1. Movwelana na lemba la Aebere 12:1, n’nga ninofwanela iran’ni ira nimafiye komoni wa pikisano odhowa mawachela ingumi yo-omala?

 BIBILYA linofwanafwani-a ingumi ya Makristu na pikisano otamanga. Atu enao anoganyali vapikisano anowachela yotuva ya ingumi yo-omala. (2 Timo. 4:7, 8) Ninofwanela ira yongo iliyothene inaode i-yo ira nidhowenave tamanga namwasa oi kwaranya wale nlilothene, ee-ni nili komoni wa pikisanula. Rumiwi Paulo wenuo aodile ganyali pikisano omawachela ingumi atoonga vyevyo vinanikami-e ira niode ganyali. Liye atoniwandela ira “niungule vyonyemela vilivyothene . . . ira niode tamanga movilela va pikisano uni-elele atula.”—Muleri Aebere 12:1.

2. N’nga madhu oi “muungule yonyemela iliyothene” anothapulelan’ni?

² N’nga vevo Paulo valembile liye ira “niungule yonyemela iliyothene,” athapulela ira kavali yongo iliyothene Makristau inofwanela aliwa tukula? Kabe, kaathapulela e-no. Malomwee athapulela ira ninofwanela tatila yongo iliyothene yo-ofuneya. Vyongo vyevyo vinaniimwanani-e tamanga pama thitho vinaniiri-e i-yo kala ochenyela. Ira nivilele, mombaranya ninofwanela zindiyela thitho tatila yongo iliyothene yo-ofwanelela yeniyo inaniiri-e nyemeliwa. Mbwenye vahora inoira i-yo vyevyo kaninofwanela tatila vyongo vyofuneya tukula namwasa oi naira ee-no vinooda niiri-a ira na-akale ofwanelela va pikisanula. (2 Timo. 2:5) N’nga pivyongo viivi vinofwanela i-yo tukula?

3. (a) Movwelana na lemba la Agalatiya 5:6 n’nga ninofwanela tukulan’ni? (b) N’nga chini inofuna i-yo tapanya muyofunjedha yei, N’nga mwasiwa ngwan’ni?

³ Muleri Agalatiya 6:5. Paulo atoonga yongo inofwanela i-yo tukula. Liye atolemba ira “uliwethene unofwanela tukula tolwee.” Veva Paulo aonga vya vyongo vyevyo Yohova vinodedi-edhela liye ira uli wethene wa i-yo aviirengana, vyevyo  mutu mwinango vya-anaode liye niirela. Muyofunjedha yei, ninodha ona ira “tolwi-u” unothangani-avo vyongo viivi thitho mwemo munatukulele i-yo toluo. Thitho ninodha ona vyongo vinango vitukunle i-yo thitho mwemo munavitatilele i-yo. Tukula tolwi-u thitho tatila vyongo vinango vyevyo vili vyo-ofuneya, unodha nikami-a ira niode ganyali vapikisano odhowa mawachela ingumi.

4. N’nga mwasiwa ngwan’ni madhu aongile i-yo oi ninodha mlambela Yohova modhowa nodhowa kai onyemela? (Muone thitho iruthiruthi.)

⁴ Yolanyedha yoi ninodha mlambela Yohova modhowa nodhowa. Hora yadhivelela i-yo wa Yohova natolanyedha ira ninodha mlambelanga thitho irana ifunelwee. Ninofwanela kwakwaneli-edha vyalanyedhile i-yovyo. Irana vyongo vyevyo vilanyedhile i-yo vyoi ninodha mlambela Yohova ndi izo ilukulu. Mbwenye kai yochenyeli-a. Thitho Yohova anipanduchile ira niirengana ifunelwee. (Apok. 4:11) Liye anipanduchile muifwanafwani-oyee thitho na rima ofuna mlambela. Vyo-arelavovyee pyoi ninokala vauxamwali na liye thitho ninosangalala irana ifunelwee. (Sal. 40:8) Kwaranya vyothene, nairangana ifunelo ya Nlungu thitho m’sazi-edha Mwanee, “ninodidili-iwa.”—Mat. 11:28-30.

