MURU OFUNJEDHA 1
NYUMBO 2 ‘Dzina Lanu Ndi Yehova’
Mum’va-e Yohova titimi-o
LEMBA LA YAWA YA 2025: “Mum’va-e Yohova titimi-o linofwanela dhinalee.”—SAL. 96:8.
VINOFUNA I-YO FUNJEDHA
Muyofunjedha yei ninoona vyongo vinaire i-yo ira nivelelenga wa Yohova titimi-o lofwanelela dhinalee.
1. N’nga atu anjinji malamboano anothuulela vyan’ni?
MALAMBOANO atu anjinji anothuulela vyofuna viwa baa-i. Mwaifwanafwani-o, atu enango anoira vinjinji vaiternetini naifunelo yoi atu enango takaengana ifunelo naaliwa venango taidhiweyenga na vyongo vinoira aliwa. Mbwenye ndi atu oyeva baa-i enao anovelela titimi-o wa Yohova Nlungu. Muyofunjedha yei ninotapanyani thapulela ovelela titimi-o wa Yohova thitho vyongo vinanilimbi-e ira niirengana vyevi. Ninoona thitho vyongo vinaire i-yo ira nivelelenga wa Yohova titimi-o ofwanelela dhinalee na mwemo munalemezele liye dhinalo sogolou.
N’NGA VA-A YOHOVA TITIMI-O UNOTHAPULELA N’NI?
2. N’nga Yohova aoni-idhe a-vi titimi-olee vamwango wa Sinai? (Muone thitho iruthiruthi (Muone ndima 9-10)
2 Bibilyani, madhu oi “titimi-o” anooda thapulela yongo iliyothene inairi-e mutu mwinango ira akale oiri-a ifunelo. Yohova atoothonyi-edha titimi-o Aisraeli modabwi-a tangakhumi-iwile wene uudhaari wu Iguputu. Kafwanafwani-edhelani ira munoona Aisraeli anjinji tangagumaneile chindo mwa mwango wa Sinai ira tamagumanena Nlungwiwa. Rambo lukhulu watookhunela mwanguo. Ee-no mo-odedi-edhela indharandhara yakopolo, yali ninga mwango yatooroma thweya notekenyeya vali aliwavo. Vatookala vyerima noula ogadha baruni wa lipenga. (Eki. 19:16-18; 24:17; Sal. 68:8) Aisraeli vinooneya ira tatookaana ifunelo na mwemo Yohova mwaathonyi-edhele liye titimi-olee.
Yohova unooni-a kopolo na titimi-olee wa Aisraeli vamwango wa Sinai. (Muone ndima 2)
3. N’nga m’va-a titimi-o Yohova unothapulela n’ni?
3 N’nga i-yo aatu ninodha velela titimi-o wa Yohova? Ee. Ndhila imbo-i inairelena i-yo vyevi kuwandela atu vyokhuza kopolodhee thitho makalelwee apama. Ninovelela titimi-o wa Nlungu ninom’lemeza namwasa wa vyongo vinikami-idhe liye irana. (Esa. 26:12) Mwene Davide ali ifwanafwani-o yapama maningi vamwasa olemeza Yohova. Lobelo lavelenle Davide vagulu la Aisraeli, liye atoowandela Nlungu ira “Nyo Yohova, lukhulu, kopolo, baleya, titimi-o na lemezo phinyu, namwasa oi vyongo vyothene vyadhulu na vya ilambo yavathi phinyu.” Davide angamari-idhe velela lobeloli, “atu othene tatooroma m’titimi-a Yohova.”—1 Li. 29:11, 20.
4. N’nga Yesu avelela a-vi titimi-o wa Yohova?
4 Yesu angali vailambwila, anoovelela titimi-o wa Babee vothonyi-edha ira ngu liye am’va-a kopolo ira airenga vyongo vyodabwi-a. (Mrk. 5:18-20) Vyongo vyaonga Yesu vyokhuza Babee thitho mwemo mwairela liye vyongo naatu enango, vyanoovelela titimi-o wa Yohova. Vahora dhinango Yesu anoofunji-a Sinagogani. Va mwinji waatu aafunji-a liyao vatookala m’ma mwinango wenuo aoni-iwa nyarwa na viwanda wa vyawa 18. Iwadayo yatooiri-a ira arangale mithana voi kaaodave inuwa. Vyali vyovwi-a tangaranga maningi. Yesu atoom’vwela tangaranga thitho atom’kwivela noonga moriya rima ira: “M’ma, mutothathuwa wu marendinyu.” Ee-no atoo-inda thitho m’muo atooimela modhongowa “noroma m’titimi-a Nlungu,” M’muo atookaana okoka kopolo. (Luk. 13:10-13) Mofwanafwana na m’mula nitokaana myasa yovweya yom’va-edhelana Yohova titimi-o.
