MURU OFUNJEDHA 2
NYUMBO 132 Tsopano Ndife Thupi Limodzi
Alombwana, mulemezenga a-iyaninyu
“Nyo thitho alombwana, . . . Mualemezenga.”—1 PE. 3:7.
VINOFUNA I-YO FUNJEDHA
Muyofunjedha yei ninotapanyani mwemo madhu na vyoira vya lombwana munathonyi-edhele liye ira unom’lemeza i-yanee.
1. Mwasiwa ngwan’ni Yohova atooromi-a kazamento?
YOHOVA ngu “Nlungu waimwerumweru,” thitho unofuna ira na-iyene nisangalalenga. (1 Ti. 1:11) Utoniva-a vyotuva vinjinji vyonikami-a ira nisangalalenga. (Yak. 1:17) Imbo-i mwa vyotuva vyevi ndi banja. Lombwana na i-yana tathelana anolanyedhana ira anongodhivelana, lemezana thitho samalelana. Aliwa tavwelananga anokala osangalala maningi.—San. 5:18.
2. N’nga chini inoireya mabanja manjinji malamboano?
2 Mbwenye atu anjinji anodiwala vyongo vyalanyedhilena aliwa va dambo lakazamento. Thitho vyo-arelavovyee pyoi katinokala osangalala. Lipoti lachineneeva la Gulu loona vyaingumi vailambo yothene, linothonyi-edha ira alombwana anjinji anokhoma a-iyaniwa, onga madhu aiburutu venango aoni-a nyarwa mundhila inango. Anolemeza a-iyaniwa takala vamwinjini mbwenye anoaoni-a nyarwa tadhowa mudhi. Mabanja manjinji katinowenda pama akala maniwa unoonela vyaumandhave.
3. N’nga ndi vyongo viivi vinairi-e lombwana kala wauwalanga?
3 Mwasiwa ngwan’ni alombwana enango tanooni-a nyarwa a-iyaniwa? Venango tasamaleliwa na ababa auwalanga ee-no anothuulela ira kavali yorucha irela atu enango vyauwalanga. Atu enango anowendela ikalelo yothakala voi lombwana waimbarimbari unofwanela thonyi-edha kopolo ira alemeziwenga. Voi alombwana enango katifunji-iwile dhikhondi-a. Alombwana enango anokaana mathuulelo odaweya okhuza a-iyana thitho gonana namwasa oonela vyaumandhave. Wenjedhela veva, malipoti atoothonyi-edha ira sau wa COVID-19 utowenjedhela nyarwa dhedhi mbwenye vyevi kai myasa yovweya yoiri-a ira alombwana tairelenga vyauwalanga a-iyaniwa.
4. N’nga alombwana Aikristau anofwanela rambela n’ni?
4 Makristau anofwanela rambela mathuulelo odaweya okhuza a-iyana. a Mwasiwa ngwan’ni? Ninoonga e-no namwasa oi vyongo vinoira mutu unoroma vithuulela. Rumiwi Paulo atoowenjeli-a Makristau ozoziwa wu Roma “ira katitukhulele zelu dhahora ino.” (Aro. 12:1, 2) Vevo Paulo vyalembela liye karta pingo wau Roma wali ungalivo wahora indendai. Mbwenye madhu a Paulwala anothonyi-edha ira atu enango pingonimo tanoowendela mathuulelwala thitho makalelo ailamboi. Ngumwasee atoalimbi-a ira tachinje mathuulelo na makalelwiwa. Malangi-o enala mbokami-a thitho waalombwana Aikristau malamboano. Pyovwi-a tangaranga ira tanootukhulela mathuulelo ailamboi thitho anoairela uwalanga a-iyaniwa. b N’nga Yohova unofuna ira alombwana tairenga a-vi vyongo naa-iyaniwa? Ninofwanya yowakhula ya yofuka yei mulemba linosogolela yofunjedhai.
5. Movwelana na lemba la 1 Pedru 3:7, n’nga alombwana anofwanela irana vyongo vyoi a-vi na a-iyaniwa?
5 Muleri lemba la 1 Pedru 3:7. Yohova unowandela alombwana ira talemezenga a-iyaniwa. Lombwana wenuo unolemeza i-yanee, unoirana liye vyongo moriya rima thitho mwaudhivela. Muyofunjedha yei ninotapanyani vyongo vyevyo lombwana vinaire liye vothonyi-edha ira unolemeza i-yanee. Mbwenye yoroma dhoweni nitapanyeni makalelo anathonyi-edhe ira lombwana kanolemeza i-yanee.