5. N’nga chini inaukami-eni kwakwaneli-edha yolanyedha inyu yoi munodha mlambela Yohova modhowa nodhowa? (1 Juwau 5:3)

 ⁵ N’nga munatukule a-vi tolula? Vatokala vyongo vinli vyevyo vinaukami-eni. Yoroma, mudhowenave mdhiveliwana maningi Yohova. Munooda irana vyevyo vothuulela vyongo vyapama vyevyo vikanle liye auirelangani thitho maraeli-o anofuna liye dhauva-ani sogolou. Mwam’dhiveliwangana maningi Nlungu paevo vinokala aliwa vyo-orucha ira muode m’vwela. (Muleri 1 Juwau 5:3.) Yanambili, mum’sazi-edhenga Yesu. Mofwanafwana na Yesu, mum’vepenga Yohova ira auva-eni kopolo thitho hora dhothene muthuulelenga idedi-edho yodhawa mawachela ingumi yo-omala. (Aeb. 5:7; 12:2) Vevo vanom’dhiveliwananyo maningi Nlungu thitho m’sazi-edha Mwanee, munodha kwakwaneli-edha yolanyedha inyu yoonga ira munongo mlambela modhowa nodhowa.

6. Mwasiwa ngwan’ni ninofwanela kwakwaneli-edhanga vizo vi-u vya banjani? (Muone thitho iruthiruthi.)

⁶ Vizo vi-u vya banjani. Vapikisano wi-u odhowa mawachela ingumi, ninofwanela mdhiveliwana maningi Yohova na Yesu kwaranya mwemo munodhiveliwana i-yo abali-u. (Mat. 10:37) Mbwenye vyevi kavinothapulela ira ninofwanela pwaza vizo vi-u vya banjani kalanga ninga pivizo vyevyo vinaniiri-e ira na-aodenga msangalali-a Nlungu na Kristu. Malomwee ira nikale orumeleya wa Nlungu na Kristu ninofwanela kwakwaneli-edha vizo vi-u vya banjani. (1 Timo. 5:4, 8) Nairangana vyevi, ninodha kala osangalala. Thitho Yohova atoosaka-edha vyoi banja likalenga losangalala, akala lombwana na i-yanee tanodhivelana thitho lemezana, anamabala taadhiveliwengana thitho afunji-a a-imiwa thitho a-ima tavwelenga anamabaliwa.—Aef. 5:33; 6:1, 4.

7. N’nga munakwakwaneli-edhe a-vi izo inyu ya banjani?

⁷ N’nga munatukule a-vi toluo? Mo-obala izo inanyo banjani, mu-indi-edhenga basa zelu dhofwanyeya Bibilyani malo moiranga vyongo movwelana na mwemo munoonelanyo vyongo, ikalelwinyu venango atu oidhiwa vyongo vinoonga aliwa. (Sang. 24:3, 4) Thitho mu-indi-edhenga basa mabukhwi-u. Mabukhwala anoonga vyevyo vinairenyo vo-arela makundo a Bibilyani. Myasa ya miru yoi “Mfundo Zothandiza Mabanja” mutokala makundo okami-a mabanja, anamabala thitho a-ima va nyarwa dhinogumanana aliwa malamboano. b Mukalenga osikimizela a-rela makundo a Bibilyani masiki atu abanjani mwinyu ta-a-arelenga. Vyevi vinodha kami-a banja linyu thitho Yohova unodha uraeli-ani.—1 Pe. 3:1, 2.

