1. N’nga Yohova airile n’ni wa mutu uliwethene wa-iyo?

I-YO othene Yohova atonikokela waliye. (Juwau 6:44) Kathuuleleni vyevi. Yohova vyasakasaka liye mirimani mwaatu mabiliyau manjinji availambo yothene yavathi atoonamo jongo jofuneeleya wari mwarimani mwinyu. Atoona ira mutokaana rima wapama thitho munooda m’dhiveliwana. (1 Limb. 28:9)Yohova unooidhiwani, unovwechechani thitho unoudhiveliwanani. Vyevyo pyolimbi-a vinjinji.

2. N’nga Yesu athonyi-edhe a-vi ira Yohova unodhiveliwana mabilee othene?

² Yohova unoudhiveliwanani maningi thitho unoadhiveliwana abali naarongolinyu othene. Vofuna nikami-a vwechecha likundu leli Yesu atofwanafwani-edha Yohova nanamakumbiza. Akala libila limbo-i vamabila 100 litodimelavo , n’nga namakumbiza unooira n’ni? Lie uno-iyachi mabila 99 vamwangoni nodhowa masakasaka libila lodhimelalo. Alifwanya kanolitakaleliwana mbwenye unosangalala. N’nga ninofunjedhavo n’ni? Libila lililothene tofuneya wa Yohova. Yesu aongile ira: Babanga wadhulu kanafuna ira m’mbo-i mwavixi a-ima vi amanongeye.”—Mat. 18:12-14.

3. N’nga wari mwamwasa ween’na ninofuna nitapanye n’ni?

³ I-yo kaninafune fooki-a venango lunduwi-a abali-u naarongoli-u. N’nga i-yo ninaire a-vi ira na-alunduwi-enga atu enango? N’nga ninaire a-vi akala ira mutu mwinango utonilunduwi-a? Wari mwamwasa ween’na ninofuna nitapanye vyofuka vyevyi. Mbwenye yoroma dhoweni nitapanyeni vyoonga vixi a-ima vi vyevyo viongiwile mukapitulu 18 valemba la mateu.

4. N’nga “vixi a-ima” mbaani?

⁴ Vixi a-ima mbaanamafunjedha a Yesu avimo vyothene. Mo-oona imo yiwa aliwa tali ninga a-ima ang’ono. Mwasa oi anofunechecha funji-iwa na Yesu. (Mat. 18:3) Angalive ira tano-i-yana  unakumela aliwa, makalelwiwa, moda unaonela aliwa vyongo na thitho ingumi yiwa yothene anororomela kristu thitho liye unoadhiveliwana.—Mat. 18:6; Juwau 1:12.

5. N’nga Yohova unavwa a-vi mutu mwinango aalunduwi-anga arumiwee venango apei-a?

⁵ Atu othene ali vixi a-ima mbapereso yavadhulu wa Yohova. Ira nivwecheche moda unaonela lie dhoweni nithuule munaonela i-yo a-ima. Ninoaona kala a pereso yavadhulu. E-no ninofuna avunela namwasa oi aliwa katina kopola, katinoidhiwa vyongo vinjinji thitho katina zelu dhina andimuwa. Pyaimbarimbaria ira kaninofuneela ona mutu uliwethene angalunduwile venango angapei-iwile mbwenye vinooda nikuza rimani fiedhela nithakaleliwi-a mutu amwirela mwana vyongo ninga vyevi. Mofwanafwani-a na vyevyi Yohova unofuna ira anibarele thitho vinookuza rimanimwee fiedhela mthakaleliwi-a mutu mwinango aalunduwi-anga venango apei-a arumiwee!—Esaya 63:9; Marku 9:42.

6. Movwelana na lemba la 1 Akoritiyo 1:26-29 n’nga ilambo inaaona a-vi anamafunjedha a Yesu?

⁶ N’nga anamafunjedha a Yesu tali ninga a-ima mwandhila inango iivi? N’nga ilamboi inaona ira atu osimbwa funeya mbaavi? Atu ofuma, ovweya, thangani-avo atu akopolo naale anooniwa mwatundu wenuo. Mbwenye anamafunjedha a Yesu anooniwa ninga o-ofuneya thitho “vixi a-ima.” (Muleri 1 Akoritiyo 1:26-29.) Mbwenye Yohova kanaaona e-no.

