1-2. N’nga chini inairi-e ira lambelawi-u ukale orumeleya wa Nlungu?

 N’NGA munothuulela n’ni mwavwa madhu oi “lambela”? Venango munothuulela vya bali odhiyevi-a ukokorile vaduzi na kamee, volobela mokumela vathi va rima. Venango munothuulela vya banja losangalala lelo linodhiveliwana funjedha mopwasedha Bibilya.

² Va vyoireya vyothene vyevi, atu taongiwileao tanolambela Nlungu. N’nga Yohova unorumela lambela wiwao? Liye unorumela akala vinovwelana na ifunelwe thitho akala tanoviira mwaudhivela na mwalemezo. Ninomdhiveliwana maningi Yohova. Ninoidhiwa ira unofwanela lambeliwa, thitho ninofuna ira yotuva yi-u yolambela ikale yapama maningi.

3. N’nga ninothapanya n’ni muyofunjedha yei?

³ Muyofunjedha yei, ninofuna nitapanyeni vya lambela warumelecha Yohova ndulimu thitho ninotapanya vikundu 8 vyokuza lambela orumeleya malamboano. Nairanga vyevyi, ninothuulela vya i-yo okene munalambelele i-yo mundhila yapama maningi. Ninoona thitho mwasiwa lambela munanikami-idhe aliwa ira nikale osangalala.

4. N’nga atu talambela Yohova Kristu a-anadhe taoni-idhe a-vi ira tanomleza thitho mdhiveliwana?

⁴ Kristu a-anadhe, alombwana ororomeleya ninga Abeli, Nowa, Abrahamu, na Yobo tatothonyi-edha ira tanomlemeza no mdhiveliwana Yohova. N’nga tairile a-vi vyevyo? Aliwa tatoira  e-no mokala ovwela, airoromelo, novelela sembe. Bibilia kalinoonga vikundu vyothene vyafuna aliwa ira volambela. Mbwenye aliwa taira vyothene vyaoda aliwa volemeza Yohova, thitho liye anoorumela lambela wiwa. Ee-no Yohova atoovelela Ilamulo dhela wa Mose waa-ima a Abrahamu. Ilamuloyo mwali malamulo manjinji aonga ndhila yolambela warumela Yohova.

5. N’nga kuchinja oi a-vi waireile vamwasa olambela waimbarimbari vanduli vokwa no venyathi-iwa wa Yesu?

⁵ Vanduli va wukwa no venyathi-iwa wa Yesu, Yohova kaafuna ira nimlambelenga mo-arela Ilamulo yava-iwile Mose. (Aroma 10:4) Makristau tanofwanela a-rela “Ilamulo” lipya, lelo lili “lamulo la Kristu.” (Agal. 6:2) Aliwa tangaoni-idhe ira tanovwela “Ilamulo,” yei a-kala lokota thandha wa vyongo vyafwanela aliwa irana na vya-afwanela aliwa irana, mbwenye a-rela ifwanafwani-o ya Yesu no indi-edha basa vyafunji-a liye. Malamboano, Makristau tanovilimbi-edha sazi-edha Kristu naifunelo yoi tasangalali-e Yohova no “limbi-iwa.”—Mat. 11:29.

6. N’nga yofunjedha yei inonikami-a a-vi?

⁶ Natapanyanga likundo nlilothene yolambela wi-u, nidhifukenga ira, ‘n’nga miyo ndinoira a-vi va mwasa wen’na?’ Munodhowanave dhifuka ira, ‘n’nga ndinowenjedhela lambela wanga Nlungu?’ Musangalalenga na dhowawinyu vasogolo thitho mumvepenga Yohova ira aukami-eni ona vinofwanela nyo wenjedhela.

7. N’nga Yohova unoaona a-vi malobelwi-u okumela vathi va rima?

⁷ Ninolambela Yohova nalobelanga wa liye. Malemba anofwanafwani-edha malobelwi-u na vyotuwela vyosaka-ediwa pama maveleliwa va tabernakulu. (Sal. 141:2) Vyotuwelavyo vyanokumi-a nukela wamdhiveliwi-a Nlungu. Mofwanafwana na vyevyi, malobelwi-u okumela vathi va rima “anomdhivelwi-a,” angalive ira nino-indi-edha basa madhu o-orucha. (Sang. 15:8; Dotor. 33:10) Nitokaana myasa dhovweya dhororomela ira Yohova unokala osangalala anivwa nionganga madhu othonyi-edha ira ninodhiveliwana thitho msimba. Yohova unofuna ira nimwandele vyokumbanyi-a vi-u, iroromelo yi-u na vinofuna i-yo. Mwa-anaire lobelo wa Yohova munoona a-vi nyo thuulela pama vinofuna nyo onga? Mwaira e-no, nyo munovelela “vyotuwela” vyapama maningi wa Babinyu wa dhulu.

