1. N’nga Yohova airile a-vi Adamu na Eva tangadawile? (Maromelo 3:15)

 ADAMU na Eva tangadawile, Yohova atoonga ulosi ofuneya wenuo wavelenle idedi-edho waa-imee. Ulosuo uli va lemba la Maromelo 3:15.—Muleri.

2. Mwasiwa ngwan’ni ulosula ngwavakundu?

² Ulosula unofwanyeya mubukhu loroma la Bibilyani. Mbwenye mwadhila inangwee mabukhu othene a Bibilyani anovwelana na ulosula. Mofwanafwana na simeti inogumani-a mabuloko aliwa kala chi-i la nyumba, madhu ava lemba la Maromelo 3:15 anonikami-a ira milanyu ya mabukhu othene ikale yovwelana. Milanywee njoi, Nlungu unodha ruma namavulumucha wenuo unofuna dha nonga namanami-a na othakala othene ale anom-arela. * Enala ndi maraeli-o malukulu waatu ale anomdhiveliwana Yohova!

3. N’nga ninofuna nitapanyen’ni muyofunjedha yei?

³ Muyofunjedha yei, ninofwanya vyowakula vya vyofuka vyo-arelavi vyokuza ulosi wava lemba la Maromelo 3:15: N’nga mbaani unoongiwa muulosi wen’na? N’nga ulosula unokwakwaneli-edhiwa a-vi? N’nga i-yo ninoganyali a-vi na vyevi?

4. N’nga nyowa mbaani, thitho ninoidhiwa a-vi vyevi?

⁴ Anoongiwa va lemba la Maromelo 3:14, 15, anothangani-avo “nyowa”, “mbeu ya nyowa,” “i-yana” thitho “mbeu ya i-yana.” Bibilya linonikami-a idhiwa pama mwa uliwethene  uongiwile. * Dhoweni niromeni na “nyowa.” Nyowa yaimbarimbari chaavuruwanenga vyaonga Yohova mundani mwa Edeni. Moi e-no Yohova atovelela matongelwee wa yopanduchiwa ya zelu. N’nga yopanduchiwaji mbaani? Lemba la Apokalipse 12:9 linoonga movweya pama vamwasa wen’na. Lembali linoonga ira: “Nyowa yawalila” ndi Satana Namanami-a. N’nga mbeu ya nyowa mbaani?

5. N’nga mbaani uli mbeu ya nyowa?

⁵ Bibilya laonganga vya mbeu, mopipirisa linaonga vya othene enao anothuulela venango irana vyongo ninga babiwa opipirisuo. E-no mbeu ya nyowa ndi angelo o-ororomeleya thitho atu ale mofwanafwana na Satana, anokonda Yohova Nlungu thitho runi-a atwee. Enala anothangani-avo angelo enao a-iidhe urumiwiwa dhulu muhora ya Nowa thitho atu othene othakala anoira vyongo ninga babiwa Namanami-a.—Maro. 6:1, 2; Juwau 8:44; 1 Ju. 5:19; Juda 6.

6. N’nga mwasiwa ngwan’ni “i-yana” unoongiwola kai Eva?

⁶ Va-eni dhoweni niidhiweni “vya-iyana” uongiwilula. Pyooneelatu ira kai Eva kabe. Mwasiwa ngwan’ni ninoonga e-no? Dhoweni nioneni mwasa m’mbo-i. Ulosula unoonga ira mbeu ya-iyanuo inodha “pwanya” muru wa nyowa. Ninga muonele i-yo walelene, nyowa ndi Satana wenuo uli yopanduchiwa yauzimu e-no, kavyaodeye ira mwana wa Eva oi kai ochena aode inonga. N’nga Satana, anongiwe a-vi?

