimwanana kalave ororomeleya wa Yohova. N’nga munaire a-vi akala chinja uireile guluni utowesedha roromeleya winyu?

11. N’nga ninofunjedhavon’ni vaifwanfwani-o ya Akohati enango?

¹¹ Muirenga vyongo movwelana na chinja uireile vyongo guluni. Vahora yavira aliwa kokolani Akohati tatokaana urumiwi wapama maningi. Hora iliyothene Aisraeli tathamanga dhowa ulimburo n’nango, Akohati enango tanotukula likasa noliwendangana vasogolo vaatu othene. (Num. 3:29, 31; 10:33; Yoswa 3:2-4) Ye’na yali ngari ilukulu maningi! Mbwenye vyongo vyatochinja Aisraeli tangafiile uilambo yolanyedhiwa. Likasa kalafuneelave tukuliwanga vaduzi navaduzi. Ee-no vahora yenio Solomu vyatonga liye, Akohati enango tatova-iwa urumiwi oomba, enango talaba ninga anaming’anela avalangoni thitho enango tasamalela nyumba dholokotedhamo vyongo. (1 Limb. 6:31-33; 26:1, 24) Kavali valivothene vanothonyi-edha ira Akohati tanodungunya venango funa va-iwa izo yavadhulu namwasa oi ndulimu tanoira urumiwi wavakundu. N’nga ninofunjedhavon’ni? Muvwelanenga na rima othene nochinja unoireya mugulu la Yohova, angalive ira utokuza urumiwinyu. Musangalalenga na urumiwi uliothene unova-iwanyo. Muthuulelenga ira urumiwinyu kai ira unothonyi-edha ira muli ofuneya maningi kwaranya atu enango. Yohova unoona ira muli ofuneya namwasa ovwela  a-kala namwasa oi muli vaurumiwi unangwee.—1 Sam. 15:22.

12. N’nga Zaina avivwide a-vi angawandeliwile ira a-iye laba va Beteli?

¹² Kathulelani ifwanafwani-o ya rongola unango wau Middle East dhinalee Zaina, wenuo urumiwi wadhiveliwana liye maningi watochinja. Liye atowandeliwa ira amairenga upainiya wavakundu angalabile va Beteli wa vyawa vyokwaranya 23. Zaina aongile ira: “Ndatosukwala maningi urumiwanga ungachinjile. Ndadhiona ira ndili o-okaana basa moi ndakalelecha dhifuka ira: ‘N’nga ndidawi-idhen’ni?’” Pyovwi-a tangaranga ira abali naarongola enango pingoni tanowenjedhela upawee rima, vom’mwandela ira: “A-akale ira mwanoira pama vyongo vyothene, gulu kalauirenani e-ni.” Wa hora lopela Zaina akala osukwala moi anola ma-iyu othene. Mbwenye liye aongile ira: “Ndatodhilimbi-edha ira nda-akaikele ira Yohova unondidhiveliwana thitho ira nda-akaikele gululee.” N’nga Zaina airile a-vi ira akaleve othuulela pama?

13. N’nga Zaina airile a-vi ira a-iye kaana mathuulelo odaweya?

¹³ Zaina atodhilimbi-edha ira a-akaena mathuulelo odaweya. N’nga liye airile a-vi vyevi? Atoleri maningi mabukhwi-u na myasa dhedho dhakuza nyarweeila. Liye atofwanya mwasa wenuo wamkami-idhe wa muru oi “Mungathe Kupitirizabe Polefulidwa!” mu Nsanja ya Olonda ya 1 wa Fevereiro wa 2001. Mwasa wen’na unoonga ira pyooneya ira olemba Bibilya Marku anolimbanana thitho mathuulelo ninga enala vevo urumiwee vyachinjile aliwa. Zaina aongile ira: “Ifwanafwani-o ya Marku ali ninga rombwe wandikami-idhe ira ndirome thitho dhivwa pama.” Malo mokalanga ekene venango dhivwelanga tangaranga, liye anoira vyongo naafwee. Vakomonivee atoona ira zimu wa Yohova unolaba basa gulunimwee thitho abali osogolela anomthuulela maningi. Liye thitho atozindiyela ira gululi linofwanela thitho ira vyongo vyevyo vinakami-e maningi ira basa la Yohova lidhowe vasogolo.

14. N’nga Vlado arucheile lemeela chinja uuvi wewo waireile mugulu la Yohova, n’nga chini yamkami-idhe?

¹⁴ Vlado wenuo uli ndimuwa wavapingoni wa vyawa 73 wau Slovenia, anorucheya mathuulelo pingwiwa ungathangani-iwile na pingo unango thitho Nyumbiwa ya Umwene ingafungiwile. Liye aongile ira: “Kandavwechechile mwasiwa Nyumba ya Umwene yobaleila  yatofungiwa. Ndatosukwala maningi namwasa oi naira imari-a wene isakaedha. Ndili namasema thitho ndatokami-a saka-edha vambo-i naaliwa vyongo vinango vipya munyumbila. Thitho nanofwanela chinja vyongo vinango navinango namwasa othangani-iwa wa mipingwila, vyali vyorucha wa i-yo anamalaleya oulula.” N’nga chini yamkami-idhe Vlado a-relave malangi-o taveleliwile? Liye atoonga ira: “Ira vyongo movwelana na chinja waireile mugulu la Yohova, hora dhothene unodhi-a maraeli-o. Chinja weu unokami-a kozeela chinja ulukulu wewo unofuna dhaireya sogolou.” N’nga nyo munorucheya namwasa oi pingwinyu utothangani-iwa venango urumiwinyu utochinja? Idhiwani ira Yohova unovwechecha moda unodhivwelanyo. Mwairanga vyongo movwelana nochinjau thitho dhowanave kala ororomeleya wa Yohova na gulu linoli-indi-edha liye basa, munodha raeli-iwa maningi.—Sal. 18:25.

15. N’nga ninaire a-vi ira nikaleve othuulela pama nagumanangana nyarwa pingoni?

¹⁵ Vanokwivela i-yo komoni wailamboi, nidedi-edhenga ira ninodha gumana nyarwa pingoni. Nyarwa dhedhi dhinooda wesedha roromeleya wi-u wa Yohova. Ee-no ninofwanela kalave othuulela pama. Akala Kristau fwinyu utouirelani vyongo vyo-olongomana murambelenga thakaleliwa. Mwava-iwa malangi-o venango mwalangiwa, kamuthuulelenga maningi vyoi munokaana manyadho. Muvwelenga malangi-oao thitho muchichenga. Akala chinja uireile gulunimu utoukuzani murumelenga na rima othene thitho mu-arelenga malangi-o aveleliwilao.

16. N’nga munaire a-vi ira mwa-a-iye roromela Yohova na gululee?

¹⁶ Akala roromeleya winyu utowesedhiwa, munooda dhowanave kala ororomeleya wa Yohova na gululee. Mbwenye ira muode irana vyevi, munofwanela kalave othuulela pama, vyevyo vinothapulela kala okurudheya, onanga vyongo mofwanelela thitho vionanga ninga munovionela Yohova. Kalani osikimiza ira mufunjedhenga vyaatu oongiwa Bibilyani enao tavilele nyarwa dhofwanafwana na dhinyu thitho muthuulelenga ifwanafwani-o yiwa. Mulobelenga wa Yohova ira aukami-eni thitho kamu-iye ira vyongo na pingo. Akala munogumanana vyongo vyoi a-vi, Satana kanadhaoda u-iyani-ani na Yohova venango gululee.—Yak. 4:7.