1-2. (a) N’nga ninadhivwe a-vi nathuulelanga vya ingumi ya Yesu thitho urumiwee? (b) Chini inofuna i-yo tapanya muyofunjedha yei?

 MUTU unamdhiveliwana i-yo akwa, ninomsowa maningi! Voromavene ninongovwa tangaranga nathuulela vyevyo vyaireile anga-adhi vang’ono funa wukwa, simbwasimbwa akala ira atoona nyarwa maningi vahora yeniyo. Mbwenye vira wahora ninoroma kala osangalala nathuulela vyongo vinango vyevyo vyanifunji-idhe liye, vyaonga liye thitho vyaira liye naifunelo yoi anilimbi-e venango ira nitheenga.

² Mofwanafwana na vyevi, ninokaana tangaranga naleringa vyoonga rucheya thitho wukwa wa Yesu. Vahora ya Ithuulelo, ninothuulela simbwasimbwa funeya wa sembee ya kuto. (1 Akor. 11:24, 25) Mbwenye ninosangalalecha maningi nathuulelanga vyothene vyaonga liye noirana angali vailamboi. Ninolimbi-iwa nathuulelanga vinoira liye va-eeni thitho vinofuna liye dhaira sogolou. Thuulela vyevi thitho udhivela unonithonyi-edha liye, unoniiri-a simba ndhila dho-iyana-iyana ninga mwemo munofuna i-yo onela muyofunjedha yei.

3. N’nga ndi myasa dhivi dhinoniiri-a i-yo simbanga kuto?

³ Nisimbenga maningi nathuulelanga ingumi ya Yesu thitho wukwawee. Vaurumiwee othene vailamboi, Yesu anoofunji-a atu vyoonga maraeli-o a Umwene wa Nlungu unofuna aliwa dhadhi-a vailamboi. Ninosimba makundo aimbarimbari oonga vya Umwenula. Ninosimba thitho kuto namwasa oniva-a ngari yokala vauxamwali wapama na Yohova na Yesu. Atu othene anomroromela Yesu tatokaana idedi-edho yodhakaana  ingumi yodhowa nodhowa thitho dhaonana na odhiveliwiwa enao takwide. (Juwau 5:28, 29; Aroma 6:23) Kavali yaire i-yo ira nifwanelele maraeli-o enala, thitho kanaode mmweli-edha Nlungu na Yesu va vyongo vyothene viniirele aliwa. (Aroma 5:8, 20, 21) Mbwenye ninooda thonyi-edha ira ninoasimba maningi. Moi a-vi?

4. N’nga Mariya Madalena athonyi-edhe a-vi ira anoosimba vyevyo Yesu vyam’mwirele liye? (Muone iruthiruthi.)

⁴ Kathuulelani ifwanafwani-o ya m’ma unango wa Iyuda dhinalee Maria Madalena. Liye ali vanyarwa ilukulu namwasa orucheya na viwanda 7. Pyoodeya ira athuulela ira nyarwa dhagumanana liyedho kadhinodha mala. Kathuulelani mwemo mwasimbele liye Yesu angamkumi-idhe viwandavyo! Simbau watom’mwiri-a ira akale nama-arela wa Yesu thitho ira a-indi-edhenga basa hora, kopolo na vyongovyee vokami-a Yesu vabasa lolaleela. (Luka 8:1-3) Angalive ira Mariya atosimba mokumela vathi varima vyevyo vyam’mwireele Yesu, pyooneelatu ira liye kaaidhiwa ira unodha mva-a yotuva ilukulu sogolou. Yesu anoofuna dhavelela ingumee namwasa waatu “ira uliwethene omroromela liye” adhakaena ingumi yo-omala. (Juwau 3:16) Mbwenye atothonyi-edha ira anosimba Yesu vokala ororomeleya. Vevo Yesu vyaoni-iwa liye nyarwa vaimwirini yoonelavo nyarwa, Mariya atoimela vaduzi ira alimbi-e atu enango na Yesuo. (Juwau 19:25) Yesu angakwide, Mariya na a-iyana enango ambili tatodhana vyonukela ira ta-ele manungo a Yesu ta-anam-ele masiyeni. (Marku 16:1, 2) Liye atoraeli-iwa maningi namwasa okalave ororomeleya. Atokaana ngari yogumanana Yesu thitho yoonga na liye angavenyathi-iwile, ngari yoi anamafunjedha anjinji katana.—Juwau 20:11-18.