N’NGA CHINI INONILIMBI-A IRA NIM’VA-ENGA YOHOVA TITIMI-O?
5. N’nga ndi myasa iivi inoniiri-a m’titimi-anga Yohova?
5 Ninovelela titimi-o wa Yohova namwasa oi ninom’lemeza maningi. Nitokaana myasa injinji ira nim’lemezengana. Yohova ngwakopolo dhothene, thapulela ira kopolodhee kadhina madile. (Sal. 96:4-7) Ninoona zeludhee mu vyongo vipanduchile liye. Ngwenuo aniva-idhe ingumi thitho vyongo vyothene vinonikami-a ira nikaenave ingumi. (Apk. 4:11) Yohova ngororomeleya. (Apk. 15:4) Yongo iliyothene inoira liye inowenda pama thitho hora dhothene unokwakwaneli-edha vyolanyedha vyee. (Yos. 23:14) Pyovweya ira namaongela Jeremiya atoonga vya Yohova ira: “Vari vaatu azelu othene amaziza aatu thitho vari va mamweniwa othene, kavali mutu uliothene oladana nanyo.” (Jer. 10:6, 7) Ee-no nitokaana myasa yapama yom’titimi-edhelana Babi-u wa dhulu. Kaiira ninam’lemeza wene Yohova, mbwenye ninom’dhiveliwana maningi.
6. Mwasiwa ngwan’ni ninom’dhiveliwana Yohova?
6 Ninovelela titimi-o wa Yohova namwasa oi ninom’dhiveliwana maningi. Kathuulelani makalelo apama a Yohova enao anoiri-a ira nim’dhiveliwengana. Liye ngwatangaranga. (Sal. 103:13; Esa. 49:15) Liye unothuulela atu enango navwanga upha naliye thitho unovwa upha. (Zka. 2:8) Liye unoonechecha ira nikale afwee. (Sal. 25:14; May. 17:27) Yohova ngodhiyevi-a, “liye unothitha chindo ira aone dhulu na ilambo yavathi. Unovenyathi-a mutu onyozeya nom’khumi-a tumbuluni.” (Sal. 113:6, 7) N’nga i-yo othene ninofuna velela titimi-o wa Nlungwi-u lukhulu?—Sal. 86:12.
7. N’nga nitokaana ngari yoira n’ni?
7 Ninovelela titimi-o wa Yohova namwasa oi ninofuna ira atu enango tam’mwidhiwe. Atu anjinji katinom’mwidhiwa pama Yohova. Vili e-no namwasa oi Satana utowairi-a a-ona vovwei-a vyonama vyokhuza Nlungu. (2 Ak. 4:4) Liye utoiri-a atu roromela ira Yohova ngwauwalanga, kanobala vyaatu thitho ngwenuo unoiri-a nyarwa dhinjinji vailamboi. Mbwenye i-yo ninoidhiwa vyaimbarimbari vyokhuza Nlungwi-u. Nitokaana ngari yokami-a atu enango idhiwa vyokhuza liye thitho m’va-a titimi-o. (Esa. 43:10) Mukapitulu 96 la Salimo linoonga titimi-o lokhuza Yohova. Natapanyangani madhu ovudheleliwa a mu lemba la Salimoli, muthuulelenga ndhila dhedho dhinavelele nanyo titimi-o wa Yohova.
N’NGA NINAIRE A-VI IRA NIM’VA-E YOHOVA TITIMI-O UNOFWANELA LIYE WACHELA?
8. N’nga ndi ndhila imbo-i ivi yeniyo inom’lemezana i-yo Yohova? (Salimo 96:1-3)
8 Muleri Salimo 96:1-3. Vyongo vinaonge i-yo vyokhuza Yohova, vinooda iri-a ira awachele titimi-o. Musalimoli ninolimbi-iwa ‘vom’mombela Yohova nyumbo,’ ‘titimi-a dhinalee,’ ‘laleela milanyu yapama yaivulumucho.’ Thitho ‘ninolaleela titimi-olee vari vaatu amaziza enango.’ Dhedhi ndi ndhila dhedho dhinavelelena i-yo titimi-o wa Babi-u wa dhulu. Ayuda ororomeleya thitho Makristau oroma, tanoowandela atu enango vyongo vyapama vya Yohova vyevyo vyaairela liye thitho makalelwee apama. (Dan. 3:16-18; May. 4:29) N’nga i-yo ninaire a-vi vyevi?
9-10. N’nga ninofunjedhavo n’ni vaifwanafwani-o ya Angelina? (Muone thitho iruthiruthi.)
