LEZION 7
Cie ie pa l Rëni de Die?
1. Cie ie pa l Rëni de Die?
Ciuldì ie pa Gejù l miëur Rë? (MERCH 1:40-42)
L Rëni de Die ie n guviern tl ciel. L sustituirà duc i autri guvierns y fajerà a na maniera che la ulentà de Die sibe fata sciche tl ciel nsci sun la tiera. L Rëni de Die realiserà tosc l dejidere dl’umanità de avëi n bon guviern y lierà adum duta la jënt che viv sun la tiera. Ne n’ie pa chësta nia na bona nutizia? (Lijëde Daniel 2:44; Mateo 6:9, 10; 24:14.)
Pra n rëni toca nce n rë. Daviadechël à Iehova dat a si Fi, Gejù Crist, la ncëria de deventé Rë de si Rëni. (Lijëde Revelazion 11:15.)
Cialëde l video Cie ie pa l Rëni de Die?
2. Ciuldì ie pa Gejù l miëur Rë?
L Fi de Die ie l miëur Rë davia che l ie de bon cuer y nce ressolut a fé for chël che ie drët (Mateo 11:28-30). Ël à nce putënza assé per judé la persones canche ël guvernerà dal ciel sëura duta la tiera. Do si ressurezion fovel jit tl ciel y ova aspità a man drëta de Die (Ebrei 10:12, 13). Ala fin ti ova Die dat la putestà per scumencé a guverné. (Lijëde Daniel 7:13, 14.)
3. Chi guvernerà pa cun Gejù?
Na grupa de ëi y ëiles fediei, che la Bibia tlama “sanc”, guvernerà cun Gejù tl ciel (Daniel 7:27). I prims a vester cric ora fova i fediei apostuli de Gejù. Iehova ie jit inant nchina śën a crì ora mo d’autri che possa fé pert de chisc sanc. Chisc unirà, sciche Gejù, ressuscitei cun n corp spirituel. (Lijëde Giuani 14:1-3; 1 Corìntesc 15:42-44.)
Tan de persones ruva pa tl ciel? Gejù ova rujenà de n “pitl pastrëc” (Luca 12:32). Ala fin saral de ndut 144.000 che renierà cun Gejù dal ciel sun la tiera. (Lijëde Revelazion 14:1.)
4. Cie fova pa unì dant canche Gejù ova scumencià a guverné?
L Rëni de Die ova scumencià a guverné tl 1914. * La prima cossa che Gejù ova fat sciche Rë fova chëla de rauscé ju dal ciel Satan y si demons. Cun na gran rabia ados, ova Satan scumencià a gaujé de gran problems sun duta la tiera (Revelazion 12:7-10, 12). Da ntlëuta incà ie la deficulteies deventedes for majeres. Vieres, ciaresties, epidemies y tremoc fej pert dl “sëni” che desmostra che l Rëni sëurantulerà prësc la putestà sëura duta la tiera. (Lijëde Luca 21:7, 10, 11, 31.)
5. Cie vën pa arjont tres l Rëni de Die?
Bele śën se cruzia l Rëni de Die de abiné adum “na gran schiera” de persones da duta la nazions tres n’opra de perdicazion mundiela. Milions de persones omles se sotmët a Gejù. Les unirà stravardedes canche l Rëni de Die desdrujerà l sistem plën de riedà de al didancuei. Duc chëi che uel avëi la benedescions che chësc Rëni purterà, muessa se sfurzé bele da śën de ulghé a Gejù. (Lijëde Revelazion 7:9, 14, 16, 17.)
Te n tëmp de 1.000 ani realiserà l Rëni chël che Die se ova tëut dant dal scumenciamënt per l’umanità. Duta la tiera deventerà n paravis. Ala fin sëurandarà Gejù inò l Rëni a si Pere (1 Corìntesc 15:24-26). Ve savëssa pa bel a rujené cun zachei che cunescëis dl Rëni de Die? (Lijëde Salm 37:10, 11, 29.)
^ par. 6 Tla nrescida 22 dl liber Cie nsënia pa la Bibia? (nia despunibl per ladin de Gherdëina) vëniel spiegà coche la profezies bibliches ndichea l ann 1914.
