1. N’nga nidedi-edhelengan’ni, thitho ninooda kala osikimizelan’ni?

 NIDEDI-EDHELENGA ira ninodha runi-iwa nalabanga basa li-u lolaleela. Thitho sogolou ninodha runi-iwa maningi. (Dan. 11:44; 2 Timo. 3:12; Apok. 16:21) Mbwenye nikale osikimizela ira Yohova unodha nikami-a. Mwasiwa ngwan’ni ninoonga e-no? Namwasa oi hora dhothene Yohova ukadhi akami-anga arumiwee kwakwaneli-edha urumiwi wava-iwile aliwa, angalive ira urumiuo wali orucha. Mwaifwanafwani-o, dhoweni nioneni vyongo vinango vyaireile vaingumi ya namaongela Zakiyeli, wenuo alaleela Ayuda enao tali muudhari wu Babulo.

2. N’nga Yohova aawandenlen’ni atu atatamo lalaleela Zakiyeli, n’nga ninofuna nitapanyen’ni muyofunjedha yei? (Zakiyeli 2:3-6)

² N’nga atu atatamo lalaleela Zakiyeli tali oi a-vi? Yohova atoonga ira aliwa tali “alomo,” “oonga maningi” thitho “opanduwa.” Aliwa tali opei-a ninga minga thitho oopi-a ninga akong’a. Moi Yohova atom’mwandela Zakiyeli mowelelawelela ira: “kuove”! (Muleri Zakiyeli 2:3-6.) Zakiyeli atooda laba basa lava-iwile liye namwasa oi (1) arumiwile na Yohova (2) akami-iwa na zimu ochena thitho (3) alimbi-iwa na Madhu a Nlungu. N’nga vyongo viraruvi vyamkami-idhe a-vi Zakiyeli? N’nga vinonikami-a a-vi i-yo malamboano?

3. N’nga ndimadhu avi tamlimbi-idhe Zakiyeli, n’nga Yohova asikimizele a-vi ira unomkami-a?

³ Yohova atom’mwandela Zakiyeli ira: “Ndinouruma.” (Zakiy. 2:3, 4) Madhu enala tatomlimbi-a maningi. Mwasiwa  ngwan’ni ninoonga e-no? Namwasa oi vyali vyo-okaikeli-a ira liye atozindiyela ira Yohova ato-indi-edha basa madhu ninga enala, vevo vamruma liye Mose na Esaya ninga anamaongelee. (Ekis. 3:10; Esaya 6:8) Liye anoidhiwa thitho mwemo Yohova mwaakami-edhe liye anamaongela ambilala limbanana nyarwa dhaguman’nena aliwa. Ee-no Yohova vyam’mwandenle liye fendo mbili ira: “Ndinouruma,” namaongeluo atokaana myasa dhovweya dhororomela ira Yohova unomkami-a. Wenjedhela vevo bukhu la Zakiyeli, ninofwanyamo hora dhinjinji madhu oi: “Yohova atoonga na miyo.” (Zakiy. 3:16) Thitho fendo dhinjinjidhene liye atolemba ira: “Yohova atodhowanave onga na miyo moweli-edhaweli-edha.” (Zakiy. 6:1) Ee-no Zakiyeli kaakaikela ira urumiwile na Yohova. Thitho voi babee ali wasembe, atomfunji-a mwemo Yohova hora dhothene mwasikimizele liye anamaongelee ira unoakami-a. Mwaifwanafwani-o, Yohova atom’mwandela Izaki, Tiyago na Jeremiya ira: “Miyo ndili nanyo.”—Maro. 26:24; 28:15; Jer. 1:8.

