MURU OFUNJEDHA 29
Nimkami-enga namasogoleli-u Yesu
“Utongi wethene uveleliwile wa miyo, dhulu na vailambo yothene yavathi.”—MAT. 28:18.
NYUMBO 13 Khristu Ndi Chitsanzo Chathu
VINOFUNA I-YO FUNJEDHA *
1. N’nga ifunelo ya Yohova malamboano chini?
MALAMBOANO, ifunelo ya Nlungu njoi milanyu yapama ya Umwene ilaleeliwe vailambo yothene yavathi. (Marku 13:10; 1 Timo. 2:3, 4) Basali ndi la Yohova ee-no pyofuneya maningi ira utomsakula Mwanee odhiveliwiwa ira alisogolelenga. Ninokala osikimiza ira namwasa oi Yesu ngunosogolela basa lolaleelali, ninodha limari-a ninga mwemo Yohova munofunela liye komoni wa-anafiye.—Mat. 24:14.
2. N’nga ninofuna nitapanyenin’ni muyofunjedha yei?
2 Muyofunjedha yei, ninoona mwemo Yesu muno-indi-edha liye basa “dhaari ororomeleya na wa zelu,” vovelela malangi-o a M’madhu a Nlungu thitho sogolela anama-arelee vabasa nlukulu lolaleela linaireya. (Mat. 24:45) Ninoona thitho vyevyo mutu uliwethene vinaire liye vokami-a Yesu na dhaari ororomeleya.
YESU UNAASOGOLELA BASA LOLALEELA
3. N’nga Yesu ava-iwile izo yoi a-vi?
3 Yesu ngunosogolela basa lolaleela. N’nga ninoidhiwa a-vi vyevi? Anga-adhi vang’ono dhowa dhulu, Yesu atogumana naanama-arelee ororomeleya vamwango wau Galileya. Atoawandela ira: “Utongi wethene uveleliwe wa miyo dhulu na vailambo yothene yavathi.” Kaonani vyevyo vyaongile liye adhamale: “Moi e-no, dhowani mumafunji-e atu amaziza othene ira takale anamafunjedhanga.” (Mat. 28:18, 19) Yesu atova-iwa thitho izo yosogolela basa lolaleela.
4. Mwasiwa ngwan’ni kaninokaikela ira Yesu unave sogolela basa lolaleela?
4 Yesu atoonga ira basa lolaleela thitho funji-a atu, linongoireya “mumaziza othene aatu” thitho liye unodhakala naanama-arelee “malambo othene fiyedhela komoni wa horaino.” (Mat. 28:20) Madhu enala anothonyi-edha ira Yesu unave sogolela basa lolaleela fiyedha malamboano.
5. N’nga ninokami-a a-vi vokwakwaneli-edha ulosi wava Salimo 110:3?
5 Yesu kaasukwala na mwasa oi unodhakala atu oyeva olaba basa lolaleela muhora yakomoni. Liye anoidhiwa ira ulosi wenuo olemba masalimo waongile liye unodha kwakwaneli-edhiwa oi: “Atwaa anodha dhivelela mofunechecha vadambo lelo linofunawee dha sogolela anyakondwaa kondoni.” (Sal. 110:3) Akala munolabanao basa lolaleela munakami-a Yesu na dhaari ororomeleya thitho munokwakwaneli-edha ulosula. Basali linaadhowa vasoglo, mbwenye vatokala vyorucha vinango.
6. N’nga chorucha iivi imbo-i inogumanana atu anolaleela milanyu yapama malamboano?
6 Yorucha imbo-i inogumanana atu anolaleela vya Umwene ndi runi-iwa. Atu opanduwa, anamasogolela amareligiau thitho andale, tatoiri-a atu anjinji ira talionenga basa li-u modaweya. Akala abali-u, atu owaidhiwa venango anoalabana i-yo basa tatodhodhomi-iwa na vyevi, anooda nikanyi-edha ira ni-iye mlambela Yohova thitho laleela. Vofuna runi-a basa li-u, muvilambo vinango abali naarongola anodhimbinueliwa, tuchiwa thitho fungeliwa perezoni. Mbwenye kaninodabwa na vyevi. Yesu atoongelatu ira: “Maziza othene anodha idanana nanyo namwasa wa dhina langa.” (Mat. 24:9) Vinoira atu voidanana na i-yo, ndi umboni oi Yohova unosangalala na i-yo. (Mat. 5:11, 12) Namanami-a, ngunoiri-a ira niruni-iwenga. Mbwenye liye kan’na kopolo vofwanafwani-edha na Yesu! Namwasa oi Yesu unonikami-a, milanyu yapama inanalaleeliwa wa maziza othene aatu. Dhoweni nione umboni wa vyevyo.
