1. N’nga mufunji-iwile vyoi a-vi vyoonga Namapanduchi-u?

AKALA ira muulukulele mubanja la Mboni dha Yohova, vinooni-a ira mwaromile funjedha vinoonga Yohova mungali mwana. Mwatofunji-iwa ira liye ngu Namapanducha, utokaana makalelo apama thitho utokaana ifunelo yapama vyokuza atu.—Maro. 1:1; Mayir. 17:24-27.

2. N’nga atu enango anaona a-vi atu enao anororomela vyoi utokala Namapanducha?

² Mbwenye atu anjinji katinororomela ira Nlungu utokalao thitho ira nguliye upanduchile vyongo vyothene. Malo mwa vyevyo anororomela ira ingumi yate kalao okene thitho mwavang’ono navang’ono vyaingumi vyo-orucha vwechecha vyate sanduwa kala vyaingumi vyorucha vwechecha. Enango mwaatu anororomela vyevi, mbaatu ofunjedha vinjinji. Aliwa anoonga ira siyensiya inooni-a ira vinoonga Bibilya kai vyaimbarimbari thitho ira atu enao anororomela ira utokala Namapanducha mbo-ofunjedha, o-okaana zelu thitho o-orucha pupwi-iwa.

3. Mwasiwa ngwan’ni pyofuneya ira nilimbi-e iroromelo yi-u?

³ N’nga vyevyo vinoonga atu enango ovweya vinododomi-a vyevyo vinofunjedha i-yo vyoonga Yohova Namapanduchi-u waudhivela? Vinonyindela idhiwa mwasee unaroromela i-yo ira Yohova ngu Namapanducha. N’nga ninororomela vyevi namwasa oi nate wandeliwavo venango sakasaka va i-yo okene i-yo fwanya umboni? (1 Akor. 3:12-15) Akala nili Mboni wa hora injinji yoi a-vi i-yo othene ninofuneela dhowanave limbi-a iroromelo yi-u. Nairangana vyevi kaninodha dimeli-iwa na “zelu dhiwa, na vilemeelelo vyonami-a vyevyo vinofunji-a atu oruni-a madhu a Nlungu.” (Akol. 2:8; Aeb. 11:6) Vofuna nikami-a ira na-adimeli-iwe mu yofunjedha yei ninodha tapanyani 1) mwasee atu anjinji wa-anaroromela aliwa ira utokala Namapanducha, 2) vyevyo vinaire i-yo ira niroromelanga vinjinji Yohova  Namapanduchi-u, thitho 3) vyevyo vinaire i-yo ira nidhowenave kaana iroromelo yolimba.

4. Movwelana na lemba la Aebere 11:1, n’nga Bibilya linoonga ira iroromelo chini?

⁴ Atu enango anothuulela ira kaana iroromelo unothapulela roromela vyongo vyevyo vya-aana imbarimbari. Mbwenye movwelana na vyevyo vinaonga Bibilya yeniyo kai iroromelo yaimbarimbari. (Muleri Aebere 11:1.) Lembali linooni-a ira mutu unororomela vyongo vyo-oneya vyevyo vili vyaimbarimbari ninga Yohova Yesu thitho Umwene wa dhulu na mwasa oi nguumboni osikimizeleya. (Aeb. 11:3) Wa Mboni mwinango wenuo uli oidhiwa siyensiya unoonga ira: “Vyevyo vinororomela i-yo pyaimbarimbari thitho kavinoruni-ana na siyensiya.”

5. Mwasiwa ngwan’ni atu anjinji anaroromela ira vyongo kavite panduchiwa?

⁵ Venango ninooda dhifuka ira, n’nga akala vatokala imbarimbari yosikimizeli-a ira vatokala Namapanducha mwasiwa ngwan’ni atu katinaroromela ira Nlungu utokalao? Mwasa unango ngoi atu enango katinosakasaka vaoka ira tafwanye upamiwa. Robert wenuo va ee-ni ngwa Mboni dha Yohova unoonga ira: “Voi xikolani katinofunji-a ira vyongo vite panduchiwa miyo ndathuulela ira vite kalao okene. Ndanororomelave vyevi fiedha vevo vaguman’nena miyo wa Mboni dha Yohova wenuo andiwandele likundo lovweya pama la Bibilyani losikimizeli-a ira vyongo vyate panduchiwa. Vahora yeniyo choi ndali ndangana vyawa 20.” *—Onani kwadru loi, “ malangi-o wa anamabala.”

