1. Chini inododomi-a atu anjinji zelu?

MALAMBOANO utokala mareligiau manjinji anoonga ira mbamakristau oi anoonga ira anolambela Nlungu mwandhila inofuna liye. Pyovweya ira atu anjinji anododomeya zelu! Aliwa anodhifuka ira: “N’nga e-ni vatokala religiau limbo-i laimbarimbari venango othenene Nlungu unoadhiveliwana?” N’nga i-yo ananionga a-vi? N’nga i-yo nili osikimiza ira ninofunji-a imbarimbari? Nitokaana imbarimbari yoi Mboni dha Yohova anoomlambela Nlungu mwaimbarimbari ninga mwemo munofunela liye? Ninofuna nitapanyeni vyongo vinango vinanisikimizeli-e va mwasa wen’na.

2. Mwasiwa ngwan’ni Paulo atoonga madhu ali va lemba la 1 Atezalonika 1:5 ira liye atosikimizela ira utofwanya imbarimbari?

² Mwasiwa ngwan’ni rumiwi Paulo atosikimiza ira utofwanya imbarimbari? Rumiwi Paulo atosikimiza ira atofwanya imbarimbari. (Muleri 1 Atezalonika 1:5.) Sikimiza weu kwaakumele va mwasa osimbwa dhiveliwa baa-i kabe. Rumiwi Paulo ali mutu odhilimbi-edha funjedha madhu a Nlungu mopwasedha. Liye anorumela ira “malemba othene avudheleliwena Nlungu.” (2 Timo. 3:16) N’nga Paulo afunjilen’ni vaari vofunjedha madhu a Nlungu? Paulo atofwanya umboni o-oruni-eya oonga ira Yesu ali Mesiya olanyedhiwa. I-yavo vyevyo, anamasogolera amareligiau aayuda tasakunle vipwaza vyevyo. Mwakalelo lonama, aluwa taonga ira tanoira vyaarumile Nlungu, mbwenye tairanga vyongo vinoidanana liye. (Titu 1:16) Mbwenye Paulo kaali ninga aliwa; liye kaasakula ikumdu ya madhu a Nlungu ira arumele vinoonga aliwa. Liye ali okozeya ira afunji-e na vi-arela.”—Mayir. 20:27.

3. N’nga pyaimbarimbari ira ninofwanela kaana vyowakula vya vyofuka vyothene ira niroromele ira nitofwanya imbarimbari? (Muone kwadru loi “ Mabasa a Yohova na mathuulelwee mboinjiva vinjinji ira naaonge.’”)

³ Atu enango anothuulela ira religiau laimbarimbari linofwanela  odanga rumela vyofuka vyothene, thangani-avo na vyofuka vya-arumeliwile Bibilyani. N’nga vyevyo pyaimbarimbari? Onani ifwanafwani-o ya Paulo. Liye atoalimbi-a makristau ira tanofwanela ‘tadhiing’anele pama va vyongo vyothene,’ mbwenye liye thitho atorumela ira vatokala vyongo vinjinji vya-avwechecha liye. (1 Atez. 5:21) Liye alembile ira: “Nina dodoliso loyeveela, nino-indi-edha basa supeyo vofuna ona vyongo.” (1 Akor. 13:9, 12) Paulo kaavwechecha vyongo vyothene, na-iyene thitho nili e-no. Mbwenye Paulo atooda ona vifunelo vya Nlungu vyothene. Vyongo vyavwechecha liye, vyatokwakwana ira akaena umboni ovweya ira atofwanya imbarimbari!

4. Ninalimbi-e a-vi iroromelo yi-u yoi nitofwanya imbarimbari, n’nga chini vinofuna i-yo ona vyoonga vya makristau aimbarimbari?

⁴ Iyo ninofwanela limbi-a iroromelo yi-u yoi nitofwanya imbarimbari. Ndhila imbo-i yoirela vyevyo njowandela atu enango kalelo likaathei-idhe Yesu la moda olambela mwaimbarimbari unoriwa na Mboni dha Yohova malamboano. Wari mwa yofunjedha yei, ninodha ona ira makristau aimbarimbari 1) katinovolowela vya malobelo othangani-ana vifwano, 2) anolemeza dhina la Yohova, 3) anodhiveliwana imbarimbari na 4) anodhiveliwana mutu na fwee kumela vathi va rima.

