VYAWA vyothene mabila ofuneechecha anoweleli-edhiwa pingoni mwaukristau. Kathuulelani “sangalala ulukulu unoireya dhulu” limboni mwamabilala lawelelamo! (Luka 15:7, 10) Akala ira muweleli-edhiwemo chineneeva pingoni, munosikimiza ira Yesu, angelo na mwinyaene Yohova tali osangalala maningi na mwasa ouonani ira mutowelela imbarimbarini. Mbwenye, vanoroma nyo manga okoka uxamwalinyu na Yohova, vanongokala vyorucha. Pyorucha vinango viivi vyevyo? Chini jinofuna ukami-ani ira muode limbana na vyoruchavyo?

Atu anjinji tawelela pingoni, anolimbana mathuulelo odaweya. Venango anooda dhivwa ninga vyali mwene Davide. Angalive ira atomala leveleliwa, liye aongile ira: “Vyodawa vyanga vitondiinjivela.” (Sal. 40:12; 65:3) Atu enango tawelela wa Yohova, anodhowanave limbana mathuulelo odhiomba landu, venango manyadho wa vyawa vinjinji. Isabelle, * akumi-iwile pingoni mwavyawa vyokwaranya 20, unoonga ira: “Wamiyo vyali vyorucha rumela ira Yohova angaodiile ndilevelela.” Mwakala osukwala, uxamwalinyu na Yohova unooda towa. (Sang. 24:10) Kamurumeli-e ira vyevyo viireye.

Atu enango anothuulela ira katinaode ira vilivyothene ira taode weleliedha uxamwaliwa na Yohova. Antoine adhaweleli-edhiwe aongile ira: “Vyakala ninga miyo ndate diwalelatu ira kristau unofwanela kala a-vi.” Na mwasa wa mathuulelo odhikumbanyedha ninga enao, atu enango katinodhivelela narima wethene vamabasa enango auzimu.

Mofwanafwani-a, indharandhara yanonga maningi vyongo vandhe. Mwinyaa vandhevo aing’ananga moda u-adhi liye na vyongo vyonongeyavyo, liye unokala ochenyelene na mwasa osukwala athuulela basa linofuna liye laba ira aviweleliedhe vinongeilevyo. Tisaasawa na mutu uirile vyodawa vilukulu vinononga vyongo vinjinji mathuuleloni mwee vauxamwalee na Yohova. Munooda kala okumbanya na basa linofwanela nyo laba ira muode weleli-edha uzimwinyu wan’nanyo voroma. Mbwenye nyo kamunofwanela limbana vyevyo vamwekene.

Yohova unoniitana ira: “Dhani, ira nidhatapanyeni.” (Esaya 1:18) Nyo mutovilimbi-edha ira ‘mutapanye  na Yohova vomali-a selu’ moi e-no, Yohova unoudhiveliwanani namwasa odhilimbi-edha winyu. Karomani kaathi nothuulela pama ira: Yohova unooda i-ndi-edha basa ifwanafwani-o inyu ira aode rumela mwakopolo vyonama vya Satana!—Sang. 27: 11.

Na mwasa owelela winyu muiimbarimbarini, e-no nyo mutomkwivela Yohova liye utolanyedha ira unodha ukwivelani. (Tiy. 4:8) Mbwenye kamunofwanela sangalala na mwasa oi atu atouonani ira mutowelela pingoni baasi. Nyo munofwanela limbi-a udhivelinyu na Babinyu na xamwalinyu, Yohova. N’nga munaviire a-vi vyevyo?

Muvilimbi-edhe kaana vifunelo vyoi munooda vikwakwaneli-edha. Muthuulelenga ira zati wairoromelo yinyu unodhowanave kala wen’neve—venango nionge ira, nyo munothuulelave vinofunji-a malemba vyofuneya vyoonga Yohova na vilanyedhile liye vyasogolo. Mbwenye thandha waingumiinyu yaukristau watofiya vokaiki-a ee-no munofuneela usaka-edha upya. Mwa vyongovyee pivi, nyo munofwanela laleela hora dhothene, fiya vamigumanoni no kalanga hora dhinjinji naabalinyu naarongolinyu airorolelo. Kaonani vifunelo vinofwanela nyo kaana.

