1. N’nga Yesu aawandenlen’ni anamafunjedhee vyoonga hora yakomoni, n’nga aawenjeli-idhen’ni?

 UNGA-ADHI malambo oyeva ira Yesu apiwe, anafunjedhee 4 tatomfuka ira: “Izindiyelo . . . ya komoni wa hora ino inodha kalan’ni?” (Mat. 24:3) Vinooneya ira anamafundhao tanoofuna idhiwa vyafuna dhaakami-a idhiwa hora yafuna dhanongiwa Yerusalemu na kachisi. Vowakula Yesu kaaongile vyonongiwa wa Yerusalemu na kachisee baa-i. Mbwenye atoonga thitho vyokuza komoni wa hori-uila venango ira malabwi-ala. Voonga vya hora yakomoni Yesu aongile ira: “Onga vya dambolo venango horee, kavali unoidhiwa masiki angelo adhulu venango mwana, mbwenye Baba baa-i.” Moi ee-no atoawenjeli-a anamafunjedhee othene ira “takale ovuruwanechecha” thitho “takale methove.”—Marku 13:32-37.

2. Mwasiwa ngwan’ni vyali vyofuneya ira makristau a muhora ya arumiwi takale methove?

² Makristau Aiyuda a muhora ya arumiwi tanoofuneela kala methove ira tavulumuwe. Yesu atoawandela anama-arele yafuna dhaakami-a idhiwa ira Yerusalemu na kachisee vi-adhi vang’ono nongiwa. Liye aongile ira: “Mwadhaona magulu akondo tangarungunuile Yerusalemu, mudhaidhiwe ira nongiwawe utokwivela.” Vahora yeniyo aliwa tanoofwanela vwela yowenjeli-a ya Yesu yoi “tadharome tawela myangoni.” (Luka 21:20, 21) Enao avwenle yowenjeli-ai tatoovulumuwa vahora yanongiwa Yerusalemu na Aroma.

3. N’nga ninotapanyan’ni muyofunjedha yei?

 ³ Va-eeni ninokala muhora yakomoni ya ilambo yothakalai. Ee-no na i-yene thitho ninofwanela kalave othuulela pama thitho kala methove. Muyofunjedha yei ninotapanya yeyo inanikami-e kalave othuulela pama naonanga vyoireya vya muilamboi. Ninoona thitho vinaire i-yo ira niirenga polepole na vinoira i-yo thitho mwemo muna-indi-edhe i-yo basa pama hora i-adhila.

4. Mwasiwa ngwan’ni ninofwanela kaana ifunelo na mwemo vyoireya vya muilamboi munokwakwaneli-edha aliwa maulosi a Bibiliyani?

⁴ Vatokala myasa yapama yoniiri-a kaana ifunelo na mwemo vyoireya vya muilamboi monokwakwaneli-edha aliwa maulosi a Bibiliyani. Mwaifwanafwani-o, Yesu atoonga vyongo vyo-iyana i-yana vyevyo vinonikami-a idhiwa ira komoni wa ilambo ya Satanai uli vakwikwi. (Mat. 24:3-14) Rumiwi Pedru atonilimbi-a ira nikaengana ifunelo na mwemo maulosi munokwakwaneli-edhiwa aliwa naifunelo yoi iroromelo yi-u ikale yolimba. (2 Pe. 1:19-21) Bukhu lomari-a la Bibiliyani linoroma na madhu oi: “Apokalipse oveleliwa na Yesu Kristu wenuo Nlungu wamva-idhe liye ira aoni-e adhaare vyongo vinofwanela ireya vachineneeva.”(Apok. 1:1) Ee-no ninokaana ifunelo maningi na vyevyo vinoireya muilamboi ira nione mwemo munokwakwaneli-edha aliwa maulosi a Bibiliyani. Thitho ninofunechecha tapanya naatu enango vyoireya vyevi.

5. N’nga ninofwanela rambela ongan’ni, n’nga niirengan’ni? (Muone viruthiruthi.)

⁵ Natapanyanga maulosi a Bibiliyani nirambenga onga mathuulelwi-u. Mwasiwa ngwan’ni? Namwasa oi kaninofuna onga iliyothene yeyo inadodomi-e vwelano pingoni. Mwaifwanafwani-o, venango ninooda uvwa anamatonga a ilambo taonganga vinaire aliwa ira tamali-e nyarwa inangwe thitho dhi-a rendele na ibarelo. Malo moonganga mathuulelwi-u ira vyevi vinokwakwaneli-a ulosi wa valemba la 1 Atezalonika 5:3, ninofwanela onga vyongo movwelana na mabuku okumi-iwa na gulu la Yohova, ninokami-a ira pingo udhowenave kala ovwelana thitho ukaena “mathuulelo mambo-ive.”—1 Akor. 1:10; 4:6.