MURAMBELENGA MAKALELO ENAO ANATHONYI-EDHE IRA KAMUNOLEMEZA A-IYANINYU
6. N’nga Yohova unovwa a-vi alombwana taoni-anga nyarwa a-iyaniwa? (Akolose 3:19)
6 Khoma i-yaninyu. Yohova unoidanana mutu uliothene wauwalanga. (Sal. 11:5) Liye unoidanana maningi na lombwana unooni-a i-yanee nyarwa. (Mal. 2:16; muleri Akolose 3:19.) Movwelana na lemba linosogolela yofunjedhila la 1 Pedru 3:7, akala lombwana unooni-a i-yanee nyarwa unododomi-a uxamwalee na Nlungu. Yohova kanawakhule malobelwee.
7. Movwelana na lemba la Aefeso 4:31, 32, n’nga alombwana anofwanela rambela onga tundu uuvi? (Muone thitho “madhu ovudheleliwa.”)
7 Onga madhu aiburutu. Alombwana enango tanooni-a nyarwa a-iyaniwa voonga madhu mwaiburutu thitho voonga mwauwali. Mbwenye Yohova “unoidanana, nyanyuwa rimani, lalata na madhu aiburutu.” c (Muleri Aefeso 4:31, 32.) Liye unovwa vyongo vyothene vinoonga i-yo. Thitho unokhuziwa rima na moda lombwana munoongana liye i-yanee angalive ira tali vaokhene. Lombwana unoonga mwaiburutu na i-yanee unododomi-a banjalee thitho uxamwalee na Nlungu.—Yak. 1:26.
8. N’nga Yohova unovwa a-vi atu taonelanga vyongo vyaumandhave, n’nga mwasiwa ngwan’ni?
8 Onela vyongo vyaumandhave. Yohova unoidanana maningi na vyaumandhave. Ee-no lombwana unoonela vyaumandhave unododomi-a uxamwalee na Yohova thitho kanolemeza i-yanee. d Yohova unodedi-edhela ira vyoira thitho mathulelo alombwana athonyi-edhenga ira ngororomeleya wa i-yanee. Yesu atoonga ira lombwana unoing’anechecha i-yana fiyedha m’silila, utom’raruwanee rimanimwee.” e—Mat. 5:28, 29.
9. Mwasiwa ngwan’ni Yohova kanosangalala lombwana aoni-anga i-yanee nyarwa vamwasa okhuza gonana?
9 Irana vyo-ofwanelela vamwasa okhuza gonana. Alombwana enango anokhanyi-edha a-iyaniwa ira tagonanenga mundhila inairi-e ira i-yana vivwanga ninga ngothakali-iwa venango ira kanodhiveliwiwa. Yohova unoidanana kalelo lovidhiveliwana thitho lo-othuulela atu enango. Liye unofuna ira lombwana adhivelenga samalela thitho lemeza i-yanee. (Aef. 5:28, 29) N’nga Kristau unaire a-vi a-kala kanolemeza i-yanee, unom’mwirela vyauwalanga venango unoonela vyongo vyaumandhave? N’nga unaire a-vi ira achinje mathuulelo thitho vyoiravyee?
VYONGO VINAIRE LOMBWANA AKALA KANODHIVELIWANA I-YANEE
10. N’nga ifwanafwani-o ya Yesu inakami-e a-vi alombwana?
10 Chini inakami-e lombwana ira a-iye irela i-yanee vyauwalanga? Liye unofwanela dhilimbi-edha a-rela Yesu. Pyaimbarimbari ira Yesu kathenle mbwenye alombwana anooda funjedhavo yongo athuulela mwemo mwairela liye vyongo na anamafunjedhee. (Aef. 5:25) Mofwanafwani-a, n’nga Yesu aira a-vi vyongo na anamafunjedhee n’nga aaongana a-vi? N’nga alombwana anofunjedhavo n’ni?
11. N’nga Yesu aira a-vi vyongo na anamafunjedhee?
11 Yesu anoothonyi-edha lemezo thitho riya rima waarumiwee. Liye kaali wauwalanga venango onyingalela. Angalive ira liye ali mbwiiwa, kaa-indi-edha basa kopolo ira aliwa tam’movenga. Malomwee, anoowalambela modhiyevi-a. (Ju. 13:12-17) Liye anoowandela anamafunjedhee ira: “Rumelani ira nduufunji-eni, namwasa oi ndili opwaseya na odhiyevi-a thitho munodha sisimuliwa.” (Mat. 11:28-30) Muone ira Yesu ali opwaseya. Mutu opwaseya kai ofooka mbwenye unokala wakopolo ooda dhikhondi-a. Athomiwa unookala okhurudheya thitho odhikhondi-a.
