1. N’nga chini jinoniiri-a ira hora dhinango nikaengana makalelo enangweene?

 AKALA nitebadiziwa wene venango nibadiziwile mu vyawa vivirile ndulimu, nothene ninofuna kaana makalelo anodhiveliwana Yohova. Ira vyevi viodeye, ninofwanela tonga mathuulelwi-u namwasa oi hora dhinjinji, vinothuulela i-yo, pinoniiri-a ira nikaena makalelo ana i-yo. Akala hora dhinjinji ninothuulela vyevyo tutuli-u vinolakalaka aliwa, ninooda onga venango ira vyongo vyothakala. (Aef. 4:17-19) Akala hora dhinjinji ninothuulela vyongo vyapama, ninodha onga venango ira vyongo vinomdhiveliwi-a Babi-u wadhulu, Yohova.—Agal. 5:16.

2. N’nga pyofuka viivi vinofuna i-yo tapanya muyofunjedha yei?

² Ninga muonele i-yo ndima ivirile, kaninarambele mathuulelo othene otakala. Mbwenye ninooda sakula ira na-aire vyongo vinothuulela i-yovyo. Na-anabadiziwe ninofwanelela i-ya onga venango ira vyongo vinoidanana Yohova. Leli tilikundo loroma thitho lofuneya maningi ira niungule umutu wawale. Ira nimsangalali-e maningi Yohova ninofwanela vwela lamulo loonga ira: “Muware umutu upya.” (Akol. 3:10) Muyofunjedha yei ninofwanya vyowakula vya vyofukavi: N’nga “umutu upya” chini? N’nga ninaire a-vi ira niware umutu upya thitho na-aungule?

3. Movwelana na lemba la Agalata 5:22, 23, n’nga “umutu upya” chini, n’nga ninauware a-vi?

³ “Umutu upya” unothapulela thuulela thitho ira vyongo momsazi-edha Yohova. Mutu unooda wara umutu upya athonyi-edhanga makalelo enao zimu ochena unokumi-a aliwa, thitho unorumeli-a ira zimuo umsogolelenga va vinothuulela liye, munovivwela liye, thitho na vyoira vyee. (Muleri Agalata  5:22, 23.) Mwaifwanafwani-o, liye unomdhiveliwana Yohova thitho atwee. (Mat. 22:36-39) Liye unodhowanave kala osangalala angalive ira unogumanana vyowesedha. (Tiy. 1:2-4) Unokala mwarendele naatu enango. (Mat. 5:9) Unokala oleva rima thitho ooma rima airanga vyongo naatu enango. (Akol. 3:13) Liye unodhiveliwana ira vyongo vyapama. (Luka 6:35) Vyoira vyee vinothonyi-edha ira unororomela maningi Babee wadhulu. (Tiy. 2:18) Unokala opwaseya atu enango tamthoma, thitho unokala odhikondi-a agumanana vyowesedha.—1 Akor. 9:25, 27; Titu 3:2.

4. Ira niware umutu upya mwasiwa ngwan’ni ninofwanelela thonyi-edha makalelo othene aongiwile va Agalata 5:22, 23, thitho na maversu enango a Bibilyani? Onganimo.

⁴ Ira niware umutu upya, ninofwanela kaana makalelo aongiwile va Agalata 5:22, 23 thitho maverso enango a Bibilyani. * Kaiira makalelwala tali ninga vyowara vyo-iyana-iyana vinowara i-yo iliyothene vahoriwa. Thitho hora dhinjinji, makalelo enala tanowendela vambo-ive. Mwaifwanafwani-o, akala ninoadhiveliwanadi afwi-u, ninoairana vyongo moleva rima thitho mooma rima. Thitho akala ninofuna kala mutu wapama, ninofuneela kala opwaseya thitho odhikondi-a.

5. N’nga kaana mathuulelo “ninga a Kristu” unothapulela n’ni, n’nga mwasiwa ngwan’ni ninofwanela funjedha mwemo Yesu mwairela liye vyongo? (1 Akorintiyo 2:16)

⁵ Muleri 1 Akoritiyo 2:16. Ira niware umutu upya, ninofwanela kaana “mathuulelo a Kristu.” Mumadhu enango nionge ira, ninofwanela funja mwemo Yesu munothuulela liye nomsazi-edhanga. Yesu unothonyi-edha pama maningi makalelo enao zimu ochena wa Nlungu unakumi-a aliwa. Mofwanafwana na supeyo lapama, liye unothonyi-edha pama maningi makalelo a Yohova. (Aeb. 1:3) Nadhilimbi-edanga kaana makalelo ninga a Yesu, paevo vanaire i-yo vyongo ninga liye thitho thonyi-edha makalelwee.—Afil. 2:5.