7. N’nga munoona umboni oi a-vi othonyi-edha ira lemba la Apokalipse 14:6, 7 linaakwakwaneli-edhiwa?
7 Ninga anamalaleela vya Umwene, yorucha inango inogumanana i-yo choi ninofuneela laleela waatu aviongelo vyo-iyana-iyana. Masopenya aoni-iwile rumiwi Juwau, Yesu atothonyi-edha ira milanyu yapama inodha laleeliwa angalive ira vatokala nyarwa dhinjinji. (Muleri Apokalipse 14:6, 7.) Moi a-vi? Ninodhilimbi-edha moda munaodele i-yo wandela atu anjinji milanyu ya Umwene. Malamboano atu availambo yothene yavathi anooda leri mabukhu oonga vya Bibilya vasaiti-u ya jw.org muviongelo vyokwaranya 1000! Gulu lotonga latorumeli-a ira bukhu la Mungakhale Ndi Moyo Mpaka Kalekale! lelo lino-indi-edhiwa basa vofunjedha Bibilya naatu lithapuleliwe muviongelo vyokwaranya 700! Malangi-o a Bibilyani takanle taveleliwanga waatu ale ana nyarwa yo-ovwa, vo-indi-edha basa mavidiyo thitho mabukhu avilembo vyaatu ale ana nyarwa yo-oona. Ninoona maulosi a Bibilyani takwakwaneli-edhiwanga. Atu “okumela muviongelo vyothene vya maziza aatu,” anafunjedha oonga “iongelo yochena” yeyo ili makundo aimbarimbari a Bibilyani. (Zakar. 8:23; Zef. 3:9) Vyothene vyevi, vinoodeya namwasa oi Yesu Kristu ngunasogolela basali.
8. N’nga basa lolaleela linokaana vyo-arelavovyee vyoi a-vi?
8 Malamboano atu okwaranya 8.000.000 enao ali muvilambo 240, ali mugulu la Yohova thitho yawa iliyothene atu anjinji anobadiziwa! Pyaimbarimbari ira atwao tatokalavo anjinji mbwenye yofuneya maningi choi atu enala atochinja makalelwiwa thitho atowara “umutu upya.” (Akol. 3:8-10) Anjinji ato-iya raruwa, uwalanga, sakulo thitho dhiveliwana maningi ilambo yiwa. Ulosi wava lemba la Esaya 2:4 unaakwakwaneli-edhiwa unoonga ira, ‘katinadha funjedhave kondo.’ Nadhilimbi-edhanga wara umutu upya, ninokami-a atu ira tavolowe mugulu la Nlungu thitho ninothonyi-edha ira nino-arela namasogoleli-u Kristu Yesu. (Juwau 13:35; 1 Pe. 2:12) Mbwenye vyevi kaira vinaireya mwangovi baa-i kabe. Yesu ngunonikami-a.
YESU ATOSAKULA DHAARI
9. Movwelana na lemba la Mateu 24:45-47, n’nga Yesu aongeletun’ni vyokuza komoni?
9 Muleri Mateu 24:45-47. Yesu atoongelatu ira muhora yakomoni, unodha sakula “dhaari ororomeleya na wazelu” ira avelelenga malangi-o a M’madhu a Nlungu. Ee-no ninodedi-edhela ira dhaaruo akaengana thindhi va basalee. Thitho piyevyo vinoireya. Namasogoleli-u ukadhi a-indi-edhanga basa ixigulu ya alombwana ozoziwa, vovelela “yodya yauzimu vahora yofwanelela” waatwee thitho atu ale aoni-idhe ifunelo. Alombwana enala, katinadhiona ninga otonga iroromelo yaatu enango. (2 Akor. 1:24) Malomwee, aliwa anozindiyela ira Yesu Kristu nguli “namasogolela nanamatonga” waatwee.—Esaya 55:4.