5. N’nga ninathonyi-edhe a-vi ira ninomsimba Yohova na Yesu va vyevyo viniirele aliwa?

⁵ I-yo thitho ninooda thonyi-edha ira ninomsimba Yohova na Yesu va vyevyo viniirele aliwa, vo-indi-edha basa hori-u, kopolo na kobiri dhi-u vodhowi-a vasogolo basa la Umwene. Mwaifwanafwani-o, ninooda  kami-a basa lomangamanga nosaka-edha limburo lino-indi-edha i-yo basa volambela waimbarimbari.

6. Mwasiwa ngwan’ni ninooda onga ira kuto ndi yotuva iveleliwile wa mutu uliwethene vaekene?

⁶ Kathuulelani mwemo Yohova na Yesu mwanithonyi-edhele aliwa udhivela, na-iyene thitho ninofunechecha ira naadhiveliwengana. (1 Ju. 4:10, 19) Ninoadhiveliwana maningi nazindiyela ira Yesu atookwela uliwethene wa i-yo vaekene. Rumiwi Paulo atoidhiwa likundo leli thitho atothonyi-edha simbawee volebela Makristau awu Galatiya ira: “Mwana wa Nlungu . . . atonidhiveliwana nodhivelela ekene namwasa wa miyo.” (Agal. 2:20) Vo-indi-edha basa kuto, Yohova atonikokela wa liye ira niode kala afwee. (Juwau 6:44) N’nga kamunosangalala idhiwa ira Yohova atoona yongo inangwee yapama mwanyo thitho ira atovelela yotuva yapereso yavadhulu naifunelo yoi nikale afwee? N’nga vyevi kavinouiri-ani ira mumdhiveliwengana maningi Yohova na Yesu? Vinooda kala pama dhifuka ira, ‘N’nga udhivela waimbarimbari undilimbi-enga iranan’ni?’

7. Ninga munoonela i-yo iruthiruthila, n’nga i-yo othenene ninathonyi-edhe a-vi ira ninomdhiveliwana Yohova na Yesu? (2 Akor. 5: 14, 15; 6: 1, 2)

⁷ Mdhiveliwana wi-u Nlungu na Kristu unoniiri-a ira nidhiveliwengana thitho atu enango. (Muleri 2 Akor. 5:14, 15; 6:1, 2.) Ndhila imbo-i inathonyi-edhele i-yo udhivela wen’na kulaba vambo-i naaliwa mwathidhi basa lolaleela. Ninolaleela wa mutu uliwethene unomgumanana i-yo. Kaninosakula mutu namwasa wa tundwee, makalelwee moda unofwanyela liye vyongovyee venango thitho mafunjedhwee. Nairangana vyevi, ninokala niiranga vyongo movwelana naifunelo ya Yohova  yoi “kaya atu takale a tundu oi a-vi, tavulumuwe nokala oidhiwa imbarimbari molinyali.”—1 Timo. 2:4.

8. N’nga ninathonyi-edhe a-vi ira ninodhiveliwana abali na arongoli-u?

⁸ Ninooda thonyi-edha thitho ira ninomdhiveliwana Nlungu na Kristu naadhiveliwangana abali naarongoli-u. (1 Ju. 4:21) Ninoathuulela thitho ninoakami-a tagumanangana vyowesedha. Ninoadidili-a rima thakweliwa, maapandha tabulelanga thitho ninoira vyongo vyothene vinooda i-yo noalimbi-a tafooka. (2 Akor. 1:3-7; 1 Atez. 5:11, 14) Ninodhowanave alobelela namwasa oi ninoidhiwa ira “lobelo la mutu olongomana linolaba basa mwakopolo maningi.”—Yak. 5:16.

9. N’nga ndindhila inango iivi inathonyi-edhelena i-yo ira ninodhiveliwana abali naarongoli-u?

⁹ Ninothonyi-edha thitho ira ninodhiveliwana abali naarongoli-u nadhilimbi-edhanga kala vambo-i naaliwa mwarendele. Ninodhilimbi-edha tukulela ifwanafwani-o ya Yohova vamwasa olevelela atu enango. Akala ira Yohova atoorumeli-a mwanee nikwela namwasa wa vyodawa vi-u, n’nga i-yo kaninokala okozeya levelela abali naarongoli-u tanidawela? Kaninofwanela kala ninga dhaari othakala unoongiwa muifwanafwani-o inango ya Yesu. Angalive ira patarawee atomlevelela mangawa ana liye, atoimwana levelela dhaari fwee amfiarile kobiri yoyeva. (Mat. 18:23-35) Akala vatokala a-vwelana na mutu mwinango pingoni, n’nga munooda kaathi-a rendele ya-anafiye hora ya Ithuulelo? (Mat. 5:23, 24) Irana vyevi unothonyi-edha ira ninomdhiveliwana maningi Yohova na Yesu.