7. N’nga Yohova unofuna ira naonenga a-vi abali naarongoli-u?

⁷ Yohova anoadhiveliwana arumiwee othene akala uromile walelene vinjinji venango unaaroma wene funjedha imbarimbari. Abali-u naarongoli-u othene mbofuneya wa Yohova e-no anofwanela thitho kala ofuneya wa-iyo. Ninofwanela dhiveliwana gulu lothene laabali akala oyeva. (1 Pe. 2:17) Ninofwanela kala ofunechecha irana jongo jilijothene jinaode i-yo ira niode abarela thitho asamalela. Akala ira nitozindiela ira nitonlunduwi-a mutu mwinago kaninofwanela dhi-iya onanga ira mutuo unasimbwi-a seluo funanga ira liye aode nilevelela. N’nga atu enango anolunduwi-a namwasa waan’ni? Abali naarongola enango anodhiona ira mbo-ofuneya venango namwasa wa waulukulele aliwa. Enango anaaromawene imbarimbari thitho katafunjile munairele aliwa tadhawi-a vyongo. Akala ira kavinobala ira vyongo vili mwatundu wan’ni niirenga vili vyothene vile vinaode i-yo ira nikale varendeleni naatu enango. Wenjedhela veva mutu a-anarucha lunduwa na vyoira vyaatu enango unofwanela ona ira kalelo lelo kai lapama thitho unofwanela chinja. Irana vyevyi unooda aakami-a kaana rendele warimani thitho ira taodenga vwelana naatu enango.

8. N’nga hora ya Yesu atu anjinji tana mathuulelo oi a-vi enao aodile landela anamafunjedhee?

⁸ N’nga chini yamwiri-idhe ira Yesu aonge vya vixi a-ima? Anamafunjedha tali tangam’fukile ira: “Mbaani simbwasimbwa unofuna dhakala ndimuwa muumwene wadhulu?” (Mat. 18:1) Vahora yeniyo Ayuda anjinji taona ira kala vaizoni chiyongo yofunea vinjinji. Ndimuwa mwinango oidhiwa vyongo wavyofunji-a aongile ira: atu taona ira jongo jofuneya vinjinji, kulemeziwa, vweya thitho ira atu anjinji tamdhiveliwengana.

9. N’nga anamafunjedha a Yesu tafwanela ira n’ni?

⁹ Yesu atoidhiwa ira anamafunjedhee anofwanela kala athidhi ira takumi-emo mathuulelo opikisana enao ali odhala vari Vaayuda. Liye atoawandela ira: “wenuo uli ndimuwa maningi vamwethenene akale ninga mwana kirikiti vanyo mwethenene, thitho ule  unasogolela akale rumiwi.” (Luka 22:26) Mutu unothonyi-edha ira ngu ichimwana ng’ono aonanga atu enango kala oomkwaranya. (Afil. 2:3) Nadhilimbi-edhanga kaana mathuulelo enala, paevo vanofuna i-yo rambela lundui-a atu enango.

10. N’nga mbamalangi-o aavi a Paulo anofwanela i-yo athuulela?

¹⁰ Abali naarongola othene anonikwaranya mwavyongo vinango. Vyevyi vinokala vyo-orucha rumela ira ninothuulela makalelo apama aana aliwa. Ninofwanela thuulelanga malangi-o ale avelele rumiwi Paulo oonga ira: “N’nga unouiri-ani ira mukale o-iyana naatu enango mbaani? Ee, unaniya jejo ja-airewee jiwachela? akala ira ute jiwachela mwasiwa ngwan’ni onovigweli-a ninga kwate jiwachela?” (1 Akor. 4:7) E-no ninofwanela ira polepole ira na-arome dhiona ira nili atu osimbwa funeya kwaranya atu enango. Mofwanafwani-a akala bali unoonga mwasa mwadodoliso,venango akala rongola kanorucheyana romi-a funjedha Bibilya, unofwanela aonecheche ira lemeziwa uliwethene udhowe wa Yohova.

