MURU OFUNJEDHA 5
NYUMBO 108 Chikondi Chokhulupirika cha Mulungu
Maraeli-o anofwanya i-yo namwasa wa udhivela wa Yohova
“Yesu atoodha vailamboi dhavulumucha atu odawa.”—1 TI. 1:15.
VINOFUNA I-YO FUNJEDHA
Muyofunjedha yei ninotapanyani maraeli-o anofwanya i-yo namwasa wa kuto thitho mwemo munathonyi-edhele i-yo ira ninom’simba Yohova.
1. N’nga ninaire a-vi ira nim’sangalali-enga Yohova?
NIFWANAFWANI-EDHELE ira mutom’va-a mutu unom’dhiveliwana nyo yotuva yobaleya thitho inam’kami-e. N’nga munavivwe a-vi akala ute i-iya wene a-ithuulelave? Onga mwaimbarimbari, munodha sangalala akala ira unoi-indhi-edha basa thitho thonyi-edha simba. Molandana na vyevi, Yohova unosangalala nathonyi-edhanga ira ninosimba yotuva ya kuto thitho udhivela unonithonyi-edha liye voniva-a yotuva ya pereso yavadhulu!—Ju. 3:16; Aro. 5:7, 8.
2. N’nga ninatapanye n’ni muyofunjedha yei?
2 Mbwenye hora yaviranga, ninooda roma ona movevuwa yotuvila. Vinodha kala ninga nitukunle yotuva ya Nlungu noiponyedha venangovee. Vinokala ninga ninoisangalalana mbwenye kaninofuna ira ikalenga vooneya. Ira vyevi vya-aireye ninofwane thuulelanga hora dhothene viniirele Nlungu na Kristu. Mwasula unodha nikami-a ira niirenga vyevi. Ninoona mwemo kuto munonikami-edhela aliwa va-eeni thitho mwemo munanikami-edhele aliwa sogolo. Ninodha tapanyani vyongo vinaire i-yo vothonyi-edha ira ninosimba udhivela wa Yohova simbwasimbwa vahora ya ithuulelo.
MARAELI-O ANOFWANYA I-YO VA-EENI NAMWASA WA KUTO
3. N’nga ndi maraeli-o a-vi anafwanye i-yo va-eeni namwasa wa kuto?
3 Vatokala maraeli-o anofwanya i-yo va-eeni namwasa wa sembe ya Kristu. Mwaifwanafwani-o, Yohova unonilevelela vyodawa vi-u namwasa wa kuto. I-yo kanili ofwanelela leveleliwa mbwenye liye unofuna irana vyevi. Olemba masalimo athonyi-edhele simba, volemba ira: “Nyo Yohova ngunyo wapama thitho muli okozeya levelela.”—Sal. 86:5; 103:3, 10-13.
4. N’nga Yohova atoovelela kuto ira likami-a aani? (Luka 5:32, 1 Timoteo 1:15)
4 Atu enango anodhiona ira mbo-ofwanelela leveleliwa na Yohova. Pyaimbarimbari ira i-yo othene kanili ofwanelela leveleliwa. Rumiwi Paulo atoozindiyela ira liye kaali “ofwanelela itaniwa rumiwi.” Mbwenye atoonga ira: “Namwasa oriya rima ulukulu wa Nlungu, ndili ninga mwemo muli miyomu.” (1 Ak. 15:9, 10) Nachinyuwa vyodawa vi-u Yohova unonilevelela. Kaiira unoirana vyevyo namwasa oi nili ofwanelela leveleliwa, mbwenye namwasa oi unonidhiveliwana. Mwaroma dhiona ninga o-okaana basa, muthuulelenga ira Yohova atoovelela kuto ira likami-e atu odawa enao tachinyuwile, a-kala atu o-odawa.—Muleri Luka 5:32; 1 Timoteo 1:15.