9 Ifwanafwani-o va mwasula ngu rongola mwinango wau Estados Unidos dhinalee Angelina. a Liye atoonga molimba rima vyongo vyapama vyokhuza Yohova walaba liye basa. Angafwaidhe basa, Angelina atooitaniwa ira tamagumaneye vaipereza voi mutu uliothene afwanela wandela afwee vyokhuza limbili lee. Angelina atoosaka-edha vidiyo yothonyi-edha ira anoosangalala kala wa Mboni dha Yohova. Horee inga-adhi vang’ono funa fiya, mutu mwinango atoonga ira asamaleliwa na banja la Mboni thitho atooroma nyoza vyongo vyaroromela aliwa. Angelina aongile ira: “Rimanga watooroma dima maningi. Mbwenye ndatoondiwandela ira: ‘N’nga pyaimbarimbari ira ndirumele ira mutu mwinango aongenga vyonama vyokhuza Yohova? Ndinooda limba rima onga vyapama vyokhuza liye.’”
10 Fweuo angamari-idhe onga, Angelina atoolobela rimani mogwandela. Adhamale atoomwandela fweuo mwalemezo ira: “Limbili langa njolandana na inyu miyo thitho ndisamaleliwile na banja la Mboni dha Yohova. Fiyedha va-eeni ndilive wa Mboni dha Yohova.” Vyali vyorucha maningi mbwenye Angelina kaatekenyeile. Liye atooni-a atu vyongo vya migumano yeniyo yafwanyeilevo liye thitho atoonga mosamala vobarela vyongo vyaroromela liye. (1 Pe. 3:15) N’nga vyo-arelavovyee vyali vyoi a-vi? Vevo Angelina vamari-a liye onga, mutuo atoochinjelatu mathuulelwee. Liye atoonga ira vatookala vyongo vinango vyapama vyevyo vyaireya vyasamaleliwa liye na banja la Mboni. Angelina aongile ira: “Ninofwanela m’barela Yohova. Ndi ngari ilukhulu onga vyokhuza dhinalee.” I-yo ninom’va-a Yohova lemezo thitho m’va-a titimi-o angalive atu enango katinom’lemeza.
Ninooda m’lemeza Yohova na vyoonga vi-u, vyongo vi-u, thitho makalelwi-u (Muone ndima 9-10) b
11. N’nga arumiwi a Yohova takadhi ta-arelanga a-vi makhundo ofwanyeya va Salimo 96:8?
11 Muleri Salimo 96:8. Ninooda m’va-a Yohova titimi-o vovelela vyongo vi-u vya pereso yavadhulu. Romela walelene, arumiwi a Yohova takadhi tava-anga titimi-o mundhila yen’na. (San. 3:9) Mwaifwanafwani-o, Aisraeli tanoovelela vyongo viwa ira vikami-e va basa yomanga nosamalela kachisi. (2 Mam. 12:4, 5; 1 Li. 29:3-9) Anamafunjedha a Yesu, tanoo-indi-edha basa kobiridhiwa vokami-a liye na arumiwee. (Luk. 8:1-3) Makristau oroma tanoovelela ifwanafwani-o yapama waabali naarongoliwa. (May. 11:27-29) I-yo thitho malamboano ninooda lemeza Yohova vovelela vyongo vi-u.
12. N’nga vyovelela vi-u vinalemeze a-vi Yohova? (Muone thitho iruthiruthi.)
12 Dhoweni nitapanyeni ifwanafwani-o inothonyi-edha ira vyovelela vi-u vinokami-a ira Yohova alemeziwe. Lipoti la yawa ya 2020 latoothonyi-edha ira wu Zimbabwe watookala nyarwa ilukhulu namwasa wa masoka avilengo aireile wahora indendai. Atu anjinji katana yodya, thangani-avo rongola mwinango dhinalee Prisca. Angalive ira watookala nyarwadhi, Prisca atoodhowanave laleela Chitatu na Xixanu. Liye anooiranave vyevi masiki vahora yolima. Atu enango tanom’nyoza namwasa odhowa malaleela malo modhowa minda thitho tanoonga ira, “Weyo unodha wukwa na ndhala.” Prisca atoowakhula rimee ungali limburonimwee ira, “Yohova kanaromevo i-ya arumiwee.” Va-anavire hora indendai, liye atoowachela vyongo vyavelenle gulu li-u. Vyongo vyevi vyatoofwanyeya namwasa wa vyovelela vya abali naarongola. Atu enangwale tatookaana ifunelo thitho tatom’mwandela ira, “Nlungu kanau-iyevo, ee-no ninofuna nifunjedhe vyongo vinjinji vyokhuza Nlungu wenuo.” Atu okwakwana 7 tatooroma fwanyeya vamigumanoni.