11. N’nga ninafunjedhavo n’ni vaifwanafwani-o ya Yesu ya mwene naadaare?

¹¹ Yesu angaawenjeli-idhe anama-arelee ira katilundui-enga atu enango, atoonga thitho ifwanafwani-o inango yoonga vya mwene na aadaree. Mwenuo atolevelela adaari mangawa malukulu enao akondile aliwa aodha pagali. Mbwenye vingaireile e-no daari wenuo kaafune levelela mdaari fwee mangawa ana liye oyeva. Vamamari-edhovee mwenuo ato-ela perezo daari o-okaana tangaranguo. N’nga ninofunjedhavo n’ni veva? Yesu aongile ira: “Mofwanana navyevyi Babanga wadhulu unodha uonani pama akala ira uliwethene wanyo kanalevelela balee narima wthene.”—Mat. 18:21-35.

12. Akala ira i-yo kaninolevelela vinokuza a-vi atu enango?

¹² Vyaireile daarula kavyakuzile liye ekene, mbwenye vyatokuza atu enango. Yoroma liye atoomwirela daari fwee vyauwalanga vom’volocha perezo fiedhela adhapagali mangawa. Yanambili liye tatoalundui-a adaari afwee. “Aliwa tangaonile vyaireile vyo tatokaana tangaranga.” (Mat. 18:29-31) Mofwanafwana navyoireya vyevi vinokuza atu enango. Akala fwi-u utonidawela thitho i-yo kaninofuna mlevelela, n’nga jinaireye chini? Yoroma liye unooda lunduwa namwasa oi i-yo kanivwele tangaranga thitho kanidhiveliwena. Yanambili ninooda lundui-a atu enango pingoni akala ira aliwa tatozinidela ira kanili varendeleni nabali-uo.

13. N’nga ninofunjedhavo n’ni va vyamwireele mpainiya mwinango?

¹³ I-yo nalevelelanga abali naarongoli-u ninodhivwa pama thitho ninoaira-a ira aliwa tadhivwenga pama. Vyevyi pievyo vyamwireele rongola unango unofuna i-yo m’monga ira Crystal. Liye atolundui-iwa na rongola mwinango wapingoni moi e-no liye aongile ira: “Rongoluo andiongana madhu opi-a rima moi ndadhivwa ninga nditelathiwa nambene. Kandafuna navang’onovene wenda naliye dhowa malaleela. Vyevyi vyatoiri-a ira nda-akaena thindhi lodhowa malaleela thitho nda-asangalalenga.” Crystal aona ira atokaana mwasa ovwea omwiri-a ira aode lunduwa. Mbwenye liye kaadhowilenave mlokothedha vyarimani venango thuulelangave vyanwasuo. Malo mwavyevyo liye atodhievi-a no-indi-edha basa malangi-o a Bibilyani anofwanyea mumwasa oonga ira “mulevelelenga kumela vathi varima” inofwanyeya mu Nsanja ya Olonda ya Outubro 15, 1999. E-no liye aongile ira: “Chineneeva  nditozindiela ira othenene ninofwanela dhilimbi-edha ira niwara umutu upya thitho Yohova unonilevelela ndambo lililothene. Vachineneeva ndinodhivwa pama rimanimwanga thitho ndatoroma kala osangalala.”

14. Movwelana na lemba la Mateu 18:21, 22, n’nga pyoodeya ira Paulo anoorucheyana iran’ni, n’nga ninofunjedhavo n’ni va vyawakunle Yesu?