Hora dhothene mutapanyenga na Yohova. Babinyu unoidhiwa ira na mwasa okaana mathuulelo odhiomba landu munofiedhela onanga kala vyorucha ira mulobele. (Aroma 8:26) Mbwenye munofwanela “vilela mwa malobelo,” mum’mwandelenga Yohova ira nyo munofunechecha ira mukale xamwalee. (Aroma 12:12) Andrej unothuulela voonga ira: “Miyo ndanodhivwa kala osimbwa dawa ndanokaana manyadho. Mbwenye fendo dhothene dhalobela miyo, mathuulelo enao anovunguwa. Ndanokkala warendele rimani.” Akala nyo kamunoidhiwa ira munalobele a-vi, munofwanela, funjedha voleri malemba a Masalimo 51 na 65 anooni-a malobelo airecha mwene Davide vya-iidhe liye vyodawa.

Mufunjedhenga Bibilya malambo othene. Vyevyo vinolimbi-a uxamwalinyu na udhivelinyu wa Yohova. (Sal. 19:7-11) Felipe uongile ira: “Na mwasa o-okaana thandha wa dambo na dambo wauzimu ofunjedhanga Bibilya, ali mwasa wandiva-idhe ira ndididile mwauzimu no ndiiri-a ira ndim’thakaleliwi-e Yohova. Miyo kandafuna welela okoka vyodawa vyevyo fendo yanambili, ndatosikimiza funjedha wavameka ira ikale yondibarela.” Nyo munooda irana saasawa. Akala kamunoidhiwa jofwanelela ira thangani-avo ira mbamakundo avi anofunanyo funjedhanga vamweka, muvepe xamwalinyu owarala mwauzimu.

Mumange upya uxamwalinyu waabali naarongolinyu. Atu enango awelele pingoni, anoova ira taawandamelenga abali ovanga ira anoanyanyuwela na mwasa wa vyairile aliwa ndulivyo. Larissa uongile ira: “Miyo ndanokaechana manyadho maningi. Ndavivwa ira ndatouirela vyongo mo-ororomeleya pingo. Mathuulelo enao atokalaove vira vyawa vinjinji.” Mukale osikimiza ira andimuwa apingoni naabali owarala mwauzimu tali okozeya ira taukami-eni limbi-a okoka uxamwalinyu na Yohova. (Onani kwadru loi “ N’nga andimuwa avapingoni anofwanela iran’ni?”) Aliwa mbosangalala na mwasa oi nyo mutowelela wa Yohova anofuna ira nyo mukale osangalala!—Sang. 17:17.

Nyo munakale a-vi o-indana na pingo? Vambo-i naabalinyu naarongolinyu, mukalenga vambo-i vamigumano yothene no dhowa fendo dhothene malaleela naaliwa. N’nga vyevyo vinaukami-eni a-vi? Felix uongile ira: “Pingo wanodedi-edha welelawanga pingonimo. Ndatozindiela ira abali naarongola tanoondidhiveliwana. Othenene tatondikami-a ira ndivionenga ira nditowelela banjani la Yohoova okoka, no viona ira nditoleveleliwa roma ira ndidhoweve vasogolo.”—Muone kwadru loi “ Chini inofwanela nyo irana?”

Vakondo inowananyo yofuna manga upya uxamwalinyu na Yohova, munofwanela ira musikimize ira Satana unongodhowanave thathamula “vindharandhara vya teya” ndhila munofunanyo wendanga; liye unofuna ira audidili-eni. (Luka 4:13) Moi ee-no, munofwanela kozeya pama no limbi-a iroromelo yinyu mwachineneeva e-ni.

Voonga vya mabilee, Yohova utolanyedha ira: “Ndinodha asakasaka mabila odimela, loundheya mwendo ndinodha limanga, lobulela ndinodha liili-a.” (Zakiy. 34:16) Yohova utoakami-a anamalabee anjinji aliwa oda kaana kopolo okoka mwauzimu. Mum’roromele ira liye thitho unofuna aukami-eni ira mumange okoka no limbi-a uxamwalinyu na liye.