Ninooda lemeza Yohova na vyoonga vi-u (Muone ndima 12) c
13. N’nga kalelo li-u linavelele a-vi titimi-o wa Yohova? (Salimo 96:9)
13 Muleri Salimo 96:9. Ninooda velela titimi-o wa Yohova vokaana makalelo apama. Alimbo velela sembe enao talabela Yohova vakachisini, tafwanela amba thitho fula ira takale ochena (Eki. 40:30-32) Mbwenye yofuneya maningi choi tafwanela kaana makalelo apama. (Sal. 24:3, 4; 1 Pe. 1:15, 16) I-yo thitho ninofwanela dhilimbi-edha ‘ungula umutu wawale’ wenuo ndi makalelo othakala, nowara umutu upya thapulela ira ninofwanela thuulela thitho iranga vyongo mosazi-edha makalelo a Yohova. (Akl. 3:9, 10) Yohova unodha kami-a masiki mutu wamakalelo othakala thitho wauwalanga maningi ira achinje nowara umutu upya.
14. N’nga ninofunjedhavo n’ni vaifwanafwani-o ya Jack? (Muone thitho iruthiruthi.)
14 Ifwanafwani-o vamwasula ndi Jack, wenuo ali wauwalanga thitho oophi-a aitaniwa iwanda. Namwasa wa milandu yathathamunle liye Jack atoowandeliwa ira unofwanela phiwa. Adedi-edhelanga dambo lophiwa, Jack atooroma funjedha Bibilya na bali mwinango wenuo afiile perezonio. Angalive ira voroma ana makalelo othakala, Jack atoochinjelatu thitho vasogolovee atoofwanelela badiziwa. Jack atoochinja maningi voi va dambo ladhowa liye maphiwa anyakondo enao tam’mwing’anela tanoola maningi vom’lanyananee. Nyakondo mwinango alaba va perezonivo atoona ira: “Jack ali naperezo othakala maningi. Mbwenye va-eeni ngu mbo-i mwaanaperezo apama maningi. Abali tatoodhowa perezonio mairi-a migumano thitho tatoona naperezo mwinango ali airanga fiyawene vagumanonivo. Naperezuo atooroma fiya vamigumanoni angaoni mwemo Jack mwachinjile liye thitho afuna idhiwa vyongo vinaire liye ira alambelenga Yohova. Veva pyoneelatu ira kalelo li-u linooda velela titimi-o wa Babi-u wa dhulu. —1 Pe. 2:12.
Ninooda lemeza Yohova na Makalelwi-u (Muone ndima 14) d
N’NGA YOHOVA UNODHA LEMEZA A-VI DHINALEE SOGOLOU?
15. N’nga Yohova unodha lemeza a-vi dhinalee vachineeva? (Salimo 96:10-13)
15 Muleri Salimo 96:10-13. Maverso omari-a a mu lemba la Salimo 96 anoonga ira Yohova ngunamatonga walongomano thitho Mwene. N’nga Yohova unodha lemeza a-vi dhinalee vachineeva? Vo-odembuwava Yohova unodha lemeza dhinalee votonga. Liye unodha nonga Babulo nlukhulu namwasa onyoza dhinalee lochena. (Apk. 17:5, 16; 19:1, 2) Atu enango anofuna ona Babulo nlukhulu anongiwanga, anodha roma lambela Nlungu vambo-i na i-yo. Thitho va Armagedo, Yohova unodha nonga ilambo yothene ya Satanila khumi-a atu othene enao anoruni-a nonyoza dhinalee. Mbwenye unodha vulumucha atu othene enao anom’dhiveliwana, m’vwela thitho m’va-a titimi-o. (Mrk. 8:38; 2 At. 1:6-10) Vofiya khomoni va utongi wa Kristu wa vyawa 1.000, Yohova unodha kala angacheni-eletu dhinalee. (Apk. 20:7-10) Vahoriyo “ilambo yavathi inodha dhala naatu oidhiwa titimi-o wa Yohova, Ninga mwemo munodhalela ma-inje barani.”—Aeb. 2:14.
16. N’nga mutosikimizela rimani irana n’ni? (Muone thitho iruthiruthi.)
16 Vinooda kala vyosangalali-a maningi vahoriyo, namwasa oi mutu uliothene unofuna dhakaana ingumi unodha velela titimi-o lofwanelela dhinalee. Vevo vanodedi-edhela i-yo horiyo, dhoweni nidhilimbi-edheni m’titimi-a Yohova vahora iliyothene inafwanyeye. Vofuna gogomedha likhundo leli, Gulu lotonga litosakula ira lemba la Salimo 96:8 likale lemba la yawa la 2025. Lembali linoonga ira: “Mum’va-e Yohova titimi-o linofwanela dhinalee”
Mutu uliwethene unofuna dhakaana ingumi, unodha m’va-a Yohova titimi-o lofwanelela dhinalee! (Muone ndima 16)
NYUMBO 12 Yehova Mulungu Wamkulu
a Madhina enango atochinjiwa.