8. N’nga ndingari iivi yavakundu ina i-yo yotitimi-a Nlungu?

⁸ Ninomlambela Yohova namtitimi-anga. (Sal. 34:1) Ninotitimi-a Yohova nawandela atu enango vya makalelwee odabwi-a na mabasee. Ninooda onga vyongo vyapama maningi vyoonga Yohova akala ninomsimba. Nakaana hora yothuulela mopwasedha vya upama wa Yohova na vyothene viniirele liye, ninokaana myasa dhinjinji dhomsimba. Basa lolaleela linoniva-a ngari yapama manigi ira nimtitimi-enga Nlungu ninga sembe “inovelela i-yo wa liye, yeniyo ndi yova-a ya milomwi-u.” (Aeb. 13:15) Mofwanafwana na vile vinofuna i-yo roma thuulela na-analobele wa Yohova, vinokala pama thuulela vyevyo vinofuna i-yo onga waatu ale anoalaleela i-yo. Ninofuna ira “sembe inovelela i-yo” ikale yapama maningi. Ee-no ninoonga na rima wethene nawandelanga atu enango vya makundo aimbarimbari.

9. Mofwanafwana na Aisraeli, n’nga ninogayali a-vi nafiya vamigumanoni? Velelani ifwanafwani-o ya vyongo viuwireeleni.

⁹ Ninolambela Yohova nafwanyeyanga vamigumanoni. Aisraeli tatowandeliwa ira: “Fendo  taaru va yawa, lombwana uliwethene amaoneele vamethoni va Yohova Nlungwinyu, va limburo linofuna dhasakula Nlungu.” (Dotor. 16:16) Aliwa tanofwanela i-yachi nyumba na mbeu dhiwa vo-okala odhiing’anela. Mbwenye Yohova atoalanyedha ira: “Kavali mutu unofuna silila ilambwinyu, vahora inofuna nyo dhowa maoneela vamethoni va Yohova Nlungwinyu.” (Ekis. 34:24) Nairoromelwiwa wa Yohova, Aisraeli oova Nlungwao tanodhowa wu mafesta ava yawa. Vyevi vyonoiri-a ira taraeli-iwenga maningi. Mofwanafwani-a, tanovwechecha pama Ilamulo ya Nlungu, thuulela mopwasedha upamee, thitho tanolimbi-iwa tagumaneya vambo-i naanamalambela afwiwa. (Dotor. 16:15) Mundila imbo-ive i-yo thitho ninonganyali maningi navilimbi-edha ira nifwanyeeye vamigumanoni. Thitho kathuulelani moda unosangalalela Yohova nafiya vamigumanoni ningakozeele wakula mogwandela na molimbi-a rima vamigumanoni.

10. Mwasiwa ngwan’ni omba nyumbo kofuneya volambela wi-u?

¹⁰ Ninolambela Yohova naombelanga nyumbo vambo-i. (Sal. 28:7) Anaisraeli taona ira omba nyumbo kofuneya maningi volambela wiwa. Mwene Davide atosakula Alevi 288 ira taombenga nyumbo vakachisini. (1 Limb. 25:1, 6-8) Malamboano, ninooni-a ira ninomdiveliwana Nlungu naombanga nyumbo dhomtitimi-a. Yofuneya kai kaana dodoliso loomba kabe. Thuulelani ifwanafwani-o ila: “I-yo othene ninogwegweduwa hora dhinjinji,” mbwenye vyevyi kavinoniimwanani-a onga nakala pingoni na muurumiwini. (Tiy. 3:2) Mofwanafwana na vyevyi, kanirumeli-e ira rucheya voomba uniimwanani-e omba nyumbo dhomtitimi-a Yohova.

