Mumwasuo natoofunjedha ira vatokala mwasa m’mbo-i ofuneya maningi wenuo unokuza atu vambo-i na angelo. Mwasee ali oonga cheni-iwa wa dhina la Yohova. Mwasa oonga Utongi wa Yohova, venango funa idhiwa akala Nlungu unotonga pama venango kabe, ndiikundu ya mwasa nlukulu. Mofwanafana na vyevi, mwasa oi atu anooda kala ororomeleya wa Nlungu venango kabe ndiikundu inango thitho ya mwasa nlukulu.

Mwasiwa ngwan’ni va-eni ninoonga maningi ira mwasa nlukulu ngoonga vya dhina la Yohova thitho cheni-iwawee? Dhoweni nitapanyeni myasa miraru.

Yoroma, Satana atoothakali-a dhina la Yohova venango ira limbililee, mundani mwa Edeni. Yofuka yafukile Satana m’fuka Eva mowenjela, yathonyi-edha ira Yohova Nlungu ali waidyani wenuo ava-idhe Adamu na Eva malamulo o-olongomana. Moi e-no Satana mo-ovira kundu atooruni-a vyevyo Yohova vyaongile liye thitho voirana vyevyo, atoothonyi-edha ira Nlungu ngonama. Veva liye atoonyoza dhina la Yohova. Voi e-no atookala “Namanami-a” dhina lelo linothapulela “mulimbo nukedha.” (Ju. 8:44) Namwasa oi Eva atoororomela vyonama vya Satanavi, kaavwele Nlungu thitho vyevyo vyatoothonyi-edha ira kaafuna ira Nlunguwo akale Namatongee. (Maro. 3:1-6) Fiyedha va-eni, Satana unave nyoza dhina la Nlungu nomwadhanga vyonama vyoonga Nlungu. Wa atu enao anovwela vyonamavi, hora dhinjinji vinokala vyowarucha m’vwela Yohova. Ee-no wa atu a Nlungu nyoza dhina la Yohova ku-alongomana othakala maningi. Wen’na ngumwasa nlukulu unoiri-a nyarwa na vyongo vyothakala maningi vailambo yothene yavathi.

Yanambili, ira akami-e vyopanduchiwavyee vyothene, Yohova ngosikimizela rima ira asikimizeli-e ira dhinalee tochena. Yei ndi yongo yofuneya maningi wa Yohova. E-no liye atoonga ira: “Ndinodha cheni-a dhina langa nlukulu.” (Zakiy. 36:23) Thitho Yesu atoothonyi-edha pama yongo yofuneya maningi yeyo arumiwi ororomeleya othene a Yohova inofuna aliwa lobelanga mumalobelwiwa vevo vaongile liye ira: “Dhina linyu licheni-iwe.” (Mat. 6:9) Moweli-edha weli-edha Bibilya linothonyi-edha funeya olemeza dhina la Yohova. Kathuulelani vifwanafwani-o vyoyevavi: “M’va-eni Yohova titimi-o lofwanelela dhinalee.” (1 Limb. 16:29; Sal. 96:8) “Ombani nyumbo dhotitimi-a dhinalee.” (Sal. 66:2) “Ndinodha lemeza dhina linyu modhowa nodhowa.” (Sal. 86:12) Imbo-i mwa hora yeniyo Yohova vaongile liye ekene khumela dhulu, ali kachisini wu Yerusalemu weo Yesu vyaongile liye ira: “Baba lemezani dhina linyu.” Vowakula Yohova aongile ira: “Nditolilemeza thitho ndinodha dhowanave lilemeza.”—Ju. 12:28. a

Yaneraru, Hora dhothene ifunelo ilukulu ya Yohova inodhakala yovwelana na dhinalee, venango limbililee. Kathuulelani vi: Chini inofuna dhaireya vasogolo va vyowesedha vyomari-a vinofuna dhaireya Utongi wa vyawa 1.000 wa Kristu udhamala? N’nga atu thitho angelo anodha  dhowanave gawaneya vamwasa nlukulu oonga cheni-iwa wa dhina la Yohova? Ira nifwanye vyowakula dhoweni nithuuleleni vikundu vinli vya mwasa nlukuluo, vyevyo vili roromeleya wa atu thitho Utongi wa Yohova. N’nga atu athonyi-edhe ira mbororomeleya anodha dhowanave wesedhiwa ira tathonyi-edhe ira mbororomeleya? Kabe. Aliwa anodha kala olongomana thitho tangawesedhiwile wale mokwakwanela no wachela ingumi yo-omala. N’nga atu na angelo anodha dhowanave kaikela venango gawaneya vamwasa oi Yohova Ngunamatonga wapama? Kabe. Vofiya vahora yeniyo, othene dhulu na vailambo yavathi anodha vwelananga thitho rumelela ira Yohova ngofwanelela thonga. N’nga mwasa oonga vya dhina la Yohova?

Fiyedha vahora yeniyo dhina la Yohova linodha kala lingamadhi cheni-iwa. Mbwenye linodha dhowanave kala lofuneya maningi wa arumiwee othene ororomeleya dhulu na vailambo yavathi. Mwasiwa ngwan’ni? Namwasa oi aliwa anodha dhowanave ona Yohova airangana vyongo vyodabwi-a. Kathuulelani vi: Namwasa oi modhiyevi-a Yesu unodha weli-edha Utongi wa Yohova, Nlungu unodha “kala vyongo vili vyothene wa mutu uliwethene.” (1 Akor. 15:28) Vasogolo va vyevi, atu availambo yavathi anodha sangalala na “ufulu wa titimi-o wa a-ima a Nlungu.” (Aroma 8:21) Thitho Yohova unodha kwakwaneli-edha ifunelo yana liye wa hora indendai yoi othene dhulu na vailambo yavathi, takale mubanja nlukulu lovwelana.—Aef. 1:10.

N’nga vyevi vinodha kuza a-vi banja la Yohova dhulu na vailambo yavathi? Mo-okaikela, ninodha dhowanave funechecha titimi-a dhina lobaleya la Yohova. Mulimbo lemba masalimo Davide atoovudheleliwa lemba ira: “Araeli-iwe Yohova Nlungu, . . . Liraeli-iwe dhinalee la titimi-o modhowa nodhowa.” (Sal. 72:18, 19) Ninodha dhowanave fwanya myasa va-eeni fiyedha modhowa nodhowa dhoniiri-a m’lemeza Yohova.

Dhina la Yohova linoimelela yongo iliyothene yokuza liye. E-no linonithuucha simbwasimbwa vyoonga udhivelee. (1 Ju. 4:8) Hora dhothene ninodha thuulelanga ira udhivela watom’muiri-a Yohova ira anipanduche, avelele sembe yoombolana thitho athonyi-edhe ira Utongee ngolongomana na waudhivela. Mbwenye ninodha dhowanave ona Yohova athonyi-edhanga udhivela wa vyopanduchiwavyee. Ninodha funechecha kala vauxamwali olimba na Babi-u thitho omba nyumbo dhotitimi-a dhinalee.—Sal. 73:28.