5. N’nga vatokala mutu uliothene unaonge ira ngofwanelela wachela tangaranga wa Yohova? Muongemo.
5 Kavali mutu uliwethene unofwanela dhiona ira ngofwanelela ireliwa tangaranga na Yohova masiki am’labelenga wa vyawa vinjinji. Angalive ira vili ee-no, Yohova unosimba roromelaya wi-u. (Aeb. 6:10) Liye atoovelela Mwanee ninga yotuva yapezi yavadhulu a-kala ninga yopagali ya vyongo vinoira i-yo vom’labela. Nathuulelanga ira nili ofwanelela ireliwa tangaranga venango ira nili ofwanelela thuuleliwa mwavakundo, vinodha kala ninga ninoonga ira Kristu kaafwanela nikwela.—Mufwanafwani-edhele na madhu alemba lo-indiwa Agalatiya 2:21.
6. Mwasiwa ngwan’ni Paulo anokaana thindhi vom’labela Yohova?
6 Paulo atooidhiwa ira liye kaali ofwanelela ireliwa tangaranga na Nlungu. N’nga mwasiwa ngwan’ni atokaana thindhi vom’labela Yohova? Anooirana vyevi vofuna thonyi-edha ira anoosimba riya rima ulukulu wa Yohova, a-kala namwasa oi afwanela ireliwa thangaranga. (Aef. 3:7) Molandana na Paulo, ninodhowanave m’labela mwathindhi vofuna thonyi-edha m’simba, a-kala thonyi-edha ira nili ofwanelela ireliwa tangaranga.
7. N’nga ndi maraeli-o a-vi anofwanya i-yo va-eeni namwasa wa kuto? (Aroma 5:1; Yakobo 2:23)
7 Maraeli-o enango anofwanya i-yo va-eeni namwasa wa kuto, kukala vauxamwali wapama na Yohova. a Molandana na vyevi mumyasa ivirile nitotapanyani, vyoi i-yo atu kanibaliwile ningali vauxamwali wapama na Nlungu. Mbwenye na mwasa wa kuto, ninooda kala “varendele na Nlungu” thitho unooda kala fwi-u wavarimani.—Muleri Aroma 5:1; Yakobo 2:23.
8. Mwasiwa ngwan’ni ninofwanela simba Yohova namwasa wa ngari ya lobelo?
8 Voi nili vauxamwali wapama na Yohova ninooda lobela wa liye. Kaiira Yohova unovwa malobelo avamwinjini aarumiwee tagumaneya vambo-ive baa-i, mbwenye unovwa thitho malobelo a mutu uliwethene va ekene. Lobelo linonikami-a ira rimi-u ukale limburonimwe thitho mathuulelwi-u takaatheye. Mbwenye lobelo linonikami-a mundhila inango. Linonikami-a ira uxamwali-u na Nlungu ukale olimba. (Sal. 65:2; Yak. 4:8; 1 Ju. 5:14) Yesu angali vailambwila anoodhiveliwana lobela. Liye anooidhiwa ira Yohova unovwa malobelo thitho ira lobelo linodha m’kami-a ira uxamwalee na Babee ukale olimba. (Luk. 5:16) Ninosimba ira sembe ya Yesu inonikami-a ira nikale afwee a Yohova thitho ira niongenga na liye mu lobelo.
MARAELI-O ANAFWANYE I-YO SOGOLOU
9. N’nga ndi maraeli-o a-vi anofuna dhafwanya atu ororomeleya sogolou namwasa wa kuto?
9 N’nga ndi maraeli-o avi enao arumiwi ororomeleya a Yohova afuna aliwa dhavwanya sogolou? Aliwa anodha va-iwa ingumi yo-omala sogolou. Atu anjinji tanothuulela ira vyevi kai vyokweya namwasa oi atu takandhi takwanga wa vyawa vinjinji. Mbwenye ifunelo yoroma ya Nlungu yali yoi atu takaena ingumi modhowa nodhowa. Aakale ira Adamu kaadawile kavali mutu uli wethene aakaikelenga vyaingumi yo-omala. Pyaimbarimbari ira va-eeni vinooda ruchanga roromela ira niooda kaana ingumi modhowa nodhowa. Mbwenye kaninokaikela vyevi namwasa oi ninoidhiwa ira Yohova atoovelela maraeli-o avadhulu maningi enao ndi ingumi ya Mwanee.—Aro. 8:32.
