LEZION 4
Chi ie pa Gejù Crist?
1. Co ova pa scumencià la vita de Gejù?
Ciuna cualiteies de Gejù fajova pa de d’ël na persona da ulëi ti sté gën daujin? (MATEO 11:29; MERCH 10:13-16)
A defrënza de uni autra persona umana, vivova Gejù sciche spirt tl ciel dan unì sun la tiera (Giuani 8:23). Ël fova stat la prima criazion de Die y ova judà pea a crië duta l’autra cosses. Davia che Gejù fova stat l sëul a vester crià diretamënter da Die, vëniel tlamà “sëul Fi dl Pere” (Giuani 1:14). Ël fova l Portausc de Die, y perchël vëniel nce tlamà “la Parola”. (Lijëde Proverbs 8:22, 23, 30; Colossésc 1:15, 16.)
2. Ciuldì fova pa Gejù unit sun la tiera?
Die ova mandà si Fi dal ciel sun la tiera metan si vita tl grëm dla vergin judiera Maria. Daviadechël ne n’ova Gejù degun pere uman (Luca 1:30-35). Ël fova unit sun la tiera (1) per nsenië l’aurità che reverda Die, (2) per nes mustré cun si ejëmpl co fé la ulentà de Die nce canche son tla deficulteies y (3) per dé ca si vita sciche “priesc de lujonga” o rescat. (Lijëde Merch 10:45.)
3. Ciuldì adurvons’a n rescat?
N rescat ie l priesc che vën paià per delibré na persona dala mort (Exodus 21:29, 30, NM). Tl scumenciamënt ne fova la ntenzion de Die nia che la persones deventëssa vedles y murissa. Co savons’a chësc? Die ova dit a Adàm, la prima persona, che l fossa mort sce l ne n’ëssa nia ulgà, o coche la Bibia dij, sce l ëssa fat picià. Chësc uel dì che sce Adàm ne n’ëssa nia fat picià, ne fossel mei mort (Genesis 2:16, 17; 5:5). Aldò dla Bibia ie tres Adàm “l picià ruvà sun chësc mond y tres l picià la mort”. Ël à lascià coche arpejon a duc si descendënc l picià y sciche cunseguënza la mort. Perchël ons de bujën de n rescat che nes delibrea dala mort. (Lijëde Romans 5:12; 6:23.)
Chi pudova pa paië l rescat per nes delibré dala mort? Canche murion, paions la pëina mé per nosc picëi. Deguna persona imperfeta ne po’ lujé ju n’autra. (Lijëde Salm 49:8-10 [49:7-9, NM].)
4. Ciuldì ie pa Gejù mort?
Al incontra de nëus, fova Gejù perfet. Ël ne messova nia murì per si picëi davia che ël ne n’ova fat deguni. Cun si mort ovel paià ju i picëi di autri. Die ova desmustrà n amor straurdiner per l’umanità lascian pro che si Fi murissa per duc nëus. Nce Gejù ova desmustrà amor per nëus ulgan a si Pere y dajan ca si vita per nosc picëi. (Lijëde Giuani 3:16; Romans 5:18, 19.)
Cialëde l video Ciuldì ie pa Gejù mort?
5. Cie fej pa Gejù śën?
Canche Gejù fova sun la tiera, varivel i amalei, l ressuscitova i morc y alesirova la suferënzes dla persones. Nsci ovel desmustrà chël che ël fajerà tl daunì per duta l’umanità che olga a Die (Mateo 15:30, 31; Giuani 5:28). Do si mort fova Gejù unit ressuscità da Die sciche persona spirituela (1 Piere 3:18). Ël ova aspità a man drëta de Die nchin che Iehova ti ova dat l’autorità de guverné sëura duta la tiera sciche Rë (Ebrei 10:12, 13). Śën guvierna Gejù tl ciel y la persones che va do a si ejëmpl fej cunëscer chësta bona nuvela sëura dut l mond. (Lijëde Daniel 7:13, 14; Mateo 24:14.)
Tosc adurverà Gejù si putënza da Rë per tò demez duta la suferënzes y chëi che n’ie de gauja. Duc chëi che desmostra fede te Gejù fajan chël che ël dij, puderà viver sun na tiera da paravis. (Lijëde Salm 37:9-11.)
