La bona nutizia che la persones vivrà per for sun la tiera, ie da abiné tla Bibia (Salm 37:29). La Bibia ie na cumpëida de 66 pitli libri. Die la ova lasceda scrì da zirca 40 scritëures. Dan zirca 3.500 ani ova Mosé scrit i prim cin libri y l apostul Giuani ova scrit l ultimo dan plu de 1.900 ani. De chi fova pa i pensieres che i scritëures dla Bibia ova scrit? Ëi ne n’ova nia scrit si pensieres, ma chëi de Die. Ël ova fat al savëi si pensieres ai scritëures tres si spirt sant (2 Samuel 23:2, NM). Per chësta rejon possen dì che Iehova ie l Autor dla Bibia. (Lijëde 2 Timótee 3:16; 2 Piere 1:20, 21.)

Cialëde l video Chi ie pa l Autor dla Bibia?

La Bibia muessa unì da Die ajache la dij avisa danora l daunì, y chësc ie zeche che la persona ne po’ nia fé (Giojué 21:45). Mé Die, l Uniputënt, po’ udëi danora l daunì dla umanità. (Lijëde Isaia 42:9; 55:11.)

N se aspieta che n liber che vën da Die sibe zeche de unich y la Bibia ie propi nscila. Miliardes de copies ie unides dates ora te cënc de rujenedes. Nce sce la ie n liber antich, iela a una cun la scienza. La ie unida scrita da 40 persones che ne se à mei cuntradì una cun l’autra. * Te duta la Bibia vën auzà ora l amor de Die y la po’ miuré la vita dla persones nce al didancuei. Dut chësc fej udëi ite a milions de persones che la Bibia ie la Parola de Die. (Lijëde 1 Tessalonizésc 2:13.)

Cialëde l video Ciuldì pudons’a ti crëier ala Bibia?

N argumënt prinzipel dla Bibia ie la bona nutizia che Die mpermët n daunì de marueia per l’umanità. La Scritures spiega coche bele tl scumenciamënt dla storia fova jita perduda la puscibltà de viver per for sun na tiera da paravis y te ce maniera che l paravis unirà inò fat da nuef. (Lijëde Revelazion 21:4, 5.)

La Parola de Die cuntën nce leges, regules de vita y de bon cunsëies. Mplu vëniel cuntà coche Die à tratà cun la persones tl tëmp passà. Daviadechël possen cunëscer la persunalità de Die y capì co deventé si amich. (Lijëde Salm 19:8, 12 [19:7, 11, NM]; Iacun 2:23; 4:8.)

Chësta brosciura Ve juderà a capì la Bibia adurvan la medema maniera de nsenië de Gejù. Ël zitova pec dla Bibia y i stlariva acioche chëi che scutova su pudova “ntënder la Scritures”. (Lijëde Luca 24:27, 45.)

Puecia cosses po’ tan apasciuné sciche la bona nutizia che nes dà Die. Vel’ un ne n’ie nia nteressà y d’autri se dessëna monce. Ma ne lascëve nia sciautrì. Ala fin dla finedes depënd la speranza de viver per for dal cunëscer miec Die. (Lijëde Giuani 17:3.)