1-2. N’nga hora dhinjinji chini inoireya mutu abadiziwa, n’nga munofwanela thuulelanni?

 N’NGA mutoroma onavo gulu laatu libadiziwanga? Pyooneelatu ira mwatoovwavo tawakulanga vyofuka vinli vyevyo vinofukiwa aliwa ta-anabadiziwe mosikimizela. Mwatoona thitho abali naafwiwa tasangalalanga. Vahora inokuma aliwa ma-injeni munoona kovedhiwa dhingali dhaimwerumweru thitho mwanoovwa atu taombanga mandha. Ninooda onga ira vaduzi duzi sumana lililothene atu mamilyau ana dhivelela no badiziwa thitho kala Mboni dha Yohova Nlungu.

² N’nga vyongo vili a-vi wanyo? Akala munofuna badiziwa idhiwani ira muli wavakundu maningi muilamboi namwasa oi “munomfunafuna Yohova.” (Sal. 14:1, 2) Yofunjedha yei ilembiwele nyo akala muli ndimuwa venango mwana. Mbwenye i-yo thitho ubadiziwile wale ninofuneela sikimizela rima ira nidhowenave mlabela Yohova modhowa nodhowa. Dhoweni nitapanyeni viraru mwavyongo vinjinji vyevyo vinoniiri-a mlabelanga Yohova.

3. Mwasiwa ngwan’ni arumiwi a Yohova anodhiveliwana imbarimbari thitho longomano? (Salimo 119:128, 163)

³ Yohova atootonga atwee ira “tadhiveliwengana imbarimbari.” (Zakar. 8:19) Yesu atoolimbi-a anama-arelee ira tafunefunenga longomano. (Mat. 5:6) Vyevi vinothonyi-edha ira mutu unofwanela kala ofunechecha irangana vyongo vyofwanelela, vyapama thitho vyorumeleya vamethoni va Nlungu. N’nga nyo munodhiveliwana longomano? Kaninokaikela ira munodhiveliwana. Munoidanana vyonama thitho vyongo vyothene vyothakala. (Muleri Salimo 119:128, 163.) Vyonama vinothonyi-edha makalelo a Satana wenuo uli namatonga wa ilamboi. (Ju. 8:44; 12:31) Imbo-i mwaifunelo ya Satana kuthakali-a dhila lochena la Yohova Nlungu. Liye ukadhi amwadhanga  milanyu dhonama dhokuza Nlungwi-u kumela vahora yamdawi-idhe liye Adamu na Eva mundani mwa Edeni. Satana atoiri-a ira atu taonenga ninga Yohova Ngunamatonga ovidheveliwana thitho onama wenuo unomana atu vyongo vyapama. (Maro. 3:1, 4, 5) Vyonama vyevi vikadhi viiri-anga atu anjinji ira tam’monenga Yohova modaweya. Atu tasakula ira “ta-adhiveliwengana imbarimbari,” Satana unoairi-a ira tairengana vyongo vyo-olongomana vili vyothene thitho makalelo othakala.—Aroma 1:25-31.

4. N’nga Yohova uthonyi-edhe a-vi ira ngu “Nlungu waimbarimbari”? (Muone thitho iruthiruthi.)

⁴ Yohova ngu “Nlungu waimbarimbari,” thitho mofunechecha unofunji-a atu anodhiveliwa imbarimbariyo. (Sal. 31:5) Unoakami-a ira katifunji-iwe na vyonama vya Satana. Yohova unofunji-a arumiwee ira takale oriya rima thitho a longomano. Vyevi vinoakami-a ira atu enango taalemezenga thitho takaengana rendele wa rimani. (Sang. 13:5, 6) N’nga nyo mutoona Yohova auwirelangani vyevi vahora yafunjedha nyo Bibilya? Mutofunjedha ira ndhila dha Yohova tapama maningi waatu othene thangani-avo nyo. (Sal. 77:13) Ee-no muli ofunechecha irana vyongo vinoona Nlungu ira pyolongomana. (Mat. 6:33) Munofuna kala ikundu ya imbarimbari thitho kala osikimizela ira vyaongile Satana vyokuza Nlungwi-u Yohova pyonama. N’nga munaire a-vi vyevi?

5. N’nga munasakule a-vi kala uikundu ya imbarimbari na longomano?

⁵ Vinosakula nyo vaingumiinyu vikalenga ninga munoonga ira: “Ndinokonda vyonama vya Satana thitho ndinodhiveliwana imbarimbari. Ndinofuna ira Yohova akale namatonganga thitho ndinofuna ndiirengana vyongo vinoonga liye ira pyofwanelela.” N’nga munaire a-vi vyevi? Munooda irana vyevi vodhivelela wa Yohova dhela mulobelo. Mwaira e-no, nyo thonyi-edha vochena dhivelela winyu vobadiziwa. Dhiveliwana imbarimbari na longomano, ngumwasa m’mbo-i unauiri-eni ira musakule badiziwa.