8. N’nga vyosakula vi-u vinanikuze a-vi?

⁸ Vyo-arelavo vinodha namwasa wa vyongo visakunle i-yo. Yohova utoniva-a ufulu osakula vyoira thitho liye unofuna ira nisangalalenga na vyo-arelavo vyapama vyodha namwasa wa vyongo visakule i-yo mofwanelela. Mbwenye liye kananivunele va vyo-arelavo vinodha namwasa o-osakula vyongo pama. (Agal. 6:7, 8) Ee-no ninorumelela vavyo-arelavo vinodha namwasa o-osakula vyongo mwapama, namwasa o-oonga mothuulela pama, thitho namwasa oirana vyongo motamanga rima. Movwelana na vyongo visakunle i-yo ithuulela rimi-u inooda niruchi-a. Mbwenye idhiwa ira ninokaana vyo-arela vavyongo vinosakula i-yo, unooda nikami-a ira niode onga madawi-u, nisaka-edhe vyongo vidawi-idhe i-yo thitho na-aviwelele okoka. Irana vyevi unonikami-a ira nidhowenave tamanga vapikisano odhowa mawachela ingumi yo-omala.

9. N’nga chini inaukami-eni ira mwa-asakulenga vyongo modaweya? (Muone thitho iruthiruthi.)

 ⁹ N’nga munatukule a-vi toluo? Akala ira kamunaode chinja vyosakula vyodaweya vyairilenyo, murumelenga mwemo vyongo mukalele aliwa vainguminyu vachineneeva. Idhiwani ira kamunaode chinja vyongo viireile ndulimu. Kamutatilenga hora na kopolo dhinyu vodhilimbi-edha dhioni-a kala mutu olongomana venango viomba landu vavyongo vyevyo vya-asakunlenyo pama. Malonimwee murumelenga vyongo vidawi-idhenyo novilimbi-edha irana vyongo vinaodenyo ira vyongo viwelele kala pama. Akala ira munodhiomba landu namwasa wa vyongo vyadawi-idhenyo mulobelenga wa Yohova modhiyevi-a, rumela vyongo vidawi-idhenyovyo thitho mvepa Yohova ira auleveleleni. (Sal. 25:11; 51:3, 4) Mupepesenga waatu enao aadawelenyo. Muvepenga andimuwa ira taukami-eni akala ira pyofuneya. (Yak. 5:14, 15) Mufunjedhenga vavyongo vyadawi-idhe nyo thitho mudhilimbi-edhenga ira mwa-aviwelele. Mwairangana vyevi munooda kala osikimiza ira Yohova unodha uvwelani tangaranga thitho unodha ukami-ani.—Sal. 103:8-13.

10. Mwasiwa ngwan’ni ninooda onga ira dedi-edhela vyongo vyo-oodeya ndi tolo onyemela? (Agalatiya 6:4)

¹⁰ Dedi-edhela vyongo vyo-oodeya. Nadedi-edhelanga vyongo vyo-oodeya vovifwanafwani-edha naatu enango, ninooda nyemeliwa. (Muleri Agalatiya 6:4.) Akala ira hora dhothene ninodhifwanafwani-edha naatu enango, ninooda roma kaana rima wa sanje na wa pikisano. (Agal. 5:26) Dhilimbi-edha ira niode irana vyongo vyevyo viirile atu enango, vinooda niiri-a kala okanyi-edheya irana vyongo vya-anooda i-yo irana votukulela dodoliso li-u venango mwemo vyongo mukalele aliwa vaingumi-u. Mbwenye akala ira “yongo yadedi-edhawee itoimwananeya inobuleli-a.” N’nga ninadhivwe a-vi akala ninofunechecha irana yongo yeyo ya-anaode i-yo? (Sang. 13:12) Irana vyevyo unooda ninongela kopolo dhi-u thitho vinodha niiri-a ira nirucheyenga tamanga vapikisano odhowa mawachela ingumi.—Sang. 24:10.