7. Ninga munooni-a lemba la Apokalipse 12:1, 2, 5, 10, n’nga i-yana unoongiwa va lemba la Maromelo 3:15 mbaani?

⁷ Bukhu lomari-a la Bibilyani linoniwandela vya i-yana oongiwa va lemba la Maromelo 3:15. (Muleri Apokalipse 12:1, 2, 5, 10.) I-yanula kai wavathivano! Liye utokaana  mwedi manyaloniwee thitho muruniwee uli ichapowa ya Umwene yokaana nyenyedi 12. I-yanula atobala mwana wavakundu maningi oi ngu Umwene wa Nlungu. Umwenula ngwadhulu moi e-no i-yanula vinooneya ira ngwadhulu. Liye unoimelela ikundu ya dhulu, ya gulu la Yohova losakanyiwa naangelo ororomeleya.—Agal. 4:26.

8. N’nga ikundu yoroma ya mbeu ya i-yana mbaani, thitho ndi hora iivi yakanle liye mbewila? (Maromelo 22:15-18)

⁸ Madhu a Nlungu anonikami-a idhiwa ikundu yoroma ya mbeu ya i-yana. Mbewila yanofwanela kala yokumela muzele wa Abarahamu. (Muleri Maromelo 22:15-18.) Ninga mwaongele ulosula, Yesu akumeledi muzele wa baba ororomeleula. (Luka 3:23, 34) Mbwenye mbewila yanoofuneela kala yakopolo maningi kwaranya mutu namwasa oi yanoofuneela nonga Satana Namanami-a. Ee-no, angana vyawa 30 Yesu atozoziwa na zimu ochena. Angazoziwile atokala ikundu yoroma ya mbeu ya i-yana. (Agal. 3:16) Yesu angapiwile no venyathi-iwa, Nlungu “atom’mwari-a titimi-o na lemezo ninga ichapowa ya Umwene” thitho atomva-a “utongi wethene . . . dhulu na vailambo yavathi,” thangani-avo kopolo dhoi “anonge mabasa a Namanami-a.”—Aeb. 2:7; Mat. 28:18; 1 Ju. 3:8.

9-10. a) N’nga mbaani ali ikundu ya mbeu ya i-yana, n’nga ndi vahora iivi varomile aliwa kala mbewila? b) N’nga ninofuna nitapanyenin’ni?

⁹ Vatokala thitho ikundu yanambili ya mbeu ya i-yana. Rumiwi Paulo atoonga vya mbewila vevo vaawandenle liye ozoziwa Auyuda thitho mitundu inango ira: “Akala muli Makristau, ngunyodi mbeu ya Abarahamu owachela yotuva, movwelana na yolanyedhiwa.” (Agal. 3:28, 29) Yohova azoza Kristau na zimu ochena, mutuo unokala ikundu ya mbeu ya i-yana. E-no mbeu ya i-yana, ndi Yesu Kristu naanamatonga afwee okwakwana 144.000. (Apok. 14:1) Othenene enala anaadhilimbi-edha ira tathuulelenga noira vyongo ninga Babiwa Yohova Nlungu.

¹⁰ Namwasa oi va-eni nitoidhiwa othene aongiwile va lemba la Maromelo 3:15, dhoweni nitapanyeni mogwandela mwemo Yohova mukanle liye akwakwaneli-edhanga vang’ono navang’ono ulosi wen’na thitho mwemo munauganyalina i-yo.

11. N’nga mbeu ya i-yana ya pei-iwile a-vi “izondo”?

¹¹ Ninga mwemo ulosi wava lemba la Maromelo 3:15, munaongela aliwa, nyowa yanofwanela pei-a “izondo” ya i-yana. Vyevi vyatokwakwaneli-edhiwa vevo Satana vyairi-idhe liye Ayuda na Aroma ira tampe Mwana wa Nlungu. (Luka 23:13, 20-24) Molandana na ilonda ya izondoni yeyo inoimanani-a mutu wenda wa hora yoyeva, wukwa wa Yesu watoiri-a ira liye, a-iye ira vyongo wa hora yoyeva vevo vagona liye masiyeni wa malambo mararu.—Mat. 16:21.