6. N’nga valemba la Salimo 45:4, vali myasa ivi youiri-ani mdhiveliwana Yesu Kristu?

⁶ Mwasiwa ngwan’ni munomdhiveliwana Yesu Kristu? Dhoweni nioneni myasa yapama yofwanyeya va lemba la Salimo 45:4. (Muleri.) Yesu unodhiveliwana imbarimbari, dhiyevi-a na longomano. Akala munodhiveliwana imbarimbari na longomano, pyooneelatu ira  munomdhiveliwana Yesu Kristu. Kathuulelani mwemo Yesu mwairela liye vyongo molimba rima vokala uikundu ya imbarimbari thitho longomano. (Ju. 18:37) N’nga Yesu athonyi-edhe a-vi ira anolimbi-a kalelo lodhiyevi-a?

7. Chini inouva-ani ifunelo no dhiyevi-a wa Yesu?

⁷ Yesu atolimbi-a kalelo lodhiyevi-a mwavyoiravyee. Mofwanafwani-a liye atoonechecha ira titimi-o lothene lidhowe wa Babee a-kala wa liye. (Marku 10:17, 18; Ju. 5:19) N’nga nyo munodhivwa a-vi mwathuulela dhiyevi-a weu? N’nga vyevi kavinouiri-ani mdhiveliwengana Mwana wa Nlungu nomsazi-edha? Pyo-oira fuka. Mwasiwa ngwan’ni Yesu ali odhiyevi-a? Mwasiwa ngoi unodhiveliwana thitho msazi-edha Babee wenuo uli odhiyevi-a. (Sal. 18:35; Aeb. 1:3) N’nga vyevi kavinouiri-ani mdhiveliwana maningi Yesu wenuo unothonyi-edha paama makalelo a Yohova?

8. Mwasiwa ngwan’ni ninomdhiveliwana Yesu ninga Mweni-u?

⁸ Ninomdhiveliwana Yesu ninga Mweni-u namwasa oi ngunamatonga wa pama maningi. Yohova atoofunji-a Mwaneula thitho atomsakula ira atongenga. (Esaya 50:4, 5) Kathuulelani thitho udhivela ololela onela nyarwa atu enango wa thonyi-edhe Yesu. (Ju. 13:1) Ninga Mweni-u, Yesu ngofwanelela ira nimdhiveliwengana. Liye aongile ira atu anomdhiveliwa mbenao aaongile liye ira ndi afwee thitho tanothonyi-edha udhivela movwela malamulwee. (Ju. 14:15; 15:14, 15) Ndi ngari ilukulu kala afwee a Mwana Nlungu!

9. N’nga ubadizo wa Makristau unofwanafwana a-vi na wa Kristu?

⁹ Limbo-i mwamalamulo a Yesu toi anama-arelee tanofwanela badiziwa. (Mat. 28:19, 20) Liye atovelela ifwanafwani-o vamwasula. Mbwenye ubadizwee ngo-iyana mundhila dhinango na ubadizo wa anama-arelee. (Muone kwadru loi “ I-yana wa ubadizo wa Yesu na waarumiwee.”) Mbwenye mundhila dhinango ngofwanafwana. Hora ya badiziwa liye, Yesu atodhivelela irana ifunelo ya Babee. (Aeb. 10:7) Mofwanafwana na vyevi, anama-arela a Kristu anobadiziwa vofuna thonyi-edha vochena ira tatodhivelela wa Yohova Nlungu. Mbwenye yongo yofuneya maningi vaingumiiwa inokala irana ifunelo ya Nlungu a-kala yiwa. Ee-no aliwa takala tasazi-edhanga ifwanafwani-o ya Mbwiiwa.

10. Mwasiwa ngwan’ni mdhiveliwana Yesu unooda uiri-ani badiziwa?

¹⁰ Munorumelela Yesu ninga Mwana obaliwa ekene thito Mwene wenuo Nlungu umsakunle liye ira anitongenga. Ninoidhiwa ira Yesu ngodhiyevi-a thitho unosazi-edha mwapama makalelo a Babee. Mwatoofunjedha ira atodyi-a atu andhala, atolimbi-a ofooka thitho atoili-a atu obulela. (Mat. 14:14-21) Mutoona moda unosogolela liye pingwee malamboano. (Mat. 23:10) Thitho mutoidhiwa ira unodha irana vyongo vinjinji kwaranya vyevyo sogolou ninga Mwene wa Umwene wa Nlungu. N’nga munathonyi-edhe a-vi ira munomdhiveliwana? Munooda irana vyevi vosazi-edha ifwanafwani-oyee. (Ju. 14:21) Munooda roma dhivelela wa Yohova, mwaira e-no nyo badiziwa.