10-11. N’nga andimuwa avapingoni tanathonyi-edhe a-vi ira tanomdhiveliwana Yohova na Yesu? (1 Pedru 5:1, 2)

¹⁰ N’nga andimuwa avapingoni tanathonyi-edhe a-vi ira tanomdhiveliwana Yohova na Yesu? Ndhila yofuneya maningi yoi tanooda irela vyevi, kusamalela mabila a Yesu. (Muleri 1 Pedru 5:1, 2.) Yesu atoothonyi-edha pama likundo leli vevo vaongile liye na rumiwi Pedru. Angamadhi mkonda Yesu fendo dhiraru, atokala ofunechecha mthonyi-edha Yesu ira unomdhiveliwana. Yesu atomfuka ira: “Simoni mwana wa Juwau, n’nga unondidhiveliwana?” Kaninokaikela ira Pedru anooira iliyothene inaode liye vofuna thonyi-edha ira unomdhiveliwana Mbwiyee. Yesu atom’mwandela Pedru ira: “Kumbiza a-ima amabilanga.” (Juwau 21:15-17) Vaingumiyee yothene Pedru anosamalela mwaudhivela mabila ambwiyee vothonyi-edha ira unomdhiveliwana Yesu.

¹¹ Andimuwa avapingoni, n’nga hora ya ithuulelo munathonyi-edhe a-vi ira madhu aongile Yesu m’mwandela Pedru mbofuneya thitho wanyo? Munooda thonyi-edha ira munomdhiveliwana Yohova na Yesu vodhilimbi-edha ira hora dhothene muonenga hora yolimbi-a abali naarongola thitho kala athindhi vokami-a atu enango tafookile ira tawelele wa Yohova. (Zakiy. 34:11, 12) Musangalalenga thitho naale tanofunjedha Bibilya thitho afiile va Ithuuleloni va fendo yoromene ira tadhivwenga kala owacheliwa pama. Muthuulelenga ira aliwa tanooda thitho kala anamafunjedha a Yesu.

12. Mwasiwa ngwan’ni thuulela madhu a Yesu aongile liye va ma-iyuwee omari-a, unooda nikami-a kala olimba rima? (Juwau 16:32, 33)

¹² Va nama-iyuwee omari-a, Yesu atoawandela anamafunjedhee ira: “Munodha gumanangana nyarwa dhinjinji, mbwenye limbani rima! Miyo nditogonji-a ilambo.” (Muleri Juwau 16:32, 33.) N’nga chini yamkami-idhe Yesu kalave olimba rima, vogumana  amwidanee thitho kalave ororomeleya fiyedhela wukwawee? Liye anonyindela Yohova. Voidhiwa ira anama-arelee tanodha gumanana thitho vyowesedha ninga vyevyo, Yesu atomvepa Yohova ira aaing’anele. (Juwau 17:11) Mwasiwa ngwan’ni vyevi vinonilimbi-a kala olimba rima? Namwasa oi Yohova ngwakopolo kwaranya amwidani-u. (1 Ju. 4:4) Liye unoona yongo iliyothene inoireya. Naroromelanga ira ninonyindela Yohova, liye unodha nikami-a ira na-aove thitho nikale olimba rima.

13. N’nga Yosefe wa Arimathea athonyi-edhe a-vi ira ali olimba rima?

¹³ Kathuulelani ifwanafwani-o ya Yosefe wa Arimathea. Liye anoolemeziwa maningi na Ayuda afwee. Yosefe ali m’mbo-i wa anamatonga a tribunale nlukulu la Ayuda loitaniwa Sanihedirini. Mbwene vahora yaira Yesu urumiwee vailambo yavathivano, Yosefe kaali olimba rima. Juwau toonga ira liye ali “namafunjedha wa Yesu mbwenye mobisa namwasa oi aova Ayuda.” (Juwau 19:38) Angalive ira Yosefe anooni-a ifunelo va milanyu ya Umwene, kaawandela atu enango ira anomroromela Yesu. Mo-okaikela liye aova ira unooda i-yachi izoyee ya kopolo. Mbwenye Bibilya linoniwandela ira Yesu angakwide, vakomonivee Yosefe “atodhowa wa Pilato molimba rima mavepa Morti wa Yesu.” (Marku 15:42, 43) Veva Yosefe kaadhilokotidheve okoka ira ali namafunjedha wa Yesu.