11. Chini inaukami-eni ira mwa-adedi-edhelenga vyongo vyo-oodeya?

¹¹ N’nga munatatile a-vi yonyemela yei? Kamudedi-edhelenga ira muirenga vyongo vinjinji kwaranya vyevyo Yohova vinodedi-edhela liye. Liye kanodedi-edhela ira mumva-enga vyongo vya-ananyo. (2 Akor. 8:12) Muidhiwenga ira Yohova kanofwanafwani-edha vyongo viirilenyo na vyongo viirile atu enango. (Mat. 25:20-23) Vyongo vinoona liye kala vyavadhulu pyoi munomlabela na rima othene, muli ororomeleya thitho munovilela. Murumelenga modhiyevi-a ira kamunaode irana vyongo vinango mwachineneeva namwasa wa tunga linyu, manungwinyu thitho mwemo vyongo mukalele aliwa vainguminyu. Mofwanafwana na Barzillai, mukalenga okozeya konda maurumiwi enango akala ira manungwinyu katili pama. (2 Sam. 19:35, 36) Mofwanafwana na Mose, murumelenga kami-iwa thitho mugawedhenga mabasa atu enango akala pyofuneya. (Ekis. 18:21, 22) Dhiyevi-a ninga weu unodha ukami-ani ira mwa-airengana vyongo vyevyo vya-anaodenyo vyevyo vinauchenyeli-eni vapikisano odhowa mawachela ingumi.

12. N’nga i-yo ngunoiri-a ira atu enango tasakulenga vyongo modaweya? Muongemo.

¹² Dhiomba landu namwasa oi atu enango katisakunle pama vyongo. Kaninaode sakulela atu enango vyoira thitho kai hora dhothene vevo vanofuna i-yo avunela ira ta-agumanena nyarwa dhodha namwasa osakula vyongo modaweya. Mofwanafwani-a, mwana unooda sakula i-yachi mlambela Yohova. Vyevi vinoiri-a ira anamabalao tavivwelenga tangaranga maningi. Thitho anamabalao taviombanga landu namwasa oi mwaniwa utosakula vyongo modaweya, anokala  tangatukunle tolo onyemela. Wen’na kai tolo wenuo Yohova unofuna liye ira anamabala tautukulenga.—Aroma 14:12.

13. N’nga anamabala anaire a-vi akala mwaniwa utosakula vyongo mo-ofwanelela?

¹³ N’nga munatatile a-vi yonyemela yei? Muthuulelenga ira Yohova atooniva-a i-yo othene ufulu osakula thitho unorumeli-a ira uliwethene asakulenga vyoira ekene. Vyevi vinothangani-avo sakula mlambela venango a-mlambela. Yohova unoidhiwa ira anamabala kai olongomana mbwenye liye unofuna ira muirengana vyongo vyevyo vinaodenyo. Izo yosakula vyoira chamwanuo a-kala inyu. (Sang. 20:11) Mbwenye ninga namabala hora dhinango munooda vikumbanyedha vavyongo vyadawi-idhenyo. Akala ti-eeno mum’mwandelenga Yohova mwemo munovwelanyo thitho mum’vepenga ira auleveleleni. Liye utoidhiwa ira kamunaode chinja vyongo viireilevyo. Vahora imbo-ive, liye kanodedi-edhela ira mum’vunelenga mwaninyuo ira aimwanane a-nda vyongo vidhanle liye. Muthuulelenga ira akala mwaninyuo utodhilimbi-edha ira awelele wa Yohova, liye unom’mwachela mofunechecha.—Luka 15:18-20.