6. N’nga mbamakalelo a-vi anofwanela i-yo thuulela nadhilimbi-edhanga ira niware umutu upya?

⁶ N’nga ninooda msazi-edha Yesu? Venango ninongo thuulela ira: ‘Yesu ndi olongomana. Kaninaode ira vyongo ninga liye!’ Akala munoona ee-no muthuulelenga makundo ala. Yoroma, mwapanduchiwile ira mukale ofwanafwana na Yohova na Yesu. E-no munooda sakula ira mwamsazi-edhanga thitho munoodha ira vyothene vinaode nyo.  (Maro. 1:26) Yanambili, zimu ochena wa Nlungu ngwakopolo mu vyopanduchiwa vyothene. Mokami-iwa na zimuo munooda ira vyongo vyevyo vya-anaode nyo irana vamwekene. Yanararu, Yohova kanadedi-edhela ira nithonyi-edhenga mo-odawi-a iliyothene mu makalelo enao zimu ochena unakumi-a aliwa. E-no Babi-u waudhivela utovelela vyawa 1000 waatu ale an’na idedi-edho yodhakala vailambwila ira tadafiedhe kala olongomana. (Apok. 20:1-3) Va-eni Yohova unodedi-edhela ira niirenga vyothene vinaode i-yo thitho nyindela ira unodha nikami-a.

7. N’nga ninofuna nitapanye n’ni?

⁷ N’nga ninasazi-edhe Yesu vavyongo viivi? Ninotapanya mogwandela makundo manai anakumi-a zimu wa Nlungu. Natapanyanga kalelo nlilothene, ninoona vyevyo vinafunjedhevo i-yo va mwemo Yesu mutonyi-edhele liye makalelwao. Thitho ninofuna nitapanyeni vyofuka vyonikami-a ona vinaire i-yo va mwasa owara umutu upya.

8. N’nga Yesu athonyi-edhe a-vi udhivela?

⁸ Yesu atoira vyongo modhimana namwasa odhiveliwana Babee na i-yo. (Juwau 14:31; 15:13) Ee-no vyairile Yesu angali vailambo yavathi vyanothonyi-edha ira anodhiveliwana maningi atu. Dambo nlilothene, liye anooni-a udhivela thitho tangaranga, angalive ira atu enango tanomruni-a. Ndhila ilukulu yaoni-idhe liye ira unodhiveliwana atu, ndi afunji-a vyoonga Umwene wa Nlungu. (Luka 4:43, 44) Yesu atooni-a wa Nlungu na waatu udhivela vorumela ira aoni-iwe nyarwa thitho piwa naatu odawa. Vyairile liye vitoniva-a ngari yodhafwanya ingumi yo-omala.

9. N’nga ninasazi-edhe a-vi Yesu va mwasa ooni-a udhivela?

⁹ Natodhivelela wa Yohova thitho badiziwa na mwasa oi ninomdhiveliwana Babi-u wa dhulu. E-no mofwanafwana na Yesu, munoirela i-yo vyongo naatu vinofwanelela tonyi-edha ira ninomdhiveliwana Yohova. Rumiwi Juwau alembile ira: “Wenuo a-anadhiveliwena balee unom’mona liye, kanadhiveliwena Nlungu a-anam’mona liye.” (1 Ju. 4:20) Ninooda dhifuka ira: ‘N’nga miyo ndinodhiveliwana maningi atu? N’nga ndinovwela tangaranga atu enango, angalive ira kanondilemeza? N’nga udhivela unondiiri-a miyo i-ndi-edha basa hora na vyongo vinango vokami-a atu enango funjedha vya Yohova? N’nga ndinofunechecha ira vyevyo angalive ira atu anjinji katinasimba vinoira miyo venango anaandiruni-a? N’nga vatokala vinaire miyo ira ndikaengana hora injinji yokami-a atu anango kala anamafunjedha a Yesu?’—Aef. 5:15, 16.

