Vyofuka vyokumela waalimbo leri
N’nga anamafunjedha 70 enao Yesu aarumile liye malaleelale, tali wani vahora vyaromi-a liye mwambo wa yodya ya namaulo ya Mbwiye? N’nga tali tangam’iidhe?
Voi anamafunjedhee 70 ala vevo Yesu vyaromi-a liye mwambula katalivo, kaninofwanela thuulelanga ira kaasangalala naaliwa venango ira tatoom’tawa. Yesu afuna akale na arumiwee 12 baa-i va mwambula.
Yesu anoosangalala na arumiwe 12 na anamafunjedhee 70 ala. Voroma Yesu atoosakula alombwana 12 vari va anamafunjedhee anjinji noaromola ira arumiwi. (Luk. 6:12-16) Liye ali wu Galileya voi “atowagumani-a arumiwi 12” “nowaruma ira tamalaleele vya Umwene wa Nlungu thitho ili-a atu.” (Luk. 9:1-6) Vasogolovee angali wu Yudeya, Yesu “atoosakula atu enango 70 nowaruma ambili ambili.” (Luk. 9:51; 10:1) Va pyooneelatu ira Yesu atokaana anama-arela mumatatamo o-iyana i-yana vevo milanyu vyalaleeliwa aliwa.
Ayuda enao tali anamafunjedha a Yesu, vinooneya ira yawa iliyothene tanooiranave mwambo wa paskwa vambo-i na mabanjiwa. (Eki. 12:6-11, 17-20) Anga-adhi vang’ono funa wukwa, Yesu na arumiwee tatoodhowa Yerusalemu. Mbwenye kaafunile ira anamafunjedhee othene okumela wu Yudeya, Galileya na Pereya tagumaneye vambo-i dhaira paskwa. Va pyooneelatu ira Yesu afuna akale na arumiwee baa-i vahora yeniyo. Liye atoawandela ira: “Ndikadhi ndifunafunanga maningi udya paskwa vambo-i nanyo nda-anarome rucheya.”—Luk. 22:15.
Yesu atokaana myasa yapama yoirelana vyevi. Liye a-adhi vang’ono funa wukwa ninga “Mwana libila wa Nlungu wenuo ukhumi-idhe vyodawa muilambo.” (Ju. 1:29) Vyevi vyafwanela ireya wu Yerusalemu weo Aisraeli wavelela aliwa sembe wa Nlungu wa hora indendai. Wukwa wa Yesu watoothathula maningi atu kwaranya mwemo mwairela mwana libila wenuo mabanja Aisraeli vyadya aliwa nama-iyu vyakuma aliwa wu Iguputu. (1 Ak. 5:7, 8) Vyairile Yesuvi vyatookami-a arumiwi 12 ala ira takale sapato yapingo wa Ikristau. (Aef. 2:20-22) Pyova-a ifunelo ira sidade yochena ya Yerusalemu itokaana “mabwe omangiwana sapato okwakwana 12 thitho vamabwao vatolembiwa madhina 12 arumiwi 12 a Mwana libila.” (Apk. 21:10-14) Ee-no arumiwi ororomeleyao tangaodile khaana izo yofuneya maningi vokwakwaneli-edha ifunelo ya Nlungu. Pyovweya ira Yesu afuna akale na arumiwee ala va paskwee omari-a thitho va mwambo wa yodya yanamaulo ya Mbwiye yaromi-idhe liye vasogolovee.
Anamafunjedhee 70 ale vambo-i na atu enango katali vambo-i va yodya yanamaulo na Yesu. Mbwenye anamafunjedhee othene, enao tadhowenganave kala ororomeleya, tangaganyanle na mwambo wa yodya yanamaulo ya Mbwiye yeniyo yaromi-idhe Yesu. Othene enao tazoziwe vasogolovee, tangavolowile muvwelano wa Umwene Yesu vyaawandenle liye arumiwee ma-iyu enao.—Luk. 22:29, 30.