6. Mwasiwa ngwan’ni atu enango tanoruni-a ira utokala Namapanducha?

 ⁶ Atu enango, katinororomela ira utokala Namapanducha namwasa oi anororomela vyongo vyevyo vinoona aliwa baa-i. Namwasa wa vyevyo, katinororomela vyongo vya-anaona aliwa ninga kopolo dhinokami-a ilambo yavathi ira vyongo vikaena ingumi vyevyo vina imbarimbari yoi vitokalaodi. Tundu wa iroromelo yeniyo iongiwile Bibilyani itokaana imbarimbari “oneya wa vyongo vyaimbarimbari, angalive ira kavinaoneya.” (Aeb. 11:1) Inofuneeleya kukaana thindhi thitho hora yofunjedha ira nifwanye imbarimbari yen’na vaoka. Mbwenye atu anjinji katinofuna irana vyevi. Mutu wenuo a-anasakasaka ira afwanye imbarimbari yosikimizeleya unooda onga ira Nlungu kalio.

7. N’nga atu othene ofunjedha anororomela vyoi Nlungu ngwenuo upanduchidhe vyongo vyothene? Onganimo.

⁷ Vanduli vosakasaka imbarimbari yooni-a vyevi alimbo sakasaka vyongo tatosikimizela ira Nlungu ngu Namapanducha wa vyongo  vyothene. * Mofwanafwana na Robert, venango atu enango tanororomela ira kuli Namapanducha na mwasa oi universidadini katinofunji-a ira vyongo vite panduchiwa. Mbwenye anamasakasaka anjinji, tatofunjedha vyoonga Yohova thitho anomdhiveliwana. Mofwanafwana na anamasaka enala i-yo othene ninofwanela dhilimbi-edha ira nilimbi-e iroromelo yi-u akala nili ofunjedha venango kabe thitho kavali unaniirele vyevi.

8-9. N’nga va ee-ni ninofuna nitapanyeni yofuka iivi? N’nga funjedha vyongo dhela mwa vyopanduchiwa unanikami-e a-vi?

⁸ N’nga ninaire a-vi ira niroromelenga ira utokala Namapanducha? Dhoweni nitapanye ndhila 4.

⁹ Nifunjedhenga vyongo dhela mu vyopanduchiwa. Ninooda limbi-a iroromelo yi-u nakaangana chidwi na vyongo ninga vinyama, vyomela thitho nyenyedi. (Sal. 19:1; Esaya 40:26) Mwafunjedhanga vinjinji voonga vyongo vyevi paemo vanakaenanyo imbarimbari yokwakwanela yoi Yohova ngu Namapanducha. Mu mabukwi-u munofwanyeya myasa injinji inoonga vyongo vyo-iyana i-yana vya vyopanduchiwa. Mwafunjedhanga kamulupenga yasa dhedhi masiki muonenga ira pyorucha vwechecha. Mudhilimbi-edhanga ira mufunjedhevo vyongo vinango. Thitho kamudiwale onelanga va saiti-u ya jw.org mavidiywi-u osangalali-a oonga vya vyopanduchiwa enao akadhi i-yo nionelanga vamigumanoni ya gawo muvyawa vivirilevi.

10. Onani ifwanafwani-o ya mwemo vyongo vyopanduchiwa munooni-edha aliwa ira utokala Namapanducha. (Aroma 1:20)

¹⁰ Mwafunjedhanga vyoonga vya vyopanduchiwa Muthuulelenga vyongovyo vinoufunji-ani aliwa voonga vya Namapanducha. (Mueri Aroma 1:20.) Mwaifwanafwani-o, venango mutoidhiwa ira wenjedhela ka-a unokami-a vyongo vyaingumi, dhuwa linokumi-a njeza yeniyo inaode nonga vyongo. I-yo ninofuneela vuneliwa ira njeza yen’na ya-anipei-e thitho ninovuneliwadi. N’nga ninovuneliwa moi a-vi? Ilambwila itokaana mwela wa dhuludhulu unayevi-a kopolo ya njeza yen’na. Njeza yononga vyongo yawenjedheleya mwela thitho unowenjedheleya. N’nga veva, nyo kamunarumela ira vatokala mwinango unairi-a vyevi uli Namapanducha wazelu thitho waudhivela?

11. N’nga munafwanye uuvi makundo oukami-ani ona ira vyongo vyate panduchiwa? (Onani kwadru loi, “ Vyongo vyonikami-alimbi-a iroromelo yi-u.”)