10. N’nga Yesu athonyi-edhe a-vi ira anodhiveliwana rendele?

¹⁰ Yesu ali mutu odhiveliwana rendele. Atu tamuirelanga vyotakala liye kaaweli-edha. Liye anoirana thitho vyokwaranya veva. Aroma nguliye irana vyongo mwarendele, thitho alimbi-a atu enango ira tamali-e avwelana wiwa. Mwaifwanafwani-o, liye anofunji-a ira mutu unofwanela kaathi-a rendele na balee, ira Nlungu arumelenga lambelawee. (Mat. 5:9, 23, 24) Thitho moweli-edha weli-edha liye atoakami-a arumiwee ira ta-akanganenga vamwasa oi ndimuwa baani vari viwa.—Luka 9:46-48; 22:24-27.

11. N’nga ninaire a-vi ira nikale atu odhiveliwana kaati-a rendele?

¹¹ Ira nikalenga arendele naatu enango, ninofwanela ira vinjinji akala rambela romi-a kangana. Ninofwanela dhilimbi-edha ira nikalenga va rendele naatu enango, thitho limbia abali naarongola ira tamali-enga avelanawiwa. (Afil. 4:2, 3; Tiy. 3:17, 18) Ninooda dhifuka vyofuka vyo-arelavi: ‘N’nga ndinorumela dhimana vyongo vinango ira ndikale va rendele naatu enango? Bali venango  rongola andisukwali-a n’nga ndinom’lokotedha vyarimani? N’nga ndinodedi-edha ira arome ngu liye kaathi-a rendele, venango unoroma ndi miyo iravo vyongo angalive vinooneya ira liye ngundidawenle? Akala pyofwanelela, ndinolimbi-a atu a-anavwelana ira takati-e rendele?’

12. N’nga Yesu athoyi-edhe a-vi oma rima?

¹² Yesu ali ooma rima. (Mat. 11:28-30) Liye anothonyi-edha kaleloli vokala okurudheya, thitho o-orucha vahora yorucha maningi. Mwaifwanafwani-o, i-yana mwinango wau Penicia angavepile Yesu ira am’mwili-idhe mwanee, liye atom’monganee mooma rima. Voroma atokonda, mbwenye i-yanuo angathoyi-edhile iroromelo ilukulu liye atom’mwili-edha mwaneuo. (Mat. 15:22-28) Masiki ira ali ooma rima, Yesu kaarumela vyongo vinango. Hora dhinango Yesu anothonyi-edha oma rima vovelela malangi-o akopolo waatu ale aadhiveliwana liye. Mwaifwanafwani-edho, Pedru vyawesedha liye m’kondi-a ira a-aire ifunelo ya Yohova, Yesu atom’sumulula vari va anamafunjedhee enango. (Marku 8:32, 33) Liye atoira vyevi a-kala vofuna mva-a manyadho, mbwenye vofuna mfunji-a thitho vofuna wenjeli-a anamafunjedha enango ira ta-akale odhigweli-a. Pyo-okaikeli-a ira Pedru atokaana manyadho mbwenye malangi-oao tatomkami-a.

13. N’nga ninaire a-vi ira nioni-enga enango oma rima?

¹³ Ira nithonyi-edhe atu enango oma rima, hora dhinango ninofuneela ava-a malangi-o, mo-ovira kundu. Nairanga vyevi nimsaziedhenga Yesu vovelela malangi-o okumela Mumadho a Nlungu thitho nikalenga okurudheya. Kanikaikelenga ira aliwa anofuna ira vyofwanelela. Thitho voi anodhiveliwana Yohova nonidhiveliwana, anodha arela malangi-o audhivela aava-idhe i-yo. Nidhifukenga vyofukavi: ‘N’nga ndinolimba rima ongavo yongo ndaona mutu unamdhiveliwana miyo airanga vyongo vyodaweya? Ndafunanga velela malangi-o, n’nga ndinoonga mooma rima venango mwauwali? N’nga ifunelo yanga vovelela malangi-o inokala yan’ni? N’nga ndinovelela malangi-o na mwasa oi mutu utondisukwali-a, venango namwasa omfunela vyapama?’