11. N’nga mwasa nlukulu unauiri-eni badiziwa ngwan’ni, n’nga mwasiwa ngwan’ni munoonga e-no?

¹¹ N’nga mwasa nlukulu unaniiri-e badiziwa unofwanela kala wanni? Yesu atoonga lamulo nlukulu maningi la Nlungu vevo vaongile liye ira: “Umdhiveliwengana Yohova Nlungwaa na rimaa othene, ingumiyaa yothene, mathuulelwaa othene na kopolodhaa dhothene.” (Marku 12:30) N’nga puyemo mukalele udhivelinyu na Nlungu?

12. Mwasiwa ngwan’ni munomdhiveliwana Yohova? (Muone thitho iruthiruthi.)

 ¹² Vatokala myasa injinji inauiri-eni mdhiveliwana Nlungu. Mofwanafwani-a, mutofiya vovwechecha pama ira liye “ngutipwati la ingumi” thitho ira unoniva-a “yotuva iliyothene yapama na yolongomana.” (Sal. 36:9; Yak. 1:17) Vyongo vyothene vinosangalalana nyo vinokumela wa Nlungwi-u ova-a mo-oumeleliwa mandha thitho waudhivela.

13. N’nga chini inoiri-a ira kuto ukale yotuva yapereso yavadhulu?

¹³ Kuto chotuva yavadhulu iniva-idhe Yohova. Mwasiwa ngwan’ni ninoonga e-no? Kathuulelani vya uxamwali wa pama maningi wa Yohova na Mwanee. Yesu atoonga ira: “Babanga unondidhiveliwana” thitho “miyo ndinomdhiveliwana.” (Ju. 10:17; 14:31) Uxamwalula watolimba maningi namwasa okalela vambo-ive wa vyawa mamiliau. (Sang. 8:22, 23, 30) Ee-no Kathuulelani mwemo Nlungu mwavwele liye vorumeli-a ira Mwaneula, arucheye noukwa. Yohova unodhiveliwana maningi atu thangani-avo nyo voi atofiyedha rumela mvelela Mwanee obaliwa ekene ninga sembe, naifunelo yoi nyo thitho atu enango tadhakaena ingumi yokalao dhowa nodhowa. (Ju. 3:16; Agal. 2:20) Wenna ngumwasa nlukulu unaniiri-e mdhiveliwana Nlungu.

14. N’nga ifunelo yapama inasakulenyo vainguminyu chiivi?

¹⁴ Udhivelinyu na Yohova utoulukula maningi varomile nyo funjedha vyoonga liye.  Mo-okaikela munofuna ira mukale vauxamwali olimba na liye vachineneeva thitho modhowa nodhowa. Thitho vyevi pyoodeya. Moriya rima liye unoulimbi-ani irangana vyongo vyosangalali-a rimee. (Sang. 23:15, 16) Munooda irana vyevi a-kala mwamadhu baa-i mbwenye mwavyoira vinyu. Vyongo vinoiranyo vaingumi inyu vinodha thonyi-edha akala munomdhiveliwanadi Nlungu. (1 Ju. 5:3) Yei chiifunelo yapama maningi yeyo inasakule nyo vainguminyu.

15. N’nga munathonyi-edhe a-vi ira munomdhiveliwana Nlungu?

¹⁵ N’nga munathonyi-edhe a-vi ira munomdhiveliwana Yohova? Yoroma munofwanela dhivelela dhela mulobelo lavamwekene lothonyi-edha ira mutodhivelela wa Nlungu waimbarimbari. (Sal. 40:8) Mwamala munofwanela thonyi-edha vochena, vivelela winyuo no badiziwa. Ninga muongele i-yo maromelo wa yofunjedha yei, horila inokala yosangalali-a maningi thitho yofuneya vaingumi inyu. Munoroma ingumi ipya a-kala yoiranagana vinofunanyo baa-i mbwenye vya Yohova. (Aroma 14:8; 1 Pe. 4:1, 2) Wenna unooda oneya ninga mwasa nlukulu thitho puyemodi. Mbwenye irana vyevi unodhula ngari yoi mudhakaena ingumi yapama maningi. Moi a-vi?