14. N’nga mwasiwa ngwan’ni dhiomba landu maningi ngutolo unofwanela i-yo utatila?

¹⁴ Dhiomba landu maningi. Pyovweya ira nadawi-a ninodhiomba landu. Mbwenye dhiomba landu maningi kai tolo wenuo Yohova unofuna liye ira niodenga utukula. Dhiomba landu ngutolo unofwanela i-yo utatila. N’nga ninaidhiwe a-vi ira ninodhiomba landu maningi? Akala nitoonga yodawa yi-u no chinyuwa thitho ira vyongo vyothene vyofuneya ira na-awelele okoka yodawiyo, nikalenga osikimiza ira Yohova utonilevelela yodawiyo. (Mayirelo 3:19) Nairana vyevi, Yohova kanofuna ira nidhowenganave dhiomba landu. Liye unoidhiwa ira kalela dhiombanga landu koopi-a. (Sal. 31:10) Akala ninodhivwela tangaranga mokwaranyi-a madile, ninooda i-yachi tamanga vapikisano odhowa mawachela ingumi.—2 Akor. 2:7.

15. N’nga chini inanikami-e ira na-adhiombenga landu maningi? (1 Juwau 3:19, 20) (Muone thitho iruthiruthi.)

¹⁵ N’nga munatatile a-vi yongo yonyemelai? Mwadhiombanga landu maningi muthuulelenga  likundo loi Nlungu “unoleveleladi.” (Sal. 130:4) Liye alevelela atu enao tachinyuwile kumela vathi varima unoalanyedha ira: “Kandinodha vithuulelave okoka vyodawa vinyu.” (Jer. 31:34) Vyevi vinothapulela ira Yohova kanodha uombani okoka landu namwasa wa madawo enao airilenyo ndulimu. Ee-no kamuonenga ira nyarwa dhedho dhagumanenanyo namwasa oi mwatodawi-a nguumboni oi Yohova kanoulevelelani thitho kamudhinyanyuwelenga mwekene venango vilanga namwawa wa vyongo vyaireile ndulimu neri-a vyevi vinodha uiri-ani ira mwa-airengana vyongo vinjinji vomlambela Yohova malamboano. Yohova kanokalelave thuulela vya madawinyu thitho nyo kamunofwanela athuulelanga.—Muleri 1 Juwau 3:19, 20.

16. Mofwanafwana naatu ali vapikisano otamanga, n’nga chini inofwanela i-yo zindiyela?

¹⁶ Vevo vanotamanga i-yo vapikisano odhowa mawachela ingumi, ninofwanela “tamanga mundhila yoi nimawachele yotuviyo.” (1 Akor. 9:24) Ninooda irana vyevi akala nitozindiyela tolo unofwanela i-yo tukula thitho vyongo vyonyemela vinofwanela i-yo tatila. Muyofunjedha yei nitotapanyani vifwanafwani-o vyoyeva baa-i va vyongo vyevyo vinofwanela i-yo tukula thitho vinofwanela i-yo tatila. Mbwenye vatokala vyongo vinango thitho ndi vinjinji. Yesu atoonga ira “ninooda lemweya nodya maningi, umwa maningi na vyokumbanyi-a vyaingumi.” (Luka 21:34) Vyevi thitho malemba enango anooda ukami-ani idhiwa vinofwanelanyo chinja vahora inotamanganyo vapikisano odhowa mawachela ingumi yo-omala.

17. Mwasiwa ngwan’ni ninooda kala osikimizela rima ira ninodha ganyali vapikisano odhowa mawachela ingumi yo-omala?

¹⁷ Ninooda kala osikimizela rima ira ninodha ganyali pikisano odhowa mawachela ingumi namwasa oi Yohova unodha niva-a kopolo dinofuneela i-yo. (Esaya 40:29-31) Mudhowenave tamanga. Musazi-edhenga ifwanafwani-o ya Paulo wenuo atamangile mwathindhi ira amafwanye yotuva yeniyo yali sogolowee. (Afil. 3:13, 14) Kalivo mutu unofuna utamangelani vapikisanula, mbwenye Yehova unodha ukami-ani ira muode ganyali. Liye unodha ukami-ani tukula tolwinyu nothathila vyongo vyevyo vili vyonyemela. (Sal. 68:19) Voi Yohova uli uikundu inyu, liye unodha ukami-ani ira muode tamanga movilela no ganyali yotuva ya ingumi yo-omala!