14. N’nga Yesu athonyi-edhe a-vi upama?

¹⁴ Kaiira Yesu unoidhiwa vili vyapama baai mbwenye unoirana vyapamavyo. Yesu unodhiveliwana Babee thitho hora dhothene unoira vyapama angana vifunelo vyofwanelela. Mutu wapama hora dhotene unosakasaka ndhila dhokami-edha atu enango thitho airela vyongo vyapama. Idhiwa vyofwanela ira, kai okwakwanela, mbwenye ninofwanela viira ningana vifunelo vyapama. Venango mutu unooda ufukani ira: ‘N’nga pyoodeya ira vyongo vyofwanelela ungana vifunelo vyodaweya?’ Ee pyoodheya. Mwaifwanafwani-o Yesu aongile vyaatu enango takami-echa atu osauwa, nofunanga ira atu enango aviidhiwenga vya vyotuva vivelenle aliwa. Masiki ira atwala tanoira mabasa apama, mbwenye Yohova kaasangalalana mabasiwa.—Mat. 6:1-4.

15. N’nga ninaire a-vi ira nithonyiedhe ira nili mutu wapama?

¹⁵ Ninooda thonyi-edha ira nili mutu wapama, akala ninoira vyofwanelela ningana vifunelo vyapama. Ninooda dhifuka ira: ‘Wenjedhelavo idhiwa vyofwanelela ira, n’nga ndinovilimbi-edha ira ndiviirenga? N’nga ifunelo yanga voira vyongo vyapama chini?’

BARELA UMUTWI-U UPYA

16. N’nga dambo nlilothene ninofwanela ira n’ni, namwasa wani?

¹⁶ Kanithuulele ira wara umutu upya unomala nabadiziwa. Ninofwanela dhowanave samalela “yowara ipya” yobaleila. Ndhila inango yoirana vyevyi, kudhilimbi-edha ira dambo nlilothene nithonyi-edhe makalelo  ale zimu ochena wa Nlungu anokumi-a aliwa. Ninoonga e-no mwasa oi Yohova ngu Nlungu oira vyongo, thitho zimwee ndikopolo yolaba basa. (Maro. 1:2) Ee-no kalelo nlilothene linokumi-a zimu ochena iniiri-enga iravo vyongo. Mwaifwanafwani-o, Tiyago alembile ira: “Iroromelo yo-okaana mabasa njokwa.” (Tiy. 2:26) Saasawa thitho na makalelo enango a vyova-a vya zimu wa Nlungu. Hora dhinjinji ninothonyi-edhacha makalelo enao, ninooni-echa ira zimu wa Nlungu unolaba mwa i-yo.

17. N’nga ninofwanela ira n’ni naimwanana thonyi-edha makalelo anokumi-a zimu ochena?

¹⁷ Angalive ira Makristau abadiziwile vyawa vinjivinji ndulimu, hora dhinango anoimwanana thonyi-edha makalelo ale anokumi-a zimu ochena. Yofuneya maningi kudhowanave vilimbi-edha ira nithonyi-edhe makalelwala. Thuulelani ifwanafwani-o ila. Akala yowara inodhiveliwana nyo maningi itokauwa munombaranyedha itatila? Kabe. Hora dhinjinji munosona vakauwilevo, akala pyoodeya. Thitho vasogolovee munowesedha ira vyongo mosamala. Mofwanafwana na vyevi akala mutoimwanana thonyi-edha oma rima, leva rima, venango udhivela wa mutu mwinango, kamutatile rima. Pepesa mokumela vathi varima unoukami-ani ira murome vwelana okoka. Mwaira e-no muvilimbi-edhenga ira vyapama va mwasuo sogolo.

18. N’nga munokala osikimizela va vyongo viivi?

¹⁸ Ninosimba maningi Yesu! na ifwanafwani-o inioni-idhe liye. Nasazie-dhanga maningi munothuulelela Yesu thitho ona vyongo ninga munovionela liye, vinokala vyo-orucha ira niirenga vyongo ninga munoviirela liye. Nadhilimbi-edhanga ira vyongo ninga munaviirela liye, paevo vanoira i-yo pama maningi va mwasa owara umutu upya. Muyofunjedha yen’na nithapanyile makalelo manai anokumi-a zimu ochena. Munoona a-vi kaana hora yofunjedha makalelo anokumi-a zimu ochena thitho thuulela munairele nyo voathonyi-edha? Munooda fwanya myasa dhoonga makaleloala M’buku la Mboni za Yehova Lofufuzira Nkhani. Volowani va muru oi “Moyo Wachikhristu” mwamala “Makhalidwe Amene Mzimu Woyera Umatulutsa.” Mukale osikimizela ira mwakaana thindhi Yohova unodha ukami-ani ira muware umutu upya thitho mwa-auungule.