12. N’nga ndi vahora iivi inofuna dha pwanyiwa nyowa, n’nga vyevi vinodha ireya a-vi?

¹² Ira ulosi wava lemba la Maromelo 3:15 ukwakwaneli-edhiwe, Yesu kaafwanela kalave masiyeni modhowa nodhowa. Mwasiwa ngwan’ni? Namwasa oi movwelana na ulosi, mbeu ya i-yana yanofwanela dha pwanya muru wa nyowa. Vyevi vyathapulela ira Yesu anoofuneela dhavenyathi-iwa wewo ali ninga ila wa ilonda ya izondoni. Thitho liye atovenyathi-iwadi. Vadambo lanararu Yesu atovenyathi-iwa na ingumi yo-okwa. Vahora ya Nlungu Yesu unodha n’nonga Satana nomkumi-elavotu. (Aeb. 2:14) Atu anofuna dhatonganga na Kristu, anodha mkami-a  vokumi-avo amwidani othene a Nlungu vailamboi enao ali mbeu ya nyowa.—Apok. 17:14; 20:4, 10. *

13. N’nga ninoganyali a-vi na kwakwaneli-edhiwa wa ulosula?

¹³ Akala muli namalaba odhivelela wa Nlungu, munoganyali na kwakwaneli-edhiwa wa ulosula. Yesu atodha vailambo yavathi ninga mutu. Liye atothonyi-edha paama makalelo a Babee. (Juwau 14:9) Moi e-no, nafunjedhanga vya Yesu ninofiya voidhiwa thitho mdhiveliwana Yohova Nlungu. Ninoganyali thitho na vya funji-idhe Yesu thitho malangi-o anovelela liye asogolelanga pingo wa Makristau malamboano. Utonifunji-a thitho vinaire i-yo ira nimsangalali-enga Nlungu. I-yo othene ninoganyali na wukwa wa Yesu wewo uli ninga pei-iwa izondoni. Moi a-vi? Yesu angavenyathi-iwile atovelela sangiree ya pereso yavadhulu ninga sembe yochena yeniyo “yanicheni-idhe umadao othene.”—1 Ju. 1:7.

14. N’nga atu tanofwanela dedi-edhela ira ulosi wa mundani mwa Edeni ukwakwaneli-edhiwe vahora yaongiwile aliwiyo? Onganimo.

¹⁴ Madhu aongile Yohova mundani mwa Edeni anothonyi-edha ira vanoofuneela vira hora ira ulosula ukwakwaneli-edhiwe wethene. Vanoofuneela thitho hora ira mbeu yolanyedhiwa ya i-yana ioneele, Namanami-a agumani-e anama-areele thitho ira vakale idana vari vamagulu menlala. Ninoganyali idhiwa vya ulosula, namwasa oi unoniwenjeli-a ira ilambo yotongiwa na Satanai inodha idanana omlambela Yohova. Vangavirile hora, Yesu atowenjeli-a thitho anama-arelee vamwasa wen’na. (Marku 13:13; Juwau 17:14) Nitoona kwakwaneli-edhiwa wa ulosi wen’na simbwasimbwa muvyawa 100 vivirilevi. Moi a-vi?