16. Ninga munothonyi-edha lemba la Salimo 41:12, n’nga Yohova unodha airelanni atu ale anodhivelela ira tamlabelenga?

¹⁶ Yohova ngova-a maningi. Mo-obala vyongo vinomva-a nyo hora dhothene unouva-ani vyongo vinjinji. (Marku 10:29, 30) Liye unodha uva-a ingumi yapama yokaana yothapulela thitho yokwakwanana masiki vachineneeva muilambo yothakalai. Thitho weu kumaromelo baa-i. Ingumi yaromilenyo mungabadiziwile, kina magomelo. Munooda dhowanave mlabela Babinyu odhiveliwiwa modhowa nodhowa. Udhivela wa vari vinyu na Babinyu, unongo dhowanave ulukula thitho mamari-edhowee, munodha kaana ingumi ninga yee, yokalao dhowa nodhowa.—Muleri Salimo 41:12.

17. N’nga chini inofuna nyo va-a Yohova yeyo ya-ana liye?

¹⁷ Mwadhivelela thitho badiziwa munokaana ngari yovelela wa Babinyu vyongo vya pereso yavadhulu maningi. Liye utouva-ani  iliyothene yapama inosangalalana nyo. Vothonyi-edha simba nyo thitho, munofwanela mva-a mwiinyaa wa vailambo yavathi yongo inangwee ya-ana liye yeyo ili funechecha winyu mlabela modhivelela. (Yobo 1:8; 41:11; Sang. 27:11) Yei chiingumi yapama maningi inosangalalena nyo. Mo-okaikela dhivelela winyu wa Yohova, ngumwasa wapama maningi unauiri-eni badiziwa.

18. N’nga munadhifuke vyofuka viivi?

¹⁸ N’nga munawakule a-vi yofukai, N’nga mutobadiziwa? Ngunyo baa-i unofuna wakula yofuka yei. Mbwenye vingakanle pama dhifuka ira, ‘N’nga dinodedi-edhanni?’ (Mayir. 8:36) Thuulelani vyongo viraruvi vitapanyileni i-yo. Yoroma choi, munodhiveliwana imbarimbari thitho longomano. Dhifukeni ira, ‘N’nga ndinofuna dhaona hora yeniyo uliothene vanofuna liye dhaonganga imbarimbari na longomano?’ Yanambili choi, munomdhiveliwana Yesu Kristu. Dhifukeni ira, ‘N’nga ndinofuna ira Mwana wa Nlungu akale Mwenanga thitho ndinofuna a-rela ifwanafwani-oyee?’ Yanararu kwaranya vyothene choi, munomdhiveliwana Yohova. Dhifukeni ira, ‘N’nga ndinofuna sangalali-a rima wa Yohova vofuna mlabela ninga Nlungwanga?’ Akala ira vyowakula vinyu va vyofuka vyevi pyoi ee, mwasiwa ngwan’ni kamunobadiziwa? N’nga munodedi-edhan’ni?—Mayir. 16:33.

19. Mwasiwa ngwan’ni kamunofwanela kaikela va mwasa obadiziwa? Muonge ifwanafwani-o. (Juwau 4:34)

¹⁹ Akala munokaikela badiziwa, kathuulelani ifwanafwani-o ya-indi-edhe basa Yesu. (Muleri Juwau 4:34.) Va lembali Yesu atofwanafwani-a irana ifunelo ya Babee na yodya. Mwasiwa ngwan’ni? Mwasiwa ngoi yodya chapama maningi wa i-yo othene. Yesu unoidhiwa ira vyongo vyothene vinoniwandela Yohova ira niviirena, vinokala vyapama maningi wa i-yo. Yohova kanofuna ira niire yongo iliyothene yofuna nipei-a. N’nga vyongo vinofuna Yohova ira muviirenga vinothangani-avo badiziwa? Ee. (Mayir. 2:38) Ee-no munooda kala osikimiza ira vwela lamulo loi munofwanela badiziwa tokami-a wanyo. Akala kamunokaikela udya yodya yapama maningi, n’nga vatokala mwasa uliothene unauiri-eni ira mukaikelenga badiziwa?

20. N’nga ninodha tapanyanin’ni muyofunjedha yo-arela?

²⁰ N’nga munodedi-edhanni? Atu anjinji anooda wakula ira, “Va-eeni kandinakozeele tai.” Veva likundo toi sakula ira mudhivelele wa Yohova no badiziwa, ndi mwasa ofuneya maningi vaingumi inyu. Moi ee-no vanofuneela hora, thuulela mopwasedha thitho kaana thindhi ira mukozeele. N’nga akala munofuna badiziwa, chini inairenyo va-eeni ira mukozeele pama? Ninodha tapanyani yofuka yei muyofunjedha yo-arela.