10. N’nga atu ozoziwa naatu enango anodedi-edhela n’ni?
10 Angalive ira ingumi yo-omala ninodha iwachela sogolou, Yohova unofuna ira niithuulelengave va-eeni. Atu ozoziwa tanothuulela vya ingumi yapama maningi yeniyo inofuna dhawachela aliwa dhulu yoi tanodha tonganga vambo-i na Kristu. (Apk. 20:6) Amabila enango tanothuulela ingumi unofuna aliwa dhawachela yo-okaana yorucha vailambo yavathivano. (Apk. 21:3, 4) N’nga muli amabila enango thitho munodedi-edhela ingumi yo-omala vailambo yavathi? Kaiira yotuva yen’na ndi yothitha nafwanafwani-edhela na ingumi yadhulu. I-yo atu nipandichiwile ira nikalenga vailambwila thitho ingumi ya vailambwila inodha kala yosangalali-a maningi.
11-12. N’nga ndi maraeli-o avi anodedi-edhela i-yo muilambo ipya? (Muone thitho iruthiruthi.)
11 Kathuulelani ingumi munofuna aliwa dhakalela paradaizoni. Kamunodha dhikumbanyedha namwasa wa marenda venango ukwa. (Esa. 25:8; 33:24) Yohova unodha uva-ani vyongo vyothene vyofwanelela vyevyo vinolavela nyo. N’nga nyo munodha funa funjedha vyongo viivi? Vyamasiyentista, nyumbo venango khoma mafoto? Pyooneelatu ira vanodha funeya atu adodoliso oona vya maporogarama na vyomangangana thitho vyolima. Vanodha funeela atu enango oing’anela mabasa enango ninga saka-edha vyonongeya, piya, saka-edha vyongo vyo-indi-edha basa thitho unodha kala maluwa. (Esa. 35:1; 65:21) Voi ninodha kaana ingumi yo-omala, ninooda funjedha dodoliso nlilothene lelo linafune i-yo.
12 Vinodha kala vyosangalali-a dhawachela atu enao anofuna dhavenyathi-iwa. (May. 24:15) Ninodha sangalala funjedha vyongo vinjinji vyoonga Yohova dhela muvyongo vipanduchile liye (Sal. 104:24; Esa. 11:9) Yosangalali-a maningi choi ninodha lambelanga Yohova mo-odhiomba landu namwasa oi natoodawi-a vyongo vinango. N’nga munodha rumela i-yachi vyongo vyothene namwasa ofuna “sangalala wahora yoyeva voira vyodawa”? (Aeb. 11:25) Kamunafune irana vyevyo. Ninodha rumela i-ya yongo iliyothene va-eeni ira nifwanye maraeli-o enala. Kathuulelani ira vyongo vinodedi-edhela i-yo paradaizo dambo n’nango vinodha ireyadi. Ninodha onga ee-ni ningali paradaizoni. Vyevi kavyaodeye aakale ira Yohova kaanidhiveliwana novelela yotuva ya Mwanee.
N’nga ndi maraeli-o avi enao anofunechecha nyo dhaona muilambo ipya? (Muone ndima 11-12)
NISIMBENGA UDHIVELA WA YOHOVA
13. N’nga ninathonyi-edhe a-vi ira ninosimba udhivela wa Yohova? (1 Akoritiyo 6:1)
13 N’nga ninathonyi-edhe a-vi ira ninosimba Yohova namwasa wa kuto? Ninodha ira ee-no vo-ela basalee valimburo loroma vaingumii-u. (Mat. 6:33) Vale Yesu afuna ira “atu othene ana ingumi katikaena ingumi yodhisangalali-a okene, mbwenye takaena ingumi yosangalali-a wenuo aakwenle novenyathi-iwa.” (2 Ak. 5:15) Kaninofuna luza ifunelo yoriya rima ulukhulu wa Yohova.—Muleri 2 Akoritiyo 6:1.