4. N’nga ndimadhu avi olimbi-a amva-idhe kopolo Zakiyeli?

⁴ N’nga Aisaraeli tawachele a-vi milanyu yalaleela Zakiyeli? Yohova uongele ira: “Anyumba ya Aisraeli katafuna uvwela, namwasa oi aliwa katinofuna ndivwela.” (Zakiy. 3:7) Vokonda vwela Zakiyeli atwao takonda Yohova. Madhu enala tatomkami-a Zakiyeli idhiwa ira, konda a-vwela wa atwao, kwaathapulela ira liye utoimwanana urumiwee wa unamaongela kabe. Yohova atomsikimizeli-edha thitho Zakiyeli ira vyongo vyalaleela liye vyadhakwakwanela, aliwa tanodha “idhiwa ira vari viwa vatookala namaongela.” (Zakiy. 2:5; 33:33) Pyo-okaikeli-a ira madhu olimbi-ala, tatomkami-a kala wakopolo vokwakwaneli-edha urumiwee.

5. Movwelana na lemba la Esaya 44:8, n’nga ninafwanye wani kopolo?

⁵ Na-iyene thitho ninokaana kopolo namwasa oi ninorumiwa na Yohova. Liye unonilemeza voniitana ira: “Mboni dhanga.” (Esaya 43:10) Yen’na ndingari ilukulu maningi! Ninga mwemo Yohova mwam’mwandele liye Zakiyeli ira: “Kuove,” Yohova unoniwandela thitho ira: “Kamuove.” Mwasiwa ngwan’ni kaninofwanela ova atu tanoniruni-a? Molandana na Zakiyeli, nirumiwile na Yohova thitho liye unonikami-a.—Muleri Esaya 44:8.

6. (a) N’nga Yohova unosikimizela a-vi ira unodha nikami-a? (b) N’nga kopolo ninodhifwanya wani?

⁶ Yohova unonisikimizela ira unodha nikami-a. Mwaifwanafwani-o, Yohova a-anaonge ira: “Nyo muli mboni dhanga,” aongile ira: “Wadhawendanga vama-injeni, miyo ndinodha kala naweyo. Wadhavandelanga mi-inje, ma-inje katinodha umidha. Wadhawendanga vamuloni kunodhavya. Angalive ira likala lamulo linoka-a kalinodha uka-a.” (Esaya 43:2) Nairanga urumiwi-u, hora dhinango ninogumanana nyarwa, dhedho dhili ninga ma-inje odhalela thitho vyowesedha vili ninga mulo. Angalive ira vili e-no Yohova unonikami-a ira nidhowenave laleela. (Esaya 41:13) Mofwanafwana na Hora ya Zakiyeli, atu anjinji malamboano tanokonda milanyu inolaleela i-yo. Ninozindiyela ira konda wiwa vuruwana, kavinothapulela ira nitoimwanana laba pama basa li-u lolaleela ninga a Mboni dha Yohova. Ninolimbi-iwa thitho kaana kopolo voidhiwa ira Yohova unosangalala nadhowanave laleela milanywee mororomeleya. Rumiwi Paulo aongile ira: “Uli wethene vaekene unodha wachela yotuvayee, movwelana na basalee.” (1 Akor. 3:8; 4:1, 2) Rongola unango uirile upainiya wahora yolapela aongile ira: “Ndinosangalala voidhiwa ira Yohova unoraeli-a thindhi li-u.”

7. N’nga hora dhothene Zakiyeli avwa a-vi athuulela vya masopenya aoni liye? (Muone iruthiruthi yavakapani.)

⁷ Zakiyeli atoona mwemo zimu wa Nlungu muli aliwa wakopolo. Masopenyani liye atoona zimu ochena ukami-anga angelo akopolo thitho uwendi-anga maroda malukulu a galeta ladhulu. (Zakiy. 1:20, 21) N’nga Zakiyeli airile a-vi vyaoni liye vyevi? Liye atolemba vyevyo vyaireile ira: “Ndangaonile vyevyo, ndatokokora noorama fiyedha kovanga vathi.” Namwasa oova, Zakiyeli atogwa vathi. (Zakiy. 1:28) Hora dhothene Zakiyeli athuulela masopenya odabwi-ala, anolimbi-iwa thitho anororomela ira mokami-wa na zimu wa Nlungu, unooda kwakwaneli-edha urumiwee.

