Atu enango anoleri mwasa wen’na mombaranya anodabwa na vyevi. Mbwenye vatokala atu ambili ana dhina loi Mefiboseti, thitho ninofunjedhavo likundo m’nango nathuulela vyaireile.

Mwene Sauli wau Israeli, ana a-ima aalombwana 7 naa-iyana ambili. Mwana oroma ali Yonantani. Ee-no mwenewo atobala mwana mwinango walombwana dhinale Mefiboseti m’mee ali i-yana wanambili wa Sauli, Rizipa. Vyosangalali-a pyoi Yonantani atokaana mwana wa lombwana dhinale Mefiboseti. Ee-no Mwene Sauli ana mwana wointaniwa mefiboseti na dhulee ana dhina limboi-ve leli.

Vahora inango Mwene Sauli atodhimbinuwela Agibioni enao tali vari va Aisraeli thitho afuna aapa othene. Vyevi kavyali vyofwanelela. Mwasiwa ngwani? Hora ya Yoswa, andimuandimua Aisraeli atoira ivwelalano ya rendele na Agibioni.—Yoswa 9:3-27.

Vwelano eli lali lilambangave basa vaora ya Mwene Sauli. Mbwenye mo-ovwelana na lamulo, afuna aapa Agibioni othene. Vyevi vyatoiri-a ira Sauli vambo-i na avandhevee, takaena selu wa sangiri. (2 Sam. 21:1) Ee-no Davide atokala Mwene. Agibioni tavulumuile katomwandela vyaireilevi. Davide atoafuka vyaire aliwa ira tasaka-edhe vyothakala vyairile Sauli, naifunelo yoi Yohova adhowenave aaraeli-a muilambwiwa. Malo moonga ira aava-e kobiri, Agibioni tavepile ira tape a-ima 7 amutu ule aachinga ira aape. (Num. 35:30, 31) Thitho Davide atorumelela vyavepile aliwavyo.—2 Sam. 21:2-6.

Vahorio, Sauli na Yonatani tali tangapiwile kondoni mbwenye mwana wa Yonatani Mefiboseti ali a-anakwe. Liye ali orangala na mwasa wa ngovi yaireile angali mwana thitho pyoidhiweelatu ira liye kairile ikundu va vyothakala vyairile mbwiyee wa Agibioni. Davide atoira vwelano na Yonatani wenuo ali fwee thitho vwelanolo langakami-idhe a-ima a Yonatani thangani-avo Mefiboseti. (1 Sam. 18:1; 20:42) Bibilya linonga ira: “Mwene athovwela tangaranga Mefibioseti mwana walombwana wa Yonatani, mwana wa Sauli mwasa wa lumbelo yairile Davide na Yonatani mwana wa Sauli vamethoni va Yohova.”—2 Sam. 21:7.

Angalive vyali e-no, Davide atoolemeza vyavepile Agibioni liye atoava-a vidhuulu 5 vya Sauli na a-imee ambili oi m’mbo-i mwaaliwa ali Mefiboseti. (2 Sam. 21:8, 9) Vyairile Davide vyatokumi-a selu wa sangiri ilambonimo.

Kaiira mwasula utekala limbili baa-i kabe. Lamulo la Nlungu lanoonga movweya pama ira: “A-ima katipiwe namwasa wa vyodawa vya ababiwa”. (Dotor. 24:16) Aakale ira a-ima ambili a Sauli na vidhuulu vyee 5 katadawile Yohova kaarumeli-e ira vyevyo vyaaireele. Lamuloli lanodhowanave onga ira: “Uli wethene apiwe na mwasa wa yodawayee.” Vinooneya ira atu 7 abanja la Sauli apiwilala, tali ikundu ya Sauli vochinga Agibioni. Ee-no atu 7 tatopiwa na mwasa wa vyodawa viwa.

Mwasula unooni-a ira mutu kanadhilevelela va vyothakala viirile liye vothuulela venango onga ira a-arela malangi-o ava-iwile liye. Sangani mwinango wazelu unonga ira: “Saka-edha ndhila ya manyalwaa, thitho ndhila dhothene dhinodha kala dhovuneleya.”—Sang. 4:24-27; Aef. 5:15.