11. Movwelana na lemba la Salimo 48:13, mwasiwa ngwan’ni ninofwanela lokota hora ira niire lambela wavabanjani?

¹¹ Ninolambela Yohova nafunjedhanga madwe thitho funji-a a-imi-u vya liye. Vadambo la Sabudu, Anaisraeli tanovuma va mabasiwa adambo nadambo thitho vyevi vyanoava-a ngari yothuulela uxamwaliwa na Yohova. (Ekis. 31:16, 17) Aisraeli ororomeleya tanofunji-a a-imiwa vya Yohova na upamee. I-yo vaokene ninofwanela kaana hora yoleri no funjendha Madhu a Nlungu. Yei ndi ikundu yolambela wi-u, thitho inonikami-a kala vauxamwali na Yohova. (Sal. 73:28) Nairanga lambela wa vabanjani, ninokami-a a-imi-u ira takale vauxamwali wapama na Babi-u waudhivela wa dhulu.—Muleri Salimo 48:13.

12. N’nga ninofunjedavo n’ni na moda waonela Yohova basa laanamasaka-edha viya vya tabernakulu?

¹² Ninolambela Yohova namanganga Nyumba dha Umwene nodhisaka-edha pama. Bibilya linoonga ira basa lomanga tabernakulu na vyothene vya tabernakulumo vyali “vyavakundu.” (Ekis. 36:1, 4) Malamboano, Yohova unoona ira mabasa omangamanga Nyumba dha Umwene na nyumba dhinango dha gulu ndi basa lavakundu. Abali naarongola enango tanomalela horiwa talabanga mabasa enao muhora injinji. N’nga kaninosimba basa lofuneyali lokami-a mabasa Aumwene? Mbwenye naaliwene anolaba basa lolaleela. Abali enango tanofuna tangairile upainiya. Andimuwa avapingoni tanothonyi-edha ira anokami-a va basa lomangamanga, voarumeli-a ira abali naarongola athindhala takale apainiya akala mbofwanelela. Akala nitokaana dodoliso lomangamanga venango kabe, nothene ninooda kami-a vabasa lomanga no samalela Nyumba dholambelelamo ira dhikale dhosamaleya pama.

13. N’nga ninofwanela onanga a-vi kobiri dhinovelela i-yo vokami-a basa la Umwene?

 ¹³ Ninolambela Yohova nakami-a basa la Umwene na vyovelela vi-u. Aisraeli katafwanela dhowa maoneela vamethoni va Yohova e-nwene. (Dotor. 16:16) Aliwa tanofwanela dhana yotuva inangweene movwelana na vyongo mukalele aliwa vaingumiiwa. Vyevi vyanothonyi-edha ira tanosimba na vyothene vyasaka-edhiwa ira taganyalinga mwauzimu. N’nga ninathonyi-edhe a-vi ira ninomdhiveliwana Yohova thitho ira ninosimba vyothene vinoniirela liye? Ndhila imbo-i kuvelela kobiri dhokami-a pingo unogumaneya i-yo thitho basa lavailambo yothene muvwelana na mwemo vyongo mukalele aliwa vaingumii-u. Vamwasula rumiwi Paulo aongile ira: “Yotuva yokumela vathi va rima njenio inodhiveliwana Nlungu, namwasa oi Nlungu unofuna ira mutu avelelenga vinooda liye, a-kala vyevyo vya-anaoda liye.” (2 Akor. 8:4, 12) Yohova unosangalala na kobiri dhinovelela i-yo mokumela vathi va rima, masiki ikale yoyeva moi a-vi.—Marku 12:42-44; 2 Akor. 9:7.

14. Movwelana na lemba la Sanganikho 19:17, n’nga Yohova unoona a-vi nakami-anga abali naarongoli-u osauwa?

¹⁴ Ninolambela Yohova nakami-anga Makristau afwi-u anofuneela kami-iwa. Yohova atolanyendha araeli-a Aisraeli akami-echa atu osauwa. (Dotor. 15:7, 10) I-yo nakami-anga anamalambela afwi-u, Yohova unoona vyevyo ninga yotuva wa liye. (Muleri Sanganikho 19:17.) Mwaifwanafwani-o, Makristau au Filipi vyatumizile aliwa vyotuva wa Paulo angali perezoni, liye aongile ira, “yenio yali sembe yorumeleya na yosangalali-a wa Nlungu.” (Afil. 4:18) Mwaona abali naarongola apingoni mwinyu mudhifuke ira: ‘Vatokala mutu anofuna miyo mkami-a?’ Yohova anosangalala maningi aona ira nino-indi-edha basa kopolo dhi-u, hori-u, dodoliso li-u, thitho fumi-u vokami-a atu tanogumanana nyarwa. Unoona ira vyevi ndiikundo yolambela wi-u.—Tiy. 1:27.