8-9. (a) N’nga chini jaireile Yohova vyam’mwandele liye Zakiyeli ira aimele? (b) N’nga Yohova adhowilenave a-vi mva-a kopolo Zakiyeli ira alaleele tatamo lorucha?

⁸ Yohova atom’mwandela Zakiyeli ira: “Weyo mwana wa mutu, imela ira ndiuongena.” Madhu enala vambo-i na zimu ochena tatomva-a kopolo Zakiyeli. Liye atolemba ira: “Zimu watovolowa mwamiyo thitho watondiimeli-a.” (Zakiy. 2:1, 2) Vasogolo va vyevi, thitho vaurumiwee wethene, Zakiyeli asogoleliwa na “dhandha” la Yohova thitho na zimwee ochena. (Zakiy. 3:22; 8:1; 33:22; 37:1; 40:1) Zimu wa Nlungu watomva-a Zakiyeli kopolo dhoi aode laba basa lava-iwile liye lolaleela waatu atatamonimwee, oi tali “alomo na o-ovwela.” (Zakiy. 3:7) Yohova atom’mwandela Zakiyeli ira: “Nditoiri-a kovaa ira ikale yolimba molandana na kove dhiwa, thitho ira vakovenivaa vakale volimba molandana na vakoveni viwa. Nditoiri-a vakovenivivaa kala ninga libwe la oro, lolimba kwaranya libwe  la sangalambwe. Kuove kovedhiwa.” (Zakiy. 3:8, 9) Veva vyali ninga Yohova unam’mwandela Zakiyeli ira: ‘Kufooke namwasa ouma wa mirimiwa. Miyo ndinodha ulimbi-a.’

⁹ Vasogolovee zimu ochena wa Nlungu, watomtukula Zakiyeli nomdhowana tatamoni wafuneya liye malaleela. Liye atolemba ira: “dhandha la Yohova latondi-inda mwakopolo.” Namaongelula vyatomtukulela sumana lipumbula ira avwecheche milanyu yafuneela malaleeliwa naifunelo yoi aode laleela kumela vathi varima. (Zakiy. 3:14, 15) Ee-no Yohova atomsogolela dhowa ipedipedi, weo “zimu ochena watovolowa mwa [liye].” (Zakiy. 3:23, 24) Ee-no Zakiyeli ali okozeya roma urumiwee.

10. N’nga ninofuneelan’ni volaba basa li-u lolaleela, n’nga mwasiwa ngwan’ni?

¹⁰ N’nga chini inanikami-e ira nilabenga basa li-u lolaleela? Ira niwakule yofukai, muthuulele vyam’mwireele Zakiyeli. A-anarome basalee lolaleela, zimu wa Nlungu watomva-a kopolo dhafuneela liye. I-yo thitho malamboano ninooda laba basali, akala ninokami-iwa na zimu wa Nlungu. Mwasiwa ngwan’ni? Mwasiwa ngoi Satana uli vakondo yolimbana na i-yo naifunelo yofuna niimwanani-a laba basa lolaleela. (Apok. 12:17) Ona waatu, vinooneya ira kaninoganyali vakondo yolimbanana Satana. Mbwenye dhela mubasali ninongonji-a! (Apok. 12:9-11) Moi a-vi? Nalabanga basali ninothonyi-edha ira kaninoova ndhila dhino-indi-edha basa Satana vonitucha. Hora iliyothene inolaleela i-yo vinokala ira nitongonji-a Satana. N’nga ninofunjedhavon’ni va likundo loi ninodhowanave laleela angalive ira amwidani-u tanoniruni-a? Ninofunjedhavo ira zimu ochena unoniva-a kopolo thitho Yohova unosangalala na-iyo.—Mat. 5:10-12; 1 Pe. 4:14.