6. N’nga ninofunjedhan’ni va 2 Pedru 3:11-13?

⁶ Muleri 2 Pedru 3:11-13. Rumiwi Pedru atonikami-a ira nikaengana mathuulelo ofwanelela naleringa maulosi a Bibiliyani. Atonilimbi-a ira hora dhothene nithuulelenga kalavo wa dambo la Yohova. Mwasiwa ngwan’ni? Akala namwasa oi ninofuna idhiwa vya “dambo na hora” yeniyo Yohova inofuna liye dhakoma kondo ya Armagedo. Mbwenye namwasa oi ninofuna i-ndi-edha basa hora i-adhila ira nikale atu “akalelo lochena thitho niirenga mabasa othonyi-edha ira nili odhivelela wa Nlungu.” (Mat. 24:36; Luka 12:40) Madhu enango ninooda onga ira ninofuna ira vyofwanelela thitho oni-a ira nitokaana thindhi volabela Yohova namwasa oi ninomdhiveliwana maningi. Ira vyevyi viodeye ninofwanela iranga polepole na vinoira i-yo.

7. N’nga ninathonyi-edhe a-vi ira ninoira polepole na moda unoirela i-yo vyongo? (Luka 21:34)

⁷ Yesu atowandela anamafunjedhee ira tanofwanela ira polepole a-kala na vyoireya vya muilamboi baa-i, mbwenye thitho na mwemo munoirela aliwa vyongo. Likundo leli linooneela pama va yowenjeli-a yavelenle liye va Luka 21:34. (Muleri.) Valembali Yesu aongile ira: “Muire Polepole.” Mutu unoira polepole unokala oing’anechecha yongo iliyothene  inadodomi-e uxamwalee na Yohova noirambela. Airanga vyevi, unodhowanave ira vyongo vyevyo vinam’mwiri-e Nlungu mdhiveliwana.—Sang. 22:3; Yuda 20, 21.

8. N’nga rumiwi Paulo avelele malangi-o oi a-vi wamakristau?

⁸ Rumiwi Paulo atolangi-a makristau ira tairenga polepole na mwemo munoirela aliwa vyongo. Mwaifwanafwani-o atoawandela makristau au Efeso ira: “Muirenga polepole maningi ira mwemo munowendelanyo ka-i ninga atu o-okaana zelu mbwenye azelu.” (Aef. 5:15, 16) Hora dhothene Satana unodhilimbi-edha ira anonge uxamwali-u na Yohova. Ee-no Bibilya linonilangi-a ira nidhowenave “zindiyela ifunelo ya Yohova” naifunelo yoi nidhivunele wu migo-ee.—Aef. 5:17.

9. N’nga ninaidhiwe a-vi vyevyo Yohova vinofuna liye ira niirenga?

⁹ Bibilya kalinoonga vyongo vyothene vinadodomi-e uxamwali-u na Yohova. Mbwenye hora dhothene ninofuneela sakula okene vyoira va myasa dhedho dha-aongiweletu malembani. Ira nisakule vyongo mwazelu ninofuneela idhiwa venango zindiyela “ifunelo ya Yohova.” Ninooda ira vyevyo akala hora dhothene ninofunjedha thitho “thuulela modi-a madhu a Nlungu. Nadhilimbi-edhanga vwechecha ifunelo ya Yohova thitho kaana mathuulelo a Kristu, paevo vanowenda i-yo ninga atu azelu angalive ira kanina malamulo oniwandela vyoira vamwasa uliwethene. (1 Akor. 2:14-16) Hora dhinango vinokala vyo-orucha idhiwa vyongo vyofwanela rambela mbwenye hora dhinango vinokala vyorucha.

10. N’nga ndivyongo vinango viivi vinofwanela i-yo rambela?

¹⁰ Vyongo vinango vinofwanela i-yo rambela ndi ninga kopana, lezela, udya maningi, onga madhu anasukwali-e atu enango, onela vyosangalali-a vyauwalanga, vyaumandhave na vyongo vinango. (Sal. 101:3) Mwidani-u namanami-a hora dhothene unofunafuna ndhila dhoi anonge uxamwali-u na Yohova. (1 Pe. 5:8) Akala kaninakale methove, Satana unooda dhala rimani mwi-u mbeu dhasanje, inyengo, idyani, idana, dhiulukuli-a thitho thakaleliwa. (Agal. 5:19-21) Voroma vyongo ninga vyevi vinooda oneya ninga vyo-oopi-a. Mbwenye na-airevo yongo mombaranya, vovidula rimani mwi-u vinooda dhowanave ulukula ninga yomela yopa yeyo inaromi-e nyarwa.—Yak. 1:14, 15.