5. Yesu unifunji-idhe moda wapama uuvi om’lambela Nlungu, n’nga i-yo ninasazi-e a-vi?

⁵ Yesu hora dhothene atokaana udhivela wa Nlungu. Ngumwasiwa, alobelelecha Yohova baa-i; romela angali dhulu thangani-avo vyali liye vailambo yavathi. (Luka 4:8) Yesu atoafunji-a anama-arelee ira tairenga saasawa na liye. Yesu na anama-arele ororomeleya chipo katina-indi-edhevo basa vyosema va lambela wiwa. Voi Nlungu ngu zimu vyosema vilivyothene  kavinam’mwandamele Yohova wesedha kala ninga liye! (Esaya 46:5) N’nga ndi-avi akala atu anosaka-edha vifwano vionganga kala vyochena no vikokorelanga? Va Malamulo Kumi oroma, Yohova uongile ira: “Kudhisaka-edhe vifwano vyogoba, venango vyifwanafwani-o vya dhulu, vya ramboni, venango vyavailambo yavathi, vyavathi va teya . . . Kuvikokorele.” (Ekis. 20:4, 5) Waatu anofuna m’dhiveliwi-a Nlungu, madhu enanala mbovweya pama.

6. Ngu moda uuvi ukaathei-idhe Yesu olambela uno-arela Mboni dha Yohova malamboano?

⁶ Alimbo idhiwa vistoriya vyaatu atokaana umboni oi makristau oroma tamlambelecha Nlungu m’mbo-i baa-i. Mofwanafwani-a, bukhu la Istoriya ya Igereja Yaukristau * linoonga ira makristau oroma “taviona kala vyothakala” vaikundu ya maonelo okaana vifwano valimburo lolambelavo (thapulela wi-u). Malamboano Mboni dha Yohova ano-arela moda m’mbo-ive ukaathei-iwile wa-arela makristau a zana loroma u-iidhe aliwa. I-yo kaninolobelela vifwano vyaatu “ochena mirima” venango vyaangelo. I-yo kaninolobelela vyothene vyevi thangani-avo Yesu. Thitho kaninoira jilijothene jooni-a ira ninolambela ilambo yi-u. Masiki viireye vyongo moda munofuneela aliwa, i-yo nili okozeya vwela madhu a Yesu oonga ira: “Ulam’bele Yohova, Nlungwao”—Mat. 4:10.

7. Ku-iyana uvi ulivo vaari va Mboni dha Yohova na magurupu enango amareligiau?

⁷ Malamboano atu anjinji anodhiveliwa a-rela andimuwa aigreja avweya anolemeziwa maningi naatu. Hora dhinango, simbwa wiwa adabwa va vinoira aliwa, anofiedhela alambela kala vifwano viwa. Atu anodhala vigrejanimwiwa, anogula mabukhwiwa, anovelela kobiri dhinjinji na mwasa wa vinoira andimuwiwao. Atu enango mwaaliwa anororomela vajongo jilijothene jinoonga aliwa. Pyorucha idhiwa akala ira aa-kale Yesu Kristu adha vaari viwa akala tangaodile mdabwa ninga munoadabwela aliwa andimuiwao! Mbwenye vo-iyani-ana aliwa, atu anomlambela Yohova mwaimbarimbari, katino-arela atu. Pyaimbarimbari ira aliwa anoalemeza atu a-eliwile kala anamaing’anela vari viwa, mbwenye hora dhothene, ninothuulela vifunji-idhe Yesu ira: “Nyo mwethene muli mubalini mwinyu.” (Mat. 23:8-10) I-yo kaninoadhi-a atu kala vifwano alambelanga, kavinobala akala aliwa mbaandimuwa amareligiau venango andale dhailambo. Thitho i-yo kaninoakami-a vyongo vyofuna aganyali-a aliwa. Malo mwa vyevyo, ninokala o-ovolowela vya ndale dhailambo vo-iyana na ilamboi. Mwa makalelo othene enala, pyovweya moda ukalele i-yo o-iyana na magulu enango anoonga ira mbamakristau.—Juwau 18:36.

8. N’nga ninoidhiwa a-vi ira Yohova unofuna ira dhinalee lilemeziwe no idhiweya?

⁸ Hora inango, Yesu atolobela ira: “Babani, lemezani dhina linyu.” Moi e-no mwinyaene Yohova atorumela lobelo lelo mogweli-a madhu kumela dhulu, lanyedhanga ira unodha lemeza dhinalee. (Juwau 12:28) Mwa basalee lothene lavailambo yavathi, Yesu atolemeza dhina la Babee. (Juwau 17:26) Ngumwasiwa ira, makristau aimbarimbari anodedi-edha ogaela dhina la Nlungu no lititimi-a vowandela atu enango ira taliidhiwe.

9. N’nga makristau oroma taoni-idhe a-vi ira tanolemeza dhina la Nlungu?

⁹ Vyawa zana vyoroma, vangavirile vyawa vyoyeva vanduli vokaathei-wa pingo waukristau, Yohova “atoing’ana waatu amaziza, ira atukulemo mwaaliwa atu oidhiweyana dhinalee”. (Mayir. 15:14) Makristau avahora yen’ne atodhivwa kala atu ofuneya na mwasa o-indi-edha basa dhina la Nlungu na voakami-a atu enango ira taliidhiwe. Aliwa tanoli-iidhi-edhela basa maningi dhina la Nlungulo volaleela na volemba  maguku a Bibilyani. * Aliwa tatooni-a ira tali mbumba yavwei-a dhina la Nlungu.—Mayir. 2:14, 21.