11. N’nga zimu ochena unanikami-e a-vi, n’nga ninaire a-vi ira nidhowenave uwachela?

¹¹ N’nga thitho ninalimbi-iwe a-vi voidhiwa ira Yohova mopipirisa atolimbi-a kove na  ipumu ya Zakiyeli? Zimu wa Nlungu unoniva-a kopolo ira niode limbanana nyarwa iliyothene inagumanena i-yo vaurumiwi-u. (2 Akor. 4:7-9) N’nga ninaire a-vi ira hora dhothene niwachelenga zimu wa Nlungu? Ninofwanela lobelanga wa Yohova mo-o-iyedhela thitho ningana iroromelo yoi liye unovwa malobelwi-u. Yesu atowandela anamafunjedhee ira: “Vepanive, . . . dhowananive sakasaka, . . . gogodanive.” Vowakula malobelwao, Yohova unodha “velela zimwee ochena wa ule uvepile.”—Luka 11:9, 13; Mayir. 1:14; 2:4.

12. Movwelana na lemba la Zakiyeli 2:9–3:3, n’nga pukutu wakumenle wani, n’nga mwalembiwilen’ni?

¹² Kaiira Zakiyeli akami-iwile na zimu ochena baa-i, mbwenye alimbi-iwile thitho na Madhu a Nlungu. Liye atoona dhandha lingatukunle pukutu. (Muleri Zakiyeli 2:9–3:3.) N’nga pukutu wakumenle wani? N’nga mwalembiwilen’ni? N’nga wamlimbi-idhe a-vi Zakiyeli? Dhoweni nioneni. Pukutuo wakumenle pandoni wa Umwene wa Nlungu. Pyoodeya ira Yohova a-indi-edhe basa mbo-i mwaangelo 4 aoni liyale ira amva-e pukutuo. (Zakiy. 1:8; 10:7, 20) Pukutunimo mwali madhu a Nlungu, amilanyu yotonga yeniyo Zakiyeli yafuneya liye mawandela Aisraeli opanduwa enao tali udhaari. (Zakiy. 2:7) Milanywiyo yalembiwile vikundu vyothene vya pukutuo.

13. N’nga Yohova am’mwandele Zakiyeli ira airenan’ni pukutuwo, n’nga mwasiwa ngwan’ni wali otapila ninga nuwi?

¹³ Yohova atom’mwandela namaongeleula ira adye pukutu wamva-idhe liye ira “inguluyee irumbale.” Zakiyeli atovwela thitho atoodya pukutu wethene. N’nga ikundu ya masopenya enala yathapulelan’ni? Zakiyeli afuneya vwechecha milanyu yothene yafuneya liye malaleela. Milanywiyo yafuneela mfiya varimani. Ee-no vatoireya yongo inango yodabwi-a. Zakiyeli atozindiyela ira pukutuo “wali wotapila ninga nuwi.” (Zakiy. 3:3) Mwasiwa ngwan’ni ninoonga e-no? Mwasiwa ngoi onga moimelela Yohova wali oriya venango ira osangalali-a maningi wa liye. (Sal. 19:8-11) Liye anosimba Yohova vomrumeli-a mlabela ninga namaongelee.

14. Chini yamkami-idhe Zakiyeli kala okozeya rumela urumiwi wava-iwile liye?

¹⁴ Vasogolovee Yohova atom’mwandela Zakiyeli ira: “Ulokote rimanimwaamo madhwanga othene anoowandela miyo, thitho uvwe na mabarwa.” (Zakiy. 3:10) Vomva-a malangi-oala, liye atom’mwandela ira ulokote madhu apukutuo rimanimwaa thitho noathuulelanga. Irana vyevyo watomkami-a Zakiyeli limbi-a iroromeloyee. Watomkami-a thitho ira amalaleele waatu milanyu yakopolo yava-iwile liye. (Zakiy. 3:11) Vwechecha thitho roromela milanywiyo watom’mwiri-a Zakiyeli kala okozeya vorumela urumiwi wava-iwile liye.—Mufwanafwani-edhe na Salimo 19:14.