12. N’nga Yesu aonga a-vi naatu enango?
12 Yesu anoonga madhu olimbi-a thitho osisimula atu enango. Liye kaaonga mwauwali waanamafunjedhee. (Luk. 8:47, 48) Angalive oruni-a tanom’nyoza thitho m’thoma, “liye kaaweli-edhe mwaiburutu.” (1 Pe. 2:21-23) Hora dhinango Yesu anookala pee a-wakhula yongo iliyothene. (Mat. 27:12-14) Va liye anoovelela ifwanafwani-o yapama maningi waalombwana Aikristau!
13. Movwelana na lemba la Mateu 19:4-6, n’nga lombwana unaire a-vi ‘anodhowa makala vambo-i na i-yanee’? (Muone thitho iruthiruthi.)
13 Yesu atoolangi-a alombwana ira takale ororomeleya wa a-iyaniwa. Liye atoo-indi-edha basa madhu a Babee ira lombwana unofwanela “dhowa makala vambo-i na i-yanee.” (Muleri Mateu 19:4-6.) Madhu Aigiriki anothapulela ira “Makala vambo-i” anothapulela “fyetela na ariditi.” Ee-no lombwana na i-yana anofwanela vwelana maningi akala tatofyeteliwa vambo-i na arditi. Aliwa tamwadhani-iwa, ambilala anovwa upha. Lombwana unovwelana maningi na i-yanee kanaonele vyongo vyilivyothene vyaumandhave. Liye unodhimbinuwa mombaranya ira ‘a-aone vyongo vyo-okaana basa.’ (Sal. 119:37) Vinokala ninga utovwelana na methwee ira a-aing’ane mosilila a-iyana enango.—Yob. 31:1.
Lombwana ororomeleya arambelanga onela vyongo vyaumandhave (Muone ndima 13) g
14. N’nga lombwana unooni-a i-yanee nyarwa, unaire a-vi ira asaka-edhe uxamwalee na Yohova thitho na i-yaneuo?
14 Lombwana unooni-a nyarwa venango ongela i-yanee mwaiburutu unofwanela ira vyongo vinango ira asaka-edhe uxamwalee na Yohova thitho na i-yaneuo. N’nga ndi vyongo viivi vinofwanela liye irana. Yoroma, unofwanela zindiyela ira utokaana nyarwa ilukhulu. Kavali yongo iliyothene yolokhotheya wa Yohova. (Sal. 44:21; Nam. 12:14; Aeb. 4:13) Yanambili, liye unofwanela i-ya m’moni-a nyarwa i-yanee thitho vepha Yohova ira am’levelele. (San. 28:13) Yaneraru, unofwanela pepesa i-yanee thitho vepha Yohova ira am’levelele. (May. 3:19) Unofwanela thitho vepha ira Yohova am’kami-e kaana rima ofuna chinja thitho ira akale odhikhondi-a va vyongo vinothuulela liye, onga thitho irana. (Sal. 51:10-12; 2 Ak. 10:5; Afl. 2:13) 4, liye unofwanela irana vyongo movwelana na malobelwee voidanana vyauwalanga vili vyothene na madhu aiburutu. (Sal. 97:10) 5, unofwanela vepha kami-o waandimuwa audhivela pingoni. (Yak. 5:14-16) 6, liye unofwanela kaana masaka-edho okami-a ira a-arome okoka kalelo lothakalalo. Lombwana unoonela vyaumandhave unofwanela ira vyongo vyothene vyevi thitho Yohova unodha m’kami-a ira achinje kalelolee. (Sal. 37:5) Mbwenye rambela vyongo vinasukwali-e i-yanee kai okwakwanela. Liye unofwanela lemeza i-yanee. N’nga unairena a-vi vyevi?
N’NGA LOMBWANA UNALEMEZE A-VI I-YANEE?