¹⁴ Ninoidhiwa ira ninofwanela levelela atu enango thitho vyevyi pyofuneya vinjinji. Mbwenye hora dhinango vinonirucha ira niirena vyongo vyevyi. Pyoodeya ira na liyene thitho rumiwi Paulo avivwa e-no. (Muleri Mateu 18:21, 22.) N’nga jinanikami-e chini? Yoroma musimbwenga thuulela viuleveleleni Yohova. (Mat. 18:32, 33) Liye unilevelela narima wethene angalive ira kanaliatu ofwanelela leveleliwa. (Sal. 103:8-10) Na-iyene “ninofwanela dhiveliwana unango nafwee.” E-no mwasa olevelela atu enango kai mwasa oira sakula pivyevyo vinofuna i-yo ira nairele abali naarongoli-u. (1 Ju. 4:11) Yanambili, nithuulelenga vinoira i-yo nalevelela atu enango. Ninooda mkami-a mutu unindawenluo, limbi-a vwelano pingoni, limbi-a uxamwali-u na Yohova thitho vinooda nikami-a ira nidhivwenga pama rimanimwi-u. (2 Akor. 2:7; Akol. 3:14) Moi e-no jomari-a nilobelenga wa Nlungu wenuo unofuna ira niodenga levelela atu enango. Kamurumeli-e ira Satana adodomi-e rendele unanyo namakristau afwinyu. (Aef. 4:26, 27) Hora dothene ninofuneela kami-iwa na Yohova ira na-amangiwe mugo-ini wa Satana.

15. Movwelana na lemba la Akolose 3:13 n’nga ninaire a-vi akala ira nitolunduwa na vyoira vya bali venango vya rongola?

¹⁵ N’nga vinakala a-vi akala ira kristau mfwinyu utoirelani vyongo visimbwile ulundui-ani? N’nga munofwanela ira n’ni? Munofwanela dhilimbi-edha mwavyothene vinaode nyo ira mukale varendeleni na liye.  Mum’mwandelenga Yohova mulobelo moda munovwelanyo. Muvepenga ira araeli-e mutu ulundui-idhenuo thitho ona makalelo apama a mutuo, enao anoiri-a ira Yohova amdhiveliwengana. (Luka 6:28) Akala ira nyo kamunooda pwaza, vyongo viudhaweleni balinyu muthuulelenga ndhila yapama yoi muonge naliye. (Mat. 5:23, 24; 1 Akor. 13:7) Hora dhothene tipama thuulelelanga ira bali-uo kaate funa ira anilundui-e. Matapanyanga naliye mukami-enga ona ira munoovwechecha ira kaana ifunelo yodawi-a yongo. N’nga akala ira liye kanofuna ira muode tapanya? Bibilya linoonga ira mudhowenave lolelana e-no kamu-iyachi mlevelela narima wethene balinyu. (Muleri Akolose 3:13.) Mbwenye yofuneya vinjinji choi kamulokote vyarimani mwasa oi vyevyo vinooda dodomi-a uxamwalinyu na Yohova. Kamurumele ira vyoira vyaatu enango viulundui-eni. Mwairangana vyevyi munodha thonyi-edha ira munomdhiveliwana Yohova kwaranyedha vyongo vyothene.—Sal. 119:165.

16. N’nga othenene nina izo yoi a-vi?

¹⁶ Ninoona ira njingari yapereso yavadhulu mlabela Yohova ninga “gulu” limbo-i lamabila losogoleliwa “nanamakumbiza mbo-i.” (Juwau 10:16) Buku la Gulu Lochita Chifuniro cha Mulungu vathakuru 165 linoonga ira: Vanosangalalanyo na vwelano wen’na munofwanela thuulela thitho ira mutokaana izo yokami-a ira vwelanuo wa-amale. E-no nidhilimbi-edhanga ona abali-u naarongoli-u ninga mwemo munaonela Yohova. Yohova unoniona ira othenene nili vixi a-ima apereso yavadhulu. N’nga nyo puemo munaonelanyo abali naarongolinyu? Yohova unoona thitho unosimba vyothene vinoiranyo voakami-a thitho voasamalela.—Mat. 10:42.

17. N’nga nili osikimiza narimi-u wethene iran’ni?

¹⁷ I-yo ninodhiveliwana makristau afwi-u thitho nili osikimiza narimi-u wethene ira kanina-elele bali-u yongo yonlundui-a venango yogwegweducha.’ (Aroma 14:13) Ninoaona abali naarongoli-u kala onikwaranya thitho ninofunechecha alavelela narima wethene. E-no kaninofwanela rumeli-a ira vyoira vyaatu enango ira viode nilundui-a. Malo mwaevyo dhoweni “nisazi-enga vyongo vyodhi-a rendele thitho vyonilimbi-a.”—Aroma 14:19.