LEZION 2
Chi ie pa Die?
1. Chi ie pa Die y ciuldì dassessans’a l aduré?
Die ie l Criator de uni cossa. Ël ne n’à no abù n scumenciamënt y ne n’arà nce no na fin (Salm 90:2). Da d’ël vën la bona nutizia scrita tla Bibia (1 Timótee 1:11). Dal mumënt che Die nes à dat la vita, dassessans aduré mé ël. (Lijëde Revelazion 4:11.)
2. Co ie pa Die?
Deguna persona ne n’à mei udù Die davia che ël ie n spirt, na majera forma de vita n cunfront ala persones sun la tiera (1 Giuani 4:12; Giuani 4:24). Purempò pudons cunëscer la persunalità de Die usservan la marueies de si criazion. Per fé vel’ ejëmpl, dala truepa sortes de fruc y ciofs pudons udëi si gran amor y sapienza. Sëuraprò desmostra la grandëza dl univiers si putënza. (Lijëde Romans 1:20.)
Ma pudon cunëscer mo miec Die lijan la Bibia. La nes dij chël che ti plej y chël che ne ti plej nia, coche ël trata la persones y ce reazion che ël à te uni sort de situazion. (Lijëde Salm 103:7-10.)
3. À pa Die n inuem?
Gejù ova dit: “Nosc Pere, che t’ies tl ciel, l sibe santificà ti inuem” (Mateo 6:9). Die à truep tituli, ma ël à mé un n inuem. Te uni rujeneda vëniel pronunzià a n’autra maniera. Tl ladin de Gherdëina adroven sibe “Iahwe” che “Iehova” y “Geova”. (Lijëde Salm 83:19 [83:18, NM].)
Te truepa Bibies ie l inuem de Die unì mudà ora cun tituli sciche “Seniëur” o “Die”. Ma ntlëuta, canche fova unida scrita la Bibia, fova l inuem de Die da abiné laite ntëur a 7.000 iedesc. Gejù fajova cunëscer chësc inuem canche ël rujenova de Die cun la jënt. (Lijëde Giuani 17:26; Exodus 3:14 y nota njunteda.)
Cialëde l video À pa Die n inuem?
4. Se nteressea pa Iehova de nëus?
Sciche chësc pere plën d’amor, cëla Die sun nëus che la nes vede bona giut alalongia
Ie pa la truepa suferënzes na desmustrazion che Iehova Die ne se nteressea nia de nëus? Vel’ un miena che ël nes fej patì per nes mëter ala proa, ma chësc ne stimenea nia. (Lijëde Iacun 1:13.)
Die nes à dat la lidëza de ulentà y chësc nes dà unëur. Son scialdi cuntënc che Die nes dà la puscibltà de dezider sce ulon l servì o no (Giojué 24:15). Truepa persones fej da gën dl mel a d’autri y perchël iel for plu y plu suferënzes. A Iehova ti mueiela “dal sot dl cuer” a udëi chësta ngiustizies. (Lijëde Genesis 6:5, 6.)
A Iehova ti sta scialdi a cuer uniun de nëus y ël uel che pudon se goder la vita. Tosc tuleral demez duta la suferënzes y duc chëi che fej l mel. Ma per ntant àl de bona rejons per lascé pro i patimënc. Tla lezion 8 uniran sëura ciunes che ie chësta rejons. (Lijëde 2 Piere 2:9; 3:7, 13.)
5. Co pudons’a ti ruvé plu daujin a Die?
Iehova nes nvieia a ti ruvé plu daujin tres la priera, davia che ël se nteressea de uniun de nëus (Salm 65:3 [65:2, NM]; 145:18). Ël nes perdona gën. Die aprijea canche se sfurzon de ti plajëi, nce sce fajon suvënz fai. Scebën che son piciadëures, pudons avëi n liam sterch cun ël. (Lijëde Salm 103:12-14; Iacun 4:8.)
Davia che ël nes à dat la vita, dassessans amé Iehova plu de uni autra cossa (Merch 12:30). Chëi che se sforza de cunëscer miec Die y fej chël che ël à gën, mostra amor per Die y ti ruverà for plu daujin. (Lijëde 1 Timótee 2:4; 1 Giuani 5:3.)
