YOMARA na abalee ambile—Marcelo na Hiver—anokala mudhi unango ung’ono wu Guatemala. Yomara atooroma funjedha Bibilya na a Mboni thitho vangavirile hora abalee tatooroma funjedha. Mbwenye vatookala yorucha othenene araru tatokaana nyarwa yo-oona thitho kataidhiwa leri maletra venango vilembo vyaatu o-oona. Ee-no aafunji-a Bibilya, anoalerela ndima na maversu va yofunjedha iliyothene.

Vyali thitho vyorucha ira tagumaneyenga hora dhothene vamigumanoni ya pingo. Kataoda wenda okene ulendo undendai wa maminutu 40, dhowa Nyumbani ya Umwene yavakwikwi. Mbwenye abali tanoakami-a noonechecha ira tafwanyeenga vamigumanoni yothene ya pingo. Aliwa tangaromile onga myasa yava migumanoni yavari vasumana, abali tanoakami-a lemeela myasa.

Maio wa 2019 migumano yatoroma ireelanga mudhimwiwa. Vahora yeniyo banja n’nango lelo laira upainiya okaatheya, latothamela mudhi mwemo. Aliwa tatoira masaka-edho oi tafunji-e atu ararwala lemba noleri maletra venango vilembo vyaatu o-oona angalive ira naaliwene thitho kataidhiwa vyafuna aliwa ira. Voi e-no tatodhowa wu library ira tamafwanye mabukhu ofunji-a lemba noleri maletra venango vilembo vyevi ira taidhiwe moda munafunji-edhe aliwa atu enango.

Vangavirile medi yoyeva, atu ararwala tatooroma idhiwa leri vilembo vyevi thitho vyevi vyatoakami-a ira tadhowe vasogolo mombaranya a. Va-eni Yomara, Marcelo, na Hiver tanoira upainiya okaatheya thitho Marcelo ngu rumiwi okami-a. Masumana othene aliwa tanokalecha opingeya na vyongo vyokuza lambela. Thindhi liwa linokami-a thitho atu enango kala athindhi.

Abali ararwala tanosimba maningi udhivela wa abali naarongala apingonimwiwa. Yomara atoonga ira: “Romela vaguman’nena i-yo Amboni aliwa takadhi tanithonyi-edhanga udhivela wa imbarimbari.” Marcelo atowenjedhela onga ira: “Nitokaana afwi-u apama maningi pingoni thitho nili banjani lavailambo yothene yavathi lodhivelana Thitho lovwelana.” Yomara naabalee tanodedi-edhela mwaifunelo dhaona Yohova asakaedhanga ilamboi kala yapama.—Sal. 37:10, 11; Esaya 35:5.