10. Nguumboni uvi unooni-a ira Mboni dha Yohova njimbumba ya dhina la Yohova?

¹⁰ N’nga Mboni dha Yohova ndimbumba ya dhina la Yohova? Kaonani umboni wa vyevyo. Malamboano andimuwa amareligiau anovilimbi-edha mwavyothene ira talokote dhina la Nlungu. Aluwa anofiedhela likumi-amo ma Bibilyani mwiwa; hora dhinango, anofiedhela kondi-a ira dhina la Nlungu la-aongiwenga vamigumanwiwa munogumaneecha aliwa ira talobelenga. * N’nga pyokaiki-a ira mbaa Mboni dha Yohova baa-i anolemeza dhina la Nlungu no lititimi-a ninga munofunela mwinyaa? Kavali gurupu n’nango linovwei-a dhina la Nlungu ninga munooirela Mboni dha Yohova! Ninooda onga ira, ninodhilimbi-edha ira niode lemeza no titimi-a dhina liva-iwile i-yo loi, Mboni dha Yoohova. (Esaya 43:10-12) I-yo nitokumi-a ma Bibilya okwaranya 240 Baibulo la Dziko Latsopano la Malemba Opatulika Lino-indi-edha basa dhina la Yohova mamburo mwakumi-iwilemo aliwa na alimbo thapulela Bibilya. Thitho ninokumi-a mabukhu okumela Bibilyani anovwei-a dhina la Yohova mu viongelo vyokwaranya 1.000!

11. N’nga makristau oroma taoni-a a-vi ira tanodhiveliwana imbarimbari?

¹¹ Yesu anodhiveliwana imbarimbari, venango nionge ira, imbarimbari ya Nlungu na vifunelovyee. Yesu anoira vyongo movwelana na imbarimbari yei thitho atowandela atua  ira tajiidhiwe pama. (Juwau 18:37) Anama-arela aimbarimbari a Yesu thitho tanodhiveliwana maningi imbarimbari. (Juwau 4:23, 24) Ngumwasiwa rumiwi Pedru aongile ira ukristau nji ‘ndhila yaimbarimbari.’ (2 Pe. 2:2) Udhivela wamakristau a zana loroma wana aliwa mwiimbarimbarini ali olimba oi aliwa tanofiedhela konda zelu dhilidhothene dhaatu enango tali olobela, vilemeelo viwa, maoneliwa a vyongo na zelu dhiwa dhakalecha dho-iyana na imbarimbari. (Akol. 2:8) Vyolandana na vyevyo vinoireya malamboano wamakristau aimbarimbari. Aliwa thitho anovilimbi-edha ira ‘tadhowenave wenda muimbarimbarini’, thitho aliwa anoira vyevyo kumela va vinororomela aliwa na mwendeliwa okumela m’madhu a Yohova.—3 Ju. 3, 4.

12. Njihora iivi vanofuneela chinja mavweelo apama, n’nga abali anosogolela anoira a-vi na mwasa waan’ni?

¹² Mboni dha Yohova katinoonga ira atokaana dodoliso lokwakwanela, venango loidhiwa vyothene, vya imbarimbari. Hora dhinango, aluwa anooda onga vyongo modaweya vyoonga vya lemba n’nango la Bibilyani venango fwanafwani-edha moda ova-a malangi-o a moda owendi-edha pingo. Vyevyo kavinofwanela nidabwi-a vyaireya. Bibilya linoonga mo-ovirela kundu ira dodoliso lokwakwanela linowenjedheya vira wa hora mwavang’ono vang’ono. (Akol. 1:9, 10) Yohova unomoneela imbarimbari mwa mwavang’ono vang’ono moi e-no, i-yo ninofwanela kala okozeya vodedi-edha ira luju lifiye vomoneya pama ira nione chena. (Sang. 4:18) Akala ira abali anoing’anela vari va pingo anozindiela ira vyongo vinango vinofwanela chinjiwa venango ira vatokala ndhila inango yofuna a-reliwa, mombaranya aliwa anoviira vyevyo. Vyevyo pyo-iyana vinoira mareligiau onama. Hora dhinjinji aliwa anochinja vyongo mofuna dhiveliwi-a anama-areliwa, venango mofuna vweya ilamboni. Mo-iyana na vyevyo, gulu la Yohova linochinja vyongo movwelana na vinaode akami-a ira taode kala vakwikwi na Nlungu na vo funa a-rela mopwasedha kalelo likaathei-iwele na Yesu lolambela waimbarimbari. (Tiy. 4:4) Machinjo anoira i-yo katinovwelana na makalelo amalamboano venango a-rela vyofuna vyaatu vinovepa aliwa, mbwenye na mwasa oi nitovwechecha pama mavweelo a Bibilyani. I-yo ninodhiveliwana maningi imbarimbari!—1 Atez. 2:3, 4.