10. N’nga ndi bukhu liivi, nli vairuthiruthiniva liukami-idheni ira murome wenda vadhila yodhowa uingumi yo-omala?
10 Romela yawa ya 1919, dhaari ororomeleya ukanle asaka-edhanga mabukhu o-iyana-iyana anokami-a atu aifunelo funjedha makundo aimbarimbari ofwanyeya Mumadhu a Nlungu. Muyawa ya 1921, dhaarula atokumi-a bukhu loi, Zeze wa Mulungu vofuna kami-a atu aoni-idhe ifunelo yofunjedha makundo oroma a Bibilyani. Vira wahora mabukhu enango thitho akanle akumi-iwanga. Ndi bukhu liivi lelo laukami-idheni ira muidhiwe thitho roma mdhiveliwana Babi-u wa dhulu? N’nga toi, “Mulungu Akhale Woona,” Choonadi Chimene Chimatsogolera ku Moyo Wamuyaya, Mungathe Kukhala ndi Moyo Kosatha m’Paradaiso pa Dziko Lapansi, Chidziŵitso Chotsogolera ku Moyo Wosatha, Kodi Baibulo Limaphunzitsa Chiyani Kwenikweni?, Zimene Baibulo Limaphunzitsa venango ndi bukhu lipya loi, Mungakhale Ndi Moyo Mpaka Kalekale? Mabukhu othenene enala tasaka-edhiwile movwelana namoda wali vyongo vahora yakumi-iwa aliwiyo.
11. Mwasiwa ngwan’ni i-yo othene ninofuneela yodya yauzimu?
11 Kaiira mbaatu aromile funjedha wene Bibilya baa-i anofuneela idhiwa makundo odi-a okuza Yohova thitho makundwee kabe. I-yo othene ninofuneela makundwala. Rumiwi Paulo alembile ira: “Yodya yothakuna njaatu owarala mwauzimu.” Liye atowenjedhela onga ira, i-ndi-edha basa makundo oi e-no unooda nikami-a ira ni-iyani-enga “yofwanelela na yo-ofwanelela.” (Aeb. 5:14) Malambo oruchala, vevo makalelo aatu vithakanle aliwa maningi, kai vyokweya a-rela makundo a Yohova. Mbwenye Yesu unoonechecha ira nitofwanya kopolo dhinofuneela i-yo, voniva-a malangi-o apama analimbi-e iroromelo yi-u. Malangi-o enala anokumela Mumadhu a Nlungu Bibilyani. Dhaari ororomeleya unosaka-edha thitho gawa yodya yauzimu mosogoleliwa na Yesu.
12. Molandana na Yesu, n’nga ninothonyi-edha a-vi ira ninolemeza dhina la Nlungu?
12 Mofwanafwana na Yesu, ninoliva-a lemezo dhina la Nlungu linofuneela aliwa. (Juwau 17:6, 26) Yawa ya 1931, natoroma idhiweyana na dhina lamalembani loi Mboni dha Yohova. Vyevi pyathonyi-edhe ira ninoona ira dhina la Babi-u wadhululi, ndi lofuneya maningi wa i-yo. (Esaya 43:10-12) Thitho kumela mu Outubro wa yawa yeyo, ndhinali likanle lifwanyeyanga vathakuru loroma la magazini a Nsanja ya Olonda. Wenjedhela vevo, Baibulo la Dziko Latsopano la Malemba Opatulika latoweleli-edha dhina la Nlungu malonimwee mofwanelela. Vyevi pyo-iyana maningi na vyevyo amareligiau anoonga ira mbama Kristau viirile aliwa vokumi-amo dhina la Yohova Mabibilyani mwiwa!
YESU ATOKAATHEI-A GULULEE
13. N’nga chini inousikimizeli-ani ira Yesu uno-idhi-edha basa “dhaari ororomeleya na wazelu” malamboano? (Juwau 6:68)
13 Dhela “mwadhaari ororomeleya na wazelu,” Yesu atokaathei-a gululee losangalali-a vailamboi lelo linolimbi-a lambela ochena. N’nga munoliona a-vi gulu leli? Venango mwavwide ninga mwemo rumiwi Pedru mwavwele liye, wenuo am’mwandele Yesu ira: “N’nga ninadhowe waani? Nyo ngun’na madhu aingumi yo-omala.” (Juwau 6:68) N’nga vyongo vyakale a-vi wa uliwethene wa i-yo vyaakale ira kaniguman’nena na gulu la Yohova? Dhela mugulu leli, Kristu unoonechecha ira ninodyi-iwa pama mwauzimu. Unonifunji-a thitho mwemo munairele i-yo mwadodoliso muurumiwi-u. Wenjedhela vevo, unonikami-a thitho wara “umutu mpya,” naifunelo yoi nimsangalali-enga Yohova.—Aef. 4:24.