¹¹ Munooda fwanya makundo manjinji oukami-ani ona ira vyongo vite panduchiwa va Watch Tower Publications Index venango sakasaka va saiti-u ya jw.org. Venango munodhiveliwana roma leri myasa thitho onela mavidiyo oonga ira “Kodi Zinangochitika Zokha?” Mavidiyo thitho myasadhi kadhinokala dholapa thitho vinoonga makundo enao anauri-eni kaana chidwi voonga vya vinyama thitho vyopanduchiwa vinango. Thitho mutokala vifwanafwani-o vya vyongo vyevyo alimbo idhiwa vyongo visasa-edhile aliwa vosazi-edha vyopanduchiwa.

12. N’nga pivyongo vinango viivi vyevyo vinofwanela i-yo vithuulelanga naleringa Bibilya?

¹² Funjedha Bibilya. Osakasaka oidhiwa vyongo mwinango um’mongile i-yo mu ndima 4, voroma kaaroromela ira Nlungu utokalao. Mbwenye vangavirile hora liye atoroma roromela. Liye unoonga ira: Kai ira ndate roma wene roromela na mwasa ofunjedha  vya siyensiya mbwenye na mwasa oi ndatofunjedha Bibilya mopwasedha. Pyovweya ira mutoidhiwa walelene vyongo vyaimbarimbari vyevyo vinofunji-a Bibilya. Mbwenye ira mumroromelenga vinjinji Namapanducha, munofwanela dhilimbi-edha funjedha madhu a Nlungu. (Yoswa 1:8; Sal. 119:97) Mofwanafwani-a muthuulelenga mwemo Bibilya munoongela aliwa pama vyongo vyevyo viireile walelene. Muthuulelenga thitho vyoro-edha novwelani-a na myasa dhinango. Irana vyevi unodha ukami-ani ira muroromelenga vinjinji ira vite panduchiwa na Nlungu waudhivela thitho wazelu wenuo uiri-idhe ira Bibilya lilembiwe. *—2 Timo. 3:14; 2 Pe. 1:21.

13. N’nga chiifwanafwani-o imbo-i iivi yeniyo inaoni-a ira ninofwanya zelu m’madhu a Nlungu?

¹³ Mwafunjedhanga madhu a Nlungu munodha ona ira malangi-o ofwanyeya Bibilyanimo mbokami-a vinjinji. Mofwanafwani-a, walelene Bibilya, latowenjeli-a ira dhiveliwana kobiri koopi-a thitho vinomdhi-edha mutu “nyarwa vinjinji.” (1 Timo. 6:9, 10; Sang. 28:20; Mat. 6:24) N’nga yowenjeli-a yen’na ino-indave basa malamboano? Buku n’nango lelo linoonga mathuulelo aatu linoonga ira: “Atu anjinji enao anodhiveliwana kobiri katinokala osangalala thitho anorucheya mathuulelo vinjinji. Angalive ira atu enao anofunafuna tangan’na kobiri dhinjinji tanoira vyongo mo-okala mwapama thitho anogumanana vyorucha vinjinji vyokuza ingumiwa.” Veva ninooda ona ira vyevyo Bibilya vinowenjeli-a aliwa ira na-adhiveliwengana kobiri, pyokami-a. N’nga mbamakundo enango a Bibilyani aavi enao aoni i-yo ira mbokami-a? Nasimbanga vinjinji malangi-o a Bibiblyani paevo vanonyindela i-yo vinjinji zelu dha Namapanduchi-u waudhivela dhedho dhinokala dhokami-a hora dhothene. (Tiy. 1:5) Nairangana vyevi ninodha kala osangalala vinjinji.—Esaya 48:17, 18.

14. N’nga mwafunjedha Bibilya munaidhiwen’ni vyoonga Yohova?

¹⁴ Mufunjedhenga na ifunelo loi mum’mwidhiwe Yohova. (Juwau 17:3) Mwafunjedhanga malemba, munodha roma ona makalelo enao ana liye anooneela pama dhela mu vyongo vipanduchile liye. Funjedha makalelo a Yohova unonikami-a sikimizela ira liye utokalaodi. (Ekis. 34:6, 7; Sal. 145:8, 9) Mwam’mwidhiwa pama Yohova, paevo vanomroromelanyo vinjinji mdhiveliwana thitho uxamwalinyu la liye unokala olimba.