13. Ngu kalelo uvi osimbwa ofuneya unooni-a makristau wenuo onosimbwa oneelana Mboni dha Yohova?

¹³ Makristau azana loroma tatokaana makalelo manjinji apama, mbwenye losimbwa funeya lali udhivela. Yesu aongile ira: “Mwa vyevyo atu othene anodha idhiwa ira muli anama-arelanga: Mwakaana udhivela mutu na fwee.” (Juwau 13:34, 35) Malamboano, Mboni dha Yohova vailambo yothene yavathi anooda ona udhivela wen’na na ivwelano. I-yo nili o-iyana na atu a mareligiau enango, nili atu a banja limbo-i lovwelana. Angalive ira ninokala vilambo vyo-iyan i-yana na viongelo na vilemeelo vyo-iyana, kavinonigaani-a. Ninooda ona umboni wa uwandhana na dhivelo leli vamigumanoni ming’ono ya visa na ya gawo. Kalelo leli linoniwenjedhela umboni oi lambela wi-u korumeliwana Yohova.

14. Movwelana na lemba la Akolose 3:12-14, tikalelo liivi lofuneya looni-edha udhivela okumela vathi varima wa mutu na fwee?

¹⁴ Bibilya linoniwandela ira: “Mukaengana udhivela mutu na fwee.” (1 Pe. 4:8) Moda ooni-edha udhivela ween’na kulevelelana mutu na fwee no dhowanave vilelana vyododoma vyaafwi-u. I-yo thitho ninooda saka hora yofuna oni-edha ira nili ova-a waabali-o apingoni no kala owaredhi-a waabali na arongola othene, thangani-avo anidawelenga. (Muleri Akolose 3:12-14.) Nadhiveliwangana wa mutu na fwee, ninooni-a ira nili makristau aimbarimbari.

15. Tikalelo liivi n’nango lino-arela i-yo li-iidhe makristau a vyawa vyoroma?

¹⁵ Vatokala vyongo vinango vinooni-a ira nino-arela kalelo likaathei-idhe Yesu lolambela la-arela makristau oroma. Mofwanafwani-a, gulu li-u litokaana anamaing’anela visa, andimuwa amipingoni na arumiwi okami-a—vyothene vyevi tisasaawa na ninga vyaireya vyawa zana loroma. (Afil. 1:1; Titu 1:5) I-yavo vyevyo, maonelwi-u va mwasa waatu o-iyana vyano na thelana moda o-indi-edha basa sangiri na moda ovunela pingo waatu anoira vyodawa ta-achinyuwanga vyothene pyokumela mwa moda wa kalelo lakaathei-idhe Yesu lawendela makristau oroma.—Mayir. 15:28, 29; 1 Akor. 5:11-13; 6:9, 10; Aeb. 13:4.

16. Ninofunjedhavon’ni vinoongiwa va lemba la Aefeso 4:4-6?

¹⁶ Yesu aongile ira atu anjinji tangadhaongile ira mbaanama-arele, mbwenye liye atodhowanane onga ira kai othene afuna dhakala aimbarimabri. (Mat. 7:21-23) Bibilya thitho linoniwandela ira malambo omari-a atu anjinji anodha fiya na “maoneelo odhivelela wa Nlungu.” (2 Timo. 3:1, 5) Mbwenye Bibilya thitho linoonga mo-ovira kundu voonga ira vali “iroromelo imbo-i” inorumeliwa vamethoni va Nlungu.—Muleri Aefeso 4:4-6.

17. Ti gurupu liivi lino-arela Yesu linoira ikundu yolambela umbo-i waimbarimbari malamboano?

¹⁷ Ti gurupu liivi linoira basa lolambela waimbarimbari umbo-ive malamboano? I-yo ninoona umboni wavyevyo. Nitotapanyani moda m’mbo-i wakaathei-dhe Yesu, waafunji-idhe liye anama-arelee thitho wa-arela makristau a vyawa zana vyoroma. Yowakula chijimbo-i yoi—mbaa Mboni dha Yohova, njingari ilukulu kala ikundu ya mbumba ya Nlungu no idhiwa imbarimbari yoonga vya liye na vifunelo vyee! Mutu uliweethene wa i-yo unofwanela sikimiza ira utoji-indeda imbarimbari mwakopolo.