14. N’nga ninathonyi-edhe a-vi ira niroromela malangi-o a Yohova?
14 Ninooda thonyi-edha thitho ira ninosimba udhivela wa Yohova vororomela malangi-oyee. Mwaifwanafwani-o, nithuulelenga vyongo vinafune Yohova nosakula vyoira vamwasa okhuza mafunji-edho na basa. (1 Ak. 10:31; 2 Ak. 5:7) Vatokala vyongo vinango vyosangalali-a vyevyo vinoiireya naroromelanga malangi-o a Yohova vosakhula vyoira. Nakala vauxamwali wapama na Yohova, iroromelo yi-u inokala yolimba thitho idedi-edho yi-u inokala yakopolo.—Aro. 5:3-5; Yak. 2:21, 22.
15. N’nga ninathonyi-edhe a-vi simba wi-u vahora ya ithuulelo?
15 Vatokala yongo inango inaire i-yo vothonyi-edha simba udhivela wa Yohova. Yongoyee ku laba pama basa vahora ya ithuulelo. Vowenjedhela vokozeela ira nimafwanyeevo, ninooda itanela atu enango. (1 Ti. 2:4) Voitanela atwao ninooda ira pama awandela vyongo vinofuna dhaireya va mwambuo. Munooda ira pama aoni-a mavidiyo ava jw.org ninga woi Mwasiwa ngwan’ni Yesu utokwa? Thitho na vidiyo yoi Thuulela wukwa wa Yesu. Andimuwa avapingoni anofwanela itanela atu afookile. Dhulu unodha kala sangalala ulukhulu maningi libila limbo-i lodhimela akala litowelela guluni. (Luk. 15:4-7) Va dambo la ithuulelo, nidhilimbi-edhe mwenyula abali naarongola, simbwasimbwa achineneeva na enao ta-iidhe gumaneya vambo-i na i-yo. Dhoweni nidhairi-e ira takale othathuwa!—Aro. 12:13.
16. Mwasiwa ngwan’ni ninofwanela wenjedhela vyoira vi-u vabasa yolaleela vahora ya ithuulelo?
16 N’nga munodha wenjedhela vyoira vinyu va basa lolaleela vahora ya ithuulelo? Irana vyevyo vinothonyi-edha ira ninosimba vyongo vinoniirela Nlungu na Kristu. Nairanga vyongo vinjinji vom’labela Yohova paevo vanaone i-yo ira unonikami-a maningi thitho ninodha roma m’roromela maningi. (1 Ak. 3:9) Mudhadhilimbi-edhe a-rela porogarama yoleri Bibilya vahora ya ithuulelo yeniyo inofwanyeya mu bukhu loi funjedha malemba dambo na dambo thitho na thandha wa urumiwi na ingumii-u yau Kristau. Munooda thitho indi-edha basa makapitulu enala vofunjedha Bibilya va mwekhene.
17. N’nga Yohova unosangalala nan’ni? (muone kwadru loi “ Mwemo munathonyi-edhele i-yo ira ninosimba udhivela wa Yohova.”)
17 Venango na mwasa wa mukalele vyongo vaingumiinyu, kamunaode a-rela vyongo vyothene viongiwile mu yofunjedha yei. Kathuulelani ira Yohova unoona vili rimanimwinyu thitho kanofwanafwani-edhela vyongo vinoira nyo na vinoira atu enango. Liye unosangalala aongana ira munosimba yotuva ya kuto kumela vathi varimani.—1 Sa. 16:7; Mrk. 12:41-44.
18. Mwasiwa ngwan’ni ninosimba Yohova Nlungu na Yesu Kristu?
18 Yotuva ya kuto inoiri-a ira nileveleliwe vyodawa vi-u, nikale vauxamwali wapama na Yohova thitho nidedi-edhelenga ingumi yo-omala. Dhoweni nisimbengani udhivela wa Yohova wenuo uiri-idhe ira nifwanye maraeli-o enala. (1 Ju. 4:19) Nithonyi-edhenga thitho ira ninosimba Yesu avelenle ingumiyee namwasa waudhivela.—Ju. 15:13.
NYUMBO 154 Udhivela o-omala