15. Lambela waimbarimbari unofuneela hora na thindhi, n’nga mwasiwa ngwan’ni i-yo kaninoona ira kaiorucha?

¹⁵ Lambela waimbarimbari unofuneela hora na thindhi. Mbwenye malamulwe kai onyemela. (1 Ju. 5:3) Mwasiwa ngwan’ni? Ninom’lambela Yohova na mwasa omdhiveliwana. Kathuulelani mwana ng’onong’ono unofuna mva-a babee yongo. Liye unooda mala hora injinji amlembelanga iruthiruthi. Mwanula kanokalela kumbanyedha hora imadhi liye asakaedhanga iruthiruthiyo. Liye unomdhiveliwana maningi babee thitho m’va-a yotuviyo. Mofwanafwana na vyevi, namwasa oi ninomdhiveliwana Yohova ninokala osangalala i-ndi-edha basa hori-u na kopolo dhi-u thitho kaana thindhi ira nimlabelanga mwaimbarimbari.

16. Movwelana na lemba la Aebere 6:10, n’nga Yohova unoona a-vi vinoira i-yo vofuna msangalali-a?

¹⁶ Anamabala audhivela katinadedi-edhela wachela yotuva yolandana kumela wa mwaniwa uliwethene. Aliwa anozindiela ira mwana uliwethene ngo-iyana na fwee thitho katinaira vyongo vyolandana. Mofwanafwana na vyevi, Babi-u wadhulu unovwechecha mwemo vyongo mukalele aliwa vaingumii-u. Venango munooda irana vinjinji kwaranya atu aidhi nyo venango anoadhiveliwana nyo. Kamunooda ira vinjinji ninga atu enango. Venango na mwasa wa tunga linyu, moda uli ingumiinyu, venango izo inyu ya banjani. Mbwenye kamutatile rima venango fooka. (Agal. 6:4) Yohova kanodha diwala basa linyu. Akala munoira vyothene vinooda nyo na  vifunelo vyapama, liye unongo udhiveliwanani. (Muleri Aebere 6:10.) Yohova unoona vifunelo vya riminyu. Liye unofuna ira mukalenga osangalala na okwakwanana na vinoira nyo vomlambela.

17. a) N’nga ninaire a-vi akala ninoona ira vikundo vinango vyolambela wi-u pyorucha? b) N’nga ndhila dholambelela dhili mu kwadru loi “ Muwenjedhele sangalala winyu” dhiukami-idheni a-vi?

¹⁷ N’nga ninoona a-vi akala vinonirucha ira vikundo vinango vyolambela wi-u, ninga funjedha Bibilya wa okene venango laleela? Ninoona ira nairanga vyevi hora dhinjinji ninongo sangalala maningi thitho vinongo niganyali-a. Ninooda fwanafwani-a lambela wi-u na vyongo vinango ninga, mawaredhelo olimbi-a tutu venango funjedhanga omba vo-indi-edha basa mafaramento oombana. Akala niiranga vyevi molupela-lupela, kaninooda dhowa vasogolo. Akala ninoviira vyevyo dambo nlilothene. Ninooda roma viira vahora yoyeva naira ee-no ninooda wenjedhela horiyo. Naroma ona ira ninaaviira mwapama, ninoroma funafuna ira niviirenga hora dhothene novisangalalana. N’nga munoona ira nina-indi-edhe a-vi basa ndhila yen’na volambela wi-u?

18. N’nga ninokwakwaneli-edha a-vi ifunelo yeniyo yapanduchiwele i-yo, n’nga vyo-arelavo vyee pyoi a-vi?

¹⁸ Ninokwakwaneli-edha ifunelo yeniyo Yohova yanipanduchedhe liye namlambelanga kumela vathi va rimi-u. Vyevi vinonikami-a ira nikaena ingumi yosangalala na yaifunelo thitho ninokaana idedi-edho yooda mlambela Yohova dhowa no dhowa. (Sang. 10:22) I-yo nitokaana rendele wa mathuuleloni namwasa oi ninoidhiwa ira Yohova anokami-a anamalambele agumanana nyarwa. (Esaya 41: 9, 10) Nitokaana myasa dhovweya dhokalela osangalala nalambelanga Babi-u waudhivela, nguli ofwanela “wachela titimi-o no lemeziwa” muvyopanduchiwa vyothene!—Apok. 4:11.