14. N’nga muganyanle a-vi namwasa okala mugulu la Yohova vahora ya sau wa COVID-19?
14 Yesu unoniva-a malangi-o azelu vahora ya nyarwa. Natoona umboni wa vyevi vahora ya sau wa COVID-19. Vevo atu anjinji ailamboi kataidhiwa vyofwanelela ira, Yesu atoonechecha ira ninowachela malangi-o ovweya pama onikami-a kala ovuneleya. Nanoolimbi-iwa wara maskara nakala vaguluni thitho kaathi molapelana. Andimuwa avapingoni tanoolimbi-iwa ira tanofwanela onganga na abali naarongola apingoni mwiwa ira taidhiwe vinofuneela aliwa ira taode kala ovuneleya, a manungo apama thitho ira talimbi-enga uxamwaliwa na Yohova. (Esaya 32:1, 2) Nanoolimbi-iwa thitho wachelanga malangi-o owenjedheleya dhela mumalipoti a Gulu Lotonga.
15. N’nga ndi malangi-o oi a-vi aveleliwile vahora ya sau okuza migumano thitho laleela, n’nga vyo-arelavovyee vyali vyoi a-vi?
15 Vahora ya saula, natowachela thitho malangi-o a mwemo munairelenga i-yo migumano thitho laba basa lolaleela. Mombaranya maningi natoroma ira migumano ya pingo, ya isa thitho ya gawo dhela va vidiyo konferensiya. Natoroma thitho laleela vo-indi-edha basa telefoni nolemba makarta. Yohova atoraeli-a thindhi li-u. Malipoti amaofesi a tambi manjinji anooni-a ira numero ya anamalaleela itogwela. Thitho abali naarongola anjinji atogumanana vyosangalali-a vahorila. Muone kwadru loi, “ Yohova unoraeli-a basa li-u lolaleela.”
16. N’nga ninasikimizelen’ni?
16 Atu enango anooda onanga ira Gulu Lotonga lanooruchi-a vyongo maningi vahora ya saula. Mbwenye hora dhothene vyaira oneelatu ira malangi-o ava-iwa i-yo ali azelu. (Mat. 11:19) Thitho nathuulelanga mwemo Yesu mukanle liye asogolelanga atwee mwaudhivela, ninokala osikimiza ira akala ninogumanana vyongo vyoi a-vi sogolou, Yohova na Mwanee odhiveliwiwa katinodha ni-iya.—Muleri Aebere 13:5, 6.
17. N’nga munodhivwa a-vi namwasa osogoleliwa na Yesu?
17 Nili osangalala maningi ira ninosogoleliwa na Yesu! Nili mugulu loi atwee mbovwelana angalive ira ano-iyana makalelo, mitundu thitho viongelo. Ninova-iwa malangi-o manjinji okumela Mumadhu a Nlungu thitho ninofunji-iwa mwemo munalabele i-yo basa lolaleela. Uliwethene vaekene unokami-iwa wara umutu upya thitho ninofunji-iwa kala odhivelana unango namfwee. Nitokaana myasa yothene yokala ogayela namwasa okaana Yesu ninga namasogoleli-u!
NYUMBO 16 Tamandani Yehova Chifukwa cha Mwana Wake Wodzozedwa
^ Alombwana, a-iyana thitho naa-ima anjinji maningi, anolaleela mwathindhi milanyu yapama. N’nga nyo thitho muli m’mbo-i mwaatu enala? Akala vili ee-no, muidhiwe ira munolabanao basa lelo Mbwii-u Yesu Kristu linosogolela liye. Muyofunjedha yei, ninoona umboni othonyi-edha ira Yesu, unaasogolela basa lolaleela malamboano. Thuulela makundo enala unonikami-a ira nikale osikimiza dhowanave mlabela Yohova mosogoleliwa na Kristu.