15. Mwasiwa ngwan’ni va-eni ilamboi inoidanana maningi atu a Nlungu, n’nga mwasiwa ngwan’ni kaninofwanela m’mova Satana?

¹⁵ Anga-eliwile kala Mwene muyawa ya 1914, Yesu wenuo ngu Mesiya atomkumi-ao Satana dhulu. Satana atoponyedhiwa vailamboi thitho unodedi-edha dhanongiwa. (Apok. 12:9, 12) Mbwenye kaira liye uteve kaathiwene baa-i dedi-edhanga ira adhanongiwe. Namwasa o-okaana yoira va-eni Satana ngothakaleliwa maningi thitho unothonyi-edha thakaleliwa weewo vodhimbinuela atu a Nlungu. (Apok. 12:13, 17) Vamwasa wen’na, ilamboi inoidanana maningi atu a Nlungu. Mbwenye kaninofwanela m’mova Satana naanama-arelee. Ninokala osikimiza ninga rumiwi Paulo alembile ira: “Akala Nlungu uli uikundu yi-u, mbaani unofuna runi-ana na i-yo?” (Aroma 8:31) Ninooda mroromela maningi Yohova namwasa wa moda muonele i-yo, ikundu ilukulu ya ulosi wava lemba la Maromelo 3:15, ukwakwaneli-edhiwe walelene.

16-18. N’nga vwechecha ulosi wava lemba la Maromelo 3:15, wamkami-idhe a-vi Curtis, Ursula, na Jessica?

¹⁶ Yolanyedha ya Yohova ili va lemba la Maromelo 3:15, inonikami-a vilela vyowesedha vilivyothene vinagumanena i-yo. Curtis wenuo uli mensionario wau Guam atoonga ira: “Hora dhinango ndanoolimbanana vyowesedha thitho vyosukwali-a vyevyo vyairi-a ira nda-akalenga ororomeleya wa Yohova. Mbwenye thuulela ulosi wava lemba la Maromelo 3:15, watoondikami-a ira ndidhowenave mroromela Babanga wa dhulu.” Curtis unodedi-edha hora yoi Yohova adha mali-e vyowesedha vyothene vinogumanana i-yo.

 ¹⁷ Rongola mwinango wau Bavaria dhinalee Ursula, aongile ira vwechecha lemba la Maromelo 3:15, watomkami-a ira aroromelenga ira Bibilya lavudheleliwile na Nlungu. Atoonga thitho mwemo maulosi enango othene munovwelanela aliwa na ulosula, thitho vyevi vyatomdabwi-a maningi. Liye atoonga thitho ira: “Vyatondikuza maningi ndingafunjedhile ira Yohova atoiravo yongo mombaranya ira atwee takaena idedi-edho.”

¹⁸ Jessica wau Micronesia atoonga ira: “Ndinothuulelave mwemo mwavwele miyo ndingazindiyele wahora yoyeva, ira nditofwanya imbarimbari! Ndatoidhiwa ira ulosi wava lemba la Maromelo 3:15, unaakwakwaneli-edhiwa. Vyevi vyatondikami-a idhiwa ira nyarwa dhinogumanana i-yo malamboano, kai vyafuna Yohova. Ulosula utondikami-a thitho roromela ira mlabela Yohova, unooda mkami-a mutu ira asangalalenga va-eni, noira adhafwanye ingumi yapama sogolou.”

19. Mwasiwa ngwan’ni kaninofwanela kaikela ira ikundu yomari-a ya ulosula inodha kwakwaneli-edhiwa?

¹⁹ Ninga muonele i-yo, ulosi wava lemba la Maromelo 3:15 unaakwakwaneli-edhiwa. Mbeu ya i-yana thitho nyowa, vitoidhiweya pama. Yesu wenuo uli ikundu yoroma ya mbeu ya i-yana, atoila ilondayee ya izondoni va-eni ndi Mwene wa titimi-o modhowa nodhowa. Sakuliwa waale ali uikundu yanambili ya mbeu ya i-yana, u-adhi vang’ono ira ufiye komoni. Namwasa oi ikundu yoroma ya ulosula itokwakwaneli-edhiwa, kaninokaikela navang’onovene ira ikundu yomari-a yeniyo ili pwanya muru wa nyowa, inokwakwaneli-edhiwa thitho. Atu ororomeleya anodha sangalala maningi Satana adhanongiwa! Fiyedha vahora yeniyo, kaninofwanela fooka. Nlungwi-u ngonyindeleya. Dhela mwambeu ya i-yana, liye unodha velela maraeli-o manjinji “wamaziza othene availambo yavathi.”—Maro. 22:18.