15. N’nga ira nivilelenga, ninofwalela lokotangan’ni “rimanimwi-u”?

¹⁵ Ira nivilele va urumiwi-u, i-yo thitho ninofuneela dhowanave limbi-iwa na Madhu a Nlungu. Ninofuneela “lokota rimani” vyongo vyothene vinoniwandela Yohova. Malamboano, Yohova unoonga na-iyo dhela Bibilyani. N’nga ninaire a-vi ira Madhu a Nlungu takuzenga mathuulelwi-u, munovwela i-yo thitho vyofuna vi-u?

16. N’nga ninofwanelela iran’ni na Madhu a Nlungu, n’nga ninaire a-vi ira takaatheyenga rimanimwi-u?

¹⁶ Molandana na yodya inoniva-a kopolo, funjedha thitho thuulela modi-a Madhu a Nlungu, unoniva-a kopolo mwauzimu. Yei ndi  yofunjedha yeyo inofwanela i-yo thuulelenga. Voonga vya madhwee Yohova unofuna ira “vingulu vi-u virumbale namadhwee,” thapulela ira ninofwanela avwechecha pama. Ninaire vyevyo volobela, leri thitho thuulela modi-a. Yoroma, ninolobela vokozeli-a rimi-u ira niwachele malangi-o a Nlungu. Ee-no naleringa Bibilya ninoroma imela ira nithuulele modi-a vilerile i-yovyo. N’nga vyo-arelavovyee vinokala vyoi a-vi? Nathuulelanga maningi vinoleri i-yo paevo rimi-u opipirisa vanovwechecha aliwa maningi Madhu a Nlungu.

17. Mwasiwa ngwan’ni pyofuneya thuulela modi-a vilerile i-yo Bibilyani?

¹⁷ Mwasiwa ngwan’ni pyofuneya leri Bibilya thitho thuulela modi-a vilerile i-yo? Irana vyevi unoniva-a kopolo dhinofuneela i-yo ira niodenga laleela milanyu ya Umwene va-eeni, thitho ira nidhaode laleela milanyu yakopolo yotonga sogolou. Thitho makalelo apama a Yohova anonikami-a ira uxamwali-u na liye ukale olimba maningi. Vyo-arelavyee pyoi ninodha sangalala na yongo inango yoriya venango yosangalali-a yeyo ili rendele warimani thitho kala okwakwanana.—Sal. 119:103.

18. N’nga atu atatamunimwi-u tanodha funeela zindiyelan’ni, n’nga mwasiwa ngwan’ni?

¹⁸ Mo-iyana na Zakiyeli, i-yo kanili anamaongela. Mbwenye nili osikimiza dhowanave laleela milanyu yeniyo Yohova iiri-idhe liye ira ilembiwe mumadhwee, fiyedha vanofuna liye dhaona ira milanywila itolaleeliwa mokwakwanela. Hora yotonga yadhafiya, atu atatamunimwi-u katinodha kaana mwasa oonga ira kaniwenjeli-iwile venango ira Nlungu kaabala. (Zakiy. 3:19; 18:23) Malomwee, aliwa tanodha zindiyela ira milanyu yalaleela i-yo yali yokumela wa Nlungu.

19. N’nga chini inoniva-a kopolo ira nikwakwaneli-edhe urumiwi-u?

¹⁹ N’nga chini inoniva-a kopolo ira nikwakwaneli-edhe urumiwi-u? Pivyongo viraru vyamkami-idhe Zakiyeli. Ninodhowanave laleela namwasa oi nitoidhiwa ira nirumiwile na Yohova, ninokami-iwa nazimwee ochena thitho ninolimbi-iwa na Madhu a Nlungu. Mokami-iwa na Yohova, ninolimbi-iwa dhowanave ira urumiwi-u thitho vilela “fiyedha komoni.”—Mat. 24:13.