15. N’nga lombwana unathonyi-edhe a-vi udhivela wa i-yanee?
15 Muthonyi-edhenga udhivela. Alombwa anosangalala na mabanjiwa anodhilimbi-edha ira dambo nlilothene tairenga yongo inango inathonyi-edhe ira anodhiveliwana a-iyaniwa. (1 Ju. 3:18) Lombwana unodha thonyi-edha ira unodhiveliwana i-yanee mundhila ndhing’ono ninga m’inda dhanja venango m’khumbarela. Unooda m’tumizela mesage yoonga ira “nditousowa” venango m’fuka ira “vinaawenda?” Hora dhinango thitho unooda m’lembela madhu osakhuliwa pama avakarta. Lombwana airangana vyongo ninga vyevi unolemeza i-yanee thitho banjaliwa linokala lolimba.
16. Mwasiwa ngwan’ni lombwana unofwanela m’simbanga i-yanee?
16 Musimbenga i-yaninyu. Lombwana unolemeza i-yanee unom’limbi-a. Ndhila inango yonlimbi-edhelana i-yanee kum’simba va vyongo vyothene vinoira liye. (Ako. 3:15) Lombwana asimbanga i-yanee khumela vathi varimani, i-yana unovwivwa pama. Unovwivwa ira ngobareleya, odhiveliwiwa thitho olemeziwa.—San. 31:28.
17. N’nga lombwana unathonyi-edhe a-vi ira unolemeza i-yanee?
17 Muirenga vyongo moriya rima thitho mwalemezo. Lombwana unodhiveliwana i-yanee unoona ira ngwapereso yavadhulu. Unoona ira liye ndi yotuva yapereso yavadhulu yokhumela wa Yohova. (San. 18:22; 31:10) Unoira vyongo na liye moriya rima thitho mwalemezo masiki va myasa yokhuza gonana. Liye kanokhanyi-edha i-yanee ira tagonanenga mundhila inairi-e ira i-yanuo a-avivwenga pama avionenga ira ngo-okaana basa thitho ithuulela rimayee yiiruchi-enga. f Lombwanuo unodhililmbi-edha thitho ira airengana vyongo vinam’kami-e kaana ithuulela rima yapama vamethoni va Yohova.—May. 24:16.
18. N’nga alombwana anofwanela sikimizela rima iranan’ni? (Muone kwadru loi “ Ndhila 4 dhokami-a ira mukale lombwana walemezo.”)
18 Alombwana, idhiwani ira Yohova unoona thitho simba vyongo vinoira nyo volemeza a-iyaninyu. Dhowananive lemeza i-yaninyu vorambela kalelo lothakala thitho dhowanave irangana liye vyongo moriya rima, mwalemezo thitho mwaudhivela. Mwairangana vyevyo munodha thonyi-edha ira munom’dhiveliwana thitho gwapereso yavadhulu. Mwalemezanga i-yaninyu, munobarela yongo yofuneya maningi vaingumiinyu, yeniyo ndi uxamwalinyu na Yohova.—Sal. 25:14.
NYUMBO 131 “Chimene Mulungu Wachimanga Pamodzi”
a Alombwana anooda ira pama leri mwasa wa muru oi “N’nga munoaona a-iyana ninga munaonela Yohova?” mu Nsanja ya namaing’anela ya Janeiro wa 2024.
b Atu anooni-iwa nyarwa mumavandhe anooda ira pama leri mwasa oi “Mfundo Zothandiza Anthu Omwe Achitiridwa Nkhanza Zosiyanasiyana” vaikhundo yoi “Nkhani Zina” va jw.org thitho JW Library®.
c THAPULELIWA WA MADHU ENANGO: “Madhu aiburutu” anothapulela onga madhina onyoza, onga mwauwali thitho kalelanga omba landu mutu mwinangwee.
d Muone va jw.org thitho va JW Library vamwasa oi “Kuonera Zolaula Kungasokoneze Banja Lanu.”
e I-yana wenuo manee unoonela vyongo vyaumandhave unooda ira pama leri mwasa oi “Akala maninyu venango i-yaninyu unoonela vyongo vyaumandhave” mu Nsanja ya namaing’anela ya Agosto wa 2023.
f Bibilya kalinoona vyothene vyokhuza gonana ofwanelela venango o-ofwanelela vari va lombwana na i-yanee. Banja lai Kristau linofwanela sakhula okhene vamwasa wa vyoira wenuo unathonyi-edhe aliwa ira talemezenga Yohova, nokaana ithuulela rima yapama thitho irana vyongo mothuulelana. Onga mwaimbarimbari, banja kalinofwanela tapanya na mutu uliothene myasa dhiwa dhokhuza gonana.
g MADHU OONGA VIRUTHIRUTHI : Bali aitaniwanga na fwee wabasani ira amaone mabukhu a vyongo vyaumandhave.