11. N’nga ndinyarwa inango yo-oonea iivi inofwanela i-yo irambela, n’nga mwasiwa ngwan’ni?

¹¹ Yongo inango yorucha zindiyela, ndiwaredhana atu amakalelo othakala. Kathuulelani vyoireya ninga vi: Nifwanafwani-e ira munalaba basa na mutu oi kai kristau fwinyu. Vofuna kami-a fwinyuo ira aonenga mofwanelela a Mboni dha Yohova, munodhilimbi-edha kala oriya rima thitho mkami-a. Thitho hora dhinango auvepani ira mumadyele vambo-i yodya yathana munorumela. Va-anavire hora mutoroma iranga vyevi mwavaduzu na vaduzi. Moi ee-no fwinyuo utoroma onga myasa dho-ofwanelela dhoi voroma mwanodiidanana. Vira wahora mutofiya movilemeela moi kamunoviidananave. Moi ee-no dambo n’nango fwinyuo utouvepani ira mwaweruwa mumamwele vambo-i yomwa thitho mutorumela. Mwavang’ono navang’ono mutoroma ona ira munovwelana maningi na fwinyuo. Vyaira ee-no n’nga munothuulela ira vanavire hora yolapela a-vi ira murome tukulela vyoira vyee? Pyaimbarimbari ira ninofuna riyela rima thitho lemeza atu othene. Mbwenye nithuulelenga ira ninotukulela vyoireya vyaatu anaawaredhana i-yo maningi. (1 Akor. 15:33) Nairanga polepole na moda munoirela  i-yo vyongo ninga mwemo Yesu mwanilangi-edhe liye, ninodha rambela vwelana naatu oi katino-arela makundo a Yohova. (2 Akor. 6: 5) Ninodha ona nyarwa inakalevo thitho ninodha irambela.

12. N’nga anamafunjedha a Yesu tafuneeleya iran’ni vodedi-edhela ira komoni ufiye?

¹² Anamafunjedha a Yesu katafuneela ira kaathiwene vevo vadedi-edha aliwa ira komoni ufiye. Liye atoava-a basa ira talabe. Atoawandela ira talaleelenga milanyu yapama “mu Yerusalemu, wu Yudeya othene na wu Samariya, fiedhela mamari-edho a ilambo yavathi.” (Mayir. 1:6-8) Leli lali basa nlukulu maningi. Aliwa tanolabi-edha basa pama horiwa vevo vyadhivelela aliwa volaba basali.

13. Mwasiwa ngwan’ni ninofwanela labi-edha basa pama hori-u? (Akolose 4:5)

¹³ Muleri Akolose 4:5. Ira niirenga polepole na munoirela i-yo vyongo, ninofwanela thuulela mwemo munolabi-edha i-yo basa hori-u. “Vyongo vyo-odedi-edhela” vinogwela i-yo othene. (Namal. 9:11) Mofwanafwani-a ninooda ukwa mo-odedi-edhela.

14-15. N’nga ninaire a-vi ira nilabi-edhenga basa pama hori-u? (Aebere 6:11, 12) (Muone iruthiruthi.)

¹⁴ Ninooda labi-edha basa pama hori-u voiranga ifunelo ya Yohova thitho limbi-a uxamwali-u  na liye. (Juwau 14:21) Ninofwanela kala “olimba, o-otekenyeya okaana vyoira vinjinji hora dhothene mu basa la Mbwiye.” (1 Akor. 15:58) Nairanga vyevi, komoni wafiya, akala ndi komoni wa ingumi yi-u venango wa ilambo yothakalai kaninodha sukwala ira kanairile vinjinji vomlabela Yohova.—Mat. 24:13; Aroma 14:8.

¹⁵ Malamboano Yesu unave dhowana sogolela anamafunjedhee vanolaleela aliwa vya Umwene wa Nlungu vailambo yothene. Liye unakwakwaneli-edha vyalanyedhile liye. Dhela mu gulu la Yohova, Yesu unonifunji-a mwemo munalaleele i-yo thitho unoniva-a vyothene vyonikami-a volaba basali. (Mat. 28:18-20) Ninoira ikundu yi-u nalabanga mwathindhi basa lolaleela nofunji-a atu thitho kala methove vanodedi-edhela i-yo ira Yohova anonge ilambo yothakalai. Na-arelanga malangi-o a va Aebere 6:11, 12, idedi-edhwi-u inodha kala “yosikimizeleya fiedha komoni.”—Muleri.

16. N’nga nili osikimizela rima iran’ni?

¹⁶ Yohova atokaathei-a dambo na hora inofuna liye dhanonga ilambo yotongiwa na Satanai. Dambolo ladhafiya Yohova kanodha imwanana kwakwaneli-edha maulosi othene alembile liye mu madhwee. Hora dhinango ninooda onanga ira komoni unaadembuwa. Mbwenye dambo la Yohova, kalinodha ‘dembuwa.’ (Habak. 2:3) Ee-no dhoweni nikale osikimiza rima ira “ninodedi-edha Yohova” thitho thonyi-edha ira “ninodedi-edhela moleva rima Nlungu wa ivulumucho yi-u.”—Mika 7:7.