15. N’nga wandela atu enango vyevyo vinororomelanyo kokami-a moi a-vi?

¹⁵ Muwandelenga atu enango vyevyo vinororomelanyo voonga Nlungu. Mwairangana vyevi iroromelwinyu inodha kala yolimba. N’nga akala ira mutu wenuo umlalelenyo utouvepani ira mum’mwandele umboni ooni-a ira Nlungu utokalao mbwenye nyo kamwiidhi mwemo munam’mwakulelenyo? Musakasakenga makundo a malembani enao anoongiwa mu mabukwi-u mwamala nyo tapanya na mutuo. (1 Pe. 3:15) Mumvepenga kristu wenuo uidhi vinjinji ira aukami-eni. Akala mutuo otoidhiwa vinoonga Bibilya venango kabe nyo munooda ganyali na vyevyo visakasakilenyo. Iroromelwinyu inodha limba thitho kamudha mudimeli-iwa naatu enao anooneya ninga anamafunjedha thitho avadhulu enao anoonga ira kuli Namapanducha.

16. N’nga jinaireye chini akala nito-iya limbi-a irorome yi-u?

¹⁶ Akala mutomlabela Yohova mwahora yolapela oi a-vi munofwanela dhowanave limbi-a iroromelwinyu. Ninoonga ee-no mwasa oi na-aire polepole iroromelwi-u inooda fooka.  Nithuulelenga ira iroromelo inothangani-avo umboni wa vyongo vyooneya. Pyo-orucha diwala vyongo vyevyo vili vyo-ooneya. Paulo atoonga ira akaana iroromelo “chodawa yeniyo inonikoka mo-orucha.” (Aeb. 12:1) N’nga ninaire a-vi ira na-agwele mu go-i wen’na?—2 Atez. 1:3.

17. N’nga chini jinanikami-e limbi-a iroromelo yi-u?

¹⁷ Yoroma, nimvepenga Yohova ira aniva-e zimwee ochena thitho niirengana vyevyo vakwikwi na vakwikwi. Mwasiwa ngwan’ni? Mwasiwa ngoi iroromelo njiimbo-i mwa vyongo vyevyo zimu ochena inokumi-a aliwa. (Agal. 5:22, 23) Ee-no i-yo kaninaode limbi-a iroromelo yi-u mo-okami-iwa na zimu ochena. Yohova unooda niva-a zimwee nadhowanave vepa. Ninooda mvepa mogwandela ira “niwenjedheleni iroromelo yi-u.”—Luka 17:5.

18. Movwelana na lemba la Salimo 1:2, 3, n’nga malamboano nin’na ngari yoi a-vi?

¹⁸ Mbwenye nifunjedhenga madhu a Nlungu hora dhothene. (Muleri Salimo 1:2, 3.) Vevo salimoli vyalembiwa aliwa, mbaaisraeli oyeva enao tana buku la malamulo. Mbwenye mwene na asembe tanokaana buku la ilamulolo. Thitho vanduli va vyawa 7 vilivyothene tanogumani-a alombwana na a-iyana, a-ima thitho alendo okala mu israeli ira tavuruwane ilamulo yaleriwanga. (Dotor. 31:10-12) Mu hora ya Yesu thitho mipukutu yafwanyeya naatu oyeva baa-i thitho mu sinagoge. Mo-iyana na vyevi, malamboano atu anjinji anooda fwanya Bibilya lothene venango ikundu imbo-i. Yen’na njingari ilukulu. N’nga ninaoni-e a-vi ira ninosimba ngari yen’na?

19. N’nga ninofwanela iran’ni ira nidhowenave limbi-a iroromelo yi-u.

¹⁹ Ninooda oni-a ira ninosimba ngari yokaana madhu a Nlungu naleringa malambo othene. Kaninofwanela funjedha madhu a Nlungu mwangari venango nakaana hora baa-i. Nadhilimbi-edhanga funjedha Bibilya hora dhothene ninodha limbi-a iroromelo yi-u.

20. N’nga ninofwanela sikimizela rima iranan’ni?

²⁰ Mo-iyana naatu azelu na ozindiyela amwiilamboi i-yo nitokaana iroromelo yolimba namwasa wa vyevyo vinofunjedha i-yo Bibilyani. (Mat. 11:25, 26) Vyevyo vili bukuni lopambuleya vinonikami-a idhiwa mwasee vyongo vinodhowa aliwa thakala vailamboi thitho vyevyo Yohova vinaire liye mo-odembuwa. Ee-no dhoweni nidhilimbi-edheni limbi-a iroromelo yi-u thitho kami-a atu anjinji ira taroromelenga Namapanduchi-u. (1 Timo. 2:3, 4) Dhoweni nidhowenave dedi-edha hora yeniyo atu othene availamboi vanofuna aliwa dhaonga madhu ofwanyeya valemba la Apokalipse 4:11, oonga ira: “Muli ofwanela nyo Yohova, Nlungu wi-u wanguru, wachela titimi-o nolemeziwa, neri-a mu-upanducha vyongo vyothene, mofuna winyu vitokhalawo titho vi-upanduchiwa.”