14. N’nga munofwanela iran’ni akala munoova atu?

¹⁴ N’nga nyo mwatooromanga ovavo ninga mwairele Yosefe? Mwakala xikolani venango basani, n’nga hora dhinango munokaechana manyadho wandela atu enango ira muli wa Mboni dha Yohova? N’nga munovwalavwali-a ira mukale namalaleya o-obadiziwa venango badiziwa namwasa oova vinofuna thuulela atu enango vamwasa wanyo? Kamurumeli-e ira vyevi viuimwanani-eni irana vinoidhiwanyo ira pyapama. Mulobelenga wa Yohova mokumela vathi varima. Mumvepenga ira aukami-eni kala olimba rima ira muirengana ifunelwee. Mwaonanga mwemo Yohova munowakulela liye malobelwinyu, munodhakala wa kopolo thitho olimba rima maningi.—Esaya 41:10, 13.

15. Vasogolo voi Yesu utooneela wa anamafunjedhee, n’nga imwerumweru iwa yatoalimbi-a iranan’ni? (Luka 24:52, 53)

¹⁵ Yesu angapiwile, anamafunjedhee tatosukwala maningi. Kathuulelani mwavivwelenyo aakale ira mwatookalavo vahora yeniyo. Kaiira aliwa taona ira tatoluza fwiwa wavarimani  baa-i kabe, mbwenye thitho taona ira katina idedi-edho. (Luka 24:17-21) Mbwenye angaoneele waaliwa, liye atoakami-a vwechecha mwemo vyongo vyam’mwireele, mwakwakwaneli-edhe aliwa ulosi wa Bibilyani. Atoava-a thitho basa lofuneya maningi ira talilabe. (Luka 24:26, 27, 45-48) Yesu vyagwela liye dhowa dhulu vanduli va malambo 40, tangaranga yana anamafunjedhao yatochinja kala imwerumweru ilukulu. Idhiwa ira mbwiiwa atokaana ingumi okoka thitho ngokozeya akami-a vabasa lipya laava-idhe liye, watoakami-a kala osangalala. Imwerumweru yana aliwa yatoakami-a ira tasimbenga Yohova mwathidhi.—Muleri Luka 24:52, 53; Mayir. 5:42.

16. N’nga ninaasazi-edhe a-vi anamafunjedha a Yesu?

¹⁶ N’nga ninasazi-edhe a-vi anamafunjedha a Yesu? Ninooda kala aimwerumweru volambela Yohova a-kala va Ithuuleloni baa-i mbwenye yawa iliyothene. Vyevi vinofuneela ira ni-elenga Umwene wa Nlungu va limburo loroma. Mofwanafwani-a, atu anjinji tatochinja moda munolabela aliwa mabasiwa ira talabe basa lolaleela, fwanyeya vamigumanoni thitho iranga lambela wavabanjani hora dhothene. Atu enango thitho tatofiya vorumela sakula a-kaana vyongo voi atu enango tanoviona kala vyofuneya naifunelo yoi tairenga vinjinji pingoni venango tamalabe wu limburo unofuneela anamalaleya a Umwene anjinji. Angalive ira vanofuneela vilela ira nidhowenave mlabela, Yohova unolanyedha ira unodha niraeli-a maningi na-elanga vyokuza Umwenee valimburo loroma.—Sang. 10:22; Mat. 6:32, 33.

17. N’nga musimikezelenga iranan’ni vahora ya ithuulelo? (Muone iruthiruthi.)

¹⁷ Ninodedi-edhela mosangalala dhakala va Ithuuleloni chipili 4 wa Abril. Mbwenye kaninofwanela dedi-edhela hora yeniyo ira nirome thuulela vya ingumi ya Yesu na wukwawee thitho udhivela unithonyi-edhe liye na Babee. Ni-indi-edhe basa ngari iliyothene inafwanye i-yo ira niirena vyevi vahora yothene ya Ithuulelo. Mofwanafwani-a, ninooda dhi-elela thandha oi nileri thitho thuulela vyoireya vili va kwadru loi “Wiki Yomaliza ya Moyo wa Yesu Padziko Lapansi,” mu Kabuku Kothandiza Kuphunzira Mawu a Mulungu, muru 16. Vanolerinyo muonenga makundo a Bibilyani okami-a kala osimba, audhivela, olimba rima thitho aimwerumweru. Mwamala muthuulelenga ndhila dhinaodenyo thonyi-edhana simba mokumela vathi va rima. Munooda kala osimikizela ira Yesu unodha simba vyothene vinoiranyo vomthuulela vahora ya ithuulelwila.—Apok. 2:19.